السلام عليكم

ياناس ابي اعرف وش الزين بالتطعيس دق علي خويي من صباح الله خير قم الجو روووعة وانا اقول بنفسي ياليل هالسعوديين ماقد شافوا سحاب <<<<يبي يعلمكم انه مولود بالريف الفرنسي

المهم طلعت معهم واخرتها ع طعوس ع طريق الدلم كل دداسن الخرج واي سيارة لها صندوق(حوض) تلقاها هناك وبرررد ومطر واا قاعد اطالع هالسيارات اللي ترقى وتتزل وسيارات تغرز

الله يصلح اخوي اللي مزعجني ع التطعيس ومطامر من ديرة لديرة عشان هالتطعيس


المهم هي هوايات واذواق مثل مافي ناس صوفية ماتحب الكووورة في ناس ماتت ع الكورة

المهم خلني اتكلم بموضوعي اللي بالعنوان

كان قبل سنتين في واحد من عيال حارتنا تقاعد ابوه ونقلوا للرياض عااد حنا لنا سنتين تقريبا ماشفناه من يوم نقل

جاا واحد من اخوياي اللي بحارتنا القديمة قال علاوي تذكر خوينا فلان قلت اي صحيبك قال اي قال انت عندك شي الخميس عاادي اطلع معك بسيارتك للرياض

قلت اووك نو بروبلام انا بشوف اهلي ان ماكان يبون مني شيء ثم بعلمك

جا الخميس وخلصت مشاوير اهلي وكلمته قلت هاا بينا نطلع له قال يلا
قلت كلمه شف وين ساكن قال طيب رحت اصلي العشا
يوم طلعت كلمت واحد من اخوياي - اعز اخوياي- قلت بطلع بعد شوي مع فلان للرياض يبي يشوف صقيق له يعزه واجد له سنتين ماشافه

قال لنا صقيقي مالك دااعي ليه انت تعطي فلان وجه كنسل الطلعة فلان مايستاهل ومافيه خير
والله ذا اللي تسويه له ماراح يفيدك هو بشيء
قلت ولو انا وعدت الولد وان شاء الله ماراح نطوول قال شف انا حذرتك وقلت لك والله مايستاهل تسوي له شيء
قلت له شف انا ماابي ازعلك بس ماراح اطول برجع بدرري وابي قابلك واتكلم معك

الولد عصب وسكر -سبحان الله صدق احساسه-

مريت خويي وطلعنا لخويه للروضة قال وقفوا سيارتكم ومشينا بسيارتي

طلعنا وتعشينا ولفينا ومن هالسوالف ثم شوووي بدا يدخل بحواري اول مرة اشوفها بحياتي مدري وش والتفت علي صقيقي قال نبي نشتري حشيش الا الثاني قال يلا كم معك ياعلاوي

ياولد ياهوووه وش حشيش وش هالحتسي فكوني

قالوا والله مايسوي شيء وفلة ومحدن داري هذا انا اللي امشي معك اغلب الايام تشك اني محشش لا هاذني احشش ومستانس

فكوني ياعيال انا مامعي الا اللي لحاجتي ومانيب دافع شي ولو معي ماراح ادفع

قالوا ليه وراك صاااير بزر يااخي عاتي وحدة ماتسوي شيء

المهم تهاوشت معهم وخليتهم يرجعوني لسيارتي وعلطول ع الخرج وكرهت الساعة اللي وديت الولد فيها ولا مشيت معه

واللي قاهرني اكثر اني كذا مرة يغلط علي وانا بقلبي امشيها له واقول مافي احد مايغلط الين بغيت اكلها ع راسي بالاخير

طبعا يوم علمت خويي عن السالفة قال لي انا قايل لك لاتمشي معه وهو مايستاهل تضيع وقتك وتمشي معه بس انت ماتاخذ الامور بجدية وع نياتك وهالشيء في هالوقت نساه هالوقت مافيه خير وكل الناس مصالح

طبعا وهو يتكلم لي وينصحني

جا ببالي ولد خالي

ع نياته ومايذي احد ولو تطلب ايش سواه لك والعيال هنااك مستغلينه استغلال غير طبيعي

لاجاا قالوا له يافلان والله اننا جوعانين وش رايك تباشر لنا بعشا يقول يلا مشينا ويعشيهم بالمئات
ومن يوم يلقيهم ظهره والله ياه يتكلمون فيه ويضحكون عليه لين تتقطع بطونهم من الضحك

السؤال هنا
1- هل طيبة القلب هـ الزمن تعتبر دلاخة ؟
2-وش اللي يخلي الناس في هالزمن زي الوحوش تاكلك وان صرت ماراح تنفعهم بشيء رموك ولا التفتوا عليك ؟
3-ليه اللي لسانه طوويل او فلوسه واجد هو الحلو واحسن انسان بالارض وماجابت مثله الامهات واللي ع نياته او فقير لاابوه لا ابو من جابه لدرجة ان بعض الناس تقول انه سبب خروج المنتخب السعودي من اسيا ؟


لي عودة مع ردودكم ان شاء الله