أمن الملعب وتنظيمه والتطفيش المستمر ... إلى متى ؟ إلى متى ؟ والله تعبنا (وملاحظات على مجلس الجمهور الهلالي)
السلام عليكم
مبرووووووووووووك للجميع الفوز وإن شاء الله نفرح بالإياب ونص النهائي والنهائي
يا جماعة أبيكم تتخيلون بس
إذا تشتري التذكرة وعليها الرقم والكرسي مرقم ما ترتاح؟ حلو وإذا كان المشجع مرتاح وش بيصير؟ أكيد يحضر ! ويمتلي الملعب ويوصل 70 ألف ! لكن على اللي أمس صاروالله أنواع الطفش
حضرنا في الواجهة ولله الحمد لأن أخوي حاجز لنا كراسي (هذي ثاني مرة وآخر مرة في الواجهة)
المهم يوم جينا ونبي ندخل لقيناهم مقفلين البيبان قلنا ليش؟ قالوا بنفتح وقت الصلاة ! طيب هي هي !!!!!!!!!!!!!!!!
المهم بعد تزهيق وطفش دخلنا ورحنا لكراسينا
بدأت المباراة المهم بعد نص ساعة خويي كان محتاج موية وطلع شوي ورجع قلت وش فيك ؟ قال البوابات مقفلة !!!!!! يعني قلب سجن !!!
في النهاية بين الشوطين فتحوا البوابات وكل طلع يوم بدأ الشوط الثاني ويقفلون البوابات ! والناس برا حول 200 شخص وبعد طلبة وبعد ما مرت 5 دقايق من الشوط الثاني فتحوها !
حسيت إنا ما حنا في ملعب! تقريبا إصلاحية شي زي كذا
والله شي يقهر ولازم يشوفون لهم صرفة ومهب اخترااااااااااااااااع وأطالب المهندس النمشان ما نبي شي منه إلا شي واحد : رقموا الكراسي ولو تبون أجي وأرقمها على حسابي ما عندي مشكلة أما اللي جالس يصير ما ينسكت عليه
لا طلبنا تضبطون الخروج وتنظيمه مع المرور ولا طلبنا مطاعم ولا شي فقط رقموا الكراسي وخلوا البوابات مفتوحة
ملاحظة : كل اللي صار عند البوابة 27
ثانيا: قدامي 4 مقاعد فاضية ليش؟ واحد تاكي من يوم جا يقول محجوزة وفي الأخير لا محجوزة ولا شي !
ثالثا: احتساب عدد الجماهير كيف يجري؟ التذاكر يوم طلعنا مرمية على الأرض يعني لا عد ولا شي ! حضرت مباراة بونيوديكور وهذي والفرق أكبر من ألف مشجع بينها! الجمهو كان أكبر من العدد المعلن
بالنسبة لمجلس الجمهور الهلالي:
أمس الصراحة ومع احترامي وتقديري لهم ما لمسنا شي منهم
وللأسف الشديد واحد منهم كان يدخن !! وغثنا غث
ثانيا بخصوص الأعلام اللي وزعوها وزعوها بطريقة عشوائية جدا جدا المفترض مثل ملاعب العالم حطوها تحت الكراسي قبل دخول الجماهير عشان تكون العملية منظمة أكثر
وآسف على الإطالة وما أبي أخرب الفرحة لكن كل مباراة نقول إن شاء الله يتحسن الوضع لكن للأسف من أردى إلى أردى
وإن شاء الله نلقى الوضع متغير إذا تأهلنا بحول الله لنصف النهائي ونسمع المذيع يعلن حضور 65 ألف متفرج أقل شي
.. 
الوضع العادي
