مقدمة

قال تعالى "يَا أَيُّهَا الَذِينَ آمَنُوا لِمَ تَقُولُونَ مَا لاتَفْعَلُونَ * كَبُرَ مَقْتاً عِندَاللَّهِ أَن تَقُولُوا مَا لا تَفْعَلُون"سورة الصف(3-2)
قال احد المؤرخين : " نزلت العبقرية على عقول اليونانيين ، وايدي الصينيين ، والسنة العرب ".
وأوصى حكيم ابنه :"أي بني ، لا تدعي ماليس فيك فإنك اما انت تكون كاذبا فتذهب هيبتك ، او تكون مبلاغا فلا يصدقك الناس "
قيل لاحد ملوك الفرس ان بالباب رجل يقول انه من العرب فقال الملك ادخلوه علي فلما دخل الرجل قال له الملك من انت؟ قال انا ملك العرب! فقال له الملك الم تقل انك رجلا من العرب؟ فرد الرجل كنت رجلا من العرب وانا عند بابك اما وقد اذنت لي بالدخول عليك فقد صرت ملك العرب فقال الملك املؤوا فمه درا ....
وجاء جاء رجلا الى ملك الروم وقال له الملك من انت ؟ قال انا رجل ابني الدار واعز الجار واحمي الذمار وأزاحم الجبال وأنازل الرجال قليل المال عزيز العيال ملكي عقلي وعدوي قلبي ، فقال الملك لولا انك رجل من العرب لقلت انك نبي من السماء ولكنكم معاشر العرب قوم تفخمون ...

الهياط

قال ابن منظور في كتابه (لسان العرب ): والهِياطُ والمُهايطةُ: الصياح والجلبه
أما تعريف الهياط اصطلاحا : هو فعل الشي والمجازفة الخطرة بقصدالتميلح.


ومن مرادفات الهياط : المبالغه ، التفخيم ، النفج ، التباهي ، الادعاء .
والنفج : هو ادعاء المال للمفاخره والتباهي وانتشر في العهد العباسي حيث كان الناس يضعون في مزابلهم الطعام والكساء الجيد ليراها الناس فيقولون اصحاب الدار اصحاب مال .

واصل الكلمة من هياط الناقه ، والناقه حينما تكون في موسم ومرحلة التناسل تهايط كثيرا ( اي تصدر صوتا معين) لتلفت انتباه الجمل فيلقحها .

وذكر الشاعر ابو تمام في مقدمة كتباه المشهور (ديوان الفخر والحماسه) " وقد انتقيت في هذا الكتاب اشعار العرب في الحماسة والفخر والقتال والعزة وابتعدت عن النفج والهياط "

وحينما اتى الرسول الى يثرب كان الاوس والخزرج على اختلاف كبير وكان الانصار قد عزموا على تولية امرهم لابي بن سلول ولكن الله اكرمهم بالرسول فثار ابي في احد المرات وكان من الخزرج على سعد بن معاذ زعيم الاوس وتكلم عن مفاخر الخزرج فقال له سعد " اما انك لتهايط كما تهايط الناقه تريد ملكا تنكحه ، وقد ابدلنا برجل من السماء اطهر منك ينكحنا دينا وقرآنا "

وارسل ملك الغساسنه حين بعث الرسول برجل من عنده وقال له اذهب الى هذا الرجل بمكه وانظر ما امره وعد لي فحين عاد الرجل وقال ما سمعت من نبي قريش؟ قال سمعت كلاما ليس من كلام العرب وهياطهم والله ليس بشاعر ولا مجنون وانما هو نبي ...

الشاهد ان مصطلح الهياط ومعناه معروف ومتعارف من القدم وليس وليد اليوم والحظة .

مبررات الهياط

العجز ، الفقر ، الضعف ، قلة الحيله ، الوضع الاجتماعي ، البلاغة

فحين تكوت عاجزا عن مجارات التقدم تهايط بما قد فعله اجدادك.
وحينما تنعدم مادة يومك تهايط بما تعتقد انك تملكه.
وحين تضعف عن منازلة الرجال تهايط بما انت لست اهلا له.
وحينما تقل حيلتك عن الامر تهايط بما لا تفعله .
وحينما تجد نفسك في مجتمع المظاهر تهايط بما يتماشى مع هذا المجتمع .
وحين ترزق بلاغة وبيانا تهايط لتوظيف معاني ساميه في جعبتك.

وفي النهاية تصدق ما كنت تهايط به فتتحول الى رجلا لست هو...


ابطال الهياط

الشعراء: وهم اساتذة الهياط قديما وحاضرا ، وهم معذورون في ذلك لان الشاعر اما يراد منه وصفا بديعا او غزلا شريفا او حكمة بليغة فحين لا يجد الشاعر شيئا منها يتحول الى شعر الهياط والمبالغه واشهر ما قيل في هياط الشعراء معلقة ابن كلثوم التغلبي الشهيره اذ استمرت بنو تغلب تفاخر بها حتى قال احد البكريين :

ألهي بني تغلب عن كل مكرمة ** قصيدة قالها عمرو بن كلثوم

يفاخرون بها مذ كان أولهم ** يا للرجــال لفخر غيــر مســؤوم

الخطباء : ولست اتكلم عن خطباء المساجد ، فالخطبة فن ادبي اشتغل به الكثير وكان يستعمل في التفاخر والحروب وبرع فيه كثير من العرب ، وقال حاتم الخيام وهو شاعر فارسي " اني لاعشق كلام العرب فهم يتفاخرون بالتراب حتى تظنه ذهبا "

البسطاء: وهم الاقل هياطا وسبب هياطهم هو بساطتهم والطموح الى المجد والرفعه بالكلام ، وهو الهياط المتعارف عليه غالبا .

مقومات الهياط
السلطة : واكبر دليل هياط دول الخليج في الشعر والبل والخيل والبذخ ، تدرون ان اسم الشرطه في قطر (الفزعه) .
الشعر : وقد تكلمنا عنه .
المال : ويظهر في التبذير والصرف والاقتناء والعزايم والزواجات .
المجتمع : وهو اكبر مقومات الهياط لما يفرضه من قيود عرفيه وعادات قبليه .

وغيرها كثير ....


خلاص تعبت وانا اكتب كلام جد ومصفصف تعالوا للوناسه يالربع

الهياط في بلادي

الهياط في بلادي انواع كثيره جدا
ناخذهم نوع نوع


المرتبه # 10


هياط البزران
ويسمى الهياط البرئ ، اطلق هياط في الدنيا ، والاخف حده ، يجيك البزر ويهايط ابوي اقوى من ابوك ، ابوي يكفخ ابوك ، ابوي شنبه اكثر من شنب ابوك الاملط ، والحقيقه مدري ليه مستغريبن هياط البزران وحن نربيهم عليه ، في البيت الاب يقول لولده خلك ذيب وسنايدي وكفو ورجال زي ابوك ، والام تقول خلك شاطر زي اخوك الرخمه يسمع كلام امه ، وفي المدرسه المدرس يقول يلا من الرجال اللي يحل المساله ذي واللي يحلها يقول له انت احسن واحد في الفصل ، ولما يتهاوش صبي مع صبي يراضي المدير كل واحد منهم على حده ويقوله لا عاد تهاوش الرخوم ويقول للثاني خلك رجال وخل منك الجحلط ، والصبي اذا رجع وساله ابوه عن المدرسه يقول الصبي انا احسن واحد فيهم بغض النظر عن التحصيل العلمي ، لذلك تجد الهياط في كل شي في البزر ، وهو المغذية الروحانيه له .

المرتبة # 9


هياط النسوان
ياهن يكذبن كذب اعوذ بالله ، يعني الكذب والمبالغه في دميهن من الله ، عاد اذا اضفنا عليه فن الهياط اووووه يا سلام ، يهايطن في كل شي بسم الله عليهن ، في اللبس والجوالات والنسل وحب الزوج حتى في علبة النيدو ، تجيك وحده تقول انا ما ارضع ولدي الا بروقرس 2 للاطفال وهي ترضعه من ديد الناقه بنت الذين ، وتقول زوجي مدلعني اخر دلع تدرين ان يبي يسفرنا ماليزيا وانا ابي تركيا بس مدري وش نتفق عليه ، والحقيقه انهم مختلفين بين طلعة للثمامه والا استراحه عند الفحص الدوري ، والي تقول زوجي اكبر راس في الدوام ، وهو سكرتير لفلسطيني والا مصري في العمل ، مرة كنت اشتري نظاره شمسيه في الغاليري مول المهم قلت لراعي المحل كم النظاره به قال بميتين قلت انا ليه ميتين قال انها تحمي من اشعة المدري وش حقت الشمس قلت له و احد قالك اني باسافر الفضاء ابغى نظارة تعكس النور وبس المهم دخلت بنت وقالت وش اغلى نظاره عندك قام وطلع لها نظاره ايطاليه مدري وش حالنا من شانها وقال هذي يستمية وخمسين قالت غلفها ابيها هديه لزوجي وخل السعر عليها من داخل طبعا انا حشري فقلت لو سمحتي اختي ليه ما تشترين هالنظاره بمييتن بس قال وي انا ابيها هديه غاليه قلت هذي تحمي اشعة الفضاء والكسوف والخسوف والنووي والذري وكل شي قالت بس انها بميتين بس ابي شي غالي عشان يعرف زوجي انه غالي عندي قلت هو عارف والا ما تزوجك يابنت الناس خذي ذي ابو ميتين ووفري الباقي قال راعي المحل انت ياخوي لا انت اللي شريت ولا خليتنا نترزق الله .

المرتبه #8


الهياط الوطني العربي
اكثر حكومات العالم مهايطه حنا معاشر العرب ، التلفزيون الوطني كله انجازات واستعراض طيارات ودبابات واغاني وطنيه وفوق هام السحب وارفع راسك انت سعودي ووطني العزيز وهل احب سواه ويابلادي واصلي ، وفي الحقيقه ضعف سياسي ودولي وحضاري فظيع ، اضرب لكم امثال : القناة الاولى تستعرض ببرجي الفيصليه المملكة والاميرة نوف وخزان الماء ووبرج التلفزيون كأن عمران البلد تناطح السحاب ، ودبي وقطر فيها مليون عماره وما استعرضوا بها ، ملعب الملك فهد ابو خيام درة الملاعب تحسسنا الرئاسه ان ما فيه مثله وملعب نادي بسيط في قطر والا الامارات يطقع باطلق ملعب عندنا وهو ولعب نادي فقط ، في الاولمبيات السعوديه ما تفوز الا في الخيل والهياط بس ، مهرجانات الفروسيه عندنا ومسابقات جمال الخيل تغطي على اي مهرجان والا مؤتمر في الجامعات والتعليم ، مزايين ام رقيبه تدفع فيها ملايين على بعير والا فحل بيموت بعد اربع سنوات ومادفعوا ريال في صدقة والا زكاة ، والحقيقه الهياط الوحيد وما اقدر اسميه هياط اللي يحق للوطن يتغنى به هو الامن في البلد .

المرتبه # 7



هياط عيال القبايل
من اشهر انواع الهياط ، انا ولد قبيله خلاص وخر مني من قدي ، يعني ابيهم يحسبونها صح ، اذا الجزيره العربيه كلها قبايل انت على ايش تهايط ؟؟؟؟ ، وهات يا 220 و 110 وتكافؤ نسب ومدري وش ، يعني ربي خالقنا كلنا من طينه وحده لييييييييييش تشوف نفسك يعني وتهايط ، بلال عبد حبشي ، صهيب غلام رومي ، سلمان غلام فارسي ، دولة المماليك كلها من عرق كردي ، الايوبيين مو عرب ولا عيال قبايل ، العثمانيين اتراك ، انت ويش خلاك احسن منهم ، ولد قبايل امنا بالله والنعم وسبعين نعم ما حد شكك ليش طيب تهايط ، وتعال تشوف النت كله مواقع قبايل ومفاخر عفى عليها الدهر ، المشكله ان هالنوعيه من الهياط مدعوم بقوه حتى من العقلاء ، والتفاخر في النسب شي منهي عنه ، عموما انا يامي وما انكر اني افاخر بالشي ذا لكن عندنا ناس اعوذ بالله منهم ، اذكر لكم موقف : في نجران تقريبا نص مليون 90% ياميه ، انا اعرفهم كقبايل بس ماني ضليع فيهم كفخوذ وعوايل ، المهم كنت في رايح اشتري ذبايح من سوق الغنم ، وكنت اساوم رجال يمني بس مو يامي المهم يوم تمينا على السعر واتفقنا لقيت شايب من شيبانا وسلمت عليه اوشفه يكلمني من فوق خشمه والحقيقه اني كنت محترمه عشانه شايب ومن القبيله فقال لي بقوة عين انت ما لقيت تشتري الا من هاليمني؟ قلت والله سعره زين قال كم اتفقتوا عليه قلت 15 راس بـ 9500 ريال قال روح اشتر من فلان بن فلان (من القبيله) قلت له كم بيعطيني ياها به؟ قال لو على الراس الف وش عليك قد هو يامي وخل عنك عيال السوق قلت له ياعم كلنا مسلمين وانا اتفقت مع الرجال خلاص عيب ارجع في كلمتي وسعره ازين من سعر صاحبنا قال حرام بالله ان ابوك ما جاب رجال !! فقلت والله لولا شيبتين في راسك كان دسمت لحيتك في التراب مدري كيف نفلح وانتو شببانا؟؟ فيوم خبرت ابوي قال صح لسانك و الشيبه ذا ترى امه مو اصل وخسيس طينه قلت لا حول حتى انت يا شايبي ..

المربته # 6



هياط نادي النصر
اكبر نادي مهايطي في التاريخ الرياضي ، يعني عيال القبايل ونعذرهم على هياطهم معهم شي واصل يهايطون عيله ، النصر علي ايش يهايط ؟؟؟؟ النصر يهايط على الشباب ان جمهور الشباب شوي طيب يا ربعي النصراويين جيبوا زي بطولاتهم وهايطوا اوما انك تعد الجمهور وما تعد البطولات فيها قوة هياط فضيعه ، النصر يهايط على الاتحاد ويقول ما فيه الا اصفر واحد طيب شاركوا في الاسيويه زيهم وهايطوا بعدها ، النصر يهايط على العالم انه شارك في بطولة العالم ، الاتحاد شارك ولا هايط عادي مو حكر لكم ، النصر يهايط على الحكام كلهم طيب كم بلنتي واير لس خذتوه وكم هدف باليد انحسب لكم ، ويهايطون بعدد بطولات غير موجود طيب لكم عشر سنين ما جبتوا بطوله ، وفي الاخير يهايطون على الهلال عشانه نادي القرن الاسيوي طيب ياخي احمد ربك الانجاز للوطن وراك تهايط ، وفي الاخير يقولون ما صديقنا الا حنا يعني انتو وهياطكم خليتوا احد يصادقكم ؟؟؟؟

شطحه تيمون صار نصراوي

http://www.youtube.com/watch?v=R1-wLbQWg_U


المرتبه #5



هياط شركات الاتصال
والحرب الشهيره بين موبالي والاتصالات ، قسم بالله هياط على ولا شي ، وحرب شنعاء وقلة حيا وكذب عيني عينك، هياط وتقليد وغش وتدليس ، تحس ان الشركتين بزران في فسحه ، حنا اتصالنا اسرع لا حنا اسرع ، حنا نعطيك مودم بلاش حنا نعديك مودم وكنكنت بلاش ، حنا عندنا خدمة صدى حنا عندى خدمة رنان ، حنا رعاة رسميين للنصر والاتحاد والاهلي والشباب حنا رعاة للهلال ، حنا شركه سعوديه حنا نحب السعوديه طيب ، وبعدين واخرتها انتي وهي ، يعني وربي عيب عليكم ، فشلتونا ، موبايلي شركه خليجيه وربي ما تعلمت الهياط الا يوم جات السعوديه والبركه في الاس تي سي ، حتى المراكز الاعلاميه عندهم ما يوظفون الا مهايطيه ، قسم بالله لوني من الملك لاحشرهم في غرفة وكيل المدرسه واقطع الخيزران في ظهورهم ....

المرتبه # 4



هياط الزواجات
هياط وبذخ واسراف واستخفاف بالنعمة ، مهر فوق المية الف ، صاله اجارها اربع رواتب ، 20 ذبيحه نصها في الزباله ، مظاهر وفرق وطقاقات ومحرمات بس عشان المظاهر ، ابغى زواج مدري وش حاله من شانه ، ابغى الناس كلهم يتكلمون عنه ، ابغى سياره ، بيت، شهر عسل ، وبعدين ؟؟؟؟ ما فكر بعقله وش بيصير بعدين ، ما فكر في النسل والعيال كيف يعيشون ، ياخي الرسول زوج فاطمه من علي على درع وكم درهم وانت تتكلم عن بنت الرسول وولد عمه اللي في الجنه ، عمر وهو خليفه تزوج ام كلثوم بنت علي على كم درهم وهو خليفه وهي بنت ولد عم الرسول ، علي ايش الهياط ، ولايش وداك ، انا اقول لك ايش وداك له ، ديون + قرض + اقساط + ذنوب + هم + ندم ، في الاخير ليش الحكومه ما تزود الرواتب ، ياخي اقتصد وتلقى خير ، ما انكر انها فرحه وهنا لكن بالعقل ياخي ، والله اني افتخر بقوه لان قبيلتي حاطه قوانين صارمه في الزواج يعني اقولها لكم : في قبيلتي الموقره المهر للبكر 20 الف والثيب 10 الاف داخل القبيله واذا البنت تصير بنت عم الولد المهر تدفعه القبيله كامل والحفل يكون في ارض القبيله للرجال وفي صاله للنسوان ، العشاء يكون عشر ذبايح والفايض يقسم على المساكين ، شهر العسل اذا كان في السعوديه يكون على حساب القبيله بشرط انه يروح مكه نهاية الشهر ، تقدم عانيه من القبيله مقدارها 50 الف للمتزوج على خمس سنوات 10 الاف كل سنه ، صح فيها شويه تقشف بي فيها تكافل اجتماعي والموسر حر في ماله .....

المرتبه #3



هياط الشباب
يتمحور هياط الشباب في اثبات الذات في الغالب ، والضحيه لا شك المال المحجور على السفهاء ، وصراحه الشباب والمراهقين لا يقلون شأنا عن البنات ولكن هياطهم يكلف اكثر ، فهالياط يبدأ بالسيارات والتفحيط ، ثم هياط بالدخان والمقاهي والاستراحات ، ثم هياط بالسفرات والجوالات والاجهزة ، واخطر هياط هو الهياط بالمحرمات والجهر بها خصوصا في الهياط بالنسوان ، يعني انا معي اربع خويات كلهن يحبنوني ، طيب انت تحبهم ؟؟؟ ناوي تتزوج وحده منهم ؟؟ الاجابه بكل بساطه لا يخسون بنت عمي تحتريني ، طيب ليه تلعب بقلوب العذارى وين انت من الله ياخي ؟؟؟ والله يادعوه تالي الليل من مظلوم اقول من دعوة صايم قايم متعلق بستار الكعبه ، ولا تقولي هم اللي يبون والبنات خفيفات عقل وش اسوي ، طيب يعني انت راجح العقل ليه ما تحكم عقلك ، ياخي معك خوات وين مرجلتك ما تخاف عليهن والا بنات الناس حلال وخواتك بنات الرسول ، والله اني اعذر الحبيبه واللي فعلا يحبون بس المهايطين وحقين الكشخه بالنسوان وربي انهم احقر عندي من الكافر نفسه ...

المرتبه # 2



هياط الوظيفه
انا اشتغل هالشغله والله لو اموت ما اشتغلتها ، انا سعودي ولد فلان ، طيب معك شهاده زي وجهك وخبره زي ركبتك ، تبغى تدكي على مكتب وتستلم عشرة الاف ؟؟؟ تعالوا نستعرض وش كان وظايف الانبياء : ادريس خياط ، داود وهو ملك كان حداد ، موسى شعيب محمد كلهم رعاة ، عيسى نجار ، انت احسن منهم والا ايش ؟؟؟؟ ياخي وربي هذا هياط غبي ، توظف احسن ماتكون زي الحرمه عاله على ابوك في بيتكم ، توظف وربي يسرها ، انت تبغى لقمة عيش والا تبغى منصب وفخفخه ، تقدم ملفك المعفن لمكتب العمل ويرسلون لك فيه وظيفه باربعه الاف وتقول لا وش اربعه الاف ما ابيها ثم ترجع البيت وتنزل موضوع في المنتدى ما فيه وظايف والحكومه مهملتنا وش هالعيشه وربي عيب استحي على وجهك ياخي ، لاتهايط في المركز، وترى اغنياء البلد وربي كانوا ما يلقون لقمة عيش لكن التواضع والاصرار شوف كيف خلى الرزق ينهمر عليهم ، وربي يقول اسع ياعبدي وانا اسعى معك ما قال دك يابو صالح في البيت وابشر بالعز .....


المرتبه #1



هياط المنتديات
وهذا ظهر بشكل كبير ، وصار الشين يهايط بزينه والغبي يهايط بذكاءه ، والجاهل يهايط بعلمه ، ويما خلف الشاشات من عاهات ، يعني لما تنزل موضوع في المنتدى قبل تهايط وتقول بقلمي وهو مو قلمك فكر ان القوم اللي يقرون مستأمنينك على كلامك ومصدقينك ،و قبل ما تبدي رايك وتهايط في موضوع عشان ترضي فلانه والا المشرف فلان ابد رايك الصدقي ولا يهمك ، وقبل تنتقد المواضيع وتهايط على اصحابها عشان تلفت الانتباه قدر التعب في الموضوع وابد رايك باحترام ، خل الهياط منك وتكلم باريحيه ، لان في الاخير والله لا وجهك ولا ملفك الشخصي ولا عدد مشاركاتك يعكس شي منك بقدر ما تعكس اخلاقك واسلوبك ، يعني يجي واحد وينزل قصيده ويجي واحد بعده ويقول بكل ادب وينتقد بيت والا ثنين مع ان الوجه العام للرد محترم فتلقى صاحب الموضوع يهايط ويقول انت تنتقدني وانا الشاعر فلان صاحب القصيده الفلانيه ومدري وش حقيقه قصيدتي فوق مستواك ، طيب دامك ما تقبل النقد لا تهايط علينا بقصيدتك ، والا اللي يتعب في موضوع بقوه وفيه بعض الاخطاء او الاختلاف ويجي واحد بعده ويبحث عن الاسقاطات ويشرشح الموضوع غاض النظر عن كل التعب والجهد لمجرد الهياط ولفت الانتباه لا اقل ولا اكثر ( ابن امه اللي ينتقد الموضوع حقي بعد هالكلام "فن التسليك" )


المرتبة # جميع ما سبق



هياط الشعر
هذا اوضح هياط على الساحة لكذا خليته اخر شي ، هياط عيني عينك وله جمهور مشالله تبارك الله تحف ، والحقيقه كان هذا النوع من الهياط على خفيف لكن بعد شاعر المليون ظهر بكل فخر ، كل شاعر يجي ويجر وراه قبيله والا دوله ، وكل قصايده هياط ، انا الشاعر اللي مدري وش ومدري وش ، انا اللي اطقع بالشعراء كلهم ، انا اللي المتنبي طالب عندي ، طيب دامك متاكد ليش جاي تشارك انتو وجهك ، وكلهم يدعي في قبيلته العزه والقوة والنجده والكرم والطهر وهو والله لو سالته وش اسم جد جده قال مدري ، ولو سالته عن حرب والا غزوة لربعه قال مدري ، واذا انتقدت شعره قال يحق للشاعر ما لا يحق لغيره ، يعني بالله يحق لك تهايط علينا ، ليه مغفلين لهالدرجه ، والا والاتحف اذا جاك شاعرين من نفس القبيله والفخذ وقام كل واحد يهايط على الثاني طيب ياحمير كلكم من عرق واحد كيف تهايطون على بعض ؟؟؟؟ يعني وش بتقول عليه ؟؟ بتقول انت اسم امك نوره ؟؟؟ لا والتحف اللي يهايطون في الغزل هذولا لحالهم زي حامد زيد وطقته ، اوما حامد زيد تحس ان البنات اللي يكتب فيهم خاينات وحقيرات وهو العفيف ابن الشريف ، وهو صاحب المبادئ والوفاء ، وربي طالت وباخت ابو زيد ، وسالم بن جخير العجمي رغم انه مدح يام وهي قبيلتي الا اني ما قبلت منه معظم ابياته فيها هياط وفخر غبي ، يعني يقول حنا نذبح الملوك وحنا نهز الجبال ونخوض البحر ومن هالكلام وهو يفحط بقصيده عند ملك والا شيخ ، اللي اخلاقهم كذا ياسالم ما يمدح ملوك ، عموما ماكن ودي اتطرق لاسماء لكن من باب التوضيح وكل قبيله معها خير ، والهياط في الشعر وربي ما قاد الا لنعرات وعصبيه ممقوته وفتن وذنوب ، شوفوا انا شاعر وقد وقعت في فخ هياط الشعر بقوه ومازلت لكن على الاقل معترف به واحاول اتخلص منه يعني مره في زواج لاخوي صرت افتخر واقول في ابيات لي :

بردنا ظل السيوف وغيرنا تحت الشجر
يشربون الماي عادة ونشربه نشف الكبود

لا التقا الصفين نكشف للعدى صدر ونحر
ونعرف الاعدا بقفاهم بين مدبر او شرود

نستبق للصف الاول هي هزيمه او نصر
المهم موته كريمه تحت انصال وحدود

ومالموت عارن ندفعه لكن لنا فيه الفخر
العار ضيمن تقبله وتعيش مرغوم السجود

نجير طيور السما والحوت في بطن البحر
ونجير جنن تفتزع وعظام في جوف اللحود

الى اخر القصيده وهي طويله والابيات ذي سرت في نجران بسرعه واعجبتهم وكنت فرحان الين قال واحد من الشيبان والله ما قالها الا شاعر بزر مهايطي يسمع بالفخر ، والحقيقه انه ما كذب لاني عمري وقتها 19 سنه وما قلت الا ما اسمع بس وكنت في قمة هياطي ، وتاثرت بكلامه واجد وتزوج واحد من اخواني قبل فتره ويوم جيت اقول قصيده في زواجه اكتفيت ببيت فخر واحد قلت فيه :

يكفي فخر اني على نهج أحمد الطاهر اسير
ويكفي فخر با خالقي انك الاهي اللي اعبده

فقال لي ابوي اشوفك ما هايطت هالمره ، قلت الا هايطت بربي ، قال الفخر بخالق السما حق مو هياط ....



شوي اطق اصابعي وربي طاقه وجهد يالربع غير طبيعي
ياحبي للتفلساف والتطويل ياناس
احس اني ضحيه كميه معلومات هايله في الجعبة
المهم ذا الي الله قدرني اكتبه هالمره



اللي يبي ينقل الموضوع عادي انا محلله بدون ما يكتب منقول