بسم الله والصلاة والسلام على رسول الله
والسلام عليكم ورحمة الله

في البداية احب ابارك حق جاهيــــــــــر الزعيم على صدارة الدوري واللي تعتبر طبيعية وكل فريق اخذ مكانه الطبيعي في الدوري.
لكن.
خلونا نرجع وناخذ نظرة سريعه على حال الهلال في الدوري و دوري ابطال آسيا ونجوف نقاط القوى ونقاط الضعف ونوقف عند جم نقطه تخص الشأن الهلال.
موقع الهلال في الدوري بلغة الارقام:
المركز-الاول
لعب -13
فوز-9
تعادل-4
خسارة-0
له-30
عليه-8
النقاط-31
طبعا المركز مطمئن والى الآن لم يتلقى الهلال أي خسارة وهذا شي يثلج الصدر بس في مشكلة بسيــطة الا وهي,

ان الهلال ضيع 8 نقاط منها اربع كانت في المتناول امام القادسية وامام التعاون ومازالت لنا 6 نقاط صعبه اما الشباب والاتحاد وهي اللي راح تكون الفيصل والمنعرج الرئيسي في تبيان ملامح الدوري.
المهم
كلنا ضاقت صدورنا برحيل الداهية جريتس وكلنا تمنينا مدرب في مستواه الفكري او على الاقل اوروبي ولكن الادارة فاجئتنا بالعقد المؤقت واللي راح ينعكس على الهلال سلبا في دوري ابطال آسيا وهذا راح انتكلم عنه لاحقا.
الأداء اللي ظهر فيه الهلال في آخر مبارياته يعتبر باهت والشي الوحيد الذي يشفع لهذا الكيان هو حصد النقاط ولكن الى متى.
احنا ما تعودنا على الهلال هلون ولا عاجبنا مستوى الهلال و اعتقد ان الاغلبية تتفق معاي في هالنقطه.

اتمنى من الاستاذ سامي الجابر كونه هو الاداري في فريق الكره ان يعيد النظر في شأن الفريق لان الصراحه مانبي الدوري ولا نبي الآسيوية بس رجعوا لنا هلال جريتس ومتعته هلال جريتس والبطولات اتجينا من نفسها..

موقع الهلال في دوري أبطال آسيا:
الصراحه القرعه جات على ما انا اتمنى واذا تبون الصراحه منت ابيها اقوى لان كل ما صارت المجموعه اقوى كل ما صار الهلال افضل وطريق البطوله يكون اسهل بالنسبه للزعيم..بس بعد في مشكله صغيـــــــــرة,

اذا هذي المستوى اللي يلعب فيه الهلال ويفوز في اخر الدقايق وبطلعت الروح عز الله شبنسوي في الآسيويه ؟!!
يعني لازم انجوف حل ..

يمكن احد يسأل ويقول شيبي ذي من الموضوع,
اقول لك طال عمرك,
ابي الادارة اتجوف حل حق المدرب لاهانت واتصرف مع اللاعبين اللي بدا ينزل مستواهم تيلس وياهم واتحاجيهم وتشوف شصادهم وتحاول تحل مشاكلهم وتخليهم يرجعون حق مستواهم.
وبالذات ان وقفت الدوري بتعطينا فجه عشان نرجع نفسنا وانجوف اللي لنا واللي علينا ولازم نستغلها افضل استغلال..


كلمه اخيره:

الانسان بطبعه طماع...وصعب اتخليه يرضى بالثرى عقب ماتعود على الثريا...والزعيم عودنا على ما بعد الثريا!!!

واسمحوا لي على الاطاله لكن حجي في قلبي وحبيت اقوله.

اخوكــــــم/ جوزيه مورينهــــــو - البحرين