فكرة: سندريلا الهلال

اعداد وتصميم : الهنوووف + عسيريه

لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير

**][يوميات رمضانية 1431 هـ ♥][ **

لقد عدنا اليكم .. تحملنا الاشواق للقياكم .. ونسعد ان نعيش معكم

. في سلسلة تحمل بين طياتها يوميات الأعضاء الرمضانية من كل عام

هذه السلسلة أنتم أهل بيتها ونحن ضيوفا في حضرتكم ،،،

♥

أهلا وسهلا بكم أحبتنا

ودعونا نرحب سوية بالضيف" الحادي عشر المتميزḾŎĤǍṀẠḊ
لكي يحكي لنا احداث يومه مع شهر رمضان المبارك

في البداية أحب اشكر الاستشاري ع الاستضافة
وان شاء الله ما اكون ضيف ثقيل عليكم ..

ما هو رمضان بالنسبة لك ؟

رمضان شهر الغفران والرحمة شهر القران
شهر التغير بالنسبة لي ..
ممكن فيه أشياء غلط كنت تسويها قبل رمضان ما كنت تقدر تتركها
في رمضان تقدر تتركها .. زي المسلسلات او الأغاني وكوذا واشياء كثيره تقدر تتخفف منها بمساعده رمضان ..



ما هو برنامجك اليومي برمضان ؟
برنامجي يختلف على حسب ..
عندي محضرات بالكلية او لا عندي اخبار في المنتدى او لا
بس الغالب اني اقوم ع الساعه 2 اصلي الظهر ..
واتمغط حبتين .. واشوف امي واسولف معها شوي ناقصها شي ولا شي يذن العصر ..
اروح اصلي اذا فيه اغراض ناقصه اروح اجيبها ..

حتى لو ما فيه اغراض احب اطلع بعد الصلاه اتمشى شوي في الحاره ..

ارجع البيت افتح المنتدى .. واسولف ع المسن لين قبل الفطور

اذا قرب الفطور انزل المطبخ اغث اختي شووي واشوف امي لين كالعاده يطردوني للمقلط
لين يذن المغرب يذن المغرب افطر مع اهلي ..
وبعدها اطلع للصلاه اصلي بعد الصلاه ارجع ابوي واخوي البيت لانا غالبا نروح المغرب بالسياره
بعدها اروح امر خويي ونوجه للمسجد الي بصلي فيه التراويح وغالبا يالقطامي او الجليل
ونقعد انا وياه نقرى قران لين يجي وقت العشاء وبعدها نصلي التراويح

بعدها يا اطلع انا وياه او نشوف لنا سربوتن ماصلى يطلع معنا او ارجعه بيتهم اذا كان مشغول
واشوف لي واحد اطلع معه لين الساعه 12 او 1 بالكثير بعدها ارجع ع النت نشوف المسابقه واذا فيه واحد نفزع معه و نساعده بالمسابقه وطبعا المسن شغال ما يوقف لين السحور

اتسحر بعدها صلاه الفجر
بعد الصلاه اذا عندي اخبار رجعت زينتها او اقعد ع المسن او البيبي وسواليف لين تقريبا 7 او 8
وبعدها نوم


ماهي اكلتك المفضله في رمضان ؟
الفيمتو والفيمتو فقط
طبعا احب البتيزا والفطاير عموما بس غالبا ما الحق عليهم لاني بعد المغرب ما اكون بالبيت
بس اخر الايام امي صارت ترفع لي قبل لا توديه لهم


متى اول مره صمت فيها واذا عندك مواقف مع الصيام اذكرها ؟
بالظبط بالظبط ما اذكر
بس اذكر اني صمت مبكر ..
اذكر شي كيذا قيدم مره << تعرون الي تذكر الشي ولا تذكره زين
المهم اقولكم اذكر ان اهلي كانوا يروحون مكه اغلب رمضان يمكن قبل لا ادخل المدرسه ..
اذكر كذا خيال ان امي وابوي يعودوني ع الصوم اذكر كنت في البدايه اصوم لين يذن العصر وبعدين بديت اتدرج
بس الي اذكره زين ايام الدراسه ان اخوياي كانوا يفطرون وانا صايم وكان بعضهم يرحمني
ويجي يحاول يقنعني ان ابوه كان يقوله انه توه صغير 1

يالبى هاكـ الايام << شعنده ابو 90 سنه موقف


موقف لا ينسى برمضان ؟
موقف وفاه جدتي .. مستحيل انسى هذاك الرمضان وانسى اللحظه الي جانا فيها خبر وفاه جدتي وانا ماسك خط الرياض الطايف يوم كان صعب علي خصوصا اني رجعت انا وامي لحالنا ..

الله يغفر لها ويرحمها ..


كيف نظامكم واجوائكم في رمضان ونظامكم بالفطور والعشاء والسحور.؟

اممم

تبون نظامي ولا نظام بيتنا
ووشسمه بيتنا نظامه :
الفطور (الشوط الاول ) : يكون تمر + قهوه + ماء + فيمتو عشاني بسس ض1 العاده يكون بعد الصلاه + حلا او اصابع او لقيمات وكوذا
الشوط الثاني ( بعد صلاه المغرب ) : شوربه + سمبوسه + فطاير يعني بيتزا جبن دجاج وغيرو ..


السحور : تنويع .. رز بانواعه كبسه مندي برياني كل الاشكال موجوده 1


احينا يكون نواشف احينا يكون تمر ولين بس يعني يختلف من يوم ليوم


هذا نظام بيتنا بس انا ساحب عليهم

طبعا افطر قبل المغرب معهم دايم الشوط الثاني ما الحق عليه ابدد

السحور في الغالب معهم الا ان كان الشباب بيتسحون برا طلعنا معهم


هل ترى اختلاف بـرمضان في السنين الماضيه عن السنوات الاخيره واذا نعم وش الاشياء الي افتقدتها.؟
يب يفرق كثير بالنسبه لي ..
رمضان من قبل بالنسبه لي كان ابوي اغلب وقته مسافر فكان يجونا دايم خوالي او كنا نروح عندهم
صح كنت افقد ابوي وكوذا ..
بس الحين افقد الجمعه وخلاتي .. وجدتي الله يرحمها ..
يعني رمضان هذا ما شفت خوالي ابدد ض1 يمكن انا مقصر كثيير بس ما فيه وقت واذا رحت اودي اهلي يقولون مليان بنات وش تبي جاي


هل تفضل الصلاه في المسجد القريب من بيتكم او تميل للتنويع ومن القاريء الذي تحرص على الصلاه خلفه في رمضان؟

ما اذكر قد صليت جنب بيتنا .. يمكن اول يوم قالوا ان فيه رمضان بسس لاني فكرت اروح للقطامي
بس يوم طلعت ع مخرج 5 شفت الزحمه قلت يالبى البنقالي الي جنبنا
والقارئ الي احرص عليه يا القطامي او الجليل .. ولايهون الدوسري بس بدرجه اقل ..


أجمل رمضان عشته حتى الآن , متى ولماذا ؟


ما فيه شي معين في بالي ..
بس الاسوء هو رمضان الي فات ..
يمكن الاجمل يوم كنا صغار يوم كنا نروح مكه مع خوالي ونروح سفره جدي الله يرحمه بالحرم


رسالة في هذاالشهر المبارك .. لمن تبعث بها وماذا تقول فيها .؟
الرساله الاولى للجميع وانا اولكم ..
هذا اليوم الحادي عشر من رمضان راح .. !!
وش سوينا بالاحدعشر يوم الي راحت هل عطينا رمضان حقه .. !
كم وصلنا بقراءه القران .. !!
هل حرصنا ع صلاه التراويح .. !!
هل غير رمضان منا او بيجي رمضان و بيروح وحنا نفس ما حنا .. !!


الرساله الثانيه لشخص يعرف نفسه زين ..
ما ودك تعطيني لفه ثانيه .. وقسم امس جالس اهوجس بالوشسمه االي تقوله


الرساله الثاليه للهنوف ..
اسفين ع التاخير بس والله موب بيدي ..


نبي صوره تلتقطها لنا من يومك الرمضاني المجال مفتوحلك..؟

الصور تشوفونها باخر اليوميات ..

طبعا اشكر اخوي وصديقي واكوس واحد بالدنيا عبوود

كل الصور هو الي صورها وبعد الغالي وليد هو الي رفعها ..



اليوميات .الرمضانية.
قبل البدايه صح هالررساله ما جت الا الساعه 2.14 بالليل
بس وشسمه حبيت احطهها بالبدايه ..
يقول الشاعر ..
ممحمد تكفى ظبطها
....... نبي يومك شكل ثاني
نبي الاحداث تحبكها
........ بطعم الفيمتو والشاني
واذا ودك نخربها
........اكيد الوعد في مكاني
ولك اشواقي ارسلها
.......... ويكفي انك ثنياني ..
سوال اليوم من هو الشاعر .. ؟؟..


بدايه اليوم الساعه 11.30 صبحاً عندما صبحت بفيس اخي الجميل يقولي متى نروح الجامعه !!


طبعا رايحين الجامعه عشان اخوي صارت له مشكله بالتسجيل وحوسه

المهم قمت وتمغطت من النوم << طبعا يستغرق من الوقت 7-10 دقائق




المهم رحنا الجامعه وصلينا الظهر هناكـ .. بعد الصلاه دخلنا خلصنا شغلتنا بسرعه
كنت متوقع اقل شي نخلص ع 2 وحده ونص بالكثير خلصنا كلش الساعه 1


المهم ركبنا السياره بعد مشي بالجامعه
الحين ابي اعرف ليه ما يفتحون مواقف اداره الجامعه للي بيراجعون لازم مشي بها الشموس برمضان ..
المهم ركبنا السياره وحنى راجعين للبيت الا اخوي يقول وش رايك نمر نشوف دله ذوليك حقين الرخص

هو معه تصريح وخلص ويبي يعرف الإجراءات وكوذا عشان يطلع الرخصه ..
قلت له الي اذكره انه يدفع الرسوم بسس دام الملف عندهم قالي مدري الملف عندهم او عندي
قلت له حمار انت ما تدري ملفك وينه .. !!

قال وش يذكرني من سنه << طبعا اخلاق عشان اوافق ولا كان وشسمه ..
قلت له سقها بسس
رح بموترك اذا رجعنا البيت
قالي بفيس حزين ابي تكون معي عشان اتونس بالطريق ولان كانت تعرف اكثر مني
صحت الا شوي

وقلت خلاص موافق بس اسكت تكفى ..

المهم رحنا طبعا وحنى رايحين بالطرق اقوله تذكر الملف معك ولا معهم << نسبه ويبي يتفلسف


جالس يتذكر اخر شي قال لا معهم اذكر قالوا لي رح عطه الشرطي

قلت له زين ان شاء الله نطلعها اليوم اذا ما بقى الا الرسوم
وصلنا وقت مشوار ندخل جوا خن نروح عند ذولا الي يعبون البينات ويصورون الفيسات والاوراق
سالناهم قالوا نفس ما قلت الملف والرسوم ..
طبعا انا اذكر اني مطلع بدله بس كانت بعيده عن بيتنا لعيون الواسطه الله يقلع ابوها
فما عطوني ملفي وخلوه عندهم والضاهر للحين عندهم << تراي ما اذكر نفس اخوي بس تعرفون اخو كبير لازم تتفلسف شوي ع الي اصغر منك هع

المهم قال اخوي مسوي ذهين طيب انا ملفي عندهم هنا يعني بسس اسدد الرسوم واطلع الرخصه

جاك زول واااوكـ

ياكرهي للزول لاجاء يتفلسف
لا هم يعطونك الملف افتكر افتكر اكيد انتا نساي
يالليله ذا الزول ذا وقته ياكرهي للهجتهم اذا كان رايق المشكله عليه وقت يروق فيه


الظهر ورمضان ولا جالس بصندقه

المهم اخوي بكل فهاوه قال ايه صح يمكن عطوني الملف

وجاء الزول آآي افتكرت صحيح انت افتكرت

طبعاَ انا لاشعوريا طلعت من الصندقه حقتهم وانا اتمتم آآي افتكرت واخوي فاطس ضحك

وركبنا السياره وحطيت حرتي باخوي


المهم وصلت للبيت لقيت امي سلمت عليها واخوي يعطيها التفاصيل وانا افتح الابتوب طبعا فتحت المجلس
وادور الاخبار ما احصل اخبار ..
واشاور واحد معي بالمسن وش رياك يابوفلان انزل الاخبار اليوم
بصراحه جاوبني بجواب فاجأني
قالي لا ما يحتاج .. اصلا برمضان محد فاضي يقرا اخباركـ

عاد تبون الصدق ما همني قروا او ماقروا اهم شي اخبار المجلس تنزل
المهم هو قالي بروح اصلي وطسس يصلي وانا قلت لانا متاخرين بنزل الكاركتيرات اول ثم الاخبار
المهم نزلت الكاركتيرات وجلست انزل الاخبار بنفس الوقت احدث الصفحه حقت الاخبار متحطم من خويي الي قبل
اشوف فيه ناس تتابع او لا
المهم واشوف رد حطمني شوي يعني بس سكتت خصوصا انه جاء من عضوه احترمها كثير
المهم وانزل الاخبار الا اشوف رد ثاني حسسني اني انا ساحب ع الاخبار بصراحه انغبنت
والردين هي سبب ردي الثاني التوضيحي

وبعد الاخبار كملت ع المسن لين صلاه العصر .
.

بعد العصر رحت جبت كم غرض لامي وشوي الا يدق علي الحلاق

سلام
سلام عليكم
كيفك محمد
تمام الحمد لله كيفك انت وكيف رمضان معك
والله منيح .. وينك من زمان ما تجي عنا << باللهجه التركيه

والله وشسمه ذاك وتعرف الا عندك شي الحين
لا والله فاضي
يالله جايك
رحت عنده ووشسمه ذاك وسولفت معه كان يبي يقولي انه خطب ويبي يعرس وكوذا
وظبطني بما انه مستانس

وبعدها رجعت البيت فتحت الابتوب شفت الاسئله حقت اليوميات جاوبت ع بعضها
ونزلت للفطور طبعا قبل الفطور بعشر دقايق هذا الوقت الي امي واختي ما يحبون يشوفون خشتي فيه

المهم نشبت شوي بسس ما كثرت

وبعدين ظفيت خشتي للمقلط احتري الفطور

واخيراً اذن بعد ذي المشوره في النهار

جامعه للزول للتركي

بعد الفطور كالعاده رحنا بالسياره انا وابوي واخوي الصغير ..
بعد الصلاه رجعتهم ورحت لجامع القاضي
طبعا كانت العاده ادق ع خويي او اكلمه بالبيبي << ماجد
عشان نروح سوا .. عاد هو قالي اليوم مقدر وكوذا قلت له اوك نشوفك بعد الصلاه قال ان شاء الله وفيه فلان يبيك ونبي نطلع كلنا وكوذا
قلت له صار وبينا الو بعد التراويح ..
بعدها رحت لبو قطم لبى قلبه
وطبعا قريت الجزء المخصص لي من القران لليوم هذا ..
ودخل وقت صلاه العشاء وبيدنا بالتروايح << قل قسم

المهم باول تسليمه صلى بنا الشيخ ناصر القطامي الركعه الاولى يوم رفعنا من السجود ..
الا محد يقرى .. !! شالسالفه .. !!
الا شوي بسم الله الرحمن الرحيم .. !!

شدعوه ابو قطم قلب صوته .. وقسم بالله استغفر الله كله قران
بس يعني من صوت القطامي لصوت الي صلى بنا مكانه وقسم بالله فررررررررررق

طبعا صلى بنا ما طول شكله حس ان صوته مخيس

والتسليمه الثانيه يرجع القطامي واكملنا الصلاه في امن وامان
بعد الصلاه دقيت ع خويي على موعدنا قالي مدري وشو اني انشغلت وكذا ومقدر الحين

قلت اها زين
وادق ع الثاني الي يبي يشوفني والله ياهو صرفني
قلت يالليل اليوم البايخ ..

واحد مواعدني سحور واعتذر وذولا مواعديني بعد التراويح وسحبوا


قلت ما لها الا ادق على خويي الي اول وازبد له شوي بس ماش
ما ينفع تزبد له ذاك من اولى ابتدائي معك لين الحين وحنا نفس المدرسه بالابتدائي والمتوسط والثنوي والجامعه نفس التخصص
حاولت بس قالي اقلب وجههك

قلت له ابشر

ورحت كفي بلحالي قلت خل اكمل الاسئله حقت اليوميات واكتب يومي السعيد ع بالي ان يومي انتهى

طبعا انا مواعد اهلي اروح اخذهم ع الساعه 12

ومن الفضاوه كلمت خويي نفسه مره ثانيه

قلت له وش رايك نتسحر اليوم

قال قداام ..

قلت له تراك تبي تسحرني قال ما في مشكله متى اجيك قلت له ع الساعه 12.30 اكون في البيت ان شاء الله


طبعا رحت جبت اهلي بس اكتشفت ان موب اهلي بسس
شفتوا خوالي الي قلت لكم ماسلمت عليهم رمضان ذا نصهم برجعهم وانا مدري
طيب وين وشسمه مواعد واحد من اخوياي
قلت ياولد يالله ..
مالك الا توصلهم بسرعه ..
طبعا تخيلوا امي وثنتين خواتي .. وخمس بنات خالتي وخالتي وجدتي وخالتي الثانيه
كلهم بسياره جيب باثفيندر
كيف انا للحين منيب مستوعب بس صارت

بس احس شكل الجيب صاير زي ذيك الصوره حقت المصاريا الي راكبين فوق بعض ومطيحه السياره

المهم وكل شوي يدق خويي اقوله قريب قريب

وانا يمكن يبي لي ساعه الا ربع عشان اوصل له

المهم وصلت خالاتي وجدتي لبيتهم ويوم جيت بمشي جت جدتي ( طبعا هي زوجه جدي بس وقسم نفس جدتي الله يرحمها )
قالت لا تمشي انتظر فيه شي بجيبه لكم

ياربيييييييه


انا الحين ساحب ع الرجال حول الساعه بس وش اسوي

جدتي ..

انظرت طلعت تبي تعطينا كرتونين تمر

لبى قلبيها بسس

المهم خذيت التمر .. ويدق علي خويي واقوله وش فيك هذاني جنبك طبعا في كل مره يدق انواع التسفيل والسب

ومقدر ارد عليه عشان امي واخواني الي راكبين معي وهو ما خذ راحته


اخيراً وصلنا البيت بسلام

واحصل خويي جالس ينتظر عند الباب

وقسم من زمان ما اسحيت منه الله يقلعه بس اليوم اسحيت منه

بس من ركبت موتره راح كل الحياء خخخخخخخخخ


هو يعرف ليه
ايه صح ما قلت لكم قلت له ان عندي يوميات قالي اووه ابشر عندي اكشن لها ولا بعد رمضاني
قلت كفو

المهم رحنا عشان الاكشن حقه طبعا ما بقول وشو الحين << ياشين الي مسوي تشويق


المهم بالطريق الا يدق ابوي طبعا انا شايل هم انه يسالني عن موضوع ما سويت فيه أي شي للحين

ومتردد ارد او لا
اخر شي قلت يالله ان شاء الله انه يبي شي ثاني
دق قال محمد ..
هلا ابوي سم ..!!
قال نسيت الدوا الي قلت لك عليه ..
محمد .. يوووووووهـ اسف والله .. نسيت من الحوسه والبزران الي معي بالسياره

خلاص الحين بروح اجيبه واجي

قلت لخويي قال زين قلت له مشوارك قريب او بعيد لان ابو يبي الدواء للسحور وباقي وقت عليه يعني ان كانا قربا يمدي نخلص ونرجع لابوي قال لا خلاص وصلنا قلت زين نخلص شغلتنا ونجيب دواء ابوي ونرجع

طبعا خل اشرح لكم سالفه المشورا ذا


خويي عندهم فرن ما يبونه ويبون يتبرعون فيه ..
فقاي خاوني تعاوني بشيلته وتنزله بيومياتك وان شاء الله تكسب اجر
قلت والله فيك خير عبود
صرت تعرف تسوي خير ..
ولا تبيني اخذ اجر
صراحه فيه تطور ..
قال انطم وشل الفرن وانت ساكت ..
عاد رحنا وعطيناهم الفرن ..

الله لايحرمني الاجر ..

وبعدها رحنا تسحرنا من صب واي

وانتهى هذا اليوم المدري وش يبي
وسلكوا تكفون تراي كاتب السواليف كني جالس اسولف مع واحد بالمسن
حاولت اكون ع طبيعتي قد ما اقدر
احس الهنوف تقول كل هالتاخير ونهايتها هالسماجه ..
وشسمه اتركم الحين مع الصور طبعا منوعه لليوم
وكلها ما جت الا من خويي واكوس صديق
عبوود

يعني الصور من الفرن وصب واي فقط
وزي ما قلت صور منوعه يعني اذا لقبتوا صوره مالها دخل لا تستغربون ..
البدايه صوره الصيدليه الي شرينا منها الدواء لابوي ..


هذي صوره الدواء ..
نبداء الحين بصور صب واي ..

وبس في الختام اشكر الهنوووف ..
وقسم بالله لوي مكانها كان اسحب ع النت شهر ومعد ادخل ..
بجد انا اسف ع كل شي ..
الى اللقاء ..

كل اللشكر

لـلمميز **][ " ḾŎĤǍṀẠḊ " "♥][ **

وانتظرونا غداَ

مع المميزه ام متعب التميمي

أرق التحايا وأطيبها من

مشرفي واستشاري

المجلس العام