شاهدت هذا المقطع على اليوتيوب وحبيت افتح موضوع نتناقش فيه عن ضرب المدرس للطالب ؟
YouTube - ‫معاناة برهوم - معلم يضرب طفل‬‎
قبل ماتكلم عن اي شي المدرس غلطان يضرب بهذا الشكل .. ومارضاها له
لاكن والله ترى بعض الاحيان الضرب يفيد
انا عمري 16 سنه ماقولكم 40 ولا 35 وكنت في المتوسط والابتدائي اكل كفوف واتعلم ..
حتى صرت بعض الدروس والله مانساها الى الآن ..
اللي بوصل له ان كل مانطق طالب جاء ابوه وسوى مشكله وليه وليه وكيف تضربه ..
والله كنت انضرب ضرب ومن مدرسين اجانب ومدارس اهليه وابوي يقول تستاهل لانه يدري ان هذا الضرب بيمشيني صحح ..
الاولاد الان صارو (( دلوعين )) يلمسه المدرس يسوي مشكله ..
ياخي هذا مدرسك انت المرحلة اللي فيها اساسيات الدراسه في الابتدائي ...
اتوقع ان الزمن اختلف 120 درجة ..
انا مو مع الضرب في اي الحالات مثلا في جدول الرياضيات يجب يضرب ويجلد عشان ماينساه طول حياته ..
اوما الحين مدرس يرفع صوته بس تصير مشكله ويفصل المدرس !!



الملخص ( يجب ان يضرب الطالب لكي يتعلم ) ولا يضرب في اي الحالات !!
للاسف ططلابنا يبون واحد يضحكهم ويونسهم عشان يجون متوسط ماهم فاهمين شي ويروحون ثنوي ماهم فاهمين شي والى مالا نهايه في الحياة ..


اتمنى الجميع يطرح رأيه بكل صراحه ..

اخوي الحين الطالب يكسسسر راس المدرس

انا قبل 8 سنوات كان المدرس يسجني 5 حصص ورا بعض في المسستودع

و من بعدها صرت اذاكر ودائما ترتيبي الثاني او الثالث

تحياتي لك

لا يا اخوي انا مو مع الضرب ابداَ

,,

ايه بعدي يطقني ويلعن خامس خامسي واقول تعليم

ماعمر الطق وصَل لـ نتيجه يعني وش بيضره اذا حسن تعامله وحسن اسلوبه معي ؟ بالعكس اذا رحت من عنده اذكره بالخير وبحاول بقد ما اقدر مافشل نفسي عنده وانضبط

طيب اوك انا كـ طالب ثنوي يمكن اتحمل الضرب < طالب ثنوي وش يدريك بس

لكن طفل في الابتدائي وضربته بشكل موحش صدقني بيتعقد وبيكره شي اسمه دراسه وانت جايب الدليل بنفسك

اجل عشان غلط بكلمه يصفقه كف ويكسر نظارته ؟ لا واذا علمت ابوك خصمت منك درجات ؟ نظااااااااااااامك يا صديقي

يالله يعطيك العافيه ياقوي يالي تتحمل الطق لـ اجل العلم والتعليم

هلا اخوي
...
خلني بلخص لك حديثي من خلال تجربتي لللمدارس هنا فالسعوديه
قبل ايام ما كنت فالابتدائي كان فيه ضرب ودق خشوم
يوم جيت المتوسط فيه ضرب للطالب اللي يسكت واللي يرد ينطرد ويحول للوكيل واستدعاء ولي امر
بس اللحين اكاد اجزم انه مافيه مدرس يضرب فهالوقت الا الابتدائي وهاذي المشكله
ابي افهم اذا انضرب البزر يبي يفهم قسم هالمدرسين دلووخ
واللي فـ الفيديو حقير ! كيف يضرب الطفل عشان هالسبب التافه حسبي الله عليه مشكور عـ الموضوع اخوي

على حسب اهمية المادة .. او على حسب اهمية الشغاب اللي يحصل بالطلاب ..

انا لا اؤيد الضرب من اول مرة .. لا اؤيده وبشده في المرة الثانية .. اما المرة الثالثة اضربه واوديه للمشرف او الوكيل ..

اما اذا كان عن الدرس او انه مايشارك او انه مايحل الواجبات او ماحفظ جدول الضرب ..!

فيجب عليه الشدة بالكلام .. ثم نقص الدرجات ..

واكره شي عندي المجاملة للطلاب !!

وخصوصًا عند ابتدائي المدارس الاهلية .. زي مايقول اخوي !!!

منورين على راسي والله
انا قصدي ماينطق طق مبرح يكون طق يذكرك الدرس او الحفظ ..
يعني الحين طالب مو مجتهد لو ماتجلده عادي عنده لاكن لو تقول النصوص اللي موب جاي يحفظ بينطق وش بيصير ؟
بيجي حافظ .. فهمتوني ..
ولايكون الضرب لاي شي مثل حق المقطع ..

انآ اختلف معك 180 درجه
ولا توقعت احد يفضل الضرب هذا الوقت
اللحين وحنا بالجامعه وكبار واحد يفرض عليك رائيه مو تنقهر وهو مو طق ولا شى
حتى مع اهلك لمى يخلونك تسوي شى مو مقتنع فيه مو تنقهر شلون عاد الضرب ومع صغار
بس بعض الناس متخلفه تستغل برائه طفل وخوفه وانه مايقدر يعبر عن نفسه

بالنسبه لي الضرب للصلاه مثل ماوصانا الرسول وحتى وصيه الرسول قبل الضرب امر للصلاه واخرر شى الضرب

عن نفسي الابتدائي درستها بمدارس حكوميه صح ماكنت شاطره مره بس بنفس الوقت اسوي الواجب
وكان فيه معلمتين طقوني صح مو قوي بس الطفل مايفرق قوي ولا لا خصوصا ان الاطفال الاشياء السخيفه يشوفونها كبييييره
مره بسنه رابع نسيت المصحف
وكنت لابسه ربطه وتجي المعلمه تسحبها وترميها تقول مانسيتيها ونسيتي المصحف

ومره معلمه العربي تقبصني ليه انسى الدفتر وهي بتصححه
والله اتذكر رجعت للبيت ويدي مزرقه واصيح عند امي تحط فيها كريم وتقول الله يهديها
جلست فتره اكررهه المدرسه واصيح كل صباح وبهذلت اهلي وخواتي الي صرت اترك فصلي وادرس معهم

مواقف ماانساها بكرى لو يجيني بنت والله ياويل الي يكلمها كلمه
عادي مو لازم تكون شاطره 100% الدراسه اقدر اعوضها بالبيت بس
اهم شى نفسيه البنت وثقتها بنفسها

والله فيه استاذ لو اقابله اليوم اقوم احب راسه على الطق اللي كان يجيني منه
لانه موب بس يطق , يطق وينصح على حسب وش انا مسوي
يخليني استحي على وجهي اذا اخطيت عنده او ماجبت الدفتر او اي شي
وفيه مدرس كسر قلم سبوره على راسي وانا بالابتدائي بدون سبب وكرهت مادته لين الحين وانا متعقد من الماده هذي ولا اذكر اني جبت بالماده هذي لين تخرجت اكثر من جيد مغ ان درجاتي بجميع المواد ممتاز الا الماده هذي

أنا أكلت كـف يحبه قلـبك وللآن من 14 سنه مانسيته
ومتذكر الحصه والمآده وكل أبوو شي عن الحادثه .

كآنت أوول حصه قوآعد لي في سنه رآبعه إبتدائي الحصه الرابعه
بعد الفسحه وكنت أنقز بين الكرآسي آخر الفصل ,
وعلى جيت المدرس تعال تعال .....
طرآآآآآخ

كرهت القوآعد بسبته... الله يذكره بالخير بس


انا مع المدرس أنه يضرب في حآلة التعليم والتربيه
والأهـم من ذلك يكوون حـليم مع طلابه
مو للهياط آنه يتقوى على طالب صغير فالسن .

يا زين حق الابتدائي يعطيني في موادهـ 4

واذا خذت الشهادهـ شقها ..


ــــــــــــــــــــــــــــــــــــــــــــــــــــــــــــــــــــــــــــــــــــــــ


والله الطالب مظلموووم ..

لو واحد سوى لولدي كذا بفقع وجهه

اذكر وانا في صف خامس ابتدائي استاذ الوطنيه طول الحصه

يحسب فلوسه مايشرح الا اخر خمس دقايق من الحصه ولا يخلي احد يتكلم

في يوم من الايام انا طفشت من الحصه وفجأه قال الاستاذ مساكين الي في السجن

قلت انا السجن ارحم من الفصل قام وضربني بالعقال لين قال بس

لو اشوفه اجمع ربيعي يطقونه!

إقتباس الرسالة الأصلية كتبت بواسطة هلالـــ موت ـــي اذكر وانا في صف خامس ابتدائي استاذ الوطنيه طول الحصه يحسب فلوسه مايشرح الا اخر خمس دقايق من الحصه ولا يخلي احد يتكلم في يوم من الايام انا طفشت من الحصه وفجأه قال الاستاذ مساكين الي في السجن قلت انا السجن ارحم من الفصل قام وضربني بالعقال لين قال بس لو اشوفه اجمع ربيعي يطقونه!

\


نحن معك 500,000 الف عضو نجلدهـ لعيونك