عجايزنا أنا آسف (الجزء الثاني والأخير)..دعوة ضحك فقط.. - نادي الهلال السعودي - شبكة الزعيم

الطعنة في الظهر توجع · #1 10/01/2011, 08:58 AM

سلام يالربع

صبحهم بالخير ياربي

شحالكم مع البرد

الله يذكرك بالخير يالهليل يوم يقول

ما علينا

اهلا بكم في الجزء الثاني من أنواع عجايزنا

جاتني البارح مكالمة من عمتي الله يطول عمرها

كنت اكلم أمي فقالت للوالده من تكلمين؟
قالت ولدي عبد العزيز
قالت عطيني ياه اسلم عليه
وكلمتني وياليتها ما كلمتني

أنواع الخربطه يالربع

من طول الليل تقول شلونك يا سالم!!!

واقولها انا عبد العزيز ياعمه الله لايردنا لارذل العمر

تقول اني ادري شلونك يا حسين

يوم دريت انها رايحه فيها قلت لها طيب والله شحالش انتي

قالت طيبه شلون عبد العزيز أخوك

هنا انفجرت اضحك صراحه

قلت هو عندي تبين تكلمينه

قالت أي والله

وسكت شوي وقلت هلا والله عمتي

قالت هلا والله عبد العزيز شلونك ياولدي
قلت طيب
شحالش انتي (وانا كاتم ضحكي في حشاي)

قالت والله اني مشتاقه لك يا عبد العزيز

قلت وانا بعد وتخلصت من مكالمتها بحنكه وقفلت ...

لكذا راح نستفتح بعمتي اليوم

المضيعة : هذا النوع من العجايز ما يقمعشي على قولت اخوانا المصاريه

، يطيل التأمل في اشياء غبيه زي جدار البيت وفناجيل القهوه ، مفهيه ، تمشي على التاريخ الجاهلي ، معها رادي تداريه من ذيك الروادي ابو اناتل وفرفره كنها رادار ، تعرف الناس بوجيهم والاسامي يخلف الله ، دايما تلوم الناس وتقول لا تخلفون واحد عشان ما نضيع ، تحن لأهلها كثير ، زوجها يحب يطقطق عليها وهي تضحك على خيبتها من الفهاوه

، طيبه لكن ساذجه وملعبه ، حكمتها في الحياة (من أمك يا ولدي ) ، وقدوتها (الزعيم العنزي معمر القذافي ) اللي ما يضيع ابد.

أم البنات : هذا النوع من العجايز عسره جدا ، صارمه ما تتهاون ، صبوره ، مربيه مخلصه وحكيمه ، واغلبهم يكونون حلوات حتى مع العمر ، ألزم ما عليها بناتها وبيتها وما يهمها احد ، أول بناتها مفهيه ، والثانيه حاذقه ، والثالثه مكروفه ، والرابعه دلوعة أبوها ، والخامسه مضيعه دروب المحبه ، والسادسه غبيه ، والسابعه شينه ، والثامنه ذكيه جدا ومتفوقه وأحلامها توديها النجوم ، التاسعه وما بعدها تكملة عدد ونسخ مكرره من خوتاهن الاولات ، زوجها يحبها ويخاف منها بنفس الوقت ، شعارها في الحياة (أهم شي بيتي ) ، قدوتها في الحياة (أم حاتم اللي في باب الحارة ).

أم العيال : شفتوا أوصاف أم البنات هذي عكسها هههههه ، النوع ذا نشمي ويعرف الواجب ، عزيزة نفس ، ظهرها قوي ، دايما ما تكون الزوجه الأولى ، لان زوجها يتزوج عليها حبا في البنات ، معها بنت وحده إخوانها على حالتين ما فيها وسط إما إنها تكون كبيره فهم راح يكونون لاعنين جده جدتها كرف ، وإلا تكون صغيره فراح يدلعونها دلع ما مثله ، بيتها عامر ، وأحفادها متعلقين فيها ، في الغالب قدراتها العقليه متواضعه ، تعرف الدراهم من لونها ، الزرقا خمس والحمرا ميه والخضرا خمسين ، تخبي دراهمها تحت فراشها ، عيالها للحين ينامون على فراشها من حبهم لها ، شعارها في الحياة ( ما الحب الا للحبيب الأولي )، قدوتها (سيدتنا هاجر عليها سلام الله).

البنوته: هذا النوع من العجايز عيا يكبر ، مصره إنها صغيره وفي مقتبل العمر ، تلبس تنانير وبلايز ، عيالها ضايعين وبناتها ما يهابونها ، زوجها منغث منها ، تحب الأعراس والمناسبات ، معها جوال شي لكن حدها الزر الأخضر والأحمر ، تكره اسم عمه وجده ، مره سوت لزوجها كيكه لعيد الزواج واكلها عيالها قبل يشوفها الشيبه

، فاهمة الرومنسيه غلط ، تحط مناكير لأظافرها ثم تحنيها ، شعارها في الحياة (الحياة حلوه بس نفهمها) ، قدوتها (صباح).

راعية الدين: هذا النوع من العجايز مسوي زحمه على ولا شي ، على سجادته ليل نهار ، تقضي شهر كل سنه في مكه ، تتصدق واجد ، ذكر الله على لسانها ، كثيرة الصمت ، تسلم للقدر في كل شي ، منظرها يوحي بالفقر رغم الخير ، إذا جلست على سفره لازم يخلص الزاد وإلا ما هنت نفسها تلقم الموجودين غصب أهم شي الزاد لا يبقى ، تقدر الخبز واللبن ، زوجها متزوج عليها منذ مبطي ، مضيعه بيتها ، تكبر بسرعه ، تستغني عن الحياة بشكل غبي ، شعارها في الحياة (ألا بذكر الله تطمئن القلوب ) ، قدوتها في الحياة (سيدتنا خديجة عليها سلام الله ).

أخيرا وليس آخرا

راعية المباريات : ارهب عجوز في الدنيا ، بالعادة تكون أهلاويه ، وأحيانا نصراوية ، لكن تقدر شي اسمه منتخب

، ودايما تتخيل المنتخب يلعب ضد الهلال

، أثناء مشاهدتها للمباره تجيها قدحه ودها إنها تشق الكورة بشفرة خضره

، تهذر بشكل غير طبيعي أثناء المباراة ، أي لاعب يسجل تقول بعدي لو هو مو بفريقها ، تقدر الثيل الأخضر ، تقول لو فيها سدره كبيره في الثيل كان يازينها كشته ، تتهور أحيانا أثناء نشوة الفوز وتوزع عصريات ودراهم

، تحب الجلسه مع الرجال ، لها غمزات ولمزات خطيره

، شعارها في الحياة (العالمية صعبه)

، قدوتها (محيسن الجمعان)

.

خلصنا يالربع كفى العجايز ما جاهن فديهن

تدرون ليه نزلت الجزء الثاني بسرعه

رحت اكتب في قوقل عنوان الجزء الأول لقيت كذا واحد منزل موضوعي في كذا منتدى

المهم كلهم كاتبين انتظروا الجزء الثاني فما حبيت أبطي عليهم مساكين

أعيد واكرر حبايبي العجايز تاج فوق الراس وهن روح البيت

والسالفه ضحك وفرفشه

الخلاصة
ياحبني لهن