إخواني الأعزاء
السلام عليكم

قبل شهر رمضان المبارك كان لنا موعد مع حبيبنا (أبو فهد) اللي أتحفنا بالأجزاء السابقة بالعديد من الأفكار والآراء ، وكان آخر ما تحدث عنه في الجزأين الرابع والخامس عن الصحافة ... وطالب أبو فهد الصحافة بالحرص على تطوير نفسها بإنشاء بنوك معلومات تحتوي على بعض البيانات الأساسية التي أعطانا نموذجاً منها ... والتي تساعد على تطور ورقي الرياضة ...؟؟؟

وبعد استراحة بسيطة (فترة العيد) ... عاد أبو فهد في الجزء (6) ... وأرسل عدة رسائل تهم الهلاليين عموماً (رئيس النادي – أعضاء الشرف – اللاعبين – الجماهير) ... واليوم يتحدث أبو فهد بشكل آخر عن موضوع هام يجهله الكثير من المشجعين الرياضيين ... خصوصاً (حديثي العهد بالرياضة) ...؟؟؟
وإليكم أعزائي هذا الحوار اللي أتمنى أن يعجبكم ... مع حبيبنا (أبو فهد) ...؟؟؟؟

.............................................. صحافة الأندية ................................................................

أبو محمد : يابو فهد ... عندي أستفسارات وأسئلة ... ما أدري من وين أبدأ ... عن أسباب حالة (الكره والعداء) بين الجماهير الرياضية ... وتخصيص الهلال بالدرجة الأولى ... والطعن بالنزاهة (نزاهة المسابقات – نزاهة الحكام – نزاهة الرياضيين) ... هالخرابيط والمهازل اللي نشوفها ... تضيق الصدر ... ودي أعرف أسبابها ...؟؟؟

أبو فهد : هذا موضوع طويل وشائك ... والمشكلة إن كل من يفسر ويتفلسف فيه على كيفه ... واللي تشوفه صح ... يشوفه غيرك غلط...؟؟؟

أما بالنسبة لتخصيص الهلال ... ببساطة ... (كل ذي نعمة محسود) ... والهلال ولله الحمد (بنعمه) ... ما يجحدها إلا جاهل ... ومن يوم عرفناه وهو بكفه والباقين يكفه ...؟؟؟

أبو محمد : ودي أعرف وجهة نظرك ... خصوصاً مثل ما تعرف ... كل ما صار شيء ... قالوا الصحافة هي السبب ... وكل كلمة وكلمة سمعنا اللي يقول ... الصحافة سوت ... قالت ... فعلت ... تركت ... جابت ...خلت … ؟؟؟
نبي نرجع للماضي ونعرف وش قصة الصحافة ... وأساس هالإتهامات ... ومنبعها ... علشان نعرف ... هي إتهامات صحيحة وإلا لا … أو إنها كبش فداء ... وبعدين اتهام صحافتنا إنها صحافة أندية ... ولاحظ سؤالي عن الصحافة ... وليس الصحفيين ...؟؟؟

وإذا كانت صحافتنا صحافة أنديه ... فهل نستطيع تصنيفها وفئاتها ... ؟؟؟

أبو فهد : أقول ما شاء الله عليك هذي أسئلة ... هذي أطروحة (تخرج من الجامعة) ... اللي يجاوبها يأخذ شهادة (الدكتوراه) على طول ... هالمشكلة إذا حليتها ... بتصير معجزة القرن الجديد ...؟؟؟
وبعدين يوم تسألني هالأسئله ... أنت شايفني خبير زماني ...... أو تبي تحرجني ...؟؟؟

أبو محمد: الموضوع سواليف ... وأنت عندك (علوم) نبيها ... قل اللي براسك ... وما أحد بيحاسبك ...؟؟؟

أبو فهد : والله يلخوي هالموضوع حلو ... وسواليفه زينه ومهمة ... شكلك بتفتح جبهات جديده وجيده فيه ... الله يستر... ؟؟؟
خل أبدأ بالنهاية قبل ما أنسى ... بالنسبة لقولتك صحافتنا (صحافة أندية) ... أقولك ببساطة ... (وبتعصب) ...؟؟؟

أما مسألة إنك تتكلم عن الصحافة والصحفيين ... وعملية تصنيف الجرايد ... وذكر كل جريدة وميولها ... أو ميول محررينها ... هالمعلومه يعرفها أي شخص يتصفح الصحف السعودية ... تقدر تعرف ميول أي جريدة أو كاتب وأنت تتصفحها ... لكن هالموضوع مافيه فايده ...؟؟؟

والصحف ومعظم الصحفيين كتاب مفتوح ... معروفي الميول والإتجاهات ... ومن وجهة نظري الخاصة (حنا أكبر متعصبين في العالم) ...

وخلنا نتكلم بشكل عام ... عن تاريخ الإعلام بشكل عام ... وبعدين نتكلم عن الصحفيين (كمجموعات) حسب ميولهم ... بدلا ما نتكلم عن الجرايد ... ولا عن أشخاص بعينهم ... لأني أشوف إن كل مجموعة صحفيين يميلون لنادي معين ... في الغالب يمشون بنفس الطريق ... وفي النهايه هي سواليف الله يعينا عليها ... لا يزعل علين أحد ...؟؟؟

أبو محمد: تفضل يابو فهد ... ما راح يزعل أحد ... أنت قل رأيك ... والإخوان يعقبون ويصححون ... المهم الموضوع يكون إيجابي ومفيد ...؟؟؟

وأخذ أبو فهد نفس عميق مثل ما هي عادته إذا كان متحمس ومتنرفز شوي ... وبعدين إنتبه لنفسه وقال بهدوء ...؟؟؟

.............................................. الإعلام الرياضي ......................................................

أبو فهد : في البداية ودي أتكلم عن الإعلام الرياضي بشكل عام ... تقدر تقول إنه مر بأربعة مراحل مختلفة ... ؟؟؟

أبو محمد: وشلون يعني ... هذا تصنيفك الخاص ... وإلا من وين جبته ...؟؟؟

أبو فهد : حنا نتكلم عن الإعلام الرياضي ... ما نتكلم عن الرياضة... مثل ما قلت لك مر (بأربع مراحل)؟؟؟
تقدر تعتبر المرحلة الأولى (ما قبل الدوري الممتاز 1396هـ)... وأسميها مجازا مرحلة (طقها وإلحقها)...؟؟؟
والثانية (مرحلة الدوري الممتاز)... ؟؟؟
والثالثة مرحلة (المربع الذهبي) ... ؟؟؟
والرابعة مرحلة (الإنترنت) ...؟؟؟

أبو محمد : وشلون وزعتها على هالمراحل الأربعة ... ممكن توضح قصدك ...؟؟؟

.............................................. المرحلة الأولى .......................................................

أبو فهد : مثل ما قلت لك حنا هنا نتكلم عن الإعلام فقط ... وأنا وزعتها على هالأساس...؟؟؟

المرحلة الأولى (ما قبل الدوري الممتاز) ... أو مرحلة (طقها وإلحقها) كروياً ... هي مرحلة (البناء) للإعلام الرياضي ... ؟؟؟

تقدر تقول إن التنافس ...(الإعلامي)... فيها كان تقريباً على مستوى أندية المدينة الواحده ... بالدرجة الأولى...؟؟؟

وكل مدينه لها جرايدها (الرياض والجزيرة) بالرياض ... و(عكاظ والمدينه والبلاد والندوه) في جده ... وعدد قراء الجرايد قليل ومحصور ...؟؟؟

أما التنافس بين صحافة الوسطى والغربيه فكان ينحصر في وقت النهائيات ... لأنها مباراة وحده أو مباراتين في السنه (مباراة نهائي كأس الملك أو ولي العهد) فقط لاغير...؟؟؟

والتنافس بين (الإتحاد والأهلي) في جده ... سيطره إتحادية في الإعلام ... وأهلاويه في الملاعب ...؟؟؟

أما بالنسبة في الرياض فالإعلام (هلالي) 100% ... والسبب إن الهلال ظهر كفريق بطل عام 1381هـ ... ... حتى نهاية الثمانينات ... وأكل الجو...والجماهير ... وسيطر على الساحة ... ولا كان له منافس ... ينشد فيه الظهر...؟؟؟

وفي أواخر الثمانينات الهجرية حتى منتصف التسعينات ... إختفى توهج الهلال (لأسباب يجهلها الكثير) ... وابتدأ نادي النصر يظهر كمنافس في الساحة (بدون بطولات) ... وأكثر مشجعينه هاك الوقت من (الجاليتين اليمنية والسودانية) ... مع ملاحظة أن أول بطولة نصراوية في منتصف التسعينات الهجرية ... وكان جمهور النصر (السعودي) القليل جداً هاك الوقت ... من النوع اللي شجع النصر (كرها بالهلال) ... والتركيز الإعلامي والجماهيري عليه ... أو من جماهير الشباب اللي إنتهى غاب فريقها ...؟؟؟

أبو محمد: هالكلام يبي له تفصيل ... لكن أخاف نطلع خارج موضوعنا ...؟؟؟

................................ المرحلة الثانية (الدوري الممتاز) ............................................

أبو فهد : خلنا في موضوعنا هالحين ... ولاحقين على الباقي ... المهم ... جت المرحلة الثانية ... (مرحلة الدوري الممتاز) ... اللي ابتدأت في منتصف التسعينات الهجرية ... واستجد فيها الكثير على المستوى الرياضي ...؟؟؟

ترأس الأمير فيصل بن فهد (رحمه الله) رعاية الشباب ... وابتدأ بتغيير شكل المنافسات...؟؟؟
أوجد دوري جديد ... وصارت المنافسة على مستوى المملكة ...؟؟؟
أخذ التنافس الإعلامي ... شكل وبعد جديد ... صار طوال الموسم ... بدلا من مباراة واحدة فقط ...؟؟؟

وبنظرة سريعة لحال الأندية هاك الوقت...؟؟؟

تجد التنافس ثلاثي بين (الهلال والأهلي والنصر) ... أما الاتحاد فكان في فترة البيات الشتوي اللي بدأها من منتصف الثمانينات ...؟؟؟
وبدأ الدوري بقوه ... وبدأت مرحلة اللاعبين الأجانب ...؟؟؟
ولا تنسى إن في نفس الوقت حدثت فترة (الطفرة) المالية في البلد ...؟؟؟
وأيضا صار البث التلفزيوني عام ... على كل مناطق المملكة ...؟؟؟
يعني أخذت منافسات الدوري ... بعداً آخر ...؟؟؟
وجماهير جدد (طازه) ... تتابع الدوري مباشرة على مستوى المملكة... وخارجها...؟؟؟

وطبعا نتائج هذه الفترة ... ازدياد جماهيرية نادي الهلال اللي استطاع أن يفرض وجوده بقوه كطرف ثابت ...؟؟؟
الهلال بطل أول دوري سعودي ... وثالث دوري ... وصاحب أفضل سجل بالدوري من بدايته ...؟؟؟
وتلاحقت البطولات المحلية والخارجية ...اللي صار فارسها بدون منافس...؟؟؟

ودخل نادي النصر كطرف قوي على المنافسه ... وبداية تواجد جماهير (سعوديه) تشجعه ... معظمها جاء عن طريق (ماجد) ... اللي ظهر هاك الوقت ...؟؟؟

وشهدت الفترة ... ظهور تنافس صحفي على مستوى المملكة ... بين صحافة الوسطى (الرياض-الجزيرة)... التي تسيدت الساحة... وصحافة الغربيه (عكاظ- المدينة –البلاد – الندوه) ...؟؟؟

ازدياد قوة الصحافة الأهلاويه على حساب الإتحاديه ... التى وجدت نفسها (لا في العير ولا في النفير)...بسبب تواضع مستوى فريقها ... وبعده عن البطولات...؟؟؟

اتجهت الصحافة الاتحادية إلى البحث عن وجودها ... ففريقها متهالك ... لكنها وجدت ضالتها في (النصر) ...؟؟؟

فتحت صحافة الاتحاد الباب على مصراعيه لصحافة بائسة... كحال فريقها ... ديدنها خالف تعرف ... تعتمد على (الطعن والتشكيك والإقلال من الآخرين) ... والسبب بتشوفه بتحليل نفسي خاص ... بالجزء القادم من سواليف أبو فهد ... بإذن الله ...؟؟؟

تسيد الصحافة الهلالية الساحة بدون منافس... وإخراجها لصحفيين كبار ... أصبحوا قياديين في أكبر الصحف والمجلات العربية الموجودة حاليا ... أمثال (السديري – العمير- العوام – الراشد- العتيبي- الأحمدي - الضويحي- الوعيل - وغيرهم وغيرهم كثير أخاف أعدهم وأنسى بعضهم) ...؟؟؟

دخول نادي النصر كطرف قوي على المنافسة ... وبداية تواجد جماهير (سعودية) تشجعه ... معظمها جاء عن طريق (ماجد) ...؟؟؟

.............................................. المرحلة الثالثة (المربع الذهبي).......................................

أبو محمد : طيب ليش يابوفهد فصلت ...(فترة الدوري)... إلى مرحلتين ... مرحلة الدوري الممتاز ومرحلة (المربع الذهبي) ...؟؟؟

أبو فهد : موضوعنا الرئيسي ... (الإعلام) ... والإعلام تغير في كل مرحلة من هالمراحل الأربع ... وأخذ توجهات جديدة ...؟؟؟

في فترة المربع الذهبي ... أخذ الإعلام ... طريق جديد ... ضحيته الأولى ... الرياضة الشريفة ... ثم الجماهير ... ثم (الحكام) ... لأن وضع الدوري ومنافساته ... ممكن ينتهي ... بصافرة حكم ... علشان كذا ... بدأ الضغط عليهم ... وابتدأت الشكوك بالنوايا ... والمشكلة ... إن كل واحد ينظر لمصلحته الخاصة فقط ... (أنا ومن بعدي الطوفان)... وطبعاً أصحاب الإثارة وزعمائها معروفين...؟؟؟

وإذا راجعت الأحداث اللي تصير كل سنه ... في فترة المربع الذهبي ... تشوف الهوايل ... وتحس إن اللي عندنا ... (طاسة ضايعة) ... وما راح يلقاها أحد ...؟؟؟

والمشكلة إن هالفتره صاحبت الإنجازات السعودية ... اللي تزامنت مع ظهور الفضائيات ... وصار ظهورها إعلاميا ... أشد مرارة ... لأننا مثل (عنز بدو طاحت في مريس)...؟؟؟

ولا تنسى (المشاركات الخارجية للأنديه) ... بطولات الخليج والعرب وآسيا ... اللي تسيدها الهلال ... والمنتخب بعد عن طريق لاعبين الهلال بالدرجة الأولى ...؟؟؟

وطبعاً ... لإنعدام الوعي ... عند فئة كبيرة من الرياضيين ... والغيره وغيرها ... إختلط الحابل بالنابل ... والغث بالسمين ... وكل ذي نعمة محسود ...؟؟؟

وطبعاً دخلت في نفس الفترة (المرحلة الرابعة... مرحلة الإنترنت) ... اللي كملت المشوار ... بشكل أسوأ...؟؟؟

.............................................. المرحلة الرابعة (الإنترنت).......................................

أبو محمد : يعني أنت فصلت مرحلة الإنترنت عن اللي قبلها ... ؟؟؟

أبو فهد : هي مرحلة مختلفة عن الثالثة ومكمله لها ... وباختصار ... المرحلة الرابعة ... هي المرحلة اللي ضاعت فيها كل الأسس ... فالصحافة صارت ظالمة ومظلومة ... بعد أن كانت ظالمة ... لأنها زرعت في السابق ... والآن حصدت ... والمشكلة إن صحفيين هالوقت ضحايا السابقين ... مثل ما يقول المثل ... (هذا ما جناه علي أبي) ... ؟؟؟

وصار الشق أكبر من الرقعة... وضاعت بالصحافة بالطوشة ... لأن الطاسه ضايعه أساساً ... ولا عاد تعرف منهو قبيلك ... فلت (الحبل على الغارب) ...؟؟؟

والمشكلة إن الصحافة الآن ... مليانه برجال ... وزنهم ذهب ... واعين ... مثقفين ... لكن للأسف صوتهم مسموع على نطاق ضيق ... طلع لهم منافس جديد ماهو بالحسبان ... والمنافسه هنا على التقبل الجماهيري ... وتقبل تالجماهير غير عن تقبل المسؤولين...؟؟؟

لأنه طبعاً الجيل جديد... (جيل الإنترنت) ... يكتب فيه الجميع ... المتعلم والجاهل ... الكبير ... والصغير ... الصاحي والمجنون ... لكن نسبة المتابعين له من (الصغار) مرتفعة ... وهذولا شعارهم ... (لا أعرف ... ماذا أقول ... ما أريد ... ما أفعل) ... ولكني أبغي أكتب وأتكلم ... وأنا أبحث عن الإثاره وكل ما هو مخالف ...؟؟؟

وهالجيل طبعاً ... مندفع ... وبدون وعي أو إدراك ... للنتائج اللي بيحصدها ...؟؟؟

وطبعاً لأن تربيته (الرياضيه) ... دمــــــــار ... ومثار شك ... والمتهم الأول فيها الصحافة ... والأسس عنده مفقوده ... فالنتيجة طبعاً فتاكة ... واللي يزرع الشوك ما يجني العنب ...؟؟؟

وكان الله غفوراً رحيما ...؟؟؟

إخواني الأعزاء أتوقف عند هذا الحد ... ولا نتستغني عن ملاحظاتكم للموضوع ... وأتمنى من الإخوة الإعلاميين تصحيح آراء أبو فهد إن وجدت ...؟؟؟

وسنتابع حديثنا مع أبو فهد بإذن الله في تفصيل دقيق وفلسفة خاصة في تقسيم صحافة الأندية ... واللي يصبرنا وإياكم على هالسواليف ... والله يكون بعون أبو فهد ...؟؟؟

وتقبلوا تحيات أخوكم ( أزرق هلالي) ... والسلام ختام ...؟؟؟

يا سلااااااااااااااام رائع قلمك