((يوميات رمضانية "18" )) المتميزة : "ع ـشقهــا هـلالـي " كلمة تجبرها على التخلى عن فالنسيا ..!! - نادي الهلال السعودي - شبكة الزعيم

المنتدى الاستشاري · #1 29/08/2010, 05:16 AM

فكرة: سندريلا الهلال
اعداد وتصميم : الهنوووف + عسيريه

لنا من كل عام شهر فضيل ..

أعاده الله علينا وعليكم وجميع المسلمين بالخير واليمن والبركات

وكل عام وانتم بخير

**][يوميات رمضانية 1431 هـ ♥][ **

لقد عدنا اليكم .. تحملنا الاشواق للقياكم .. ونسعد ان نعيش معكم

. في سلسلة تحمل بين طياتها يوميات الأعضاء الرمضانية من كل عام
هذه السلسلة أنتم أهل بيتها ونحن ضيوفا في حضرتكم ،،،

♥

أهلا وسهلا بكم أحبتنا
ودعونا نرحب سوية بالضيف" الثامن عشر
المتميزة ع ـشقهــا هـلالـي
لكي تحكي لنا احداث يومها مع شهر رمضان المبارك

ماهو رمضان بالنسبه لك ..؟
رمضآن مآدري اذا الكثير مثلي يشعر بـ آمآن وراحه
مآدري يمكن يوم كنت صغيره كان ابوي يقول لي\تقدرين تمشي براحتك في رمضان عشان ربي يمسك الشياطين
ويسجنهم عنده في جهنم هـ الكلمات هذي ثبتت في عقلي
وصرت فعلا احس ب امان ورحه وطمآنينه

برنامجك اليومي في رمضان ؟
برنامجي اليوم ابد انام الساعه ر8 ونص او9 صباحا
اقوم ع الساعه 3 وان كثرت 3 ونص اغسل وجهي
بعدين البس قميصي المحدد للمطبخ ثم اتوكل ع
الله واجاهد في الطبخ عاد اكرف ثم اكرف ثم
اكرف لين اقول بس عاد اذا اذن اكون انا وامي
خلصنا كول حاجه ونفطر الفطور الاول بعدها اروح
اصلي واجهز الفطور الثاني عاد ابداء اقراء الجزء المحدد
لي في القران ثم اروح ع طول لـ بدايه
عقبهآ اغسل مواعيني عاد اذا اذن العشاء وسكن البيت
جلست ع النت الساعه 10 اشوف صلاة الحرم وبعدها
برنامج الشيخ العرعور في صفاء ثم بعدها
اسوي سحوري ونتسحر ونصلي الفجر واقراء
الجزء المحدد لي وبعدها نفس هيك

ماهي اكلتك ومشروبك المفضل في رمضان ؟
انا انسانه اكلي قليل جدا يعني غالبا اكتفي ب عصير
التانج لاني السنه هذي كرهة الفيمتوو موب حلو
واهم شي عندي بـ الفطور هو الماء والماء فقط

متى اول مره صمت فيها .واذا عندك مواقف مع الصيام اذكرها ؟
تقريبا يوم كان عمري 5 سنوات وع ماقال صيام نص
يوم نظرا لان اخواني الكرام كانوا اذا شافوا احد يفطر
اطلقوا عليه كلب رمضآن كرم الله وجيهكم
فـ كنت اصوم عشان ماينادوني بـ الاسم البشع هذا
بس اميمتي عسى يومي قبل يومها كانت تدخلني في
الغرفه وتعطين سن كولا وفش فاش
وكنت اكل وماعلم احد

موقف لاينسى حصل لك بـ رمضان..؟
ايه موقفي هذا بصراحه فليم هندي موب موقف والحق
يقال صار كل شي فيه الا الرقص يعني بكاء وعويل وكل
شي المهم مالكم بـ الطويله موقفي صار يوم كنت ب اول
ثانوي كنت مربوشه حبتين وكان عندنا شغاله وماكنت اعرف
شي اسمه مطبخ عكس الان المهم ان كنت طفشانه ورحت
ادور اخواني احارشهم بس لقيتهم يلعبون كوره
الساعه 5 العصر طبعا زمان كان رمضان برد
جيتهم قلت بلعب معكم قالوا لا المهم نشبت بحلوقهم
ودخل ابوي وقال لاعبوها انا بعد بجي العب
معكم عاد استانست بس فرحتي ماتمت خلوني حارس
المهم متحمسه يقالك الحين اوليفر كان اصد
ويعنني قويه امي نادتني وقالت ميس روحي
شغلي الخزان مافيه مويه وانا بنص اللعب قلت بركض
اشغله وارجع مايمديهم يدخلون اكثر من هدفين
المهم انطلقت واعطيت سيقاني للريح لكن فجائه حسيت
اني اطير واهوي ع الارض واذا بي اصرخ
يمآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه آآآآآآآآآآآآه
< ترى والله ماتحسون بمقدار الالم المهم
التموا علي اخواني وابوي وامي وشغالتنا كوثر
وانا اصرخ واتالم وابكي عاد رجلي قلب
لونه وقعدت استفرغ وحالتي صعبه وامي تشربني
مويه وانا رافضه مابي افطر المهم اخذوني
للمستشفى وكلم ابوي خوييه عشان يدخلنا لازم واسطه
المهم ع طول دخلونا واشعه الا البنت منكسره رجلها
لا وبعد كسر مضاعف في اصابع القدم اليسرى
وفي الساق كسر عاد وفي الفخذ شعر
عاد المصيبه يوم جاو يجبروني انا قعدت ابكي وامي
تبكي معي واخوي الي اصغر مني خنقته العبره
وابوي متاثر < اقولكم فليم هندي عاد
الي جاء يجبر رجلي سعودي وانا يطق فيني عرق
ومادري وشلون اطلع حرتي قلت سعودي مايجبر رجلي
الرجال وجهه طاح وانصعق وابوي يتحايلني وامي حتى
صديق ابوي طب بالسالفه عاد بعد حب خشوم
وافقت لكن للاسف اني ماعيدت ولافرحت ب
الي تبقى برمضان وحالتي صعبه زود ع الايام الي
قضيتها من رمضان عشاني ماصمت 15 يوم
في موقف ثاني بس خايفه لا اقوله

كيف نظامكم واجوائكم في رمضان ونظامكم بالفطور والعشاء والسحور.؟
ابد نظامنا الفطور الاول
قهوه ورطب وقشطه وسمبوسه وعصاير
عاد يا مع اصابع او اقماع او سندويشآت او اي
شي
الثاني يكون شوربه مع شاهي لـ امي وابوي اما
انا واخواني مانعترف فيه
السحور يكون كبسة رز لاغير
اما انا لابس اكتفي بـ خيار ولبنه وحمضيات

هل ترى اختلاف بـ رمضان في السنين الماضيه عن السنوات الاخيره واذا نعم وش الاشياء الي افتقدتها.؟

يب اشوف فيه اختلاف كبييير خصوصا من قبل كنا نتعازم
مع عماني وخوالي لكن الان كل واحد صاك عليه
بيته
افتقدت الجمعـه من جد

هل تفضل الصلاه في المسجد القريب من بيتكم او تميل للتنويع ومن القاريء الذي تحرص على الصلاه خلفه في رمضان؟
لا مسجدنا الي جنب بيتنآ

أجمل رمضان عشته حتى الآن , متى ولماذا ؟
كل رمضآن له طآبع خآص بـ النسبه لي

رسالة في هذا الشهر المبارك .. لمن تبعث بها وماذا تقول فيها .؟
للكل رمضآن فرصه لمسآحمة الانسان لـ اخيه لاتتركوا
هـ الفرصه تفوت من ايدينكم ثم تندمون عليها بعدين
لـ امي وابوي آحبكـم اقوووووى شي
والله لايحرمني منكم
لـ نواره وسومآ الله لايحرمني منكن ويرزقكم
الذريه الصالحه ي رب
لـ صديقآتي الي هنآ او الي تعرفت عليهن بـ النت
ريموو عموشه ونجوحه وسوسو
ماهينور حتى ظلالي هلالي الشيهانه متابعه بصمت وبجنون
هلاليه وهلاليه والعز عنواني والهنوف وعسيريه
الله يجمعنا واياكن بجنانه في الفردوس الاعلى
ع سرر متقآبلين

نبي صوره تلتقطها لنا من يومك الرمضاني المجال مفتوح لك..؟

هذي صوره لـ موكآ من مكه عاد من ابراج الصفوه
وقلت انزله لكم

وهذي وصلت لـ رقم مميز في الفروم
وماقصرت حنين ( ماهينور ) صورتهآ لي
وهون
من هلاليه والعز عنواني
وهون
من حت حت ( حتى ظلي هلالي )
وقسم كنت مصوره السحور بس
ماش البلتوث رافض يصلح

اليوميات الرمضانية

من الساعه 12 صبآحآ كنت منسدحه بـ الصلاه واتفرج
في صفاء واتفرج في الشيخ العرعور والشيعي العال
الله يعله ويرجع كيده في نفسه .. المهم خلصت ع
الساعه 1 وقمت ونزلت قلت لـ ابوي بتجيب سحور من
برى او اسوي سحور قال اذا تعبانه اجيب من برى قلت
لا عادي لاني عارفه انه مايحب اكل المطآعم المهم شلت
بعضي ورحت اسوي سحوري جتني امي بـ المطبخ
وجلسنآ نسولف حتى خلص السحور ع الساعه
2 عاد طلعنا وجلسنا ع بدايه ونكمل سوالف يوم
جت الساعه 3 غرفت السحور ورحت اشوف من يلبسها
ع بدايه عاد غسلت مواعيني ورحت العب مع اخواني
اكس بوكس من قو وجهي العب فالنسيا واكلتها
6 : صفر

بعد صلاة الفجر رحت اقراء قران
عاد اخذت جوالي اتسمع فيه قررت ادخل النت وع طول
لـ رابطة فالنسيا عشآني عارفه ان ورانا ماتش اليوم
عاد دخلت عقبها ع الفروم ورديت ع الرسايل صكرت
النت وخمدت ع الساعه 8 لاني مرهقه الساعه 3 قمت
ورحت ادهر بـ المطبخ وخلصت شغلي عاد رحت اشوف
برنامج المنجد ع وصال بعدها فرشت السفره
وحطيت ع بدايه وافطرنا ع هياطهم وقمت وقشقشت
مواعين وغسلتها بدري وراي مبآراه عاد خلصت
ورحت عند امي وابوي اشوف برنامجهم الي ماهضمته
في المجد بس عاد يستآنسون اذا شافوني جالسه
معهم

عاد اذن العشاء وراحوا يصلون واخواني
طلعوا من البيت وانا وحدي جبت عدتي عصير
تانج وحب باجه عشا فالنسيا بيلعب عاد يوم جلست
وبدت اول 10 دقايق وانا متحمسه دق الجرس
واناظر الا خالتي وبنات جايات عاد انا ع طول قلت امي
موب فيه قالوا نبيك انتي موب امك ارواح معنا
للسوق انا هنا اخنقتني العبره فالنسيا وتبوني اروح
للسوق واناظر في البنات قلت انا وش قلت لكم
موب قايله في رمضان مافيه سوقه لكن عاد يوم
قالت خالتي وانا امك < خقيت قلت يمه هلا
قالت ارواح والله مادري وين ربي حاطني وهن داجات
ماعندهن ذوق مير اني امشي واطالع في فالنسيا وتخنقني
العبره قلت هذا ذنبي دايم اتمصخر ع البرشلونين
واكلتها المهم صكرت التلفزيون وقلت الساعه 11
ونرجع قالت ابشري والله والله والطعوني للساعه 2
وانا منقهره عندي يوميات بس مافي اليد حيله زحمه
وعالم قلت طآيب ماكون ميس ان ماكرفتكن يابنات
الذينآ امنوا وانا مير اصرف من فلوسهن واشتري
ع حسابهن وان اعجبني شي حطيته اجل يحرمني من
فالنسيا وانا ساكته عاد يوم خلصن قلت يالله سحوري\ع حسابكن مير انهن قالن ماك قلت معصي هرفي
واخذت سحور وجبتهن معي يلفن لي السموبسه

ايه ياليت تباركون لي لان فالنسيا فاز شبيت ع
اخوي بـ الجوال كل شوي كم النتيجه عاد يوم
قال فالنسيا 3 وانا اشهههق موب مستوعبه قلت
من دخل قال لايكون مدربهم وانا مادري حدي مدريد
ي ... عيرتي المهم عاد هذا يومي ببساطه واختصار
اسفه جدن جد ع التاخير وقسم ماوصلت للبيت الا
3 من الزحمـه

اخير اتمنى استمتعتوا بيومي البآيخ تراني من جد اكتب
وانا مستحيه حآسه ان مافيه ناس واجد تعرفني لاني
متآبعه من بعيد للمجلس ..
طالبتكم لاتنسونآ من دعواتكم رب دعوة من احدكم
تصل للسمآء فتستجآب في لحظة كآن باب الاستجآبه
مفتوح ..
واشهد لكم ب الله اني احبكم في جميعـآ

الهنوف عسيريـه
كومآآآووآ بحجم السمآء

كل الشكر

لـلمميزة **][ " ع ـشقهــا هـلالـي" "♥][ **

وانتظرونا غداَ

مع المتميز BaRiO .

أرق التحايا وأطيبها من

مشرفي واستشاري

المجلس العام

الهنوووف · #2 29/08/2010, 05:17 AM

رديت لك حجزك الاولي بيومياتي

وسبقت حنين

هلا والله بعشقها هلالي

( الاسم ترا عاجبني مره )

هلا بالمربوشه والحمد لله ع سلامتك

ماتسوى على هالدكتور رحمته
تراني مثلك صار لي شي برجولي وانا صغيره ماصرت امشي
بسبب عيال الجيران راكبه عربيه نلعب وطراخ ع الجدار :$

الله يخليك لـ اهلك سنعه بعدي والله

طالعه علي -->

ومبرووك فوز فالنسيا وعقبال الهلال اليوم

-->كلن ع همه سرى

والزحمات استغفر الله بس هذا الي بقوله

اليوم طالعه واسال ابوي ليه برمضان زحمه
حسيتني بريئه قال لان الناس يطلعون بوقت واحد ان شاء الله لو بطلع لشي بروح العصر
ماتسوى علينا هالزحمات وكلش كوم والحفريات عاد
اليوم اشوف شكل السيارات كان ودي اصور كثاار لمباتهاصفراء الي بالجهه الثانيه
والي بجهتنا حمراء
-->تتامل

\

/
يعطيك العافيه ع هاليوميات

ومايجي منك الا الزين

وشدعوه انت من حمام الدار على قولتهم

والله يجمعنا بالجنه

الهنووف
كانت
هنا
ورحلت

الشيهـانه · #3 29/08/2010, 05:20 AM

بــــــــــــــــاتس

هلابالطش والرش

حي الله ميسووالذربه

ماشاء الله تبارك الله من البدايه
واضح مقدار السناعه والذرابه بيومتس

بس لوتتركين الحمضيات

موقف طيحتك

يذكر ولاينعادان شاء الله

ياكرهي للزلقات الخطيره اللي تنعطب فيها الرجل

يجتمع الم عضوي ونفسي ووااو عاد انواع الغلقه والتحكم

تذكرت اخر طيحه لي قبل سنتين

إقتباس


	لاني السنه هذي كرهة الفيمتوو موب حلو

اشوى اجل موب بس انا اللي متغيّر علي طعم الفيمتو

كرّهت العائله فيه من كثر مااقولهم انه هالسنه مااالغ

إقتباس


	الغرفه وتعطين سن كولا وفش فاش

قسم اطلق غذاء

إقتباس


	لـ صديقآتي الي هنآ او الي تعرفت عليهن بـ النت ريموو عموشه ونجوحه وسوسو ماهينور حتى ظلالي هلالي الشيهانه متابعه بصمت وبجنون هلاليه وهلاليه والعز عنواني والهنوف وعسيريه الله يجمعنا واياكن بجنانه في الفردوس الاعلى ع سرر متقآبلين

اللهم اميييييييييييين

إقتباس


	ورحت العب مع اخواني اكس بوكس من قو وجهي العب فالنسيا واكلتها 6 : صفر

يؤ قووووويه

ميسو لاعاد تلعبين باسم هالفريق دوري غيرو وانا اختس مدامتس راعية خسائر

إقتباس


	ايه ياليت تباركون لي لان فالنسيا فاز

الف مبروووك

ماقلتلس مدربكم ختيير

وسالفة السوق والشوارع مااقول الا اللهم ياساتر

شي فززززيع

اهم شي بس عساهم خلصوا اغراضهم

\
يوم حلو مليئ بالذرابه والذكريات الظريفه

استمتعت جدا بالقراءه

يسلمو ميسو

والشكر موصول لهنو

وعسيريه

عالمجهود

HILALYA ]~ · #4 29/08/2010, 05:21 AM

هيه انتي وياها وراي اشووف انا اول وحده ض1

,,,

تتلفت يمين يسار تشوف فيه احد ض1 ..
خلوني ارد قبل لا يجي احد < تراني متلطمه بشماغ اخوي عرفتوني

..

إقتباس


	برنامجي اليوم ابد انام الساعه ر8 ونص او9 صباحا

وش معنى ر8 ض1 ..

إقتباس


	لي في القران ثم اروح ع طول لـ بدايه

ليش مفصولين ض1.. الله يستر لا يكون صار شين والاش

..

إقتباس


	واهم شي عندي بـ الفطور هو الماء والماء فقط

لا فيه احد زيي

..

إقتباس


	لا وبعد كسر مضاعف في اصابع القدم اليسرى وفي الساق كسر عاد وفي الفخذ شعر

كلنكس باللهي ..
< تراني مزكمه عشان كوذا ابيها ض1 ..

إقتباس


	لـ صديقآتي الي هنآ او الي تعرفت عليهن بـ النت ريموو عموشه ونجوحه وسوسو ماهينور حتى ظلالي هلالي الشيهانه متابعه بصمت وبجنون هلاليه وهلاليه والعز عنواني والهنوف وعسيريه الله يجمعنا واياكن بجنانه في الفردوس الاعلى ع سرر متقآبلين

اللهم امين

..

إقتباس


	اكس بوكس من قو وجهي العب فالنسيا واكلتها 6 : صفر

سوبحان الله انا فرحانه لعبت مع اخوي الكبير ض1 ..
انا مدريد وهو برشلونه ذذ .. جبت عليه هدفين وللحين اناقز من الفرح ض1 ..
طبعا هو فاز 7\2 خخخخخخخ بس اهم شي جبت الهدفين ض1 ..
وابشرك جاني بلنتيين بس ضاعوا ض1 ض1 ..

إقتباس


	ورحت عند امي وابوي اشوف برنامجهم الي ماهضمته في المجد بس عاد يستآنسون اذا شافوني جالسه معهم

نفس حق امي والا لا

.. امي متابعه لبرنامج سامج بقوه ض1 ..

إقتباس


	ايه ياليت تباركون لي لان فالنسيا فاز

ياحليلكم ض1 مبروووووك الف الف عقبال الوشسمه < اخاف اتشوت ض1 ..

إقتباس


	اسفه جدن جد ع التاخير وقسم ماوصلت للبيت الا 3 من الزحمـه

اقوول يا حبيبتي اي زحممه وقسم بالله اول مره اشوف الدايري فاااضي ..
اليوم وانا راجعه من المطار ع الساعه 8 فااااااضضي فااضي بقووه ..
ليت من يطلع بهذا الوقت كل دايم ض1 ..
انصحك تروحين بالوقت هذا فاااضي بقووه ذذ .. حتى اني شكيت اننا بالرياض ض1 ..
تعرفين اول يوم لي بالرياض ض1 .. فـ لازم الناس تجي تستقبلنا عشان كوذا زحمه ض1 ..

ميسون يا بعد تسبدي انتي

اوحيبك بحجم السماء الصافيه

..
تصدقين عندي لك هديه

.. اليوم قلت باخذ لقطه واحطها بيومياتك هوديه

..
لان هديتي الاولى ضاااعت

..

( جـ،ـــــأري تحميل الوشسمه

)

..[ تم التحميل بننجااح ] ..

ميسون راسي بينفجر الحين ض1 برسلك بالليل ان شاء الله نفس الصوره بس بدون حقوقي ..

لا اصبري دقيقه .. حالفه انزل اليوم ما ضنتي الليله بشوفكم ع هالحال ..

نسيت اقولك تراني مصوره مليون شي وقلت لو بنقي الحين بععطيك اخيسهم ..
عديت حقره بقره ولقيت هذي قدامي ذذ ..
وبس

..

شوفي ترلني جالسه بجنب حررمه تروع كل شوي تلتفت لمي وقسم شكيت بنفسي : (
وحالتي حاله : ( ومزكمه ومدري وش بس قلت لازم ناخذ لقطه لحبوبتنا

..
واخذتها وانا مدري قايمه والا نايمه ذذ ..

الله يعطيك العافيه ميسون

..
موب قايله شي تراني مانمت عشان يومياتك والا راسي شوي بس ويصفر ض1 ذذ ..

عوافي هنو & عسيريه ..

بانتظار باريو ..

هلالية والعز عنواني · #5 29/08/2010, 05:23 AM

..

مشاء الله متى لحقتـو تجون الموضوع توه نزل
هنو تبدلين معي أبي أصير أولي لو مره وحده

ياهلآ بالفلنساويه الطخمـه

إقتباس


	اني اطير واهوي ع الارض واذا بي اصرخ يمآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه آآآآآآآآآآآآه

لآ عـاد تتحمسين مـره ثانيه ~ بعدنـآ نبيتس

إقتباس


	في صفاء واتفرج في الشيخ العرعور والشيعي العال الله يعله ويرجع كيده في نفسه

أجل طلعتي السوق وماشفتي الحلقه اليوم أستسلـم هالشيعي وأنسحب

إقتباس


	طلعوا من البيت وانا وحدي جبت عدتي عصير تانج وحب باجه

ميسو وشلون تجي عصير تانج وباجه اللي أعرفه شاهي مع باجه يطلع ختيـر

إقتباس


	ايه ياليت تباركون لي لان فالنسيا فاز

مبروكـ وفالكـم الدوري على أني ما أعرف كم ترتيبكـم بس يالله

أهـم شيء الهـلآل

إن شاء الله اليوم ربي يوفقنا عشان نفكر بالآسيويه

يوم خقه مثل صاحبته

مَاهِينُورْ · #6 29/08/2010, 05:29 AM

حجز
بنزّل الأخبار وأرجع ,, لا تحذفون ردّي
~> يكفّي راح عليّ أوّل ردّ
======

رجعت :$
أشوى ما صار قبلي إلاّ هنو وشوشو والحكيمة ومشاعل
أنا قلت برجع بعد مانزّل الأخبار لكن أسمحولي بصبر ما قدر أفوّت التعليق

ميس
يا هلآ والله وغلآ
وش هالزين ما شاء الله

إقتباس

بعدين البس قميصي المحدد للمطبخ

حلو معلومة جديدة عليّ بدل مانكثّر غسيل
ولأني إذا لبست بالطو ما أسلم من التطنز ><"
سنعه يا ميس ما شاء الله عليتس وشهادتي فيك مجروحة
الله يكتب لك أجر تفطير الصائمين

إقتباس

خواني الكرام كانوا اذا شافوا احد يفطر
اطلقوا عليه كلب رمضآن كرم الله وجيهكم
فـ كنت اصوم عشان ماينادوني بـ الاسم البشع هذا

على بالي هاللقب بس عندنا
من جدّ كنا نصوم حتى التطوّع واحنا صغار عشان ما يطلق علينا

بالنسبة لموقفك
الحمد لله على السلامة
هذا مصير البنت الي تلعب كورة ,, وبعد يبون أندية نسائية ~> شطحه
موقف صعب والله والحمد لله الي ماصار أكبر من كذا
لكن تعالي تفطرين 15 يوم عشان كسر أصبع !!!
~> أستغفر الله أحس ربّي بيبلاني

إقتباس

في موقف ثاني بس خايفه لا اقوله

قوليه ليّ أنا بسّ :$
"

إقتباس

الله يجمعنا واياكن بجنانه في الفردوس الاعلى

ع سرر متقآبلين

اللهمّ آميييين
"
الصور / قالوا لك صور صوّرتيها برمضان والي أعرفه إن عمرتكم قبل رمضان
لكن أهم شي صورتي ,, إستحيت يوم شفته أنا وهالخطّ لكن هذا الرسّام وهذا خطّه
كان حطّيتي إلا مافيها تعليق ~> متفشله من الخطّ
بس والله مفاجئة حلوه الله يعطيكِ العافية لو عارفة سوّيتها لك بالفوتو ولو إني مادلّ دربه
"

تعليقي ع اليوميات
يا ختي تشبهين ليومي إلا شويّ

إقتباس

من الساعه 12 صبآحآ كنت منسدحه بـ الصاله واتفرج
في صفاء واتفرج في الشيخ العرعور والشيعي العال
الله يعله ويرجع كيده في نفسه .

آميييييين الله يعلّه ويردّ كيده في نحره
أبشششششرك إنسحب أمس بأوّل الحلقة شكله يكلّم نفسه ألحين من الفششله
فكّه يا ربّ لك الحمد عمّ الهدووووء وصرنا نشوف المناظرة بالراااحة

إقتباس

رحت العب مع اخواني
اكس بوكس من قو وجهي العب فالنسيا واكلتها
6 : صفر

أفاااا ,, هاردّ لك

إقتباس

وحطيت ع بدايه وافطرنا ع هياطهم

يا سفابهم أمس ما شفتهم خاصّه إن أبو أسامه جايب عيالة

إقتباس

قالت ارواح والله مادري وين ربي حاطني وهن داجات
ماعندهن ذوق مير اني امشي

أجل لا صرت أبي منك شي أقولتس وأنا أمتس ~> وش دخّلتس!
ما شاء الله عندك ذووق لو داريه شاورتس بلبس العيد
أهم شيّ قضيتي حاجة بنات خالتك وبكيف فالنسيا الدوري طويييل

إقتباس

واخذت سحور وجبتهن معي يلفن لي السموبسه

أبد ما تضيعين حقّك

إقتباس

ايه ياليت تباركون لي لان فالنسيا فاز شبيت ع
اخوي بـ الجوال كل شوي كم النتيجه عاد يوم
قال فالنسيا 3 وانا اشهههق

ألف ألف مبرووووووووووووك

إقتباس

اخير اتمنى استمتعتوا بيومي البآيخ تراني من جد اكتب
وانا مستحيه حآسه ان مافيه ناس واجد تعرفني لاني
متآبعه من بعيد للمجلس

عنّي أنا والله إسمتعت بيومك وبأسلوبك الجمييييييييييييل
لا تخافين أنتِ أشهر من نار على علم

وإحنا نحبّك في الله , ربّي يحفظك
الله يعطيك العافية

هنووو وعسيرية شكراً جزيلاً
حلو العنواااان , ميس تتخلى عن الهلال ولا تتخلى عن فالنسيا~> بحلّل هالفيس تعبت وأنا أدوّره

:

بالتوفيق لباريو غداً

متابعة بجنون · #7 29/08/2010, 05:37 AM

..
أهنن أهنن بــ ميسو " عمتي

أهنن بالسنعة والمربوشه على قولت الهنوووف ..

ايه وش أخبارك بعد ذاك اليوم " عسساك بخير ..؟

تراي مشغوله حدي بس داخله لــ عيونك

وآعذريني إذا ردي مو ذاك الرد بس مثل ماآسلفت مشغوله >> متعوب على ماآسلفت ترى

وألف الحمدلله على سسلامتك >> ولو انها متأخرة بس أنتِ توك تعلمينا

^^ ترى يوم كنا صغار كلنا آكلناها أنا بغيت أصير عميآ إلا شوي

/

اطلقوا عليه كلب رمضآن كرم الله وجيهكم

^^ ياحليل الناس اللي مثلنا ..

احنا لحد اللحين نقول كلب رمضان للي يفطر من الصغار >> نسترجع أيام قبل

إلا صدق ودي أعرف من اللي اخترع هالكلمه " وش معنى الكلب بذات " آعزكم الله ..

/
لـ صديقآتي الي هنآ او الي تعرفت عليهن بـ النت
ريموو عموشه ونجوحه وسوسو
ماهينور حتى ظلالي هلالي الشيهانه متابعه بصمت وبجنون
هلاليه وهلاليه والعز عنواني والهنوف وعسيريه
الله يجمعنا واياكن بجنانه في الفردوس الاعلى
ع سرر متقآبلين

^^ من بؤك لباب السسماء " آلهي

/

ميسو " آبي عمره ثانيه قولي لأخوكــ

/
ورحت عند امي وابوي اشوف برنامجهم الي ماهضمته
في المجد

بس عاد يستآنسون اذا شافوني جالسه
معهم

^^ ربي يحفظهم لك ولايحرمك منهم ..

/
انا هنا اخنقتني العبره فالنسيا وتبوني اروح
للسوق

^^ حسوا بــ معاناتي يوم ارووح لسسوق مجبره من أبوي وآخلي" مباراة الهلال وراي

ايه على طاري المباراة ترى 90% ماراح أشوف مباراة اليوم من هنا أقول لكم ترى إذ خسرنا لاقدر الله وإلا جبنا نتيجه مي ذاك الزود " آعرفوا اني ماشفتها

>> آبد ماكبر رأسها من ميشو

وألف ألف مبرووووووووووووووووكـ فوز فالنسيا وعقبال هلالنا اليوم إن شاء الله

:

نهايه ميسو يوميات جميله كــ جمال صاحبتها

" ودي أعلق آكثر بس مضطره للخروج
تحياتي وودي وخالص حبي لك وللبنات ........

" برايفيت لميسو : ماتلاحظين انه احنا كلنا ي الفورميات وراء بعض

شكراً لكِ

شكراً لمشرفيين وآستشاريين المجلس العام

دحوم القصيم · #8 29/08/2010, 05:40 AM

اهلا اختي عشقها هلالي
عضوه لها حضورها المتميز في منتدى العالميه
يوميات اكثر من رائعه استمتعت بقرائتها
شكرا المنتدى الاستشاري
بانتظار باريو
دحوم

ḾŎĤǍṀẠḊ · #9 29/08/2010, 05:43 AM

السلام عليكم ورحمه الله وبركاته
حيا الله حقون زد رصيدك كلهم ..

يوميات مميزه ..
مشاء الله كرف بالمطبخ وسناعه ..
موب زي بنات هالجيل ..

إقتباس


	غالبا اكتفي ب عصير التانج لاني السنه هذي كرهة الفيمتوو موب حلو

وش فيه الفيمتو ..
مدري واجدين يقولون كذا ..
اتوقع والله العالم انه شي نفسي ..

الفيمتو هو الفيمتو ..

إقتباس


	اطلقوا عليه كلب رمضآن كرم الله وجيهكم

بصراحه اسلووب مميز ..

غصب عليك تصووم ..

سقى الله ايام سن كولا ..

<< كيفني وانا ابكي ع الاطلال ..

إقتباس


	اما انا لابس اكتفي بـ خيار ولبنه وحمضيات

يقالك صحيه مثلا ..

طيب كان خليتها بدال حمضيات عصير او شي صحي ..

إقتباس


	ورحت العب مع اخواني اكس بوكس من قو وجهي العب فالنسيا واكلتها

إقتباس


	6 : صفر

ياحليل البنات ..

دايم ينرقعون ويلعبون ثانيه ..

وليتهم يتحسن مستاوهم او شي ..

كل ماله تفوز عليهم بنتيجه اكبر ..

وشسمه عشقها هلالي ..

<< القلب لليوزر ..

فخخخخخخخخم ..

المهم يوم كويس .. وبعدعجبوني بنات خالتك

ومبرووكـ فوز فالنسيا ..
الف شكر
..

..
والف شكر للهنوف وعسيريه ..

. ..

*الجوهرة الزرقاء* · #10 29/08/2010, 06:15 AM

صفحتك ممتعة عشقها هلالي

ذكرني موقفك و أنت حارس مرمى بموقفي

بس يالله توبة

واحلى شي فالنسيا فاز وأنت تسوقتي بالمجان

تحياتي

M.Ozil 10 · #11 29/08/2010, 06:18 AM

اهــلا بالفالنســاويه .. النــاداليه

..

يوميـــات جميله .. وضحكت فيها ضحك

............

اجل فاتت عليك مبارة الفالنس .. زين فاتت وفازوا 3 .. فوتي المبارايات الجايه .. عشان يفووزن >>>>> برآآ بس

مبرووك الفووز .. وعقبــال الريــال

والهـــلال

اليووم .. ونــادال في بطولة امريكا ذا الاسبوع

>>>>> وش بقيت

والله يخلي لك ابووك وامك .. واخواانك .. ويخليك لهم .. ولاتكثــرين من الاكس بووكس .. ولا بتكثر الـ 6

الا اذا لعبتي بالريآآل

و الحمدلله على السلامه

...........

الف شكر .. هنو وعسيريه ..

وبأنتـــظار بآآريو ..

مسّتريح البال · #12 29/08/2010, 06:38 AM

عشقك هلالي
يوميات حلوة وجميلة وخفيفة ( قليلة الدسم )

بدون لقيمات وسمبوسه

بس بصراحه ماينفع ياخذك أحد معه السوق يرجع طفران

ومبروك فوز فالنسيا
لكن بالله في أحد في الشرق الأوسط يشجعه

يوميات حلوة وخفيفة
يعطيك العافيه أختي عشقها
وعقبال ماتفرحين بفوز فالنسيا بالدوري
أهم شيء ما يفوز فيه البرسا

دمت ِ

جوري الربيع · #13 29/08/2010, 06:30 AM

آهلا ميس

..

شكلك أنتي البنت الوحيده الله يخليلك أمك وأبوك وأخوانك

والحمد لله على سلآمتك ي حآرسة المرمى

.. أنا عني أكره الحراسه من موقف حصل لي

..

ومبرووك عليكِ فوز فالنسيآ وعقبآال للهلال الييوم

..

شكر{ن} هنوو

.. عسيريه

..

I B R A H E M · #14 29/08/2010, 06:39 AM

يا كثر الحجز

شكلنا بنفتح فرع لوادي لبن هنا

إقتباس


	اخواني الكرام كانوا اذا شافوا احد يفطر اطلقوا عليه كلب رمضآن كرم الله وجيهكم

إيش الأسلوب اللطيف هذا

إقتباس


	تراني من جد اكتب وانا مستحيه حآسه ان مافيه ناس واجد تعرفني لاني متآبعه من بعيد للمجلس ..

خلك بعيد حبك يزيد

مبروك فوز الخفافيش ...

ام متعب التميمي · #15 29/08/2010, 07:00 AM

استمعت جدا بيومك..............

وسبحان الله انكسرت رجلك لان اخوانك مايبونك تلعبين وستنجدتي بأبوك

بس وش الي كسر رجلك وشلون طرتي ؟؟؟؟؟؟؟؟؟؟؟؟؟؟؟!!!!!!!!!!!!!!!

بأنتظار باريو

تحياتي