هو انآ ادري عن اللي صآر لي على شآن اشرحه لكـ,
والله يوم جآء هدف يآسر شوي و اطير ..
و يوم جآء هدف عيسى عآد اذا في هدف يآسر شوي و اطير في هدف عيسى .. ايش ..؟
اكيد طرت << يوه بس وين وصلت ..؟
رغم اني حسيت ان الهدف جآي 100 في الـ100 بعد هدف يآسر ..

انا شفت الشوط الاول ويوم انتهى اقامت الصلاه رحت صليت وحلفت مااشوف الشوط الثاني وسكرت روم الهلال بالبالتوك وسكرت التلفزيون وكل شيء وجلست العب بلوت مع شباب وانواع الفهاوه والتقطيع لدرجة اني اتخيل شايب الشريا قريتس

شغلت التلفزيون على انطلاقة الشمري والهدف الرابع وقلت ليتني ماشغلته وبعد هدفهم الرابع افكر وش بيصير للهلال بعد الخساره الاسيويه واتذكر اللي بيتشمتون اخوياي الفقراويه وقلت بنفسي اذا مافزنا بذا الفريق وهذي الظروف وهذا المدرب فلن نفوز بااسيا ابدا المهم وكملت اشوف المباراه ولاجاني احساس واحد بالميه ان الهلال بيفوز جاء هدف ياسر فرحت وسجدت سجود شكر لكن كنت احس بداخلي ان الفرحه موقته لاني مااتفائل بركلات الترجيح ابدا ابدا ابدا ولاتسالني وش سويت يوم جاء هدف المحياني لاني حتى انا مااذكر وش اللي سويته لكن اذكر اني اضحك ماقدرت امسك نفسي من الضحك وسجدت سجود شكر

انا اخوي يوم انتهت الاشواط الاصليه صكر القناه وهو زعلان جيت لمه قلت ليس قال ما انتهت قلت لا
ويوم جا الهدف الرابع ضاق صدري وقلت خلاص بنطلع وجا هدف ياسر وطمرت من الفرح ويوم جا الهدف الثاني استانست
وقمت اتمشا بالبيت من الفرح كل هذا لاجلك يا زعيم بصراحه موضوع تشكرون عليه وماقصرتو

كل شي صاااااااااااااااااااااااااااااااااااااااااااااااار معي يا جماعه شي مو طبيعي حرق اعصااااااااااااااااااااااااااااااااااااااااااااااااااااااااااااااااااب

الحمدلله على التاهل

أنا بين الشوطين و النتيجة ثلاثة صفر دق علي واحد من الشباب. قال تعال كمل المباراة عندي. قلت له أخاف أجي و ما نتأهل. قال تكفى أخاف يصير فيني شي من القهر و محد عندي. المهم رحت له و الهلال لسه تعبان و الرجال كل ماله يعصب أكثر. المهم و يجئ فينا الهدف الرابع و قام ساكت و يرفس برجله الأرض. و يوم جت الكورة لعيسئ الحاسم ويشوتها في وجه الحارس وطلعت فوق و أنا ما ادري أنها بتروح لياسر قمت على رجولي و أقول يالله يا ياسر تكفى يا ياسر شوي إلا هي هدف قمنا نطامر زي البزران و ماجلسنا إلا و تو الثاني جاي. قمنا نطامر من جديد و خمينا بعض و خويّ يقول أبي أصيح أبي أصيح يا تركي و قام يصيح. المهم يوم أنتهت المباراة و هدينا قالي يوم عيسي شات الكورة و طلعت فوق خويّ يحسبها طلعت برة و يوم شافني أقول يالله يا ياسر تكفى يا ياسر يقول قلت مسكين أنهبل تركي من الهزيمة الكورة برة وهذا يطامر تكفى تكفى.

أولاً مبرووووووووووووووك التأهل والله ما يخيب رجانا ونحقق الآسيوية بمشيئة الله
أما بالنسبة لي وش سويت فبصراحة كانت مباراة أعصاب ما قد عشت مثلها في حياتي إلا مرة وحدة يوم مباراة الهلال والشباب 3/2 1418هـ يوم هدف سااااااااااااااااام6
أول شي قلت لعيالي بوديكم السوق الساعة 5:30 عشان يمديني ألحق على التحليل والمباراة
ولكن ( رحم الله أمرىء عرف قدر نفسه ) قلت أقولكم تجهزوا الساعة 6:30 بنتحرك من البيت طبعاً القصد كله أني ما أبي أشوف المباراة لأني عارف أعصابي دمر وصراحة خفت يجيني شيء من المباراة0
وانا رايح أوديهم السوق دق على خويي قال وينك فيه قلت رايح أنزل عيالي السوق قال مررررني بسرعة وقطع الإشاارااااات ، يوم قال كذا والله ياهي ضاقت بي الوسيعة.
قلت هاه يابو وليد وش القصة( عموماً هو مشترك معانا هنا بالمنتدى وهو مثلي من شيبان المنتدى ) قال الأمور ما تسر 2/0 للغرافة ، والله يوم قالها أنه كنه واحد ساطرني كف مريت الرجال وخذته وقعدنا ندور نبي المباراة تخلص باللي هيبه شوي ويرسل لنا واحد من الشباب رسالة يقول فيها جابو الثالث ، هو قاله ولا ما قاله ، قالي أبو وليد فلان مرسلي يقولي جابوا الثالث والرجال مفروض أنه إذا يبي يدق علي مفروض ياخبر مفرح ولا بلياها من مكالمة بس وشرايك نقطع علاقتنا فيه (خوينا مكبر الموضوع مره ) 0
الزبدة أنا وخويي حفظنا مخططات جدة كلها من كثر ما درنا بهالحواري وقعدنا نسولف سواليف سخيفة سامجة والله البزارين ما يقولونها بس نبي المباراة تنتهي خلاااااااص فاقدين الأمل ، وبالطريق وأنا راجعين للبيت كلمني واحد من الشباب قال وينكم قلت ولله برى رايحين نمتر جدة وكانت النتيجة وقتها 4/ 0 ، قال ما عليكم بنتأهل إنشاءالله قلت له الله يرحم والديك تراني منهار لا تقعد تتفلسف قال والله أننا بنتأهل بمشيئة الله وبيني وبينك تلفون ، وأنا قريبين من البيت دق علي قال أبشرك ياسر جاب الهدف الأول ، شوي ودق علي قال ما قلت لك يالوح أننا بنتأهل الثاني ركب في القول من المحياني ، والله ياأني قمت أدعي من غير شعور حتى خويي اللي معي لاحظ أني قاعد أدعي بلغات مختلفة ، بس الحمدلله على التأهل والله لا يرينا ولا يريكم مثل هالموقف اللي حطونا فيه لعيبة الهلال 0
ما يستفاد من الموقف
1- إذا أنك كمشجع تعتقد ان أعصابك لا تساعدك على متابعة مباراة فنصيحة خلني قدوة لك وسو مثلي والله أنك بترتاح أحسن من شوفتها ورفعة الضغط 0
2- والله ياهالمباراة خلت عندي خبرة في أحياء جدة القديمة والحديثة لأننا ما خلينا شق الأ ودخلناه نبي المباراة تخلص 0
3- أني يمكن أترك التشجيع وأفتح مكتب عقار بحكم الخبرة المكتسبة

آمممم آنآ آسآسآ ع آني آرووح قطر بس آبوي جآته ظروف بآلعمل ومآ قدرنآ نروح

آنـآ سبحآن آلله كنت متفآئله حدددي ~> لآ عآد تتفآئلين ..

آلموهم ومو بآطن تسسسبدي آلآ آلمجلس وحمود سلطآن يوم يقول بنفوز وبنفوز -__-

آلموهم وتبدآ آلمبآرآه جآ آلأول مشينآهآ سلكنآهآ

وآلثآني قلت لآلآ بنعوضهآ ويجي آلثآلث ونصررررخ آنــآ وآبوي لآآآآآآآآ

بين آلشوطين رآحو يصلون وآنآ خشيت مسن وتهآوشت مع آلموجودين كلهم

ويمرررر آلوقت ومآ سجلنآ :| وآلإضآفي ويسجلووون آلرآبع آنآ وقتهآ فيسي علآمآت تعجججب وآلوآآآن :|
:| ~ دخلت آمي وآشكآلنآ توووحفه وتطآلع آلتلفزيون قآلت عشششآن كذآ ^^"

وموووصله معآي آنـآ وآبوي وضآعت فرصة يآسر آلي قدآم آلبآب ويحلف آبوي يقول آلتأهل وآلله مو لهم

آقوله يآخي لآ تتشآئم وخلك متفآئل ~> قمة آلميآنه ~ وعلى آعصآبنآ

ويجي قووول يآآآسر أويلآآآآآآآآآآه هو صرآخ ولآ تسسسسدح ولآ بكى وآقووم وأحضضن آبوي وننآقز

وقول عيسسسى آآآآآآآآآع آلصصصصوت رآآح وقممت آرجف وقلبي يعورني وصصرت لوني آحمممر ~> فدآ آلزعيم

>> آلى آلحين مقطوع صوتي مآتري شلون بدآوم بوكرآ ..

وآلله يسسسسآمحه نوآف بس ع فكره قولوله يسآمحني لأني سبيته سب وتنتهي آلمبآرآه وتنطططلق صررررخة آلفوووووووووووووووووووز وربي وربي مآ تنسى هآلمبآرآه ..

بعد هدف الغرافة الثاني ايقنت أن اللاعبين صاروا خارج التغطية وصار فيه تخبط من تمريرات الى عدم تمركز صحيح في المراكز الى ان الكرة تمر من جانب بعض اللاعبين ولا يستطيع قطعها فقلت لهذه الدرجة يعني خلاص فقدوا اللاعبين السيطرة على المباراة صراحة بعد الهدف الرابع وبعد الكرات السهلة التي مرت من امام ياسر قد ياولد وش هذا اللاعبين ما يشوفون المرمى لهذه الدرجة وصراحة قلت عدنا لايام أم صلال وصراحة راسي اوجعن والنفسية مرة ولكن بعد تغيير الحكم الفاشل وحركات مدرب الغرافة ايقنت باذن الله ان التاهل للزعيم وبعد المباراة رحت اجيب عشا بمناسبة التأهل صراحة رجولي مرة ترتعش وتنتفض يالله بس جبت العشاء ونتعشى انا واللي معاي بس منذهلين من المباراة أصعب واتعب مباراة تابعتها للزعيم بحياتي مباراة نفسية

الله لا يعيد ذاك الليلة
انا كنت بالشقة لحالي ، طبعاً ولله الحمد والمنه معي اثنين من أخوياي كلهم زعماء مثلي
واحد الله يصلحه ماقد حضر مباراة إلا يصير الهلال منكوب فيها ، وراح لقطر بيحضرها
والثاني كان عنده دوام ويهوجس انه يسحب عليهم بس كان وضعه حساس وطردته وقلت له انا معك بالبلاك بيري وحده بوحده
المهم بدت المباراة .. وشوي إلا يجي الهدف الأول وانا توي مقرب الحب ومزهب الشاهي والشيشة .. طبعاً قمت ألعن بس بشويش .. واثق انها بتدبل على بابهم

يوم جاء الثاني بعد رفعة ضغط من حركات ياسر والفريدي .. وانا اللي ماخليت شي ما لعنته حتى هندي البقالة دقيت عليه ولعنته وقفلت ، وأدق على خويي اللي حاضر وألعنه وأحلف عليه انه يطلع من الملعب ، الرجال عارف نفسه وطلع من الملعب من غير ماحد يقوله طبعاً

يووووووووووووم عاد جت الطامة الثالث ولو ركزتوا شوي انا كنت متابع العتيبي الله يصلح قلبه
كان يصرخ للفريدي واللي جنبه انه يزحون الحيطة شوي يمين بس ماحد حولك
وانا اللي تنسسسسسسسسسسد نفسي وأترك الشيشة وأطلب ملبورو أحمر
ومافيه الا قوة تشفيط زقارة ورا زقارة
وخويي يرسل لي بنقات من الدوام وانا اللي أحذفه من اللستة عندي طبعاً حذفت 5 من أخوياي النصراويين اللي أتمنى من الله يتوب عليهم

عاد يوم جاء الرابع .. غيرت على ام بي سي 4 وجلست أتابع أوبرا أو مدري وش كان فيه
ومسكت اللابتوب وجلست أفتح قريتي بترافيان وصفحة ثانية بلياردو
وسببببببببببببببسبه في ذالعالم مع ظهور أعراض صداع وعدم قدرة على الوقوف وارتجاف في الأطراف

يوم عورني قلبي وانا اللي أتعوذ من ابليس وأرجعها على أبوظبي

يوم جاء هدف الهلال الأول والله كني مسحور وفك سحره
يوم جاء الخامس للهلال عاد انا ما تحملت قمت وطلعت وشغلت السيارة وأخذت فرة على السايدين وأحلى جلنط لعيون عيسى المحياني
طبعاً رجعت خويي اللي حذفته ورجعت أخوياي النصراويين كلهم وكلمت خويي اللي بقطر ولقيته بمكان لا يمكنني ذكره هنا D:

وأهم شي ناديت هندي البقالة وسددت المديونية وفوقها خمسين ريال رضاوة

واللي حلى الموضوع أكثر وأكثر
لبى قلوبهم الإنتر
صقعوا باري 4/0 بعد مباراة الهلال على طول
لبى قلب إيتو والخوال كلهم

أتمنى ما أكون طولت عليكم
وسامحوني على التقصير D:

تحياتي

الحالم

كنا خمس اشخاص وبعد الهدف الاول قلنا معليش خطأ دفاعي وبعد الهدف الثاني سكووت وهدؤ غريب وبعد الهدف الثالث انفجار وتكسير البيالات والترامس وبعد الهدف الرابع رضوخ للأمر الواقع واستسلام وكنا ننتظر الخامس يخلص علينا لكن الحمدلله,,
بعد هدف ياسر جنووووون وصياح ونياح وكل واحد راح لمكان وثواني ويجي هدف عيسى وبعدها انهيار وبكاء والصراحة اني خفت يجيني شي جلطة والا اغماء ولكن الحمدلله عدت على خير,,,
الحمدلله على التأهل وعقبال الكاس إن شاء الله,,,

باختصار انا سويت حركة ابراهيموفيتش من الخبصه مدري انا وش قاعد اسوي..!!!!

صراااااااحه انا مااصدقت وانهبلت في المدرجات بالدووحه وصرااحه شي مايصدق