يمه انا ودي اقول للناس:
عن الشيمه عن الحسره عن الإحساس
عن العمر اللي ملاه اليأس
انا ودي أحكيهم
أضحكهم..وأبكيهم
يمه انا ودي أقول للناس
عن الدمعه وليل الخوف
عن القصه حروف حروف
عن جروح تسافربي
وترقى ثم تحولبي
مثل غيري من الأجناس
وأنا عمري يقول يمه
وأنا فرحي يقول يمه
وأنا جرحي يقول يمه..!
أذكرهم أفكرهم
أسولف عن جروح وليل
أحبك ياغناتي حيل..
أذكرهم وأنا توي
صغير مرقدي صدرك..
لحافي يجمعه صدرك
ضحاكي مبعثه صدرك
وزادي منبعه صدرك
وأداري الجرح في صدرك..
تربينا على كلمه
تجمعنا على كلمه
تحابينا على كلمه
غطانا كلنا بلحاف
وزاد ناكله بصحاف..
وحنا مثلنا آلاف....

************************


نلم القرش فوق القرش
نبي نشري ثياب وفرش
نبي نجبر خواطرنا
ورب الكون يسترنا..
تقولي للولد منا:
أبيكم للزمان رجال
ابيكم فارس وخيال
ابي لاصاح فيكم جار
يبيكم والزمن دوار
تفزوا له كبار صغار...
أبشرح بعض قصتنا
وكل الناس قصتنا
ليا أذن مطوعنا
يجي صوته بمسمعنا
تصيحي ياولد صلو..
توضينا..تصابحنا وصلينا
رفعنا للسماء كلمه
تصعدها بواكينا
وبعد نص الملا مافاق
الا ياكاتب الأرزاق
الا يالله تهدينا.....

************************


أعرف أن الجروح كبار
وأعرف أن الزمن دوار
وأنا أذكر وش تغدينا
ومابه شي بيدينا..
أنا أذكر يوم صار العود
على كيفه وتباكينا
أنا بذني سواليفه
وممشانا على كيفه..
أنا أذكر طفية الفانوس
وأنا أذكر لذعة الناموس
وطعم الرز والمعدوس
ولابه شرح أو قاموس..
أنا أذكر ثوبي البالي
وأشوف الحال بعيالي
وأنا أذكر صيحة الفران
وأنا أذكر ونة الجوعان
أنا أذكر كل ذا كله
ندور للخبز بله...
أنا أذكر لاشى شاكي
صفعتيني أنا باكي
وأنا أذكر دعسة خطاكي
تقولي ياولد جنيت...

************************



أنا أذكر كل ذا وأسأل..؟
زمان راح واتبدل
وذاك القرص من ايدك
تعجنينه... تلمينه
تخبزينه وأنا فرحان
تبدل كل شي فينا
ماعاد به شي يكفينا
أنا أذكر أول بجامه
وثوب مشترى للعيد
وأنا أذكر أول عمامه
وفرحة خالتي بالعيد
أنا أذكر يوم مابه شي
بعدنا ماعرفنا شي..!
ودمعات الفرح منك
تعبر بالفرح عنك
أنا أذكر شايب مرحوم
أشوفه مرتكي لليوم
يصيح بنا يعذبنا
عيالي ولموا الدله
أناظر وأفتزع يمه..!
عطيني البيز يايمه
تسمس ثم تقوليلي:
ترفق لاتطيح يمه..
ولامنه قعد راسه
تمدد صابه نعاسه
زعق فيني علامك ماتغطيني..؟
اقول : أبشر
احس البرد وازيده من بطاطيني..

************************


أنا أذكر خالتي حمده
ومقبوله ومستوره
اسامي تمتلي صوره..
أنا أذكر حمسة المحماس
وأنا أذكر دقة المهراس..
أنا أذكر حارتي تبكي
بعضهم يشتكي جوعان
وأنا أذكر دخلة الضيفان
وخالي وعزوتي جمعان..
أنا أذكر صيحة العسه
وُجوع الليل مندسه..
تبي تدفى على الكانون
ولابه حظر أو قانون..
ولابه رأفت الهجان
أنا أذكر موضة القيطان
وصوت العنز واللبان
روايه في زمان كان....
أنا أذكر يوم قالو عيد
وأنا عيدي بزنوبه..!
وأنا أحفظ سورة الأخلاص
وأرتل سورة التوبه..
وأنا أعرف حظي المسكين
كبار القوم هجوا به...!
وأنا أحلف لو بيارقنا
على التاريخ منصوبه..
يباريني نزيف الجرح
ويسأل وين ودوا به..
اقول له وش تبي ياجرح..؟
تبي تاخذ علي نوبه..
تبي تحرس معاناتي
وكل الأرض مقلوبه
وأنا المدفون في ثوبه...!!!
وعمي مات في بيته
وخالي قد تغدو به..

************************


أنا جرحي يسافر بي
وليل الناس محسوبه..
أنا أذكر كل ذا يمه
أنا أعرف حاجتك يمه..
أنا أذكر جرحنا يمه
أنا أذكر يوم سقيانا من الزفه
أنا وعيالك الحلوين ملتفه..
نبي ندفى من الكانون
نبي نشرح وجاع عيون
نبي نملا جياع بطون
نبي نصرخ ونملا الكون...!
أنا أذكر كل ذا مدفون
تبين الصدق يايمه...
أنا بذاك الزمان مجنون...
عرفت شلون لاصحتي احب راسك
عرفتك زين لاصمتي
ولاافطرتي..ولاباعك بعض ناسك
أنا أذكر يوم نتبارى
ولاأحد موذي جاره
ولنا قانون بالحاره
يفسر قصة الدنيا......؟؟
غريبة قصة الدنيا...!!!
أنا أذكر دمعتي بعيني
وثيقه بينك وبيني
تعذبني .. تكذبني..
تعاتبني..تبي تقبض
على رمشي وتسحبني..
ليا صحتي انا ويني؟
وأشوف الدرب بعيونك
وأشوف البرق بسنونك
أنا منهو أنا بدونك؟؟
أنا حظك وأنا منك
وأرد المايله عنك
تذكرني سواليفك
وأنا اراقب مذاريفك...
في ذاك الجرح والكتمان
وان اللي جرح انسان
وان اللي نزف انسان
وان اللي بكى انسان...!

************************



أنا أذكر قصة الشراب
تحول بيدنا كوره..!
وأنا أذكر قصة الطلاب
وأستاذي وباكوره
أنا أذكر لعبة الشرعى
وبعض اغنامنا ترعى
ونشرب كلنا بمغراف
عدل وانصاف...
وعمي صالح القطان
ينجد للجميع لحاف
كبرنا في العمر يمه..!
تغربنا تباعدنا تعذبنا
نبي نلحق بباقي الناس
نبي نشيلك بعالي الراس
نبي نطرد من الوسواس
جروح القلب والإحساس
بعضنا غادر الديره
وبعضنا غاص في الحيره..!
ولاكنا حفظنا الروح
ومعنى الحب والجيره
بعضنا ماقرى كلمه
وبعضنا فز من حلمه..!
وبعضنا طاح به علمه
ندور وين وش صرنا..
ولابه نو ينطرنا
وصرنا مثل باقي الناس
نصارع في كلام الناس
نعاين في وجوه الناس
تغير كل هاك الناس
انا يمه..انا ودي اصارحكي
وعيني ماتبارحكي
ابيكي تسمحي يمه
جعل ربي يسامحني
ابا احكي للملا يمه
احكيهم عن اوجاعي
عن جروحي عن اوجاعي
وكم داحوس باصباعي
وكم حزن على شراعي...

************************



زماني ماعرف دكتور
زمان الكاز والدافور
زمان العجن والتنور..
زمان لو تعيشونه
بكل العمر تشرونه
زمان الفكس والحنه
زمان الجرح والونه
وكم نملة وكم صرصور
يعيشوا كنهم منا...
زمان لابكى واحد
تشوف الكون في واحد
تحس الآآآآآه من واحد
وأن الدار به واحد...
زمان التضحيه شيمه
وقول الصدق له قيمه
وعيون الناس تسليمه
ونفرح لابدت غيمه
أنا أذكر فرشة الشمله
وأنا أذكر دبة النملة
أنا أذكر كل ذا يمه...
وحول الناس كانو ناس
ولابه شيك أو عمله
أنا أذكر لاتجمعنا
نغمس من طرف ماعون
أنا أذكر عمق ضحكتنا
وتشهد للجروح عيون..
وش اللي يجبر الدنيا
تبادلني الضحاك طعون..!
تصبرني على جرحي
وانا اطلب من جراحي العون
ولاقالو نصبح عيد
نطرطش بيتنا برخام
وننفض كل زوالينا
وحنابلنا حفاة اقدام..
وذا يضحك وذاك يصيح
ولابه حارس أو خدام..!!
وذا يبكي على حظه
وذا يسبح مع الأوهام..

************************


أنا أذكر يوم نلم كبوش
وصيحة بايع المنفوش
وأنا أذكر لعبة الطرّه
وكل الدار غريفه وحوش..!
وفطور العيد ببيازه
ولابه ناس منحازه
ولابه ناس تغتالك
وتبكي لاجت جنازه..
أنا يمه عرفت ان الكبار كبار
وهرج الغيب اشوفه عيب
وعرفت ان الزمن دوار..!
أنا أذكر طاسة الحنا
وخواتي ضاحكات صغار
أنا أذكر يوم ماكنا
عيون طافحات غبار..
تبدلنا ولاكنا..
نناظر مامضى ونحتاااااااااار..!!
زمان راح ولاأحد مرتاح
يبدل جرحنا بجراح؟؟؟
ألا يالغاليه وينك..؟؟؟؟
تلميني من احزاني
تدليني لعنواني
تشوفي وين جرحي صار
وأنا ويني ووش جاني..!
أنا يمه غريب ببيت
تدور حرقتي عن بيت
أداري الآه بكلمه ليت
وأجفف دمعتي بياليت
ولامني نصيت القوم
يجيني ردهم ياليت..!!
انا يمه اسير هموم
ولولا دعوتك ماقوم
جروح الناس خلتهم
وانا جرحي معي لليوم
جروح الناس عافتهم
وانا كني جريح اليوم...
هموم الناس في صدري
وانا همي نساه القوم..

************************



أنا يمه وكم مثلي..
جريح غربته بيته
زماني راح من عيني
واحسب اني تعديته
تشوفي من انا بغيرك
ومنهو حبني غيرك..؟
ومنهو اعشقه غيرك..؟
تشوفيني ادور لك واروح بعيد
افتش في ثياب العيد
اردد آهتك واعيد
بغيرك وش يكون العيد..!!
انا منهو ليارحتي
وكم جرح كم شفتي؟
انا يمه تمنيتك
خذيتي عمري وعشتي..
انا يمه بعد صدرك
ادور في زمن قاهر
ادور عن لبن طاهر..!
ادور عن فرح ظاهر
اسامر حزنك الساهر
على جفني
وليل صار يعرفني
يعذبني ويسعفني
يهاودني يكتفني
يوديني ويجرفني..!
انا يمه اعيش بجرح
ليل لديت يزهمني
واذا ماغضيت يدهمني
ولابه حد يرحمني
سكوتك بس يفهمني

************************



[poet font="Arial,5,red,bold,normal" bkcolor="transparent" bkimage="" border="none,4,gray" type=0 line=200% align=right use=ex length=0 char="" num="0,black" filter=""]
للشاعر المبدع : ثامر الميمان..
[/poet]