][ (¯`·._) مثقـف المجلـس الـعام " Hictar." ضيفــاً على -: (يــــوم فــي ذاكرتــي) -][ (¯`·._) ‏ - نادي الهلال السعودي - شبكة الزعيم

المنتدى الاستشاري · #1 07/11/2010, 10:39 AM

فكرة وتصميم :: القيصر رهيب
اعداد وتنسيق :: الهنوووف

في حياتنا أيام لا تنسى ..
حملت بين جوانبها أحداث ومواقف شتى ،،
تحكي لنا .. عن ذكريات ماضية
في سطور سوف تبقى خالدة
فـ بكل الحب والمودة نرحب بأعضائنا وزوارنا الكرام في عدد جديد
من

يوم في ذاكرتي

ويسعدنا أن يشاركنا في هذا العدد
ضيفنا مثقف المجلس العام :

«¤¶. Hictar . ¶¤»

* مواصل من عام 1413 سابقا

من وأنا صغير والكل يسمع ويقرأ الأحاديث عن النبي عليه الصلاه والسلام عن فضل الأم

لكن الأبناء والكثير من الأزواج ما يشعرون بهذا العظم ، والسبب : تقديم العادات والتقاليد على الدين.
وما راح أطيل بهالنقطه لأني أدري إن البعض ( تتنقز بلوفه من هالموضوع )

لأنهم حاطين خطوط حمراء على هالموضوع ، ويحتاج هالخط سنين طويله بس علشان يتصدّع أو يتغير لونه.

تخيل كإنسان ( ذكر ) إنك تشيل يومياً وزن ما يتعدى كيلو واحد من تصبح لحد ما تمسي ، ووقت النوم تحط هالوزن جنبك

فما بالك بإمرأه تحمل طفل بداخلها لمده تسعة شهور تعاني أشد المعاناة بالحمل مع الزياده بالوزن ، وتصحى بأحلى لحظات نومها بسبب الترجيف

*ولو يحس الأبناء ( وأنا أولكم ) بهالمعاناة - تلقى الكل من يصبحون يحببون رجول أمهاتهم ( الله يعظم أجرهن بس )

- ترددت بالبدايه بكتابه هالموضوع لأني أظن إن الموضوع أخذ أكبر من حجمه ، ويمكن يضايق الكثير

( لوجود موضوعين مفتوحه بسبب الولاده ، كأني أول واحد يجيه طفل )

وش سبب تغيير رأيي ( هذي خلوها بيني وبين نفسي - لكن اللي بيتضايق من هالموضوع أعتذر له مسبقاً )

بطبيعة الإنسان التفكير بالمستقبل - زوجه ، أبناء ، بيت .... إلخ

أنا كان تفكيري دائماً بأسلوب التربية الصحيحه مع الأبناء ، قبل ما أفكر هل الله بيرزقني بولد أولا !!؟
لأني ومثل الكثير أقرأ وأسمع عن جرائم بالمجتمع ، غالب هالمجرمين يضعون اللوم على الآباء والأمهات قبل الصحبة السيئة!!.
فكان هذا هاجسي الوحيد من سنين إذا الله عطاني عمر ، كيف أربي أبنائي التربية الصحيحة!!؟

قبل الولادة

ولأني أعرف موعد الولادة بالتحديد ، هالهواجيس اللي كانت تمر عليّ طول هالسنين ما طرت عليّ أبداً ،
كان كل تفكيري ( بكره بصير أب فقط ) !!.
ما أستوعبت الحدث ، لأني حياتي أساساً ما تغيرت عن العزوبيه إلا بإضافة صديقة قبل أن تكون زوجة بحياتي!!.
وما كانت المسؤوليات اللي أسمع عنها بعد الزواج موجوده
- فالزواج بوجود إثنين يعتبر صداقة ( إن الله وفق بينهم )!!.

فبيوم الولاده طلعت من الدوام ومن الساعه 9 الصباح وأنا بالمستشفى بإنتظار الضيف الجديد

كان يومي أكثره إتصالات ( هاه ولدت وإلا للحين )

وما قصر واحد من الأعضاء الله يجزاه خير من بدايه دخول المدام للمستشفى وهو واقف معي ( قلبا وقالباً )
فلما تأخرت الولاده رحت لأخونا العزيز
( وما راح أذكر إسمه لأني متأكد إنه ما يبي إسمه يطلع بالموضوع )
وجلست عنده لحد الظهر وحنّا نازلين مع المصعد ( وقف بنا وتعطل بالدور 11 )

على كلام ( هالعضو ) إنه كان يسمع بتعطل هالمصعد طول فترة دوامه بالمبنى ، وما تعطل إلا بعد ما ركبته

بعد ما صلحوا المصعد وخوفاً على النفس ولضمان السلامه - نزلنا من الدور ( 11 ) للأرضي كعّابي على رجولنا

إضطريت وقتها إني أرجع للدوام -

وإتصلت على خالي ( أبو زوجتي ) يشوف هل ( ولدت أو لا )؟

وأنا بالسيارة إتصل علي خالي ( وقالي ولدت ) - الحمد لله

فأنا كنت أسوق والخبر جديد عليّ
ومن اللخمة سألت خالي ، وش جابت ولد وإلا بنت

رد عليّ : إنه ما يدري ، لكن الأهم إن المدام بخير الحمد لله

حسيت بوقتها إني قليل خاتمه ، وما أستحي

وقتها ومع اللخمه وأنا أسوق لفيت يمكن بالسيارة بطريق ماله دخل بالدوام

- ما أدري شلون دخلته

ما أدري من أتصل عليه أو أرسل لمن!!؟
فإتصلت على أمي وأرسلت رساله جماعيه لكم شخص عزيز عليّ ،
وإتصلت على ( المشاغب ) بحكم إنه طالب الموضوع من رمضان

بعد ما طلعت من الدوام - برجع للمستشفى إتصل عليّ أخوي يبارك لي ، وعطا الجوال أبوي
وقتها ما عرفت أتكلم أو أقول كلمه ( العبرّه خانقتني ) وهو يردد ( ألو - ألو )
وقفت على جنب وجلست أصيح

ما أدري بوقتها حسيت بفضل الوالدين على الإنسان أكثر من أول
لكني قدرت الحمد لله ألملم نفسي ونطقت الحمد لله أخيراً وكلمته وبارك لي
شعور غريب ما تقدر توصفه ، ويصير الحدث غصب عنك
حتى لو إن الواحد ما عنده أحاسيس ، بيصير له شئ بوقتها

دخلت المستشفى وجالس أهيئ نفسي لمقابله الضيف الجديد

ولما شفتها ، وشلتها بيديني ورفعتها وتفحصتها بعيوني

أعطيتها قبله - حسيت إنها جافه ومن قلب إنسان خالي المشاعر ، ورجعتها للممرضة

ماش ما تعودت على شيل البزران بهالعمر ، وهم مواليد أحسهم قطعه لحمه
لأن أبوي من وحنا صغار يرفض أننا نمسك المواليد وهم بهالعمر
وكلمته ترن دائماً بإذني إذا شافنا شايلين بزر مولود بكلمه ( إنتبه لرقبته )

فصرت ما أمسك البزران الصغار إلا لما أحس إن فيه عظم
بعمر الأربع شهور وطالع

فإتصلت عليّ أمي وسألتني : شفتها - وش شعورك ألحين؟

- ألحين شلون أحكي لها حكايه الصيّاح اللي صارت قبل ساعه

لكني تذكرت كلمه دائماً ترددها علينا إذا ضايقناها أو زعلت علينا
الله يزرقني بطوله العمر وأشوفكم وش بتسوون مع عيالكم!!؟

كل هالمشاعر وهالحدث ( الأبوي ) زالت في نظره شفتها بعين زميل لي بالعمل
هالزميل له 6 سنوات متزوج وما الله رزقه بعيال
وسافر للخارج يعالج هو وزوجته لكن الله ما كتب له الذريه
في يوم الأحد كانوا زملائي بالعمل يباركون لي
إلا هو كان ساكت - ما كان سكوته حسد
حسيت بنظرته إنه سرحان يفكر في نفسه لو أن الله رزقه بولد
كيف بتكون التريكات
بعد ما خلصت العالم تبريكات - حسّ بوجوده بين الناس
وبارك لي
الله يرزقه بالذريه الصالحه
الذريه نعمه من رب العالمين ما يحس فيها إلا مثل زميلانا ناصر

\

/

بنهايه الموضوع

أنا أشكر كل من بارك ، وبنفس الوقت أخجل من نفسي
لأني مقصر مع الجميع بدون إستثناء
الكثير هنا يعتبرني أخ له ، لكني ما أقدر ألحِق على الجميع
فأتمنى من الجميع يعذرني بالتقصير

جزيل الشكر والتقدير لـ مثقف المجلس العام :
Hictar

ونسأل الله أن يحفظ لك جنان وتكون من عباده الصالحين

الى أن نلقاكم مع عدد( آخر ) وعضو ( جديد )

(¯`·._) ‏ الارشيف لـ يوم في ذاكرتي ][ (¯`·._)

\

/
تقبلوا أرق التحايا وأطيبها
من
مشرفي و أستشاريي
المجلس العام

Ṩσσłŧẵή · #2 07/11/2010, 10:58 AM

لقآء جميـل وممتع

الله يجعلـه من موآليـد السسعآده

وانتبـه لو شلته لآ يفلت منك

إمسسكه بإحكـآم

ع العموم إستمتعـنآ باللقآء

يعطيـكم العآفيـه شبآب المجلسس

ولد البدائع · #3 07/11/2010, 11:04 AM

الله يحفضه لك ويخليه

حسستن باحساس الابوه
وانا ماتزوجت الى الحين هههههههههه

والله يرزق جميع المسلمين بالذرية الصالحة

متابعة بجنون · #4 07/11/2010, 11:04 AM

.
.

وآخيراً شفنا جنو

مابغى الموضوع ينزل .. > موضوع انتظرته كثير

ي لبى ياناس على النايميين

بسم الله ماشاء الله ..
الله يحفظها لكم ويخليها ويرزقكم برها .. وعقبال ماتفرح فيها وهى عروس
والله وانـ شهرتي ي جنو

.. موضوع لك وبالصورة وأبوك
يتكلم عنك " جد من قدك

> ماشاء الله " عقبال ماتشوفه يوم تكبر

وصفك لشعور الأبوه وفضل والدينك عليك ..
يبكي

ماأقول غير الله يرزقنا برهم ي ربّ .,

كثير ناس مايحسون بـ تعب والدينهم عليهم إلا بعد مايجربون طعم
الابوة أو الامومه ..

حمل تسعه شهور والسهر على تعبنا والرعايه
والصرف والتربيه وكله ..
ي ربّ تخليهم لنا ولاتحرمنا منهم [ ي ربّ

::

يوم جمييل وذكرى لن تنسى وفرحه بـ ظني لن تتكرر
فرحه أول مولود

.,
الله يعطيك العافيه " أبو جنان ..

وجعل أيامك وأيام الجميع كلها أفراح ............

.,

/

شكراً لـ من خلف هالآستضافه
.........والله يعطيكم ألف عافيه

وشكر خاص لك ِ ي الهنوووف

.,
وعقبال يوم في ذاكرتي 2 بصورة أول مولود لك ي ربّ ..

.,

marsal · #5 07/11/2010, 11:10 AM

ما تحس انك فرحان بزيادة و مزعجنا معك ..

الله يوفقك و يجعلها من الذرية الصالحة ..

لكن ماني معك في نشر صور الطفلة ...

العين حق ومو كل نفس تذكر الله ..
الله يحفظها و يخليها لعين ترجيها

طفلة خانها التعبير · #6 07/11/2010, 11:12 AM

ماشاء الله تبارك الرحمن..

عساها نومه هنيّهـ...

الله يخليكم لها ..
والله يبلغكم بااحفادها يارب..

الحروف ضايعه
حسيتك مثل اخوي لما جاته بنت

الا عساك اذنت باذونها

ذكرى رائعه عقبال ماتتكرر بولي العهد ان شاء الله..

بانتظار ضيف اخر..

مـوت ومـيـلآد ! · #7 07/11/2010, 11:26 AM

مآإششششآإءالله تبآإرك الله

!
الله يجعلهآإ من موآإليد السسعآإده يآإرب

, والله يحفظهآإ لكم

!
ششي طبيعي بتحس بهالمشششآإعر ( ألأأبويه المتفجره

) لأنهآ أول ضنى لكم

!
~
وصصدقت والله يآإششين شيلة الطفل وهو بهالعمر

, تخاف عليه حتى لو جنبك

!
~
يوم رآإئع وممتع أخوي

, وللمره الثآنيه اقول الله يحفظها لكم

, وإن شششآإءالله يآإرب تطلع هلآليه

!
~
الف شششكر لكل من له بصمه بهالموووضضضوع

, ربي لا يحرمكم من جنته

!

hilalemooot · #8 07/11/2010, 11:29 AM

.

السلام عليكم
هلا وغلا ابو جنان .. يوم جميل جداً واكيد له أثر كبير .. ما تنلام والله
فضل الاب والام كبير جداً .. أتفق معك ان الشي هذا بالذات تحس فيه اكثر لما يجي للواحد ضنى .. عسى الله يرزقك برها ويصلحها ويخليها لكم .. ماشاء الله تبارك الله عليها

موضوع جميل جداً وكالعاده مواضيعك لازم الواحد يطلع منها بفوائد كبيرة
شكراً لك عبدالله .. والشكر موصول للهنوف و الغائب الحاضر القيصر رهيب

الهنوووف · #9 07/11/2010, 11:40 AM

هلا والله بـ ابوجنان

اتوقع انك بتحمس الكل على الزواج علشان هالمشاعر
اكيد الواحد وهو يقرا ويسمع غير لما يعيش هاللحظات
الله لايحرم المتزوجين من الذريه الصالحه

يمكن كلنا نتوقع المشاعر غالبا تصدر من الأم ويمكن نادر نشوف فرحه الاباء
بس اشوف السنين الاخيره في تطور

وتوك ماشفت شي وماجربت هالاحساس اكثر
بكل مرض لها الله يبعده عنها وكل فرحه لها بتحس انها قطعه منك

مااشاء الله تبارك الله
بسم الله عليها ربي يحفظها

احسها مبتسمه لنا --->هذي من الاعتقادات الي نتخيلها دايم مع الاطفال
والله واشتهرتي ياجنان

\

/
الله يخلي لك البنوته وعقبال ماتفرح فيها
وان شاء الله تكبر وتشوف هالموضوع

احسه شعور حلو بيكون
ليت ابوي كاتب مشاعره بقدومي القهر اني مو البكر يعني الفرحه بتكون ناقصه
--->

وشاكره لك قبول هالدعووه الي سعدت بها

إقتباس

الرسالة الأصلية كتبت بواسطة marsal


	ما تحس انك فرحان بزيادة و مزعجنا معك .. الله يوفقك و يجعلها من الذرية الصالحة .. لكن ماني معك في نشر صور الطفلة ... العين حق ومو كل نفس تذكر الله .. الله يحفظها و يخليها لعين ترجيها

اذا كلامك مزح فـ تجاوز ردي
اذا جاد فـ انا الي اصريت على اخونا عبدالله انه يكتب هاللحظات
ولاجربت هالمشاعر بتقول ماينلام عبدالله وكل اب وام بفرحته
يمكن الموضوع مايهمك

بس تاكد انا والكثير معي تهمنا هالاخبار ونفرح فيها وكانهم اخوانا
وكثير طالب عبدالله يكتب هاللحظات وينزل الصوره

خلو الناس تفرح وخلو عنكم التدقيق
لحد يقول ليه اخذتي الموضوع بجد انا قلت اذا الكلام مزح لاتقرا ردي

الهنوووف
كانت
هنا
ورحلت

هلالي من ارض اليمن · #10 07/11/2010, 12:00 PM

عودا حميدا ليوم في ذاكرتي

وحضورا مميزا .. لشخص عزيز على قلوب الجميع .. وحديث عن مناسبة خاصة جدا ،،،

حقيقة يا عبدالله .. لو تحدثت عن الموضوع مرارا وتكرارا فنحن سعداء به .. لأننا نسعد حتما بسعادة أخ عزيز علينا .. وسعداء جدا ان نشاركك يا غالي هذه المناسبة السعيدة .. ونشكرك ان تكرمت بذلك علينا .. ونسأل الله ان يرزقك بر والديك وان يرزقك بر ( جنان ) بك ووالدتها ،،،

من جانب آخر اعتقد ان لديك مشكلة ما مع الرقم ( 11 )

ان يكون تاريخ ميلادك وزواجك وحضور ( جنان ) يحفظها الله متوافق مع هذا الرقم فهذه حالة وأن يقف بك المصعد في الدور ( 11 ) فهذه حالة أخرى

بسم الله ما شاء الله تبارك الله

ربي يحفظها ويرعاها ،،،

للعلم يا عبدالله .. جمالية هذا اليوم انك تمكنت من نقل مشاعرك بمصداقية عبر الحروف التي سطرتها .. حتى تمكنت ان نعيش معك لحظات الترقب والتوتر .. ولا نلومك عند اتصال خالك بك .. فقد وجدنا انفسنا معك نجيب : ولد ولا بنت !

اسعدك الله يا صديقي ومن تحب .. ونسأل الله ان يرزقك زميل بالعمل بالذرية الصالحة ويعوض صبره خير

في حفظ الله ورعايته ،،،

الهنوووف

شكرا للجهد الجميل الذي بذلتيه في هذا الموضوع

ربي يعطيك العافية ،،،

عقـل الهلال · #11 07/11/2010, 12:00 PM

زين من أخترتوا

ماشاء الله لا اله الا الله .. ماشاء الله لا اله الا الله .. ماشاء الله لا اله الا الله

بسم الله عليها الله يحفظها من كل شر وشرير ويقر عيونكم فيها يارب ,,
_____________________

بصراحة لحظات الأبوة بدايتها كأنك عايش بحلم وما أنت مصدق أنك فعلاً صرت أب .
بس عبادي فيه سؤال : سبحان الله ماتحس ان رزقك يبدأ يتوسع مع قرب قدوم المولود وتصير ماشاء الله يجيك دخل مادي ماحسبت له حساب أو تجيك ترقية .
وهذا تبع مقولة (( كل نفس ومعها رزقه )) .

عموماً دايم لحظات الولادة صعبة والانتظار مر وخصوصاً اذا كنت تسمع صرخات وكذا

.
___________________

الله يوفقنا واياك بالدنيا والاخرة
أحس ودي اهذر بعد

FINAL10 · #12 07/11/2010, 12:07 PM

مبروك يآبو جنآن ..

ويجعلهآ ابنه صآلحه لوآلديهآ

ỳάṡṣẻя · #13 07/11/2010, 12:37 PM

,,,

ما شاء الله تبارك الله
الله يحفظها لكم

,,,

احتيآج · #14 07/11/2010, 12:44 PM

مآشآء الله تبآرك الله

الله يحفظهآ آن شآء الله
آخيرآ نزل موضوع آلصوره آحسبك تهك علينا
بس موب بآين آلصفآر مآ شآء الله حمرآء

الله يرزق رفيقك آلذريه آلصآلحه

الرامـي · #15 07/11/2010, 01:12 PM

ما شاء الله تبارك الرحمن

الله يحفظها لكم