بعد ما صرّفت اللي عندي وأصخنت الحليب وجبت لي أربع أكياس حب
, بدت مباراة برشلونه وفالنسيا بداية هاديه بس كان فالنسيا ماسك اللعب إلين سجل الهدف الأول في الدقيقة 12 من تصليحه مهيب صاحيه بالكعب من روبن باراخا لبابلو إيمار اللي حطها سهله في الباب وحاول فرانك دي بوير يطلعها بس بغت تنفك ركبته :p وعقب الهدف إختبصوا لاعبين برشلونه وبغى يسجّل إيمار هدف ثاني من مزعه صدها بونانو , ومن ضربة ركنيه سجّل فالنسيا الهدف الثاني من الطويل النرويجي جون كارو في الدقيقة 26 بعد ما صقع الكورة براسه تسنه شايتها برجله
, بعد ذا الهدف طارت شوشة لويس فان غال ولا يدري وش يسوي وراح وطلّع روشمباك اللي ضاق صدره ورجم فنيلته على الجمهور ونزّل ريكويلمي .. بس أنا ودّي أدري ليش يخنفس روشمباك وهو ناكبهم في الهدف الأول وبغى ينكبهم في هدف ثاني بعد ما رجّع الكورة قصيره على بونانو !!؟؟
المهم من يوم حصل ذا التغيير سجل موتا الهدف الأول لبرشلونه بعد ما جرّ غاليدو وحطها أرضيه حلوه في الزاوية , وبعد ذا الهدف تحمّسوا لاعبين برشلونه وأنفرد كلويفرت بس إن كانيزاريس شلخه برّا الثمان طعش وخذ أحمر وأنتهى الشوط على كذا ..
وبدا الشوط الثاني بس بدايته كانت ضعيفه مهيب مثل بداية الشوط الأول , الين جت الدقيقه السادسة وعكس مندييتا كورة تعكرف فيها بالوب الحارس البديل ولا تعامل معها كلويفرت صح , المهم ضغط برشلونه بس بدون فايده وغيّر فان غال وطلّع موتا اللي سجل الهدف ونزّل سافيولا اللي ما أدري وشوله مخليه إحتياط ؟؟!!
وأستمر ضغط برشلونه وفي الدقيقه 30 رفع مندييتا كورة حلوه وصقعها كلويفرت براسه قويه بس بالوب مسكها , وغيّر رافائيل بينيتيز تغيير دفاعي عشان يحافظ على فوزه وطلّع فيسينتي ودخّل الشايب كاربوني الإيطالي , وأرتدت كورة لجون كارو وهو عند الركنيه ولعب على المطفوق بويول وعكسها لفابيو أوريليو اللي تلاعب بالحارس ببرود وحطها هدف ثالث في الدقيقه 39 وأنهى كل آمال فان غال في تدريب برشلونه في المباراة الجايه , ويوم جت الدقيقة 42 سجّل روفيتي هدف رابع من تصليحة الكابتن البيلدا , ومن يوم سنتروا لاعبين برشلونه سجّل كلويفرت هدف ثاني في الدقيقه 43 ...
وأنتهت المباراة بهذي النتيجه 4 / 2 لفالنسيا ..
مباراة بكره :
ريال مدريد X أتليتكو مدريد
الساعة 10.00 على قناة Orbit ESPN