نادي الهلال السعودي - شبكة الزعيم - الموقع الرسمي - اختار و لا تحتار ... ( مواقف داخل البيت السعودي )

عزيزي القارىء .. اختار و لا تحتار ...

==============================

* تعيش في ( دور ) مستأجر , فيه مجلس رجال واحد ,
وفي احد الأيام يزورك اقاربك , فيمتلىء كنب المجلس عن آخره ,
ولا تجد مكان لتجلس فيه انت , فتتظاهر بأنك مشغول بصب الشاهي
وانك غير مهتم بالجلوس ,
في هذه الا ثناء يدخل الى المجلس ضيف جديد ( كبير في السن والمقام )
لكن لااحد من الجالسين لديه اي استعداد للتخلي عن مكانه للضيف الكبير ,
فماذا تفعل بضيفك :

1- تقوله : اجلس على الارض .. ( فشيلة ) !!

2- تمسك بريق الشاهي , وتمـسّـكه بريق النعناع .. ( تصرفونها )

3- تختار اصغر واحد من الجالسين , وتسوي نفسك بتصبله شاهي ,
لكنك تكب بيالة الشاهي على ثوبه , وأول ما يقوم يروح لمغسلة اليدين
عشان يمسح ثوبه , تنتهز الفرصة وتجلّـس ضيفك .

==========================

* تذهبين مع زوجك الى عزيمة احد اقاربه ,
وما ان تدخلين الى هناك حتى تفاجئين بعدم وجود مدعوات ,
وان حريم اهل البيت جالسات بخلاقينهم ,
فتكتشفين ان العزيمة .. ( للرجال فقط ) ,
فماذا تفعلين :

1- تتصلين فورا وبغضب عارم على زوجك ( الدلخ ) وتطلبين
المغادرة فورا .

2- تجلسين بخجل واحراج شديد ( ووجهك في الارض )
وما عندك وجه تسولفين مع احد .

3- تتظاهرين بأنك تعلمين انك غير مدعوة , لكنك جئت من اجل
مساعدتهم والفزعة معهم , وفعلا تدخلين المطبخ مباشرة
وتتظاهرين بمساعدتهم .

=============================

* في احدى المرات , و ا ثناء زيارتك لأهل خطيبتك ,
تقدم لك الخطيبة الشاهي ( اللي هي مسويته ) , لكنك تتفاجأ
ان الشاهي ماصل " مافيه سكر " ( على بالها بتسوي اكل صحي )
وانت اصلا ما تواطن الشاهي الماصل ,
المهم وفي ا ثناء ما انت جالس تتغصّـبه , ويالله تبي تفتك من هالبيالة
اللي معك ,
ما تدري الا وهي تسألك في دلال وحياء ( وش رايك بالشاهي ) ؟
وانت طبعا مايمكن تكسر خاطرها , ولازم تجاملها , وعلى طول تقول :
( رائع .. مذهل .. يهبـّـل .. هذا ألذ واحسن شاهي شربته في حياتي ) !
المهم هي على طول صدقت , وبعد الزواج صارت كل يوم تسوي
الشاهي بنفس الطريقة الماصلة اللي انت تحبها , وانت لازم تجاملها وتشرب ..
حتى جاء يوم وصلتَ فيه الى مرحلة ترى فيها استحالة استمرار
حياتك الزوجية في ظل وجود هذا الشاهي الماصل ..
فماذا تفعل :

1- تقول لها مباشرة وفي وجهها : شاهيك شين وماصل ( تحطييييم )

2- أصـبـر , وترى الشاهي شي مايستاهل اني ازعـّـل حبيبتي عشانه
( وكله في سبيل الحب يهون )

3- اقول لها : اليوم كنت عند واحد من الشباب , وكان شاهيهم ( حالي ) ,
وانا أول مرة اذوق الشاهي حالي , وأول مرة ادري انه لذيذ لهدرجة ,
وش رايك نجربه ؟

=================================

* ترتاب في شغالتكم من كثرة ماتفتح باب الشارع وتطل فيه كل صبح ,
وتشك في انها على علاقة عاطفية مع ( روميو البلدية ) الذي
يقطع الشك باليقين وتتفاجأ به اثناء خروجك من البيت يأتي اليك
ويطلب يد شغالتكم ..
فماذا تفعل :

1- اوافق ( في الحلال ولا الحرام ) .

2- ارفض وبشدة , ما بقي الا عمال البلدية يصيرون ( نسبانا ) .

3- أسـفـّـر الشغالة .

=============================

* تعيش في شقة صغيرة مع زوجتك واطفالك الاربعة ,
بنتين في غرفة , وولدين في غرفة , ( لأن مافيه اي غرفة زايدة ),
البنتين ( عصفورتين ) ماعلينا منهم , أما الولدين فهم
خالد ( 12 ) سنة , ومحمد ( 10 ) سنوات ,
وتدلعونهم قدام الناس ( خلودي وحمودي )
وفي البيت ( خويلد ومحيميد )
المهم هالا ثنين صحيح انهم عايشين مع بعض , لكنهم ما يطيقون بعض ,
ودائما يتطاقون ..
وطول وقتهم مختلفين ولاعمرهم اتفقوا على شي ..
( ولـّـع اللمبة - طف اللمبة ) ( شـغـّـل المكيف - لا تشـغـّـل المكيف )
( ابي اسمع المسجل - ترى بكـسـّـر المسجل على راسك ... )
ودائما على هالحال ..
حتى جاء يوم تطاقوا فيه مطاقة كبيرة , وقرر خالد الكبير انه يطرد
اخوه محمد طرد نهائي من الغرفة , وفعلا طرده , واخرجه من الغرفة
ورماه في الصالة , واخرج ملابس اخوه واغراضه ورماها عليه في الصالة ,
واغلق خالد باب الغرفة على نفسه , واعلن سيادته الكاملة على الغرفة ( غزو غاشم )
في هذه الا ثناء تدخل انت وزوجتك عائدين من خارج الشقة لتجد محمد يبكي في الصالة ,
فماذا تفعل :

1- تقرر انك تسوي فيها ( خالد بن سلطان ) وتقوم بهجوم
( عاصفة الشقة ) وتقتحم الغرفة و تعيد محمد اليها بالقوة ,
وتعاقب خالد بطرده هو من الغرفة لمدة اسبوع ( وتدور الدوائر )

2- تشوف ان خالد هايج , وماعنده استعداد يتفاهم مع احد ,
ويمكن يتطور الوضع الى مالا تحمد عقباه ,
فتقرر ان محمد ينام معكم .. ( ياحظظظظظة )

3- تشوف ان المشكلة مالها حل ابد ,
وتقرر انكم تطلعون من هالبيت و تسكنون في بيت فيه غرفة زايدة .

============================

واختار ولا تحتار..

تحياتي ..