سلام يالربع

صبحكم الله بالرضا والعافية

قال الشاعر حطان بن المعلى في بيته المشهور

انما اطفالنا بيننا ----- اكبادنا تمشي على الارض

انا اعيش في بيت مليان اطفال كما اسلفت

يعني بزران في كل مكان

وبزرانا غريبين

تحسهم يكبرون بسرعه

يمكن بحكم البيئه

المهم

بحكم كثرتهم تجيك احيانا مواقف بريئه حلوه منهم

وانا ادرى اني سبق ونشرت موضوع مشابه

لكن لموقف واحد

وابغى اذكر هنا مواقف كثير صارت لي معهم

وعلى فكره

تروني من الاشخاص اللي يحبون الاطفال ويجلسون معهم بالساعات
الاطفال الاولاد طبعا
البنات ما ادناهم
ولا ادنى دلعهم

بسم الله

الموقف الاول :

الابطال : شخصي الكريم ، ولد اخوي عزوز (4 سنوات) ، بنت اخوي سارونه (7 سنوات)
الموقع : نجران فديتها في بيت الشيبه (الشيبه يعني ابوي )
الزمان : ليلة عيد الفطر.


طبعا ليلة عيد يالربع والدنيا كلها انوار وفرحه وعزايم ولبس جديد وحركات
خرجت من البيت
لقيت عزوز وسارونه عند نخله ويتأملون بحرص
جيتهم قلت وش الاطفال يسوون هنا ؟؟؟؟
قال عزوز بكل وقاحة : انقلع ياحيوان
قالت سارونه : عيب هذا عمو
قال لها : كلي تبن
هنا قلت لازم اكون عم وأؤدي دوري التربوي
وقلت صدق كلي تبن وش دخلش ههههههههههههههه
قالت سارونه : عيب والله اعلم بابا
المهم قلت لهم وش انتو تسوون ؟؟
وش تتوقعون طلعوا يسوون الاخوان ؟؟؟
لقيتهم واضعين جعفيه (خنفساء) سوداء في كيس شبس ويقولون يلا كلي بسرعه
هههههههههههههههههههههههههههههه
ومسكرين الكيسه ويرجونها رج مو طبيعي
والجعفيه مره تقوم ومره تطيح ومره تدعي علي انا
كأن لسان حالها يقول ( شرهتي عليك يالعاقل)
المهم خاصمتهم وقلت لهم عيب هذا حيوان له احساس ومدري وش
وقلت لعزوز ترضى احد يحطك في كيس شبس ويرجك ويقول يلا كل بسرعه
فتاملني شوي وقال ايوه ودي يصير عندي بطاطس واجد
هههههههههههههههههههههههه
بيني وبينكم حشرني
المهم اطلقت الجعفيه وضربتهم ضرب خفيف على يدهم ( ويمكن نختلف في كلمة خفيف يالربع )
ورجعت للحل التقليدي وقلت : والله من زد شفته مسوي كذا لاسوي واسوي
البنت بكت على طول
وعزوز يقول والله سهله والله العظيم سهله
تحسون انه يقهرني
ثم يوم اطلقنا الاخت جعفيه
جلسنا نناظرها وهي تروح
وعزوز في قلبه حسره (كأنها حسرة الذيب لا هربت منه غزاله)
فيوم توارت عن الانظار (شرايكم في توارت وربي متعوب عليها )
جلس عزوز يناظرني بقوه
وقلت في خاطري خلاص الولد يبي يقول كلام حلو ويتوب
وبعد تامل في ملامح وجهي طويل من قبله
قال تصدق انك حيوان
وراح
ههههههههههههههههههههههه
ياحبي لك ياعزوز


الموقف الثاني :
الابطال : عزوز المذكور اعلاه ، سارونه المذكوره اعلاه ، اخوي عزوز الصغير (3 سنوات) ، شخصي الكريم
المكان : حديقة حيوانات الرياض
الزمان : الاجازة الصيفية.


كنا في الاجازه وبحكم حبي للاطفال قال اخوي الكبير ابو عزوز خذ الاولاد وومشهم في الرياض
قلت ابشر واتفقنا نروح حديقة الحيوان
عزوز ذكي جدا ونبيه وسارة مفهية واخو عزوز يسميه عزوز العبيطة لانه بيني وبينكم صدق عبيط الولد
دخلنا حديقة الحيوان
وعزوز ما فيه حيوان يعجبه ابد
والعبيط مو عارف اصلا انها حيوانات همه العصير والشبس
وسارونه بغت تنجن من حبها لها
وانا اصور واعلق وافر بهم
طبعا باذكر لكم هنا تعليقات عزوز على كل حيوان
والمشكلة انه يعرف اسمائها من الروضه
لكن في الروضه اشكالها رسمات وحلوه وعلى الطبيعة اشكالها غير
اسمعوا بس التعليقات :
الدب : يسميه دبدوب غصب ويقول ليش لونه مو ابيض واسود وليه وصخ كذا .
الزرافه : الحيوان الوحيد اللي اعجبه ويوم وصلنا له قال زي خالي حسين ههههههه ( ذبه دايما نقولها لخاله حسين لانه طويل نقول له يالزرافه )
الفيل : قال معه يد في وجهه ههههههههههههههههه
الجمل ابو سنامين : هذا حير الاطفال صراحه عشان السنام الاكسترا ذا لانهم متعودين على البل في الديره وقالت لي سارونه ليش ياعمو معاه ظهرين
طبعا كالعادة انتظر عزوز يقول لها اسكتي لكن ذي المره التفت لي وقال صدق ليش معاه ظهرين قلت امممممممم عشان واحد اسبير هههههههههه
حشروني وش اقول
المهم الحيوان اللي بعدو
الفهد: يوم وصلنا للفهد قلت وهذا الفهد العربي قال عزوز لا هذا نمر قلت لا فهد قال والله المعلمة حنان تقول انه نمر قلت والله العظيم فهد انا ادرى قال انت حيوان هذا نمر قلت نمر نمر الله يلعن اللي يزعلك ويزعل المعلمه حنان ياشيخ
القرود: طبعا عارفين وش التعليق سارونه ما ناظرت تقول عيب مو لابسين وعزوز يقول حيوانات ما يلبسون حفاظات زي عبيطه وقال لي ليه فيهم دم تحت قلت مو دم كذا لونهم قال لا دم فحسيت ان حوار النمر والفهد بينعاد فقلت دم دم خلاص اللي ودك قال طيب ليه دم قلت اممممممممم عشانهم ما سمعوا كلام امهم وامهم خبطتهم كلهم قال طيب ليش امهم فيها دم بعد قلت لانها ما سمعت كلام زوجها وضربها قال وين زوجها قلت راح الدوام قال اهاااا والله زوجها حيوان
وحيد القرن: لقيناه منسدح فقال عزوز وااااو ذا كبير ياكل واجد وسارونه خافت منه ويوم بغينا نروح من عنده صاح عزوز تعالوا تعالوا عرفت ليش هو دب شوف ياكل الذبان بعينه هههههههههههه(كان حول عين الاخ ذبان وبغمض عينه عشان يهشه ) تحفه ولد اخوي ذا هههههههه
البط ، الطيور ، الوعل : كلها يقولون عند جدو مثلها في المزرعه (وطبعا أي غزال يشوفونه يقولون تيس واي طير يقولون حمامه )
جينا للخطير جدا :::
الاسد هههههههههههه : هذا الحيوان الوحيد اللي حبه عزوز وربي تحسون انه بالفطره ما قال ولا تعليق ولا شي جلس يناظره كثير وساكت فعلا هيييييييييييييييييييييييييبه تفرض نفسها وربي يمكن ربع ساعه بس جالسين نتامله .
بعدها كلنا وشرينا العاب وركبنا الموتر وطبعا عزوز قدام فقلت يلا يا اطفال وش احسن حيوان شفتوه قال عزوز الاسد وقالت سارونه البطه (قايلكم حتى ذوقهم زي وجيهم ) وقلت وانت (اقصد اخو عزوز ) قال عزوز ما يعرف عبيطه ما يعرف
ههههههههههههههههههههههههههههه
ياحبي لك ياعزوز

الموقف الثالث :
الابطال : شخصي الكريم ، عزوز
المكان : المزرعه في نجران.
الزمان : مدري يوم ما .

الموقف قصير بس مضحك
كنت خارج من العريش الضحى وعزوز يحفر تحت شجرة تين ومسوي له سواقي وسدود وعبارات وحركات ومعه سياراته والعابه وكان فعلا مشغول بمشروعه
انا كنت طربان وكنت اغني (وين احب الليله وين وين احب الليله وين وين احب الله وين وين احب وين اهيم)
وما عطاني وجه وانا اكرر الغنيه
فقال والله مدري والله العظيم مدري وين
ههههههههههههههههههههههههههههههههههههههههههههههههههههههههههههههههههههههه
ورب البيت جلست اضحك على جوابه يفكرني اساله الصبي
قلت له لا ياخوي هذي غنيه لمحمد عبده
قال انت خبل انا ابغى اسوي بايكه (مظله ) للسيارة خلاص روح
ورحت
هههههههههههههههههههههههههه
ياحبي لك ياعزوز

الموقف الرابع والاخير :
الابطال : علي ولد اختي اذا تذكرونه (9 سنوات) ، ابوه ، ابوي ، شخصي الكريم.
المكان : الحرم الله يعمره .
الزمان : شهر رجب .


كنا في الحرم ابوي وابو الولد مطاوعه وانا من جنبها وولد اخوي يبي يفلها في جده
المهم كنا نطوف حول البيت وندعي ابوي بيني وبينكم شوي سمين مو شوي يعني شوي كثير تدرون الرجال دب ولد اختي طايح فيه حش وذب
يقول : جدي ذا فلس الحكومه كل يوم يغيرون رخام الحرم هههههههههههههههه
جدي الوحيد اللي ما فيه حد يستجري يزاحمه في الحرم ههههههههههه
تصدق والله ان الثوب ساتر شوف الاحرام فضح جدي طلعت بلاوي هههههههههههههه
ويقول انت عارف ان الحجاج اللي برى السعوديه يرسلون اول شي مندوب منهم يشوف اذا جدي موجود عشان يلغون الرحله عشان عيالهم وشيبانهم
طبعا انا اسكته وميت ضحك واقول لا تحش في ابوي خاف الله تحش عند بيت الله قال انت اللحين متضايق عشانه ابوك والا عشان بيت الله حدد
قلت كلها قال لا اكثر شي
قلت عشان بيت الله
قال ما عليك انا بزر ما ربي بمحاسبني لكن اذا انت متضايق عشان ابوك عادي انا باحش في ابوي
قلت حش يالله ( ابي انتقم)
قال والله ياخال ان ابوي ذا اكبر متفلسف في التاريخ
تخيل مانع الدش علينا وعنده في غرفته دش يقول عشان العربيه
وربي انه نصاب يحط على روتانا والشله
ولا تغرك لحيته تراه يقرا كتب شعر من اللي خبرك
قلت أي كتب
قال زي اللي عندك قلت ذي اشعار العرب عادي
وهنا قلب علي وقلت عادي كتب ثقافية
وقال أي عادي عديت الكتب اللي عندك هذاك اليوم وطلعت 966 كتاب هههههههههههههههه
وكل عناوينها اشعار الغزل ، اجمل ما قيل في الوصف ، فلسفة الارواح ، نساء في تاريخ الحب ، كتاب الاغاني .....
وربي انت وابوي منافقين
طبعا مع الكلام ذا قال ابوه اسكتوا واطلبوا الله
قال ولده اكيد بنطلبه اجل نطلبك انت اللي لي سنه اطلبك نروح جده وتجيبنا مكه
ثم توجه للباب وقال يارب نروح جده يارب تكفى نروح جده يارب اذا رحنا جده تكفى لا يروح ابوي معنا يروح خالي وابوي يجلس في مكه مع جدي قال ابوه ما فيه احد يقول لربه تكفى وش تبغى تكفي ربي فيه انت وجهك
على طول الولد قال يارب وخر التفلساف من ابوي عشان قد هو ذابحني به
وربي البيت انا مت ضحك
وقال ابوي لي عمرتك ذي زي وجهك عدها لحالك
قلت السمع والطاعه طال عمرك
وعدت العمره عشان الشيخ علي هو وجهه

ياحبي لك يا مكه

شباب الموضوع الهدف منه ضحك ووناسه
اللي مو عاجبه الموضوع ارجو انه يكتفي بالقراءه فقط
مشكورين

وعليكم السلام ورحمة الله وبركاته .. < وش ضاركـ لو كاتبها كامله

إقتباس البنات ما ادناهم

< اجل البنات ماتدناهم ض1 ..

اكثر موقف اعجبني حق الخنفسا وحدبقة الحيوان ..

شوكرا لكـ ع رسم الابتسامه ..

اختكم .. ميمي

المهم من موقفك الرآبع ودي اخذ عمره مع جدك

إقتباس شباب الموضوع الهدف منه ضحك ووناسه اللي مو عاجبه الموضوع ارجو انه يكتفي بالقراءه فقط

الانبرآشآت جآيتك جآيتك

موققف العمره الموقف الاخير ههههههههههههههههههههههههههههههه
يسسسلمو على موضوعك والمواقف الحلوه .

ههههههههههههههه الموقف الأول قوي هههههههه

الله يعطيك ألف عافية

الله يحيكم يالربع

اجل الانبراشات جايه جايه الله لا يعوق بشر ههههههههههههههه

منورين وربي

فك الحجز

كتبت رد طول ابليس واخر شي انفصل النت

لكن برَد

بالنسبه للموقف الاول عندي موقف مشابه له

مره من المرات كنا بالمزرعه وشايف اخواتي الصغار مجمعين لهم كم قبون ومتجمعين لهم على نخله توها مسقيَه { شغلوا خيالكم } المهم اشوفهم ينطلون لهم كل شوي قبون ويوم سألتهم ليش يقولون نبي نعلمهم السباحه عاد لحقت لي على كم قبون واطلقت سراحه

ولا مره من المرات اختي العنود شايفه جالسه بنص الحوش ومعها جزمه وانتو بكرامه وكل ما مر عندها نمله ذبحتها سألتها ليش تقول ليش يدخلون بيتنا

وبس تسذا

الله يعطيك العآفية موضوع شيق ورآئع ومضحك بنفس الوقت < يتفلسف مثل طيب الذكر

إقتباس قال ولده اكيد بنطلبه اجل نطلبك انت اللي لي سنه اطلبك نروح جده وتجيبنا مكه

ههههههههههههههههههههههههههههههههههههههههههههههههههههههه

ههههههههههههههههههههههههههههههههه

حياكم الله يالربع ولا هنتو

بعض الناس : اسمهم اطفال مو غران يامتخلف

هههههههههههههههههه

الله يحفظهم

بجد استمتعت وانا اقرأ

خصوصا العمره

هههههههههههههههه

اسعدني استمتاعك اخوي تونتي

منور

بالله عليك وش اعجبك فيها هالبنت

لكن منورة كالعاده وشسمه