س / برنامج الابتعاث كيف طريقه ؟ يعني اروح ادرس لغه ع حسابي ثم الجامعه تكون ع حساب المملكه ؟

اللي أعرفه وعلى آخر الأخبار اللي عندي تدرس اللغة على حسابك وبعد ما تحصل على قبول جامعي غير مشروط تقدم ويتم إلحاقك بالبعثة .. وسمعت أنه قريبا جدا سيتم ضم أي شخص يدرس على حسابه بجميع الدول ولست متأكد من هذه المعلومة.
لكن دامك تقول مضبط وضعك رح وان شاء الله تمشي أمورك.


س / اقدر اخذ سيارتي معي هناك ؟ و اطلع رخصه هناك ؟ او ابيع سيارتي و اشتري هناك ؟
الأفضل تخلي سيارتك بالسعودية لأن القيادة في بريطانيا على الجهة اليسرى عكس المملكة.
أما بالنسبة للرخصة ، تقدم عن طريق البريد وبعد فترة تأخذ موعد للأختبار النظري والعملي وبعدها أحلى رخصة مدتها عشر سنين.
أما السيارة فمن السهل الحصول على سيارة هناك والأسعر جيدة ولكن تبعات السيارة هي المكلفة كالتأمين وضريبة الطريق ( رود تاكس)
والوقود والفحص ( أم أو تي) إلخ

س / ابي اتخصص شي اكون فيه مدرس انجليزي لعشقي له , وش افضل التخصصات اللي فيها انجليزي م ابي لغه فقط ابي تخصص كامل ؟
مافهمت السؤال زين لكن شكلك تقصد تبغى تتخرج مدرس انجلش .. وهنا بعد ما تخلص دراسة اللغة تقدم على الجامعة وهنالك أقسام للغويات والترجمة .

س / في المملكه كما يعرف اختبار قياس و تحصيلي ، فهل تحسب في درجت الشهاده او بس ياخذون الشهاده ؟
شهاد الثانوي تكفي .. لكن أنت قدامك دراسة سنة للغة وممكن تتغير أمور كثيرة .. ولكن إلى الآن اللي أعرفة أن شهادة الثانوي تكفي فقط. >>> أدرس ماجستير عشان كذا ماني متأكد من سالفة الثانوي واليكالوريوس ولكن على حد علمي شهادة الثانوي تكفي للتقديم.

س / السكن م ابي اسكن لحالي اقدر القى سواء عائله او اشخاص اسكن معهم ؟
نصيحة لوجة الله .. أسكن مع عائلة وعلى الأقل مدة التسة أشهر الأولى ( أنا من أهم الأشياء اللي ندمت عليها أني ما طولت مع العائلة ) لأنك مع العائلة راح تستفيد شيء كثير رغم التقييد اللي راح يكون ( عند بعض العائلات) ولكن بشكل عام الفائدة كبيرة وانت رايح بالطبع تبي تستفيد.
وبالنسبة للسكن في مدينة كبيرة كمانشستر فهو متوفر بكافة أشكاله و أنواعه.

س / يجوز اخذ معي اغراضي / مثل عطورات و ملابس و تلفزيون و رسيرفر و قهوه الخ .۔ او اروح اشتري هناك ؟
لان عندي رسيرفر ابو ظبي و ودي اشوف الدوري الانجليزي و السعودي ، و ان شاء الله احضر بعض المباريات
بالنسبة لمعاميل القهوة خذها وما جاك علي .. وجميع ما ذكرت تستطيع إدخاله والتلفزيون خله بالسعودية وتعال هنا اشتر لك واحد أفضل. والرسيفرات تشتغل وبالنسبة للدوري الانجليزي عندك قنوات سكاي اللي بتخليك تطلق أي قناة عربية وبالثلاث.
وبالنسبة لحضور المباريات عندك يونايتد وسيتي وتقدر تاخذ بطاقة عضوية واللي تبدا اسعاره من 20 أو 25 باوند بالسنة وميزتها يكون لك أولوية بشرا التذاكر.
وأسعار التذاكر تبدأ من 35 باوند للتذكرة .

س / قمر عربسات يشتعل هناك ؟
يشتغل .. وبالنسبة لتركيب دش العربسات يعتمد على موافقة صاحب البيت أو الشقة لأن دش العربسات أكبر حجما من دش الهوتبيرد لذلك هم يسمحون لك بتركيب دش الهوتبيرد والعربسات على حسب المزاج.

لكن حنا ما أتفقنا أنك بتكون مع عايلة >>> وش دخلك

يعني لا تشيل هم الدوري الانجليزي لوجود قنوات سكاي أما الدوري السعودي الله يخلي النت سرعات عالية واشبك الوصلة من الكمبيوتر للتلفزيون وتمتع بأحلى مشاهدة.


س / اذا لا سمح الله م حصل اروح على حساب الدوله و رحت ع حسابي ، و سكنت في مانشستر كم تتوقعون حجم صرفي لمدة دراستي كامله ؟ م ابي بالضبط ابي سعر تقريبي ..!

إذا بتسكن مع عائلة السعر مابين 420 إلى 450 باوند بالشهر وتكون شاملة الوجبات وأحيانا غسيل الملابس الخ.
أما اذا بتسكن لحالك .. فهنا الوضع يختلف .. اذا بتاخذ شقة بالشهر لن تقل عن 480 باوند + مصاريف الغاز والكهرب الماء والتلفزيون وغير مقاضي البيت واشتراك النت .. يعني الشغلة مكلفة شوي. طبعا تخف عليك المصاريف اذا اشترك بالسكن مع شخص أو شخصين.
وفيه سكن للطلاب سواء يتوفر عن طريف المعهد أو الجامعة أو عن طريق مكاتب العقار وهذا عادة لا يقل عن 450 باوند بالشهر شاملة الفواتير وبعضهم يطلب منك تدفع القيمة كاملة ومقدما.

طبعا غير المصاريف الشخصية اللي راح تكون كحد أعلى 50 باوند في وسط الأسبوع ولمدة شهر = 200 باوند
30 باوند في الويك اند لمدة شهر = 120
المجموع 320 باوند . ( مدة الشهر = 4 أسابيع) عشان تكون الصورة واضحة لك.
( طبعا المصاريف الشخصية تختلف من شخص الى اخر)

أما بالنسبة للمعهد فيختلف السعر من معهد لآخر وكذلك المدة والوقت الذي ستأتي فيه ، ولكم بشكل عام كل ما حجزت بوقت مبكر ودفعت المبلغ كاملا ولمدة طويلة ستحصل على خصم جيد ( وهذا بالنسبة لكل شي في بريطانيا وخذها مني عن طريق تجربة ).

يعني نقول الشهر راح يكلفك إذا بتسكن مع عائلة كالتالي: 430 باوند عائلة + 320 مصاريف شخصية + 750 باوند في الشهر طبعا غير سعر المعهد.

* الأسعار تقريبية وخاصة المصاريف الشخصية قد تزيد أو تنقص.

و موفق إن شاء الله .

أتمنى أن أفدتك ولو بشي بسيط.

ماقصر اخوي فيرست ون كفى ووفى