نادي الهلال السعودي - شبكة الزعيم - الموقع الرسمي - لاول مرة بحياتي اشيل ميت بسيارتي :(

السلام عليكم

يووووم غريب جدا من اغرب ايام حياتي ع الاطلاق

اخواني قبل ماتقرون الموضوع الفائدة من الموضوع دعوة من قلب واحد منكم تفرح اسرة حزينة

بتكلم اول شي عن بداية يومي

صحااني خوويي قال علاوي ممكن سيارتك نص ساعة بودي اختي مشوار قلت من عيوني
قال يلا تعال عشان اخذ السيارة وبسررعة

غسلت وجهي ومالى ذلك وادعس ع الموتر اللي انا عند بيتهم طلع قال ماراح اطول سااعة بس وانا مستعجل مايمدي ارجعك بيتكم بقطك بالبوفية اللي بالحارة وبرجع لك

قلت اووك البوفيه انا مااحبها بس مجبر عليها افطرت وجلست اطالع في الناس الا واحد ثاني داق علي قال لايكون نايم قلت لا قال اجل امش المقهى قلت ماعندي سيارة قال يلا بجيك جلست انتظر عند باب البوفية ممكن ربع ساعة وبس طلعت قلب الجو عج ولعب بشوشتي وصرت مغبر
توني متكي مع الولد وهو يفطر الا خويي اللي معه سيارتي قال وينك قلت انا مع فلان قال بليزز صرفه انا معي اختي شهودة (3 سنين) :smilie47: بمررك وانا مو فاضي ينشب لي وهو يدخن ولا ابي اختي تشوف احد من العيال يدخن
صرفت الولد ومرني وطلعت معه افطرت وياه مع اخته لبى قليبها
قال علاوي بتروح الرياض اليوم قلت اي بروح ولا ودي اروح طفشاان

قال ممكن اروح معك اخوي عبادي هناك وبجيبه من بيت عمي بالنظيم :to:
قلت نو بروبلام انا بستاذن من الامريكي ونروح نجيبه سوا قال اوك

راح بيتهم وانا رجعت البيت اضبط وضعي قبل لاامشي للدوام الساعة 2 ونص الظهر
رحت خذته
وطلعنا وكانت اول المفاجات الدايري الشرقي خفيفة الزحمة فيه
رحت استاذنت ورحنا النظيم خذنا خوينا وصلينا المغرب باحد المحطات ودعسنا للخرج
وصلنا قال علاوي انا بنزل اشوف اهلي ان كان يبون شيء ثم بطلع معك نبي نروح للمساج قلت اوك

نزلته ورحت بيتنا وصليت العشا وعقب الصلاة كلمني قال يلا قلت يلا

طلعت معه قال نبي صرافة للرياض ابي اسحب فلوس المساج والعشا ورحنا صرافتين ومارضوا يعطونا فلوس
قال خويي مشينا للبنك نفسه عسا صرافتهم كويسة
طبعا ع طريق البنك في سوق خيري توه مفتتح فتحت الاشارة خضراء الا ونشوف النااس تركض وتجتمع بنص الشارع
الا ونطالع الا ذاك الولد اللي طايح بنص الشارع ومايتحرك والعالم تقول لحد يلمسه ولحد يسوي شيء ومدري ايش

عاااد خويي اخته دكتورة ماشاء الله

ابو الولد منجن قاعد يصيح بالشارع والعالم تمسكه وهو يقول اسعفوه اسعفوه لايمووووت :cry:
والعالم تقوول خلوا الاسعاف يجي
انا وخويي عارفين لكاعة الاسعاف ونشيله ونحطه بسيارتي وع اقرب مستشفى وكان مستشفى المصانع الحربية (القوات المسلحة) :to:
وننادي السسترات تعالوا وهم يالله يمشون يوم شافو الولد ميت قالوا خلاص شيلوه وحطوه ع السرير
نشيله ونحطه ع السرير ويدفونه ويدخلون بالغرفة
ويجي الامن يطلبنا انا وخويي وخذ اثباتتنا وقعدوا يسالوننا وش يقرب لنا ووين الحادث ووين ابوه واهله ومدري ايش
وحنا نقول ابوه منجن بالشارع مو مصدق اللي صاير له قالوا خلاص بنحاول نكلم المستشفيات المجاورة لا جاهم يجبونه لنا
ربع ساعة الا الابو جااي منجن يبي يشووف ولده والامن يمسكونه ويهدونه
دخل ع ولده الا الدكتور يقووول ان الولد رجعت نبضات قلبه والحمدلله
والحمدلله هدى الابو شوووي يوم طمنه الدكتور

فجاة دخلوا 3 سمران شباب قالوا يبون يتطمنون ع الولد من انتم قالوا احنا نعرفه ومدري ايش
دخلوا وفجاة طلعوا يصيحون ويسئلهم خويي من انتم قال حنا اللي صدمناه وجايينا نتطمن عليه ونسلم خوينا وهو جااي بنفسه

مسكه العسكري بغرفة لحاله

قال خويي امش خلنا نروح نتعشى ونروح مساج ونرجع لهم
رحنا وخلصنا شغلنا ورجعنا

وجانا خبر ان الولد بنسبة كبيرة متوفي دماغيا ويحاولون يعالجونه قد مايقدرون

اخواني اعضاء الشبكة ام الولد للحين ماتدرري عن ولدها والاب للحين محتار وتعباان الولد عمره تقريبا 8 او 9 سنوات

تكفووون دعوة صادقة من قلب احد منكم ماراح تظره شي راح تشفي هالولد باذن الله

والولد هو البكر وهو حاليا في حالة بين الشفاء والمووت

فتكفوون لاتنسونه من دعواتكم وانا بعلمكم الجديد ان شاء الله في الردود الجاية بروح الصبح بتطمن عليه انا وخويي

اسف ع الاطالة وتضييق الصدر

تحديث : الولد انتقل الى رحمة الله اليوم الساعة 9 والنصف صباحا وتمت الصلاة عليه بعد ظهر اليوم ودفنه
انا لله وانا اليه لراجعون :cry: