سلام يالربع

كل عام وانتو بخير >>احس قد لي منكم

في ذمتكم اشتقتوا لي

أسبوع كامل أطبخ في ذا الموضوع

حطيت فيه كل شي أعرفه في الحياة الفانية >>لازم يذكرهم بالآخرة

مبروك الفوز

مدخل
بين شوقي وعزة النفس وتفسير الكرامة
بين فلسفة الجروح وشرح حال الوالهين

وش ذا الأب الجديد!!!

قسم بالله ابوي مصفي ، محشش ، رايح فيها ، احس توه يحس بمعنى الابوه ، جديد عالشغله ، صحيح ان معه 16 ولد غيري ، لكن شكله معي شعر بمعنى ان يكون اباً لرجل عظيم ، المهم الشيبه ذا من يوم صار ابوي وهو مشغلني ، اقلقني بكلمه ياولدي ، ياولدي تعال ياولدي روح ياولدي جيب ، وربي اشتقت لكلمه تعال ياعاق تعال يافاسق ، روح ياسربوت ، والله ما تفلح ياداشر ، يا اصيع اخوانك ، يالغراب الاعرج ، بالبطه السوداء ،يالبعير الاجرب ، مصطلحات اشتقت اليها كثيرا ، ودي اقوله ابيك ترجع زي زمان عمي والا مديري مو ابوي ، صراحه ما زبط لك الدور انك تكون اب ، وما قدرت اصارحه الين الله فرجها من عنده وصار اللي صار ...
وش صار ؟؟؟




ابد ياطوال العمار ، الرجل بعد الفجر جلس وعليها علامات الهم والاغتمام ، ويحتريني اقوله وش فيك طال عمرك ، وانا لعانه ما سالته ، المهم يوم قمت ابغى ارقد قال تعال ياولدي ابيك في كلام كبير ، قلت سم يا بابا ، قال حلمت بك حلم مفجع وانا خايف ، قلت اييييييه اسمع يابو مانع " اذا انت تشوف نفسك كبير وعظيم الشان انك تسوي فيها النبي ابراهيم على غفله فتراني احقر من اني اكون في مصاف النبي اسماعيل ، والله لو تشوف في المنام اني اعطيك ريال ما عطيتك ياه ، تبي تذبحني اللحين؟؟ لا وربي ما يحل لك دمي ، ذبح منت بذابحني ، وماني قايلك يا ابت افعل ما تؤمر ستجدني انشالله من الصابرين ، انا مو من الصابرين ، انا عبد مالي خامته ، ذبح والله ما تذبحني لو ادري ان في ذبحك لي مدخالي الجنه ، تبغى تذبح وفيك خرمة دم روح سوق الغنم ربي مكثر الذبايح هناك اذبحها كلها ، لكن علي الحرام ما تقربني ، قول انك طامع في ابوتي لاجل تذبحني طلع الاحقاد الدفينه ، ورب السما والقاع ورب الهوى والنار ما تقرب وريدي ولا حلقي وماني مسلم لك رقبتي تذبحني، اغسل يدك ذبح وربي ما تذبحني " المهم هو كل شوي يبي يرد وانا ما عطيته فرصه في الاخير عصب وقال " من قال اني باذبحك انت ووجهك ماني بذابحك ومن اطرى الذبح ياحمار "، قلت يعني حلمك ما فيه ذبح وسلخ ، قال لا ، قلت ايه اجل هات حلمك الله يسلمك ، قال " شفتك واقف تضحك وحولك مية حية سوداء وزرقاء وخضراء ورماديه ، وانت كل ما زدت في ضحكك التفوا حولك اكثر وانت ما تبالي بهم وانا مفتزع من ذا الحلم " ، قلت يارجال شكلك أكلت ام اند امز قبل لا ترقد ولاعبه فيك الالوان، ورحت من عنده وتركته في همه ، وناسه فيه ناس تهتم عشانك ...
المهم يوم فكرت في الموضوع فسرت الحلم على مزاجي وطلعت بالتفسير الاتي : (الحيايا اللي كانت حولي هم اعضاء المنتدى والالوان على حسب المركز يعني الاخضر مشرف والاسود الجحلط اللي ما فعلوا يوزراتهم والزرق ذولا المترززين يعين انهم والرماديه الاستشاريين ، وضحكي علامه لاني رهيب وكل ما ضحكت انقهرتوا لاني رهيب بس )


حيوانات ترعبني

لا شك ان رحلتي مع الحيوانات كانت مفعمه بالظلم من قبلي ، لكن هذا ما يمنع اني مظلوم من قبل حيوانات اخرى تفزعني كثيرا وتدب الرعب في قلبي المرهف ، وانا ما اخاف بالعاده من حيوان مطلقا ، لكن اخاف منه في حالات معينه ، وهذا ما يمنع اني اخاف جدا من بعض الحيوانات مطقا وارتعب منها احس عندي فوبيا ملعونه جدف ما اطيق اناظرها وتهلوس بي ، خلوني انور ابصاركم على مواطن الجبن في شخصيتي الشجاعه ....


الدجاجة الحابسة



هذا المصطلح يطلق على دجاجه ترقد على مجموعه بيض وتحبس عليه لين يفقس ، في هذي الحاله تكون الدجاجه اشرس من اسد ، ابن امه اللي يقرب منها تلعن ابو من جابه ، والديك يجيب لها الزاد لحد بيتها ، ومعروف مدة حضانه البيض عن الدجاج واحد وعشرين يوم لا زيادة ولا نقصان ، ولاني ملقوف منذ الصغر كان التحدي الاكبر اني اسرق بيضه من تحت دجاجه ، المهم اني خرجت فجرا عازم على الامر وجلست الى الضحى انتظر بنت الكلب تقوم من على البيض وما قامت ، والديك الرخمه مسوي فيها هوم ديلفري ، ويقولها لا تتعبين نفسك ياعمري يا ام عيالي ومن هالكلام ، المهم جلست احتري الدجاجه تغزل لها صوف والا تسولف مع جاراتها زي الكراتين ، وابد والله عينها في عيني ، قلت عز الله انها نشبه ذي الدجاجه ومالي الا حل واحد اجيها بعد المغرب ، يمكن تنام ، وانا والله اللي ما صدقت الشمس تغرب واطلع لها ليلا قبل العشاء واتسلل وادخل يدي برفق تحتها ابي اسرق ، والله يالربع ما بقى في يدي ملم متر مربع سليم ، حشى ذيب مو دجاجه ، والدجاج الباقيات جايين فزعه مسوين فيها ثورة تحرير والديك على رقبتي ينقر في مكان غبي ، المهم اني اغبى منهم وما فكيت البيضه ومتجود فيها وفي الاخير من القهر فقستها قدامهم وهجيت ، وما زد رحت صوبهم قلت لا يكونون حاقدين علي الجماعه والا شي ويطالبوني بدم بيضتهم وتركتهم ومصدق من جد انهم حاقدين ، المهم يالربع نصيحه لا تنابش دجاجه حابسه ابد ....



الجعفية وحيدة القرن



الجعفيه يعني خنفس ، وانا كنت في صغري استلذ بطعم الخنافس ، واقرمشها ليل ونهار ، واحس اني فعلا في افتراسها عرضتها للانقراض ، لكن مو كل خفنس استلذه ،عندي ذوق مرهف، يعني في خنفس اسمه وحيد القرن يجيك معه قرن اكبر ما لله في جبهته ، رزين هادي واثق الخطوة يمشي خنفسا ، المهم الحشرة ذي كانت مسببه له رعب ملعون جدف ، اذا شفتها بين الحشرات كنسلت وجبتي ذاك اليوم ونمت جوعان ، وسبب خوفي الشديد منها اني وانا صغير كان معي كرتون فاضي ، وكنت حاط فيه فرشه صغيره من داخل ، وحاط مويه ورز ، واي حشرة اشوفها احطها في الكرتون ، المهم اني حطيت فيها مليون حشره ، نمل وصراصير وعناكب وخنافس بالوان واشكال متعددة ، ويرقات وديدان وكل نوع من طائفة المفصليات وعديدة الارجل ، المهم اني لقيت وحيد القرن ذا وحطيته معهم ، وهو نفسياته زفت ، ويتنرفز بسرعه ، وما احد يتلقف عليه ابد ، لكن احد العناكب المهايطيه جلس ينط عليه ، ويقول يالربع لا يفوتكم المفطح ، المهم بكل هدوء طلع عليه ابو قرن وغرس قرنه في راس العنكبوت وجاب خبره في شوي ، المهم بعدها تحول على باقي الحشرات وافناهم حتى ابناء عمومته ، ما خلا احد ما قتله العبد ، إباده جماعيه ، عاد انا عصبت وقلت لازم احقق العداله واحمي شعبي العظيم ، وجيت ابغى امسكه فغرس قرنه في ابهامي ووخرته فبقى راسه في اصبعي ، وانواع الصياح والنياح ، انهبلت عليهم واقول لهم وخروه عني ، وامي تقول ما في النص الا جعفيه وراك قالب الدنيا ، وانا اقول بلاك ما شفتي سواته في الكرتون ، المهم بعد عمليات جرحيه وتجميليه واعشاب وطقوس وبخور وشعوذة طلعوا راسه من اصبعي ونزفت قطرتين دم ، وقبل ارقد قالت لي عمتي قصه عن صبي كان يعذب الحشرات وان الحشرات صارت كبيره اكبر منه وانتقمت منه ، طبعا خيالي ما تخيل الا ابو قرن وهو كبير ، وقمت اتخيله يدخل قرنه في عيني ، ويضحك زي ضحكت ابو جهل ويقول " لقد وقعت في شر اعمالك ايها البزر الشقي ، باللات والعزى لالعن شكلك اليوم وافقع وجهك لين تعرف ان الله حق " ، وقمت فزعا من خيالي وقلت كلمة عبد الحليم حافظ الشهيره " توبه توبه توبه ان كنت هاحبك تاني توبه بس قابلني وتبقى ذي اخر نوبه وبعدها توبه " ....




البعير




نعم انا بدوي واحب البل بس اكره شي اسمه بعير ، الحيوان هذا حيوووووووااااااان فعلا ، ما ادناه ، اموت واعشق واهيم بالنوق ، بس البعارين ما ادانيها ، عندنا يمكن فوق 300 راس ، شخصيا امتلك منها حوالي الـ30 راس من الابل ، وحافظها باسمائها ، واغلاهم على قلبي " المياسه" ، لما اجي اشوف البل اقول للسوداني وخر البعارين بعيد لين اتفقد النوق ، ويقول (واللهي انتا غريب يازول ، العرب والعروبه في دمك ، لكيين ما تحبا الجمال خالص ) قلت اييه ياعصمان بلاك ما تدري وش صار لي منها وانا صغير قال وش صار لك منها قلت وانا صغير يمكن 10 سنوات ، كنت مع عمي في احد الشعاب في شمال الوادي طالعين نتفقد البل ، المهم ان المدعو( طوخان) وهو بعير عمي المقرب كان يرعي في امان الله ، وكنت امارس هوايه رجم البعير انا وولد عمي ، وكنت ماهر في التصويب ارجم في المكان اللي ابيه وتصيب ، وما تخطي رجمتي ابد ، وولد عمي كان يرجم البعير في رجوله والا في سنامه يعني ما تضر ، وانا ارجمه في راسه وعينه واماكن حساسة اخرى ، المهم شكلي زودتها مع طويل العمر وغير مكانه وانا الاحقه الين رجمته في خشمه بعدها تنرفز مره ، وتلطم بغترته وشمر ثوبه ولحقني ، والله اني كنت اظن نفسي اسرع من الريح ، لكن ملعون الجدف طلع اسرع مني ، وشكله غبي وهو يجري مرعب براطمه تتصافق ويزبد ، وانا على قولة ابو نوره " اصيح صياح ما حي درابي مصيبه وان حكيت اكبر مصيبه" وعمي على باله اني العب مع البعير ، والحقيقه اني كنت العب بس طوخان زعول وحساس وخذها جد الله يهداه ، المهم استفزع ولا حد فزع ونفسي تقطع واقول لعمي "عماااااااااااااه " مسوي فيها الهجرس يوم يستفزع بالزير ، المهم انه حشرني وصار من وراي الوادي وهو من قدامي وتذكرت طارق بن زياد يوم يقول لجنوده " البحر من خلفكم والعدو من امامكم " ، البلا والله لاني طارق ولا هم يحزنون ، وهو بدا يسوي حركات الافلام ويتقدم خطوه خطوه ويقول " ليه ترجم ياورع ، تبغاني الحين العن شكلك ؟؟ اوريك ان الرجمه توجع ؟؟ودك تجرب؟؟ " المهم وانا اتخيل هذا الحوار من براطم البعير المزبده كنت ارد عليه في الحقيقه واقول " اخر مره ياطوخان علي الحرام ما عيدها تكفى طالبك " المهم يوم هم بي ناظرني شوي ثم ادبر وما سوى بي شي فقلت في خاطري هي حدى ثنين يا انه خاف مني وهذا مستبعد او انه حسبها صح وقال ليه اضيع زهرة شبابي عشان بزر ، من يومها وانا وربي افتزع خوفا من أي بعير لكن النوق يالبى قلوبهن احبهن عرفت ياعصمان السالفه ؟؟


الفار




هذا من الحيوانات اللي اكرها مطلقا واخاف منها كذا من الله ، يعني ما جاني منها لا شر ولا موقف بس بالفطره ما ادانيها ، وعندي فوبيا بنت ستين الف كلب منه ، عندي هو الاسد سوى ، بس الحجم غير ، وانا مفضوح منه ذا الفار ، يسموني اخواني الفيل لاني اهابه كثير ، ومره واحد من اخواني جاب فار لعبه اسود كنه مطاط ورماه فوقي وعلى طول بمجرد انه لامسني اغمي علي ، اخوي خاف وقال لا يكون عنده القلب والا شي ، المهم بعد ما سطرني اخوي بمليون كف ونثر علي كل المويه اللي في البيئه المحيطه قمت من فزعتي ولعنت جدفه بس اتفقنا على ستر الموضوع بيني وبينه وهو الحين سر بينا يالربع ، المهم من المواقف الغبيه والمحرجه اللي انحطيت فيها مع هذا الحيوان المرعب ، يوم كنت في السنه الموحده للكليات الصحيه في الملك سعود ، كان عندنا في الترم الثاني مادة 106 حين ، المهم هذي المادة فيها عملي والعملي حقها فيه تشريح فيران ، عاد انا يوم دريت ان الدعوه فيران قلت في خاطري العملي عليه 30 درجه وفدوه ما ابيها باشد حيلي في النظري ، لكن قالوا لي اللي ما يحظر عملي ما ينجح المهم اني رحت بعد ما قريت كل دعاء وكل ايه وكل تقرب وكل مناجاة وكل إبتهاله في الدين الاسلامي والاديان السماوية الاخرى ، ودخلت على الدكتور وكان يمني حبيب وقلت له صل على محمد يابن العم ، وجلست اهايط عليه واقول انك من قبيله في اليمن معروفه بالفزعه والنجده والشجاعه ومن هالكلام وانا خوالي من اليمن وبينا دم ونسب وعيش وملح وبصل ، واشوف الهياط نفع معه وقال لي سم امر وش تبي ، قلت له الفار ذا ما ابغى المسه ولا اشوفه وما ابغى منك الا 15 درجه وبيض الله وجهك بعدها قال ابشر بعزك ما طلبت شي بس لازم تحضر واذا جاء وقت التشريح اخرج بدون ما تستاذن المهم مشى الحال الين جاء الاختبار النهائي وكان المراقب باكستاني لو هايطت عليه وسلك له من اليوم الى بكره ما نفع ، المهم قال عبد العزيز اليامي قلت سم قال "ميل والا فيميل " يعني ذكر والا انثى قلت ورى ما نشرح ضفادع زي حقين الزراعه ، قال اخلص قلت فيميل وش بيني وبين الرجال المحاربه حطني اصحاب الخدور المرهفات ، وانا غبي لان الشباب يختارون الذكور لان اوردتها ما تنقطع بسرعه والاناث تتبهذل فيها ، المهم هو مخدرها وعطاني ياها في صحن ازرق ما انسى لونه ، وعطاني دبابيس وقال دبسها في الصحن وتوكل على الله ، المهم يالربع نص ساعه وانا اتأمل المرعبه ذي على صحني واشوف الشباب شغالين سلخ في فيرانهم وانا والله فاري على حطة المراقب ، المهم في نهاية الاختبار تجيب صحنك للدكتور ويبدا يسالك عن اعضاء الفار ، وما بقى الا انا فقال المراقب يلا قلت يلا توكلنا على الله واجيب له صحني والفار او الفاره بالاصح زي ما هي ، قال وراك ما سلخت زي ربعك ، قلت انا اؤمن بالعلم الباطني والخفي واستطيع تشريح الفاره بعيني وتفكيري وحكمتي دون سفك الدماء ، قال طيب 10 درجات حقت التشريح راحت عليك ياراعي العلم الباطني وباقي خمس في الاساله قلت اسال ، قال بناء على علمك الخفي وحكمتك وش الوريد اللي هنا حط يده على الفاره قلت ، وريد حق دم ، قال لا ياشيخ فيه وريد حق مويه ومجاري ، قال طيب وين تقع قناة فالوب؟ ، قلت عيب عليك وربي استر على بنت الناس ، قال اخر سؤال كم كتوسط وزن عقل الفار الانثى ؟ ، قلت شايفنا في سوق خضار انت واسالتك قال صفر مكعب قلت صفروا حسناتك يوم الدين لا ابوكم لا ابو دراستكم ....




أم القرى






(ربي اني أسكنت من ذريتي بواد غير ذي زرع عند بيتك المحرم ربنا ليقيموا الصلاة فاجعل افئدة من الناس تأوي اليهم وارزقهم من الثمرات لعلهم يشكرون)



عمري 24 سنه وداخل على 25 سنه ، حجيت أربع مرات ، والشهر قبل اللي فات تميت 126 عمره ، طبعا هذا يعود الفضل فيه للوالد الله يطول عمره ، لانه يقضي 9 شهور في مكه ، ويخلينا نجيه ، والغريب انه يصر اني انا لازم اجي دايم ، من يسمعه يقول اني افسق خلق الله ، طبعا هو ما يفوت موسم بدون ما يحج وقد حج فوق 35 مره واكثر بس هذي اللي يقول حجيتها واذكرها ، وفي البدايات كنت اكره روحة مكه واكره العمره مع ابوي ، لكن مع الوقت بديت اتعلق في البيت والحرم ومكه الله يعمرها بحجاجه ، وصارت مناسك العمره في دمي اعرفها زين ما زين ، المهم اني في مره من المرات كنت حاذف ترم ، ورحت لابوي في مكه وقضيت شهر عنده وكنت كل ثلاث ايام اعتمر وبحكم الفضاوة كنت انزل الحرم افر واشوف خلق الله والناس اشكال والوان واجناس متعدده ، وتصير لي مواقف معهم كثيره ، لانهم بمجرد يشوفون سعودي يعتقدون انه من الصحابه ومن حملة الدين وهم والله اعلم مني ومن وجهي ، ويحبون يتكلمون معنا ويشكروني على الجهود المبذوله والخدمات من سمعهم قال ابو متعب صديقي اوصل له كلامهم ، لكن مساكين على الفطرة قلوبهم ، باذكر هنا موقفين منعا للاطاله فقط والا في جعبتي بلاوي .....


أردني ما يدري وش يسوي




كنت في الحرم اتلقف على الحمام اللي في الساحات الخارجيه ، المهم والا يطب علي اردني شايب عمره فوق الخمسين ويقول لو سمحت الاخ سعودي ، قلت هلا سم اخوي ، قال انا لي في السعوديه عشرين سنه وقررت اعتمر انا والاهل ومدري وش اسوي ، قلت له اللحين لك عشرين سنه في السعوديه وتوك تتذكر ربك وتقرر تعتمر؟؟!! ، قال عاد مشاغل الدنيا ، قلت وش اللي اشغلك عن ربك ياخي؟؟ ، قال عاد لا تزودها ياخي انا مدري وش اسوي الحين ، و لاحظت انه مكشخ بالبنطلون والقميص قلت له انت الحين كم لك في مكه؟ قال اربعة ايام قلت وانت داخلها بنية العمره؟ قال ايه قلت وليه ما احرمت طيب؟ قال مدري قلت مشالله عليك المهم اني ما كنت مرتاح له وقلت له ارجع احرم اول وبعدها اد المناسك قال كيف احرم ومن وين؟ المهم اني خفت من ربي وقلت له شوف اطلع من حدود الحرم ، قال وين يعني؟ ، قلت لا حول روح الحين واغتسل انت واهلك وعيالك في الفندق ووتطهروا وكل شي ثم روح اقرب تكسي وقوله اطلع خارج حدود الحرم او قله ودني التنعيم واحرم من هناك واعقد الاحرام وتعال وانت جاي قول التلبيه انت ومن معك قال وبعدها؟ قلت بعدها اعتمر حالك حال المسلمين يوه ، قال ما اعرف ، قلت وش جابك انت مكه ؟؟؟ ياخي المفروض تعرف النسك قبل تجي ، قال طيب انتظر وشوي الا حرمته جايه وشكلها راعيه دين وقالت لو سمحت اخوي قلت سمي قالت حنا مسلمين بس والله نجهل الامور ذي واكسب فينا خير وعلمنا كل شي بالتفصيل اذا ما فيها كلافه عليك ، قلت طيب وش تبين تسالين عنه ؟ قالت اللحين علينا شي لان حنا دخلنا مكه بنيه عمره وما احرمنا؟ قلت لها انتو متعمدين والا عن جهل قالت لا عن جهل قلت "رفع عن امتي الخطا والنسيان " ما عليكم شي انا علمت زوجك كيف يحرم احرموا وتعالوا كملوا النسك عادي ، المهم قالت ما نعرف نكمل النسك وانت ليه مو لابس احرام زي الناس؟ ، قلت لها انا قد تحللت من احرامي واصبحت من اهل مكه خلاص ، ثم فكرت شوي وقلت لها تدرين خليني اكسب اجر فيكم وباعتمر معكم ، المهم خذ رقم زوجها ومعي موتر ابوي يوكن 2007 وخذتهم معي واحرمنا و وطفنا على البيت المهم وانا اطوف توجهت للقبله وبديت ادعي وقلت ادعو الموضع ذا يقبل فيه الدعاء انشالله وانا ادعي دايما تخوني دمعتي وابكي من هيبة الكعبه ، المهم يوم شافوني ابكي الا والربع كلهم يبكون مو يبكون الا يصايحون ويمسحون راسي يبون يتبركون قلت حشى شيعه ذولا المهم سعينا وجينا نتحلل قلت يلا تحللوا قالوا كيف ؟ قلت قصوا من شعوركم المهم واشوف الام الا قاصه خصله اكبر ما لله من شعرها قلت وش ذا؟ قالت اتحلل قلت القص مقدار الابهام انتي حلقتي ما قصرتي ، المهم بعدها قالوا وش نسوي؟ قلت انتو راعين طويله؟ قالوا لا بكره نروح قلت اجل الفجر طوفوا الوداع وتوكلوا على الله ورجعنا وعزمتهم على العشاء في الطازج اللي جنب الحرم وبعد ما راحوا رجع لي صبي فيهم عمره تقريبا 17 سنه المهم انه قال ابيك في كلام ، وقال شوف انا انسان ما اصلي ولا اصوم وكلي ذنوب ومدري وش وادخن واسمع اغاني وماكنت ابي اجي معهم مكه الا بالغصب وبعد العمره حسيت صدري تنور هل انغفر لي كل ذنوبي والا ايش ؟ قلت شوف ياصاحبي الذنوب عند الله والمغفره بيده وانشالله ان الله ما يردك من بيته خايب لكن انت اعزم على التوبه والله يغفر كل شي الا الحقوق اذا للناس عليك حق رده قال يعني الله يغفر كل شي؟؟ قلت وتستعظم ذا على الله الله كفيل باللي بين العبد وبينه لكن حقوق خلق الله اعيد عليك لازم تردها ، واقولها لك والله ان ربي ما يخيب ظن العبد به وما يرد عبد رجاه خايب ، انت اترك عنك الحرام واعزم التوبه ، قام وبكى بكاء شديد حسدته عليه وقال لي تصدق قلت وش " ما احلى طعم الايمان" ....




هوشه في الحرم





ابوي عارف اني من النوع اللي يتنرفز بسرعه ، واهاوش على أي شي ، لكذا كان يقول لي تذكر ان الحجاج هنا مو من ربعك وعاداتهم غير عاداتك وتذكر قبل كل شي انهم ضيوف الله ، وكنت قرفان من حركة الحجاج خصوصا من مصر اللي يتسدحون ويتبطحون في الحرم ، واللي يدخلون نعولهم الله يكرمكم الحرم والله من زين النعول زنوبه بخمسه ريال ويخايف عليها ، ويحطونها على موضع السجود وعلى ستار الكعبه ، لا احترموا بيت ولا حرمة المكان ولا رب البيت ولا المسلمين ولا حتى انفسهم ، المهم كنت اقرا بين الظهر العصر داخل في الحرم ، وشوي يجيك مصري بعائلته الكريمه ، وينبطح قدامي ويحط نعوله مخده له وعائلته كلهم نسوان ورجال تبطحوا زيه وهو يقولهم ناموا هنا بركه ، قلت له انا أي بركه انت وجهك؟ ، من انت تحللهم النوم في مساجد ربي؟ ، وبعدين ياخي كيف تدخل نعالك النجسه الحرم؟؟ ، قام المصري وعصب وقال : ياسعودي يابدوي يامتخلف ياراعي الغنم حنا اهل الدين والله اني محترم بيت الله والا كان اهنتك ، عاد هو قالها والا ما قالها تفلت عليه ، ياقبطي يامسيحي والله ما هداك للدين الا سيوفنا وخليناك بين نارين اما الاستسلام للاسلام والا الجزيه على يد صاغره ، ضف وجهك انت وربعك من قدام قبلتي خلني اطلب والله لا ورب البيت اللي قدامك اعيفك العافيه ، قام بكل وقاحه ورمى نعاله علي ، وانا اللي اصيح ابو هادي ابوه تعقب والله ابطى من سواها فيني وسلمه ربي مني ، وأطمر فيه الا وابوي يطمر فيني ويقول خله لا تاذيه قلت انت شفت اللي سواه قال عادي احتسبها عند الله قلت لا ماني محتسبها الا باردها قال ابوي خلاص انا آمرك امر لا تعصيني فيه . قلت سمع وطاعه يابو مانع دامك ترضى الذل علي وتامرني بالمهانه ، قال محشوم ياولدي والله اني اخاف عليك سخط من الله اذا بيته اللي حرمه على الناس كلهم وما اباحه الا لرسوله في ساعه حرب " وانت حل بهذا البلد" المهم المصري يسمع الحوار وفيه واحد من شيوخ الحرم يسمع كل شي و يشوف من بعيد وينتظر وش يصير ، المهم قال المصري ايوه اسمع كلام ابوك ياجاهل ، قال ابوي له خلاص يامسلم ما نبي مشاكل الله يغفر لك كم نومك ، قال المصري وانا محتاج اذن منك لاجل انام هنا دي ارض ربنا قلت له وربي اذن لك تنام هنا يامصري ؟ قال اسمع لما اؤلك انا ساكت عشان ابوك الراقل الطيب والا واللهي ابهذلك قلت له وربي اذن لك تبهذل خلق الله في بيته ؟؟ المهم الا هيئة الحرم جايه وضافة المصري هو ونعوله والا الشيخ خذني على جنب وقال حنا مسلمين وعلينا خدمة الحجاج وانت خل بالك وسيع و وانقل صورة طيبه عن بلادك وربعك واحتسبها زي ماقال ابوك لله ، يمكن تجي يوم الدين وتدخل الجنه لاجل هذا الشي بس المهم ودي اطلبك طلب قلت سم ياشيخ قال سامحه قلت الا الله لا يسامحه لا دنيا والا اخره ، قال طلبتك عاد لا تردني قلت حيرتوني واحد يامرني والثاني يطلبني ياحبكم للهياط ياربعنا خلاص سامحته الله يهديه بس قال بيض الله وجهك قلت وجهك ابيض ياشيخ.....


أطفالنا موطن إبداعنا

تذكرون يوم صورت بنت أخوي على اللاب توب ؟؟ هذي الصورة واحدة من خمس صور صورتها لها في نفس اليوم في أماكن متعدده أبي اجرب عليها هوايتي في التصوير ، المهم البنت عمرها 7 شهور وما تعرف تجلس ، لكن مع شخصي الكريم كل شي يجوز .



تجربة المركى



تجربة الكرسي



حاولت اصور صورة عاقله



تصلح جمر والا



احلى ملابس



أرحب ابو متعب


إقافي حرمني من الترحيب بأبو متعب كما يليق بالعظماء ...
ولكن من جاء ما ابطي ومن استعجل تاخر يابو متعب ....
والترحيب بأمثالك حق وواجب ....
وهذي ابسط ما يقدمه ابن من ابنائك .....







التسجيل بصوتي الرهيب :

تحميل الملف من هنا

بسم الله


الملاك


بلغوا عني ابو متعب قصيد
وذيلوا قولي بابنك ياملاك

ياولي البيت من بين العبيد
وياولي اللي هنا واللي هناك

الف بسم الله عليك من الصديد
المرض من خبثه الخالص بغاك

قال اجرب فرتـ(ن) وسط الوريد
ثم لقى في الدم لاسبابه هلاك

انثبر واعقب يالداء الشديد
دون خبثك رب شافي للملاك

ودون خبثك شعب وافي ما يريد
الا رجعه ساميه للي وطاك

اشرقي ياشمس من غربـ(ن) بعيد
واقبلي للشرق مزهوه خطاك

اقبلي الشوق كل لحظه يزيد
اقلبي للي تمناك وبغاك

واقهري في طلتك وجه العنيد
وكل خبثن في شروقك قد يحاك

مرحبا ارحب هلا بك يا بعيد
ويا قريب ويا مجاورنا برضاك

والله ان في طلتك مليون عيد
والله في غيبتك شوق للقاك

والله ان الحب صادق في القصيد
والله ان الشعر يقصر عن مداك

ولو صفاح الخضر ياسيدي جريد
والبحر مدّاد جف وما وفاك

كيف نوفي مجد من عصرن تليد
وكيف نوفي عز في الدنيا علاك

وكيف نوفي الخير من كفـ(ن) مديد
وكيف نوفي الحق من منطق شفاك

يا صدوق الوعد يا وافي الوعيد
يا فخر نستنشقه بس بهواك

يا زعيم الامه العظمى السعيد
يا خدوم البيت يا اطهر ملاك

تحرق شعوب العرب شعر(ن) وجيد
لاجل ظالمها يذوق من الهلاك

وحنا نحرق دم يغلي بالوريد
لاجل ترجع سالم وغانم نباك

العذر ياسيدي الحر الوحيد
العذر لو قصر الشعر بهواك

ايه احبك حب ما عنه احيد
ايه احبك سيدي يا اطهر ملاك


وسلامة أبو متعب وسلامتكم










إنبراشات حرة :
شكر لكل من واساني وجابرني في أسري ومسجونيتي الماضية خصوصا الأخر جار الزعيم مميز .
توضيح هام : تم توقيفي بناء على مخالفتي لانظمة وقوانين المجلس العام وليس هناك اي ظلم او تظلم في الموضوع وانا اعد الادارة بالالتزام اكثر وشاكر حرصهم واحترافيتهم وومضة شكر للاخ ابو مقبل .
الله يفك اسر الليبيين من الخبل حقهم وودي احش فيه بس لانه عنزي خايف يزعل علينا داق لطمة .
طلب من الادارة : لما توقفوني بليز لا تخبرون داق لطمة ابد ، ياهو شمت فيني شماته هالولد شكيت بعدها انه هلالي لكن راضاني في الاخير وارسل لي هالتوقيع مع اني ما اوفقه في الكلام الي كتبه :



وبس

مخرج
وبعدها فز الخفوق بشوق وأعلن الإستقامه
وأدخل اليوزر بإسمي و شمّر عن يقين