17/09/2004, 08:46 PM
|
| زعيــم جديــد | | تاريخ التسجيل: 11/09/2004 المكان: الرياض
مشاركات: 31
| |
>>..,,..ليتني صرت رجال << قصه مرأه >> قصه رائعه ..,,.. <<
السلام عليكم ورحمه الله وبركاته
كيفكم شباب
هذي قصه أمراءه منقوله وانا حبيت انكم تقرون القصه
قصه جميله ومحزنه في نفس الووقت
اخوكم :: لغز هلالي
*&&**&&*
كنت مره من المرات عند خوياتي مجتمعين ،ومبسوطين نفصفص ونتقهوى سواليف وفلّة احجاج ولا احد قدنا،
وبينما أنحن انتماعط ونتجاذب الاحاديث ،مادريت الا وذايك ((الآه ))اللي قطعت علينا السوالف ولتفت والاها نوف قلت لها : سلامتك من الآه وعلى ايش ذا التوهوه ؟؟ّ!
قالت نوف : آه ياروووز آه (( ياليتني رجال ))
كان اعلوم وهبال وخبال ساعة صدر وفلّة احجاج كان أطلع من البيت محدٍ يقول وين انت رايح ، اجي للبيت محدٍ يقول منين انت جاي ،
(( التفحيط )) آه يا عيني على التفحيط والله يا شيخه ان تسان اصرقع بحرتنا واهلهاواروجهم روج بتفحيطي ، تسان اطلع بصوت التفحيط أنغام ، امر على جهيّر وسوير و منيره ولا تهونين يا روز ، واجدّع بكم ولفلف بكم شوارع الرياض ،
ولا به مكان على وجه الارض ما ندوّج به ونتسكع به،
وفي ماهي قاعدةٍ ترطن الا وسوير تقاطعا وتقول : مالت عليتس بس هذا كل اللي هامتس ؟ التفحيط ! احسب ان عندتس مير علم ما اقول غير الله يخلف على اهلاً جابوتس
قاطعتهم (( حصه )) .. وحصه هاذي دفشه شوي ولا عندها بعد نظر .. وقالت : أي والله ياليتني بعد انا اصير رجال ولانيب رجال عادي ودي اصير مزيون ولد تجّار بعد، همن اقهر الهنوف اللي تقول ان كل عيال الحاره زد اخطبوها همن تعجب فيني بس نا ازلبها ولا اعطيها وجه ، عشانها يعني زينه تقعد تغايرنا وتقهرنا ؟؟ .......
وفيما الهنوف تحكي ومن قبلهانوف قلت في نفسي يا (( روز )) لو تمنيتي تكونين رجال وش ودك تملكين من صفات الرجوله وشهي الطبايع اللي تحبين انها تكون فيك ،
< جازت لها السالفه
وانا شاردٍ ذهني ما وعيت الاعلى صوت سويّر وهي تقول : صيته صيته
< اسمها صيته ويدلعونها روز وعع
قلت وجع عمى وش تبين غرفتي عقلي بزعاقتس تراي جمبتس منيب في الحوش يومنتس تصّوتين ،
قالت : روز لو تمنيتي تكونين رجال وش ودتس تصيرين، انا داريه وش ودتس تصيّرين اكيّد تبين تصيرين سواق _تكسي خابرتس تحبين الدوجه.
(( ماقلت لكم انها دفشه وخبله )) بس تراي منيب اوخذها على حكيها، لكن سؤالها كان في الصميم تسنهاعارفه وشني افكر فيه .
قلت :
=========================================
ياليتني (( رجال)) مخشى المطاريش .... اذب صعبات الطرايق لحالي
رجال .. ماني من رجال الدشاديش .... رجولته في لبسته للعقالي
ولاني من اللي بنبسط للنجاشيش .... امه وابوه يبيعهم با الريالي
وماني من اللي ضاريٍ با المخاشيش .... الى اشتكوا ربعه عليه الليالي
رجال ماني من رجالٍ مدافيش .... عقله خفيف وخفته با الهبالي
وأسوق (( شاصٍ ))مادخل دار توريش .... تسلمت كرته يوم سلمت مالي
لا دق سلفٍ مايجي له خشاخيش .... واليا طلع صعب المناهيج رالي
وأخاوي اللي ضاريٍ للمغابيش .... (( رجال موقف وللمواقف رجالي ))
لي شرت له با الشور ماقال لي ليش ؟ .... ولي شار بي مازيّد قيلٍ وقالي
رجال ماهو من رجال الدراويش .... لاصك بابه عن عدوٍ وغالي
الى انتفض مثل (( الصقر )) ناهض الريش .... حلمه طويل وماكره في الجبالي
ليا تخاوينا تركنا الخفافيش .... اللي صداقتهم صداقة ريالي
نمشي مع أرضٍٍ رشتّها الرشاريش .... لابردها يجزي ولاهي قوالي
ريح المطر ينعش حيا القلب تنعيّش .... وريح الخزامى مع هبوب الشمالي
(( لاكن انا طير ))
لاكن انا طير منتّف الريش .... واكبر عزاي اني (( بنت )) الرجالي
========================================
ممداني انهي البيت الاخير الا واشوف الدمع على وجنة (( نوره )) نزل ،
نوره ، هاذي انسانه خلوقه و مؤدبه وصمتها كثير
اذا شفتها تحسن ان هموم الدنيا وآلامها في عيونها، وهي اكبر خواتها ولا لها من الذكور اخوان،
وابوها كبير في السن ورغم كبر سنه كان يخدم اهله وبيته ويلبي مطالبه ،
وحاله يذكرني بالبيت اللي يقول :
جفونه مثقلاتٍ من سنينه .. ومن هول الدهر عقدة لسانه
يبي ينهض ورجلينه تخونه .. وسمعه من قبل رجليه خانه
سمعت اقصاه يوم انّه تزّفر .. وشفت العز في لحظة هوانه
======================================
سألت نوره وقلت لها وش فيك يا غاليه ؟؟
قالت ودموع الحزن تعتريها مع تنهيدة طلعة من اقصا جوفها : آه آه يا روز يالينتي رجال ،
ثم انشدت :
ياليتني رجال يابوي واكفيك .. حمل الحياة اللي تهد الكتوفي
ياليتني يابوي أقدر اوفيك .. واحملك ياغالي على راحت اكفوفي
يالله انا ناصيك وطالبك وابرجيك .. ترحم (( كبير السن )) وبه تروفي .
ما ملك اعصابي وسالت الدمعه من اهدابي وقلت :
كفو والله يانوره كفو.
======================================
ترى ماكل رجال برجال ، ولا كن من صار ذكر صار رجال
كلمة (( رجال )) مدلولها كبير وعظيم بس اهلها قليل ، الرجوله با الفعايل الحسنه والعلوم السنعه
بس يكفينا فخر ان اغلب شبابنا ورجالنا تحتويهم معنى الرجوله.
والله يخليكم لنا يا رجالنا آمين آمين .
*&&**&&*
اخوكم
لغز هلالي |
الوضع العادي
