فكرة: سندريلا الهلال
اعداد وتصميم : الهنوووف + عسيريه

لنا من كل عام شهر فضيل ..

أعاده الله علينا وعليكم وجميع المسلمين بالخير واليمن والبركات

وكل عام وانتم بخير

**][يوميات رمضانية 1431 هـ ♥][ **

لقد عدنا اليكم .. تحملنا الاشواق للقياكم .. ونسعد ان نعيش معكم

. في سلسلة تحمل بين طياتها يوميات الأعضاء الرمضانية من كل عام
هذه السلسلة أنتم أهل بيتها ونحن ضيوفا في حضرتكم ،،،

♥

أهلا وسهلا بكم أحبتنا
ودعونا نرحب سوية بالضيف" العاشر المتميز I B R A H E M
لكي يحكي لنا احداث يومه مع شهر رمضان المبارك

ماهو رمضان بالنسبه لك ..؟
هو رحمة من رب العالمين
فــكم في رمضان من التائبين العائدين
و كم فيه من رقبة أعتقت من النار
اللهم إجعلنا من المعتوقين و لا تجعلنا من المحرومين

برنامجك اليومي في رمضان ؟
أقوم الساعة 3 أصلي الظهر الله يتوب علينا و آخذ لي نص ساعة على ما أصحصح
و أرجع بعد الصلاة أقرأ الجرايد و في الغالب أخلص كم مشوار للبيت و أرجع على 5:30
أفتح النت إلى 6 تقريبا و بعدها أنزل أقرأ قرآن إلى ما قبل الفطور ثم أحول و جهتي إلى المقلط حيث الفطور
بعد الفطور أرجع أقعد مع أهلي نتعشى و نتسامر سويا إلى آذان العشاء أطلع أصلي العشاء و التراويح اللي تخلص تقريبا 9:30 و من هالوقت إلى 12:00 وقت مفتوح إما أشوف لي طلعه أو أخلص لي شغله أو أي شئ آخر و من بعد 12:00 إلى وقت السحور إما أقعد على النت أو ألعب سوني مع أخوي و بعد السحور أرجع للنت إلى ما أنام الساعة 7 الصبح طبعا في فاصل إسمه صلاة الفجر في هالفترة و بس

ماهي اكلتك ومشروبك المفضل في رمضان ؟
فيمتو + فيمتو + فيمتو + سكري

متى اول مره صمت فيها واذا عندك مواقف مع الصيام اذكرها ؟
صمت و أنا عمري 4 سنين ( فيس يناظر حسحس )
الصدق بديت صيام من أول سنه دخلت فيها المدرسة
و كانوا أغلب الطلاب اللي معي بالصف ما صاموا
و إذا جاء وقت الفسحه كلهم يطلعون يتفسحون إلا أنا و كم واحد المهم كانوا فيه 4 بزارين يجيبون فطورهم للفصل
و يعبون قوارير المويه من البرادة و يقعدون يستهبلون علينا و يتلذذون بالأكل قدامنا و حنا نشوف و كلنا زي كذا ~>

موقف لاينسى حصل لك بـ رمضان..؟
تعرفون كلمة - الله لا يهينك -
أنا يوم أني بزر ما أقتنعت فيها أحسها زي الله لا يجزاك خير أو الله لا يعافيك و كنت متأكد و بكل قوة أن كل الناس اللي يقولونها غلط و أنا الصح
المهم ذاك اليوم كان الفطور عند خالي و يوم رجعنا من الصلاه جابوا قهوة كان اللي يصب ولد خالتي و كان عمره كبير و أنا قاعد في طرف المجلس و أقول له بكامل قواي العقلية
خالد الله يهينك صبلي فنجال قهوة
المشكلة كانت لحظتها صمت من الجالسين و كلهم يلتفتون علي
بس أشوا ولد خالتي تفهم الوضع و رحم(ن) و لا كان صارت علوم

كيف نظامكم واجوائكم في رمضان ونظامكم بالفطور والعشاء والسحور.؟
الفطور = تمر + شوربة + فيمتو + سمبوسة و أصابع و لقيمات و نحوها
العشاء = معجنات أو خفايف + شاهي
السحور = رز و دجاج + سلطة زبادي + لبن و تمر

هل ترى اختلاف بـ رمضان في السنين الماضيه عن السنوات الاخيره واذا نعم وش الاشياء الي افتقدتها.؟
قايلين لكم عمري تسعين على هالسؤال

هل تفضل الصلاه في المسجد القريب من بيتكم او تميل للتنويع ومن القاريء الذي تحرص على الصلاه خلفه في رمضان؟
أحب أصلي بمسجدنا و أصلا حقين الحارات اللي بجنبنا يجون يصلون بمسجدنا لأن صوت إمامنا كويس

أجمل رمضان عشته حتى الآن , متى ولماذا ؟
الصراحة مافيه رمضان معين هو الأجمل لكن الله يديم علينا السعادة

رسالة في هذا الشهر المبارك .. لمن تبعث بها وماذا تقول فيها .؟
رب رمضان هو رب باقي الشهور
و أوجهها لكل من لم أر شعر لحيته طالع إلا قبل يومين و أول ما يقولون بكرا عيد على طول على الحلاق يا خلها دايم أو حلقها
و قس على ذلك

نبي صوره تلتقطها لنا من يومك الرمضاني المجال مفتوح لك..؟

هذي صورت سيارتي و هي قاعدة تتسبح
بعد خياس دام شهرين كاملين

اليوميات الرمضانية

نبدأ باليوميات

الساعة 11:30 أصبحنا و أصبح الملك لله قمت توضيت و قومت أخواني و رحنا صلينا الجمعة و رجعت بعد
الصلاة و على طول على الوسادة ما قمت إلا الساعة أربع بالتمام طلعت للمسجد على طول أثرهم قاضين صلاة
صليت جماعة ثانية و طلعت بعدها على طول على المغسلة بأغسل سيارتي قلت أطلع بدري علشان ألقاها فاضية
و يوم وصلت إلا أشوفها زحمة متى أمداها العالم تجي
المهم إني قعدت أنتظر دوري و قلت خل أشغل وقتي بشئ مفيد و قعدت أقرأ الكهف و وصل دوري طبعا هالهنود
لازم توقف على راسهم علشان يغسلون السيارة صح و لا لو تركتهم على راحتهم غسلوها أي كلام و قالولك يلا خذها
خلصت من عندهم الساعة 5:30

رجعت للبيت و لا أخوي بوجهي
هو : وينك تو يالمنيب قايل
أنا : رايح أغسل سيارتي ليش فيه شئ ؟؟
هو : أنزل للمجلس و تعرف وش فيه
نزلت بكل فهاوة للمجلس و لقيت هالشئ

أثر أبوي توه جاي من القصيم و جايب معه حمولة تمر و نزلها كلها هو لحاله
و أنا أقعد أناظر كذا إلا أبوي يناديني
و يقول لي أفرز التمر حط الرطب بجهه و الناشف بجهه
و يا فرحه ما تمت
الصراحة مشوار أقعد أفرز خمسين كرتون لحالي عشان كذا رحت ناديت أخواتي
كلهم و قلتلهم أبوي يقولكم أفرزوا التمر هذا الحين
هم صدقوا و قعدوا يشتغلون و أنا أراقبهم و أشتغل معهم شوي
خمس دقايق و خلصنا ترتيب
لو أني لحالي كان قعدت نص ساعة
جت الساعة 6 و رقيت فتحت النت قريت يوميات الهنوووف و شيكت على المجلس إذا فيه مشاركات مخالفة أو مواضيع أنقلها للصيد <~ مسوي مشرف

قبل الآذان بخمس دقايق نزلت تحت و قعدت على السفرة أحتري الآذان
أذن و أفطرنا و رحنا صلينا و رجعنا بعد الصلاة أكلنا فطاير و شربنا شاهي و سواليف إلى صلاة العشاء طلعت صليت العشاء و التراويح و خلص مسجدنا من التراويح 9:15
طبعا مسجدنا يقيم بدري عشان يخلص بدري
طلعت بعد الصلاة و أخذت أقمشتي و رحت للخياط علشان أفصل ثوبين واحد للعيد و واحد لعرس ولد عمي ثاني العيد

طلعت من الخياط إلى مكتب الطيران عشان أقص تذكرة لأبوي و أثره مسكر و أروح للثاني و برضوا مسكر الظاهر عشان اليوم جمعه
و أروح أدور لي مكتب فاتح و مبارة الهلال بتبدأ
و الحمد لله لقيت واحد فاتح لكن كان زحمة
ما وصلن الدور إلا الساعة 10:10 قصيت التذكرة واللي غلوها الخطوط كانت بــ 560 رايح جاي و صارت بــ 590 من زينكم الحين عشان تغلونها
س / أبوي إلى وين مسافر

ورجعت للبيت و شفت المبارة و كانت بدأت من 10 دقايق
فاز الهلال الحمد لله و هذا أهم شئ
و الرائد بعد فاز
بعد المباراة طلعت لفلافل أبو عدنان أجيب لي عشاء أنا و أخواني
رجعت البيت و تعشيت اللهم لك الحمد
وبعد العشاء لعبت قيم FIFA 10
أنا و أخوي عبد الرحمن هو أخذ إنتر ميلان
و أنا أخذت البايرن
فزت عليه كالعادة أربعة ثلاثة
طبعا أخوي عبد الرحمن متابع للمجلس كزائر من سنتين تقريبا و إلى الآن ما أقتنع أنه يسجل بيوزر و يشارك زي العالم
بعد كذا صارت الساعة وحده ونص تقريبا فتحت النت قريت لى كم موضوع في منتدى الجمهور و قسم كل ما رحت هناك أرجع و أقول يازين المجلس
بعد كذا جت الساعة 2:00 و بدأت ب تعبئة الإستمارة و كتابة اليوميات و ها أنا الآن أظغط على زر الإرسال في تمام الساعة 3:00

و بالأخير أتمنى أني كنت ضيف خفيف عليكم و أنكم تكونون أستمتعتم بيومياتي

مع السلامة

كل الشكر

لـلمميز **][ " I B R A H E M " "♥][ **

وانتظرونا غداَ

مع عضو فريق أخبار المجلس العام ḾŎĤǍṀẠḊ .

أرق التحايا وأطيبها من

مشرفي واستشاري

المجلس العام