حيوانات ..كتب...كلام كبير ..كلام صغير ..صور ...شطحات ..كل شي - نادي الهلال السعودي - شبكة الزعيم

( عبدالعزيز اليامي ) · #1 19/02/2011, 10:10 AM

سلام يالربع
عدنا والعود احمد
شحالكم
موضوع شاطح مدري وش يبي
لانكم فاضين اقلطوا حياكم الله

مدخل

حينما يكون الإبن مطالبا...

والوالد خصما...
والقرآن حكما...
والله شاهدا...
والعدالة مطلبا..
يفيض الحب...

عدت إبنا من جديد

تجمعني بوالدي العزيز الذي عمره يناهز الثمانون عاما علاقة رسميه جدا ، واقرب ما تكون الى الخصام والشقاق منذ الصغر ، والمقريبين مني يعلمون ذلك ويدركونه جيدا ، فليس يجمعنا سوى الاحترام والبر والتوقير ، مما جعلني افقد معنى ان اكون ابنا لاحد .....
لعل كثرة الابناء لوالدي العزيز وظروف الصغر لشخصي المتواضع ، السبب والمبرر الكبير في هذه العلاقه الشائكه ، ولكن حدث ما لم يكون في الحسبان وصاحت السماء واعلنت عدالتها ، والتم الصدع من جديد ، وآن الاوان للحب ان يفيض .....

ياحبي للتفلساف طيب اسمعوا السالفه

جانا الشيبه قبل اربع أيام من الديرة ، يقول يبغى يسلم على عياله قبل يروح مكه

، المهم بعد الاستقبال الحار ومراسم الاستقبال ، كنت اتجنب اجلس مع الوالد لحالنا ، وافضل يكون معي واحد من اخواني ، لين الله قدر اني اكون معه يوم الخميس بعد الفجر

، وما معنا احد ، كان السكون يعم المجلس ، فقال الوالد : عبد العزيز ودي اسألك سؤال ، قلت سم طال عمرك ، قال : انت تكرهني ؟ ، قلت بكل برود وبدون ما حتى اغير جلستي رغم فاجعة السؤال ما اشوفك سويت شي يستحق اني اكرهك ، قال طيب تحبني ؟ قلت : ما اشوف برضو انك سويت شي يستحق اني احبك ، فما تمالك ابوي نفسه وبكى

لاول مره قدامي ، وشفت دمعته وهزتني كثير ، بس كابرت وقلت تامر شي انا باروح ، قال تعال وقفل باب المجلس علي انا وهو

وقال اجلس ، وعطاني خطبه طويله هذا بعض ما حفظت منها " ياولدي انا والله كبير في العمر ، ومدري ربي يمد في عمري والا ذا اخره ، ولا ودي اقابل ربي ولك حق علي ، وكبيره علي يكون خصمي يوم الدين ولدي ، انا عارف اني قصرت في حقك وانا راح اعوضك باللي تبيه ، والله لو بغيت ما بغيت ابشر به ، وانا ادري انه ما يربطني بك محبه ولا حنيه ، لكن انت مؤمن وانا مثلك وانا ربيتك على كتاب الله ، وانا راضي بالله شاهد بيني وبينك ، وهذا كتاب الله (وفتحه وحطه بيني وبينه) هو يحكم بيني وبينك " ، انا صراحه حرت وش اقول بعدها تمالكت نفسي وقلت له " اسمع ابو مانع ، انت رجال مصلي وتعرف حق الله ، وانا اكون كافر اذا رديت حكم الله ، وانا راضي باللي كتاب الله يقوله ومحكم فيه ومسلم به ، طلع ايه فيه تشفع لك وانا راضي " (طبعا انا وهو حافظين الكتاب اللي بين يدينا وما نقدر نلعب على بعض

) قال : وبالوالدين احسانا ، قلت وهل انا اسات لك والا ما احسنت لك ؟؟ قال لا يشهد الله انك بار وطايع ، قلت طيب فيه شي في القران بفرض علي حبك ؟؟ قال لنا في الانبياء قدوه وكلهم كان يحب ابوه ، قلت زي من ؟ قال زي يوسف بيعقوب وابراهيم بابوه وسليمان بداؤد ويحي بزكريا ... قلت وهل عمل الاب في هذي الحاله ما يفرض على الولد محبته ؟ قال ايه ، قلت وهل عملت انت ما يفرض علي محبتك ؟؟ فبكى مره ثانيه

..قلت شوف يابو مانع تبغى علاقتنا مرجله ابشر بعزك تبغاها دين ماني مضيع نفسي عند الله وجاحد برك تبغاها عقل ومنطق انت ابوي ولك حق الاحترام لكن لا تطلب الحب كحق وانت ما عملت باسبابه ...قال طيب وش تبغى ياولدي؟ قلت ابغى تحسسني بحبك بس ، ابغى احس اني ولدك ، ابغى افرح بشوفتك ، ما ابغى اتجنب الجلسه معك ، بكل بساطه ابغاك اب ، وانا ابشر بي ولد ، قال تم ياولدي بكل حماس وصدق

، ثم قمت ابغى اشرد لا يشوف دمعة عيني قال تعال ياولدي ابغى ابوسك

، وقتها ما ملكت نفسي يالربع وانبطح عند رجوله وبكيت بكيت بكيت لين حسيت ما عاد بي دموع بس ارتحت راحه غير طبيعيه ، وقال ارتحت وانا ابوك ؟

قلت ارتحت فديت رجولك حسيت فعلا اني ابن من جديد

.......
يعني باركوا لي صار لي اب اللحين ...

علاقتي بالحيوانات

تجمعني مع الحيوانات علاقه وطيده منذ الصغر

، والعلاقه لا شك عدائيه

، لاني ارى الحيوانات كائنات تحاول احتلال كوكبنا المسالم

، المهم ، كان اختياري في اعدائي من الحيوانات فيه شي من الغباء

، فما كنت اعادي هر والا شاة والا بعير ، كنت اعادي الخفافيش والهوام والحيايا والقنافذ والفخافيخ والدلمات والسحالي والعناكب والنحل والدبر والكلاب والذيابه والثعاله والهرر السود و الحديات و كل ما هو مخيف

، بس كيف كنت اعاديها؟؟؟

الخفاش

الهامة

الخفافيش والهوام (الهامه هي البومه) :
كنت وانا صغير عندي هوايه وهي اروح لبيوت الطين المهجوره العالية الصباح ومعي عمشوش نخل (العنقود اذا يبس وما عاد فيه تمر) ، طبعا الهوام والخفافيش هذا وقت نومها

، ادخل البيت المهجور ، واقرب واحد اضربه لكل ما اوتيت من قوه وابطحه في الارض

، وادعس عليه لين يموت

،طبعا انا افضل الخفافيش لان الهوام كبار وعسره

، وما اطلع الا ومعي خمسه سته خفافيش غنايم

، وبالنسبه للهوام احتريها تخرج بعد العشاء وتوقع على النخل العالي وانواع الرجم تالي الليل

، ويالبي رجمتي ما تخيب يالربع

...

الحية

الدلمة

الحيايا (جمع حيه) والسحالي والدلمات (جمع دلمة وهي السحليه السامه) :
هذي موجوده في اصول الشجر خصوصا التين ، وعندنا تينه كبيره وتحتها كل انواع الزواحف

،طبعا سلاحي هنا الاحجار الكبيره

، انواع الفضخ ولان الحيايا تدخل جحورها عندي حركه الطلعها بها

، اسخن سيخ لين يحمى وادخله في الجحر وانواع الكوري

لين منعني ابوي ووبدل ما يخوفني من الحيه يخوفني من الله

....

القنافذ :
هي هوايه لكل الشعب من يوم نلقى قنفذ على طول يتلفلف على عمره ونجي نصب فوقه بنزين ونولع فيه وتلقاه داعس مليون

، يسوي فيها القنفذ الملتهب ، الله يغفر بس

.

الفخافيخ (جمع فخاخ وهو السحليه ذيك اللي تتلون) :
هذي حقت استهبال

، مسكينه ما تضر بس نحبسها في كيس ازرق لين تتلون

، ثم نوخرها ونحطها في كيس احمر وهكذا لين يخلص حبرها

، طبعا هي معروفه تتلون اربع مرات ثم توقف اذا وقفت نغرقها في الماء لين تموت

......

العناكب :
احلى حيوان نلعب به ، نجيب عنكبوت ونحطه في شبكه عنكبوت ثاني ويجلسون يتهاوشون وحنا نحارش بينهم

، ولما صارت الهوشه في قمتها ، نجيب حشره ونحطها بينهم وتشوفهم يتهاوشون عليها

، العنكبوت راعي البيت يقول حقتي وذاك يقول هي خاربه خاربه اصلا ويموتون هواش والحشره ما يجيها شي منهم لكن من باب العدل قبل نروح نقتلهم كلهم العناكب مع الحشره

....

هذا النحل وهذي الملكه

الدبور اللي مهجج بشار

النحل والدبر (الدبر معروف ذاك الكبير اللي كان يتلقف على بشار اللي ما يجيب عسل ):
النحل اول شي نسويه نسرق الملكه

، طبعا هم ينحاسون ويختبصون ويعينون ملكه جديده بس خبرتها قليله

، نجي نسرقها بعد

وهكذا لين يتشتتون ويضيعون بدون ملكه ويبقى اليعسوب (شيخهم) ينظم الامور ويهدي الشعب

ثم نجيب ملكه ثانيه مو حقتهم

ويقتلونها وفي الاخير نسرق العسل ونهج

، بالنسبه للدبر طبعا عسرين ،لكذا نشوف وين مرابعهم وخليتهم ونقفل عليها

، ويجلسون في الحوش لين يموتون كلهم اللي داخل واللي برى

...

الكلاب :
عشقي الابدي

، نلقاها في الوادي ، كالعاده نروح نسرق جراوتها في الوقت اللي تطلع فيه الكلبه تجيب زاد لهم

، ونحترى الكلبه ترجع ثم نخليها تشوفنا ، فاذا شافتنا ترمي الجيفه او الصيد من فمها تجي تبي جراوتها

، ثم نروح ونسرق الزاد حقها

، وترجع تدوره ونحطه بعيد ثم تروح له ، ونرجع نسرق جراوتها

وهي رايحه جايه وفي الاخير نسرق الزاد ونخليهم جواع لحالهم

....

الذيابه :
هذي نلقاها في البر ، نعلق راس الذبيحه وكراعينا وبعض العظام في الشجر وننتظرها تجي

، طبعا هي ما تجي وحده تجي مجموعه لكذا نعلق كل جزء في مكان عشان نشتتهم

، ثم لما جاء واحد منهم نرجمه لين ينفضخ راسه

، ويهجون في الاخير مكسورين الخواطر

، وندفن الراس والكراعين والعظام في الارض ونبول على المكان عشان ما يشمونه ونرجع المخيم

....

الثعاله (جمع ثعل وهو الثعلب) :
برضوا في الوادي او البر ، الحيوان هذا فعلا حيوان

، بس حبيب

، جبان جدا ، وضعيف ، اذا اجتمعوا صاروا ذيابه ويستعرضون واذا هو واحد شفته زي الكلب حقير

، طبعا لما نمسك واحد فيها نسوي حركه نلصق فمه ونربط عليه ونحط قدامه زاد ولحم وخير ونتركه ونكمل سمرتنا

، تلقاه يفتحس يحك فمه في كل شي يبغى يوخر اللصق

، لين يدمي وجهه كله ثم نعلق اللحم فوق بحيث ما يلحقه ونفكه وتلقاه يطامر مسكين لين يتعب وفي الاخير نقتله ونعلقه مكان اللحم ونروح

....

الهرر السود :
هذي تخصصي

، من يوم قالوا ان فيها جن وانا ميت على قتلها

، ما يعجبني الا هي وما احبها الا تالي الليل

، طبعا نحشرها في مكان ثم نمسكها مع ذيلها ونلوح بها لين تدوخ ونفكها ونطردها وانواع الدوخه والحوادث ما فيه جدار ما تنطحه

ونعيد الكره واخر مره نلوح بها ثم نصكها في اقرب حجر ثم تموت

....

الحديات (جمع حديه وهو طائر لاحم ) :
هذا يحوم حول الجيف وحنا نبعد عنه ونستدرجه لين يقرب منا ونرشه بماء وما يعرف يطير بعدها

، ثم نعلقه مع رجله منكوس واذا انتكس ساعه زمان يموت على طول لكذا ننكسه نص ساعه

ثم نرده ثم ننكسه لين نطفش ثم ننتف ريش جناحه ونخليه زي الدجاجه

....

انا حيوان ؟؟؟

البارح نتعشى يوم جمعه ، وذابحين ومفطح وليل

، والعشاء فيه اغراب واجناب جايين يسلمون على الوالد

، المهم انا انسى نفسي على الزاد واكل بطريقه شرهه وغبيه

، وما اكل الا لحم بدون رز

، فقال ابوي خلصت اللحم ياولدي خل لنا شوي فاستحيت وخذت عظم وجلست اتعرشه وابوي يناظر ويقول اعتقه ياولدي ما عاد فيه شي ، ثم ضحك وقال والله اني اشوفك عاقل وادمي لين اشوفك تاكل احس انك متربي مع ذيابه ، تنهش اللحم وتتعظم كنك في مجاعه ، قلت ما تعرف المثل اللي يقول " قال تعشيت قال ايه قال تعظمت قال لا قال اجل ما تعشيت "

قال ايه بس مو عند الرجال وانا ابوك قلت يرجال الدنيا فانيه

قال العظام طعام الجن قلت ومن قالك اني ولد آدم

...
المهم اخوي كان يصور كل شي فديو والتقطت بعض الصور لي وانا اسوي جريمتي

نظرة بريئة الى الفريسة

مرحلة التعرف على الفريسة

العملية كبرت أوي

عالمي الخاص

عندي مرض اسمه قراية

، اقرا أي شي عن أي شي في أي شي

، من يوم انا صغير ، وتتجمع الكتب عندي ، وتجيني هدايا كلها كتب ، لين تزدحم واعبيها في كراتين ، واراكمها ، قريت فوق الـ1000 كتاب

، ما خليت مجال ما قريت فيه ، شعر ادب فلسفه دين ارواح نجوم روايات كتب اطفال مسابقات انجليزي طب صحه كل شي

وبعضها القاها واحتفظ فيها ولو هي ما تخصني

، ولا ارتاح اكتب والا اجلس على الكمبيوتر الا وهي حولي

، ومكتبي عفسه كله كتب واجهزة ، المهم اني صنفتها وجلست شهر اصنفها ورتبتها ، بعد اسبوع عفست ابوها ، والمشكله ارجع اقرا بعض الكتب من الطفش

، واللي عندي ما يقرون واقول لهم استعيروا ويرفضون في الاخير قررت اعرضها عليكم اللي يبي يستعير منها هذا رابط اكسيل فيه نص الكتب لان معظمها في نجران وهذي بس اللي شريتها في الرياض

، وانا في الرياض اللي يبيها يقراها ويردها انا حاضر اوصلها له على الاقل يستفيد بس اعاره مو عطيه

لانها غاليه علي ونصها هدايا

....

وربي مدري وش فايدتها بس معجبتني ومعلقها

مسوي فيها محترف بس ما زبطت

ابي احد يجلس وياي وكلن عايفني انا وكتبي

ما دريت وين احطها عشان اصورها

هذا رابط الملف حق الكتب اللي في همه يستعير

تحميل الملف الكتب.xlsx من هنا

ملاحظات مانعه للانبراش

:
أنا وابوي سمنه على عسل وشرهني البارح بالف ريال

>>ليت الزعل كل يوم يابو مانع

الحيوانات خلاص تبت من تعذيبها وقدني حنون

عارف مواضيعي متتاليه وورى بعض بس عادي قفلوا القديمات وخلوا الجديد

اللي يبي الكتب يراسلني

بس

مخرج

تنقطع القرابات..
وتتحطم العلاقات...
وتتغير الافكار ...
ويبقى الحب ...
الرابط الأسمى...

داق لطمة · #2 19/02/2011, 12:04 PM

ياهلآ وغلآ بالطعنه

وعليكم السلآم والرحمه

المدخل والمخرج احلى من بعض صرااااحتن

إقتباس


	قال الوالد : عبد العزيز ودي اسألك سؤال ، قلت سم طال عمرك ، قال : انت تكرهني ؟ ، قلت بكل برود وبدون ما حتى اغير جلستي رغم فاجعة السؤال ما اشوفك سويت شي يستحق اني اكرهك ، قال طيب تحبني ؟ قلت : ما اشوف برضو انك سويت شي يستحق اني احبك ، فما تمالك ابوي نفسه وبكى لاول مره قدامي ، وشفت دمعته وهزتني كثير ، بس كابرت

صرااحه ماتستحي على دمك تخلي دمعة ابوك تنزل قداامك ،، والله مشكلة عيال هاليومين حتى دمعة ابوهم صاارت عاادية عندهم ..

إقتباس


	يعني باركوا لي صار لي اب اللحين ...

الف الف الف مبروك

إقتباس


	الخفاش الهامة الحية الدلمة

لآلآ واااضح انك كيوت ورومنسي فديتك

إقتباس


	القنافذ

يووه يابو هاادي ذكرتني بسوايا كنا نسويها بهذا المخلوق البرئ

الله يرحمنا برحمته بس كنا نغرقه بووسط الماء

إقتباس


	الفخافيخ (جمع فخاخ وهو السحليه ذيك اللي تتلون)

حربـــاء اسمها فخاخيخ << على وزن خعاخع

إقتباس


	العناكب

العن ام النذااالة يا شيييخ يااخي خل بقلوبكم شوية رحمه تقتلونهم كلهم سووا سويت زي هتلر يومنه ذبح اليهود كلهم ماعندكم رحمة انتم

قلتلكم والله كيوت هالولد

إقتباس


	هذا النحل وهذي الملكه

لآ ياشيخ ..

إقتباس


	الدبور اللي مهجج بشار

يآآآآآآآآآآآآكرهي له لكن بسألك سؤال برئ

عمره قرصك ؟؟؟

إقتباس


	الكلاب

نفس العشق سبحان الله بس فديتهن حقت مطاردات سررريعه

إقتباس


	الذيابه

زين ما سويتوا بهن

إقتباس


	الثعاله (جمع ثعل وهو الثعلب)

رخمه هالحيوان

كنا نربطهن وزي ما سويتوا فيه نحط له لحم ولا شي ونتركه الين ما يطق فيه عرق

إقتباس


	الهرر السود

ماقلتلتلكم انه كيوت اسم عليه

ههههههههههه

إقتباس


	الحديات (جمع حديه وهو طائر لاحم )

هالحيوان ذا ابدااع كنا نتقنصه لعاااانه بس علشان يجوون اخويااه عليه ويااكلونه

إقتباس


	نظرة بريئة الى الفريسة

هههههههههههههههههههههههههههههههههههههههههههههه

إقتباس


	مرحلة التعرف على الفريسة

هههههههههههههههههههههههههههههههههه

إقتباس


	العملية كبرت أوي

ياخي خفف شنبك بخمسة ريال ما تهز ميزاانيتك يخرب شيطانيك

إقتباس


	عندي مرض اسمه قراية

الله لا يشفيك من المرض هذا

إقتباس


	مسوي فيها محترف بس ما زبطت

لآلآلآ مأأأدرش على الابدآآآع دهـــــــــــ

إقتباس


	ما دريت وين احطها عشان اصورها

إقتباس


	أنا وابوي سمنه على عسل وشرهني البارح بالف ريال

اول انبرااشة : علشان تعرف ان قلب الاب رحيم وممتلئ بالأبوبة < < على وزن امومة

إقتباس


	الحيوانات خلاص تبت من تعذيبها وقدني حنون

ما قلتلكم انه كيوت

هو وشنبه كنه شجرة تينه

إقتباس


	اللي يبي الكتب يراسلني على الايميل هذا [email protected]

خــلآص عرفنا وش بعد ؟؟؟؟

لك يالطعنة

بلو كادي · #3 19/02/2011, 12:50 PM