[c] [/c]

مدخل :

سؤال بريء : هل المفترض ان الانسان ( لايخطيء ابدا ) ؟

سؤال ابرأ منه : هل المفترض ان لاعب كرة القدم ( لايخطيء ابدا ) ؟

سؤال ابرأ شي : هل المفترض ان سامي الجابر( لايخطيء ابدا ) ؟؟

طبعا الاجابة على السؤالين الاولين ما فيه انسان يناقش فيهم .. بس الاخير .. بتحصّل تصرفات هلاليين تخليك تشك في الاجابة !!

اصبروا علي شوي

المحلل الرياضي العربي الاشهر ( عبدالمجيد الشتالي ) ( ياحبي له اذا قعد يتطاق هو وخالد ياسين ) ... نقل عنه في جريدة الجزيرة :

إقتباس "... واستغرب الخبير العربي الشتالي ما يثار في الوسط الرياضي السعودي حول قائد المنتخب سامي الجابر وقال: خلال وجودي في الرياض أثناء بطولة الخليج 15 استغربت انقسام الشارع الرياضي السعودي حول هذا اللاعب. وقال في نظري ان هذا النجم له الفضل في تأهل المنتخب السعودي إلى كأس العالم وتحقيق دورة الخليج 15 فهو من سجل وصنع وقام بأدوار هجومية ودفاعية ووجه زملاءه داخل الميدان ويقوم بأدوار أخرى بدون كرة لا يقوم بها سوى نجوم من نوعية زيدان وقال:ربما يخفق الجابر في بعض الأوقات وهذا ليس بمشكلة فريفالدو وفيجو يخفقان أيضاً ولكن اعتقد ان هناك نوعية رياضية جاهلة فهي تريد الجابر دائماً يسجل ويقوم بأداء فاصل مهاري داخل الملعب وشدد الشتالي على أنه لا يوجد في السعودية لاعب يتمتع بموهبة وعقلية احترافية في الوقت الحالي سوى سامي الجابر...... "

اما محمد حمادة المحلل الرائع فيقول في مباراة الاهلي الاخيرة :
بما معناه :

إقتباس " يقول البعض ( يدق على المحلل السبهة اللي مع ناصر الاحمد ) اين سامي الجابر في هذه المباراة ؟؟ اقول ان سامي الجابر يقوم بدور مهم جدا في وسط الملعب وغير معقول ان نطالبه بان تكون كل تمريراته خطيرة وكل تسديداته اهداف فلا يوجد لاعب بهذه المواصفات ابدا "

اما بعض جمهور الهلال اللي حضر مباراة النصر الاخيرة وبعض اعضاء منتدى الزعيم فيقولون ... معصي والف معصي

نبي كل كور سامي صح في كل المباريات ولا بنزعل وبيطلع سامي عندنا مايسوى قرش !!
مثال ..
كان جنبي اثنين في الملعب واحد منهم واضح انه يقدر سامي مرة والثاني الله بالخير
الشاهد ان الثاني شب على الاول يوم ضيع سامي الفرصة الانفرادية في الشوط الثاني وقال له يخوي انت صراحة تحبه على غير سنع شف هه هالفرصة بالله ماانقهرت ؟؟
قال الاول : لاعادي فرصة وراحت مثل غيرها

رد عليه : ياشيخ رح انت وساميك ذا ماضيعنا الا هو !!!

انا
لعن ابو بليسك لاعب قاعد يلعب بلحاله في الشوط الاول ومع ذلك حاس ابو النصراوية وتسبب في الهدف الاول ولو عندك تحكيم زي الناس كان انطرد بسبته اثنين من هالسملق ولاحظ اني قاعد اتكلم عن الشوط الاول من نفس المباراة اللي قلت فيها هالكلام ماتكلمت عن المباريات اللي قبل !!

طبعا هالكلام كله يغلي في رويسي ولا قلته

<== اخر مرة تناقش مع ناس مايعرفهم في الملعب بغى يروح في خرايطها ( لا وبعد كان كله دفاع عن سامي قدام جنوب افريقيا !!)

هذي عينة بس من اللي صار في الملعب ولانيب متكلم نهائيا عن المتخلفين اللي سبوا سامي بكلام اسوأ من سب النصراويين له لان هذولي مايستاهلون حتى من اللي يرد عليهم

رجعت وخشيت المنتديات لقيت نقاشات قريبة من نوعية نقاش هالاثنين لكن اكثر تأدب شوي !!
( صدقوني ما اتكلم عن النقد السنع ..المحترم .. اتكلم عن شي ثاني كلكم قريتوه في المنتديات وسمعه بعضكم في الملعب... )

ياجماعة الخير ليش دايم تحطون سامي في امتحان وهمي لمستواه يتجدد في كل مباراة يلعبها ولا ينتهي ابدا ؟؟

ليش دايم تحطون سامي في موقف المدافع عن نفسه وموقف الللي يبي يثبت للناس انه لاعب متميز ؟؟

ليش دائما ... اذا لعب سامي زين تقولون استعاد مستواه.... واذا اخفق قلتوا سامي الى متى ؟

ليش هاللاعب بالذات ما يكسب ثقتكم ؟؟
اللاعب نفسه اللي يعتبر من اكثر من خدم الهلال في تاريخه وانا شخصيا اعتبره الاكثر بلا منازع !

باسالكم سؤال محرج ..( ويعلم ربي اني ماودي اني ادخل في هالمتاهات لكن الشكوى على الله ابي اوضح كلامي )

لو كان يوسف الثنيان هو اللي ضيع ذيك الفرصة قدام النصر .. وهو شيء وارد جدا هل بنشوف بعض جماهير الهلال في الملعب تسب وتلعن فيه ؟؟

هل بنشوف مواضيع في المنتديات تقول يوسف لاعب مبتديء ؟؟ او يوسف اناني ؟؟؟ او يوسف الثنيان المرتبك المتردد الخايف ؟؟؟ :sad: :sad:

تتوقعون هالشي ؟؟ :sad:

والله موب قصدي اقلل من قدر ابو يعقوب نهائيا وينكسر كيبوردي لو هذا قصدي وعبقري الكرة السعودية والله العظيم يستاهل اكثر من هالتقدير ...

انا قصدي ليش ما تعطون لسامي جو الثقة اللي تعطونه ليوسف مع ان الاول يستاهله مثل ما يستاهله الثاني (وكلهم عينين في راس وحدة ) ..؟؟

انا اقول لكم ليش ..
طبعا مافيه احد يناقش ان فيه حرب على ابو عبدالله معلنة وغير معلنة من عام 1410 الى وقتنا الحاضر ...
فعشان كذا تحصل بعض مشجعين الهلال يقرا في الجرايد المتخلفة سامي لاعب صنعه الاعلام و.. و...
ويشوف في الفضائيات سامي لاعب الواسطة و.. و...
ويسمع في الملعب ( ...... )
ويقرا في منتديات الجاليات سامي لاعب مفروض على المنتخب من الاتحاد السعودي و.. و... و من الكلام المضحك المبكي !!!!

هو ظاهريا ينكر هالكلام ويكذبه .. لكن في قرارة نفسه يتولد شيء من الشك ...

معقول كل هذولي غلط .. وجمهورالهلال وياقاهرهم ياسامي بس هم اللي صح ؟؟

ويتذكر هالشك البسيط تلقائيا مع المباراة الجاية اللي يشوفها لسامي ويبدا عقله الباطن يحط سامي في امتحان وهمي لاثبات القدرات ...
ومع اول لمسة خطا من سامي يقول في نفسه افا ..

ومع اول شوته برا ( ولو كانت جنب الباب ! ) يقول في نفسه بعد .. تصدق شكل هذولاك صادقين ؟؟

وعلى الخطا الثالث يطلع الكلام هالمرة من فمه بدال ماكان يدور بينه وبين نفسه
واول ما يبدع سامي (وياكثر مايبدع الذيب الله لايضره ) يسجل قول ولا يمرر تمريرة قول ولا يفر فرة ... تؤدي لقول .. ينسى هالمشجع كل الخرابيط اللي في باله ويقوم يصفق لسامي ويهتف له مع العالم... سامي... سامي

ومع اول لمسة خطا ينسى اللي صار تو و ترجع الشكوك في نفسه ...

هل سامي يلعب بالواسطة؟ هل سامي لاعب اعلام ؟؟ هل الهلاليين يجاملون سامي ؟؟

ليش يرسخ هالكلام براسه ؟؟ انا اقول لكم ... لاننا كعرب نعشق نظرية المؤامرة وان كل شي موب على ظاهره !

ومع المباراة الجاية تلقاه قرا وسمع كلام اكثر واكثر و تحصل الموضوع نفسه يتكرر ويتكرر ... كل مرة بترسبات اكثر من المرة اللي قبلها ...

ويستمر الامتحان اللا نهائي !!

ولا اتوقع ابدا انه يوقف الا مع توقف هرولة الذيب في الملاعب ( الله يخليه ذخر لنا )

والمشكلة الاكبر ان هالموضوع يتسرب بشكل او باخر الى سامي فتجده ( احيانا ) يلعب تحت ضغط نفسي رهيب لانه موضوع في موقف المدافع واللي يبي يثبت نفسه !!

لاحظوا اني ما تكلمت ابدا عن مستوى سامي في المباراة الاخيرة بشكل عام

لان هذا مهوب محل النقاش

لكن رايي بشكل مختصر في هالنقطة ان سامي تسبب في الهدف الهلالي هو وحسين العلي و شال الفريق بلحاله في بداية الشوط الاول مع بربسة منقطعة النظير من لاعبي خط الوسط بشكل خاص والفريق بشكل عام .. مع الوقت لاحظ كل اللي في الملعب سامي وهو يتنرفز مرة ورا الثانية... مرة من العمودي ( وتمريراته الغريبة جدا ! ) ومرة من خالد عزيز ومرة من لطف ومرة من الحكم ( بعد العنف اللي تعرض له بدون أي عقاب ) الخ ..

وسامي اذا تنرفز احيانا يطلع من جو المباراة ... وهذا بالضبط اللي حصل في الشوط الثاني

لكن افرضوا معي ان هذا ما صار وان سامي انخفض مستواه كذا بدون أي مسببات !

وبعدين ؟؟

وش المشكلة ؟؟

مثل ماقال الشتالي حبيب قلبي :

إقتباس " ربما يخفق الجابر في بعض الأوقات وهذا ليس بمشكلة فريفالدو وفيجو يخفقان أيضاً ولكن اعتقد ان هناك نوعية رياضية جاهلة فهي تريد الجابر دائماً يسجل ويقوم بأداء فاصل مهاري داخل الملعب "

ياعيني عليه حط يده على الجرح

وانا ازيد على ريفالدو وفيجو .. زيدان ورونالدو وبيرغكامب وبيكهام وباتيستوتا و و و ...

واللي يتابع الدوري الاوروبي وبطولات اوروبا وكاس العالم بيلقى مباريات كاملة بائسة ( موب بس كور خاطئة ) من هالاسماء الاسطورية
هل معنى هذا انهم زلايب ؟؟ او انهم يلعبون بالواسطة ؟ او ان الاعلام صنعهم ؟؟
تلقى الاعلام والجمهور ينتقدهم اذا طالت فترة انخفاض المستوى .. بس نقد محترم و منطقي يدخل العقل ولا يلغي موهبة اللاعب ولا حتى يشكك فيها !!
اللاعب النجم الموهوب مادام صالح من الناحية اللياقية مايستمر سيء انما ينخفض مستواه تبعا لعوامل كثيرة ماهو مجال ذكرها الان بس الاهم انه يرجع نجم وهذا اللي يفرق اللاعب النجم الموهوب عن غيره وهذا بالضبط موجود في سامي ;)

انا اقول ... ياهلاليين ليش ماتطلعون سامي من هالامتحان المرهق له ولنا ؟؟ وتقتنعون بان الخطا من سامي في بعض الكرات شي طبيعي .. مثل ما ان ابداع سامي في اغلب الكرات شي طبيعي ;)


اخي المشجع الهلالي المخلص : من مباراة الاتحاد اللي جاية حاول تبعد نفسك عن تقييم سامي بالزين او بالشين واستمتع بس بالمباراة .. صدقني بترتاح وتريح ...

اذا كانت هاللقطة تعني لك أي شيء ... طلبتك حط هالفكرة في بالك .;)

@@@ سمو الامير عبدالله بن مساعد اذا كنت اتشرف بقراءتك لهالكلام ثق طال عمرك ان كثير من الهلاليين وانا اولهم يحملك جزء من مسئولية مأساة رجوع ثنائي التشليح .. لطف والمسعري !! اتمنى انك تجلس مع بلاتشي وتناقشه بس على الاقل في هالموضوع اللي ينرفز كل هلالي

@@@ يقولون المسعري لاعب المدربين وان الجماهير ماتعرف دوره في الملعب !!! معقول لهالدرجة حنا جاهلين في الكورة ؟؟ وش هالاستحقار ؟؟
قد نتقبل اشياء من المدرب على انه هو الاخبر .. لكن فيه اشياء مثل هذي ما تحتاج لا خبرة ولا بطيخ !!

@@@ بلاتشي !! اذا كانك تقرا هالكلام ...
<==مصدق عمره
باختصار شديد 1- الاحتفاظ بالدوخي مع بربسة مجرشي المستفزة
2- الاحتفاظ بالجري على اني اشوف انه ماشاء الله اكثر لاعب ملى خانة الظهير الايسر الهلالية من ايام سلمان العمران ونهائي ناقويا !! يعني الجري بدال لطف والخثران وسط يسار ... احس انها واضحة !
3 – المسعري !!!!!!

@@@ واحد من العيال سحبته معي الملعب غصب طلع حااااقد علي ..عاد انا اخبره من المشجعين المتعصبين لريال مدريد. قلت له تخيل مجرد تخيل.... لو في مباراة ريال مدريد الجاية يرفع الحكم الرابع لوحة التغيير وهوووووب ....
[c]
7
7
7
[/c]


لاتستبعدونها على ابو علي واسطاته بكل محل

@@@ يوسف قادم بقووووووووة ان شاء الله ( بس لو يعطيه بلاتشي وقت كافي )
( احلى لقطة لابو يعقوب في اوربت والمخرج يركز عليه وهو يحمد الله بعد هدف حسين العلي في الاهلي ... حنا اللي نحمد الله على طلتك يابعدهم ;) )

@@@ اخر مباراة حلوة للهلال امام النصر كانت مباراة بطولة كاس الكؤوس العربية وبعدها انواع البرابيس ... بس الغريب اللي يقول ان النصر ابدع في المباراة الاخيرة!!! ... الهلال كان في اسوأ حالاته ولو اننا لاعبين قدام أي فريق بهالمستوى كان علوم .. لكن النصراوية حبيّبين مشوها لنا !

@@@ اخيرا .. تشكيلة الهلال امام الاتحاد لو كنت مدربا :
___________ الدعيع ( ضاري ) __________

الدوخي ___ سليمان ____ الشريدة ____ الجري

________ الغامدي ___ بدرا _______

____ســــــامي ________ الخثران ( الشلهوب )___

_____ الجمعان _____ العلي _____

ويلعب ابو يعقوب في الشوط الثاني بدل العلي او حسب الظروف ..بس اهم شي يعطى وقت كافي

اسف جدا جدا على الاطالة !!

<= من زمان ماكتب شي لاتلومونه

اخي الغالي .. مرتاح احبك ..

احييك بداية على حبك وغيرتك على نجمنا الكبير سامي والذي يعد بحق من اهم مرتكزات القوة الهلالية ..


لكن .. قرائتي لموضوعك وأحساسي بصدق عباراته تجعلني اسألك :

هل فعلا ً يوجد هناك من يشكك في قدرات سامي
هذا التساؤل اتى بعد ان طالعت تاريخ موضوعك هذا في الأسفل .. فوجدتك قد كتبته اليوم



عجبا .. فسامي هومن حفظ هيبة الهلال حتى الآن .. ولا أجد غيره الآن سوى الشريده والدعيع والسليمان ..

بإنتظار اكتمال الصفوف .. بعودة الجمعان ونواف والشلهوب والدوخي ..
هؤلاء سيعدلون الوضع بإذن الله ..
بس قل آميــــــن .. الله يفتحها على بلاشي ..


وتسلم ياغالي ..

والله كلامك عين العقل وانه كان يقرقع في قلبي من زمان
هذا اللاعب السامي انا اعتبره اعظم لاعب خدم الهلال وحقق لبلده و لناديه ولنفسه ماعجز وسيعجز غيره من ان يحقق حتى نصفه
ياجماعة يكفيكم ان السامي هو الوحيد اللي هاجمه الاعلام المتعصب ووقف ضده الجمهور المريض
هو اللاعب الوحيد اللي لايوجد حل وسط تجاهه كلاعب فاما ان تحبه وبجنون او تكرهه بجنون
سامي والهلال وجهان لعملة واحدة ( ان حبيت الهلال فانت تحب سامي )
سامي انجازاته الشخصية هي سبب كره النثراوية له لانها مسحت بتاريخ المحنط-ان كان له تاريخ-
اقول مسحت بلاط ناديه
سامي فعايله في طرش البحر من أهلاويه واتحاديه هي سبب كرههم له
سامي نقل مفهوم الجماهير السعودية من التحنط بجنب المرمى إلى جعل المهاجم موسوعة رياضية في فن التهديف وصنع الاهداف والايثار للغير للتهديف
سامس مهما قسوا عليه الاوغاد فلن يقول لهم الا .... انا احــــــــــــبـــــــــــــــكـــــــــم....
:sad:

إقتباس إقتباس من مشاركة فاهم جدا اخي الغالي .. مرتاح احبك .. احييك بداية على حبك وغيرتك على نجمنا الكبير سامي والذي يعد بحق من اهم مرتكزات القوة الهلالية . وتسلم ياغالي ..

وانا بعد
وعلى كل نجوم الهلال

ليش سامي بالذات ؟؟؟؟

كلامك عين الصواب اخوي ( مرتاح أحبك ) ... الى متى وجمهورنا في هذا الانحطاط الفكري ؟؟؟

الى متى وهم ينتظرون مباريات الهلال ليس حبا له ولكن لتصيد أخطاء مدمي الشباك ؟؟؟

سامي حاله حال بقية اللاعبين لماذا كل هذا التحامل عليه ؟؟؟ المفروض حنا كهلاليين نكون اكبر

سند له ونوقف معه ضد عقول بعض الجماهير الفارغه من الانديه الاخرى مو حنا اللي نوقف معهم على سامي ...

وانا معكم لو انه يستحق كل هذا ... لكن والله سامي مايستحق ... بأمانه تخيلوا معي مباراة الهلال والنصر بدون سامي ...

والله كان علووووم ...

حرام عليكم اللاعب جالس يعيش تناقضات داخل نفسه بين مصدق لما يقال ... وبين مصدق لنفسه ...

رجـــــــــــــــــــــــاء ... قفوا مع سامي فهو بحاجة اليكم ...


لـلـــه درك يــــــــــــــــــــــا ســـــــــــــــــــــــــــــــــــــــــــا مــــــــــــــــي ...

مع تحياتي ..
أسيرةالزعيم;)

اخوي فاهم جدا .. اتمنى ان كلامك صحيح وانه لايوجد فعلا من يشكك .. لكن اللي قريته واللي سمعته من البعض يحير صراحة

تسلم ونورت الموضوع

______________________

اخوي hilali-hoooooo :

انت اللي كلامك والله عين العقل كفيت ووفيت ... يعطيك العافية

______________________

اخوي هلال بن قمر

هذا العشم فيكم والله يعطيك الف عافية

________________________

اختي اسيرة الزعيم

الشكوى على الله :sad: بس ان شاء الله اللي يوسع الصدر ان اغلب الغالبية الحمد لله تفكيرهم سليم لكن لايمنع من وجود قلة ماعندهم ماعند جدتي

الا على فكرة انتي فزتي بالمليون ولا لا ؟؟

<===مل من متابعة المسابقة ولا يدري وش صار عليها

مـــوضوع رائــع كروعة كـاتــبه ..

سامي بتصوري هذا المـوسم قدم مستويات رائعه جدا جدا جدا ... كحال بقية المــواسم الماضيه ..
لكن للأسف جمــهور الهــلال يتوقع ان سامي فريقا لحـاله هو الذي يسجل ويمرر ويسدد ويصد !

نعــم سامي له ثقله بالفريق ..

الخــساره دائما ماتقع على رأس النــجوم اذا لم يقدم هذا النجم مستواه المـعروف ..

في مباراة النصر تحديدا .. سامي كـان مستواه مقبول نوعا ما .. لان الفريق باكمله كان سيء وصعب جدا ان يلعب سامي بمفرده عن 11 لاعـب ...


عموما سامي يبقى من اهم اللاعبين المؤثرين في تشكيلة الهــلال .. ولا ننسى انه يتعرض لحــرب اعلاميه شديده من المرضى اللاهلاليين ...
وعلينا دعــم سامي بتشجيعه .. بانتقاده نقـد عقلاني لمصلحة اللاعب والنـادي ...


وتحياتي لك وكثر من هالمواضيع الذهبيه ..

اخوي مرتاح احبك
كلامك رائع واحيي فيك غيرتك على الهلال
وسامي لا احد يقلل من نجوميته ابداالا ان يكون متخلف اوليس من جماهير الهلال
وحتى لوكان ليس من جماهير الهلال فانه يعجب به رغم انفه ولكنه يخفي اعجابه
واستغرب هذا الهجوم من جماهير الزعيم نفسهم
وسامي مهما قلناومهما كتبنا فلن نوفيه حقه
ولانشهد له نحن بل يشهد له التاريخ

ومشكور على اللقطه الرائعه اللي لن ينساها عشاق الزعيم





تحياتي

اخوي العزيز .. مرتاح احبك

موضوع رائع جدا .. تكلمت من واقع حب لسامي ..

إقتباس ياجماعة الخير ليش دايم تحطون سامي في امتحان وهمي لمستواه يتجدد في كل مباراة يلعبها ولا ينتهي ابدا ؟؟

قدره ياعزيزي .. الذي لن ينتهي حتى يفارق الملاعب

إقتباس ليش دايم تحطون سامي في موقف المدافع عن نفسه وموقف الللي يبي يثبت للناس انه لاعب متميز ؟؟

رائع .. مقتنعون بنجوميته منذ وطأة قدماه ملاعبنا ولكنهم عندما يفتحوا اذانهم لمن ليس له هم الا انتقاصه تجدهم يراجعون انفسهم ويبحثون عن تميز جديد لهذا الذئب

مايميز سامي عن غيره هو انه متى احتاجوا لدليل على نجوميته طرحه امامهم ليعيدوا النظر فيما قالوا .. سرعان مايرجعون وسرعان مايقتنعون

قد تكون حالة سامي في ملاعبنا في الاولى من نوعها .. فحتى (بعض) الهلاليين يحتاج الى دليل متجدد على نجوميته ولكن عندما تبحث هل هو يفعل الشئ نفسه مع الاعبين الاخرين وخاصة ممن هم من الاندية الاخرى تجده يسلم بنجوميتهم دون ان يناقش

عموما .. هو بدأ هكذا وسينتهي هكذا .. ولكن انتظر بعد اعتزاله لترى كيف يسطرون المعلقات في مدح هذا السامي

تقبل تحياتي يارائع .. لاتحرمنا من قلمك المميز

الف شكر اخوي مرتاح احبك على الموضوع

وبصراحه كفيت ووفيت



تحياتي.

يا هلا ومسهلا بالرائع مرتاح احبك ..

كتبت فأطلت فأبدعت <-- أنا اللي أبدعت بهالجملة

الشهادة لله أنك أنصفت سامي بعد المباراة [ الدورية ] مباراة الـــ3 نقاط مباراة الـــ90 دقيقة !!

فلــــلأسف ..

أوجعوه وأهلكوه قدحاً وأسقطوه بعبارات لا تطلق ولا على [ لاعب مُفلس كروياً] كل هذا لأنه [ تأخر في كرة واحدة ] وأنه لعب بـــ[ مزاجه بهذه الكرة ]!! علشان يبيّن للعالم أنه موهوب !!!!!!!!!

ما أقول لهم إلا [ الله يخلف على كورةٍ تعرفونها ما دام هذا تفكيركم] !!

هالحين الرجال شايل(ن) الفريق طول الشوط الأول بلحاله ومسبب بلنتي ومسبب صداع للخصم والدليل ثلاثة كروت صفراء أتت بسببه هذا غير الركل والشد وعبارات الإستهجان من جمهور الجالية وما تبونه [ يتفلسف أو يستهبل شوي ] !! على الأقل خلوه يحلل الـــمليونيين شوي <-- بيجي يوم من الأيام وبيصير كذا مبدأهم

هذي مشكلتك يا سامي !!

جيت في وقت [ جمهور الثنيان اللي يلج ولا يدري وش يقول ] الجمهور المراهق اللي يبغى التسحيب والتهديف فقط!! ما يبي اللعب التكتيكي !! ما يبي اللاعب يشغل 5 قمصان !! لا يبونك إذا مسكت الكورة تصيح وتقول [ هاه وش بغيتوا أسوي]!! دلوني تراي لا أفك ولا أربط من دونكم !!

والله والله والله يامرتاح لو أن سامي هو اللي مسدد الفاول [ اللي سدده الثنيان وطلعه الخوجلي] كان يقولون " ليش يستهبل ويشوت بالقول يستهبل بهالوقت!!!!" وش هالأنانية اللي فيه؟؟ ليش سامي يحب نفسه؟؟ ليش سامي يلعب باسمه؟؟ ليش وليش !!

مشكلة سامي أن [ طيــّــب ] وإذا طلع من تحت الجماهير [ رفع يده] مهوب مثل الثنيان !! من عيد لا عيد يرفع لهم يده .. وفوق هذا سامي ثلاثة أرباع الدوري وهو من المغضوب عليهم .. بس بدقيقة وحدة آخر الدوري يخلي هاللي يسبونه يخذرفون بقوله أو تمريرته أو قيادته إلين ما يبدأ الدوري من جديد ولنا بالدوريات اللي حصل عليها الهلال ( 1416هـ.. 1418هــ..1418هــ)

صدقني مهما أشبعوه نقد ومهما أطالوه من مدح أو قدح يظل سامي بنظري [ الناضج .. الفاهم .. المتفهم لأحوالهم خصوصاً في عمر تعتبر نقلة عمرية لهم !!]

لكن وش نقول عن جمهور [ الكوامري .. ] وجمهور [ اللي دايم ضدّك على غير سنع ] !!

تقول الحكمة الأرجنتينية [ هات لي جمهور واعي وفاهم أعطيك كورة تخذرف فيها 84394368 سنة ]

وألف شكر يارائع على هالطلة الحلوة ومبدع كما هي عادتك يا بعدي ....

اخوي مرتاح احبك
مشكور على هذا المقال الرائع و لكن انا ارجوك ان لا يتم التعميم على كل انتقاد يوجه لسامي فيوجد بعض للأنتقادادات صحيحة و الموجهين لها يحبون ان يرون ابو عبدالله على درجة عالية من الأتقان و ان يتلافى حتى الجزئيات الصغيرة . اما الهجوم الكاسح الذي يوجهه له اعداء النجاح من امثال و الا مافي داعي لذكر الأسماء .

هلا مرتاح أحبك ..

لا تستغرب كثيراً الهجوم أو بالأصح المحاسبة الدائمة لسامي الجابر من الجمهور الهلالي .. فقد تولدت لديه شكوك حول سامي .. نظراً للهجوم (( المتواصل )) من اللاهلاليين على سامي والذي أصبح يثير الشكوك لدى بعض الهلاليين حول مستوى سامي .. و على الجهة الآخرى هنالك من الهلاليين من أصبح يظن أن سامي دائما على صواب .. كردة فعل على الهجوم اللامنطقي على سامي ..

سامي لم يكن سيئا في الشوط الثاني (( بافتراض أنه من الغباء النقاش حول مستوى سامي بالشوط الأول )) .. و الدليل أبقائه لوحده ثلاثة قلوب دفاع نصراويين في منطقتهم !! و صدقني لو أُخرج سامي وبقي حسين العلي .. لرأيت أثنان منهم على الأقل .. قابعين داخل الـ 18 الهلاليية !! ..

دائما ننظر للكرة على أنها التحرك للأمام و التسديد داخل 3 خشبات .. و لا أدري ماذا نريد من سامي أن يفعل أمام 3 مدافعين وبمساندة وحيدة من يوسف و في أحيان أخرى و نادرة من فيصل الصالح ..

لو عدنا للمباراة نجد أنه خلال 90 دقيقة لم تسنح لسامي إلا فرصتين .. في الشوط الأول وسددها بذكاء ساقطة و لكنها ابتعدت .. و أخرى أتت من الجهة اليسرى و ربما رأى سامي أنه ليس في وضع مهيء للتسديد وأن يوسف كان في وضع أفضل .. لا أختلق أعذاراً لسامي ولكن سامي لم يلعب في خانة المهاجم .. لاحظ المهاجم وليس رأس الحربة .. إلا في أخر ربع ساعة خلال مباريات (( عمان - البحرين - الامارات )) في كأس الخليج الفائتة .. وكان بمثابة مهاجم مساند على الجهة اليسرى .. و منذ أمد طويل لم يلعب كرأس الحربة .. مما يفقده الكثير من الحس التهديفي - كما يقال -... و بكل صراحة من يرى تمريرات خالد عزيز على طريقة (( الكارتيه )) .. و تحرك العمودي بالقرب من خط التماس و انعدام محاولة القرب من منطقة الجزاء .. أو من يرى أتجاه الصالح بالكرة متعمداً نحو مدافعي الخصم من أجل مراوغتهم وليس من اجل سحبهم .. لا يلوم سامي ..

حسين المسعري في بعض الأحيان تجده على الصعيد الدفاعي مفيد .. وفي أحيان أخرى نرى بأعيننا ما يسمى بالعك الكروي .. كما يفعل هو على الصعيد الهجومي .. الأداراة تغيرت و الجهاز الفني تغير وبقي المسعري .. أذن لربما يكون السبب من الذين لم يتغيروا .. ! ..

عزيزي .. مخاوي البطولات ..

نص ردك عن ما يسمونه - كما يقولون - الجمهور الثنياني الذي يقال أنهم ثنيانيين وليسوا بهلاليين ..الأخ مرتاح تحدث عن بعض الهلاليين .. إلا أذا كنت ترى أن من يهاجم سامي هو ثنياني ! ..

لا أدري ماهو سبب أندفاعك الزائد .. فأذا كان هنالك (( 15 )) رد من أعضاء ستثيرك لهذه الدرجة .. فما بالك باننا لم نرى من كبار الكتاب في المنتدى أي موضوع (( تقريباً )) يثني على يوسف... و مازالوا يدورون في حلقة (( أمهر )) لاعب سعودي !! ..

بخصوص المرحلة العمرية .. فاذا كان عشاق يوسف في الثمانينات - في عزه الكروي كما يقولون - من المراهقين أو من شلة المرحلة العمرية .. فهم الآن في مرحلة عمرية كبيرة .. أشكرك على لقب (( جمهور الكوامري )) .. و سنترك لقب (( جمهور الفياجرا )) لغيرنا .. ..

فقط .. لا تجعلوا الجمهور الهلالي المحب ليوسف .. جداراً تتخطونه متى ما أردتم .. ..


لك تحياتي من القلب .. و للأخ مرتاح أحبك ..الذي أعتب عليه وضع صفة (( مخفة )).. ..

كل يسبون سامي ويكرهونه هو ان لاعبي انديتهم ما عملو مثله وما علينا منهم

لك تحياتي من القلب .. و للأخ مرتاح أحبك ..الذي أعتب عليه وضع صفة (( مخفة ))..
وشكرا