11/08/2010, 02:39 PM
|
| موقوف | | تاريخ التسجيل: 14/02/2010 المكان: .....
مشاركات: 309
| |
|
رمضان . سمبوسه . فيمتو . ملعب طائرة . ودّ الشوربة للمسجد . وش اسرع مسجد يصلي التراويح
كعادتي السنوية . اوزّع شرهات مع مدخل رمضان واكتب لي موضوع بريحة اللقيمات ذيك حقت امي اللي كلّها زيت وطول اليوم نمدحها عشان مايجي بخاطرها شي هههههههههه ،
وكعادتي السنوية . اسلّم عليكم جميع واقول كل عام وانتم بخير . عاد هالسنة صومو وخل عنكم اللعب تراه والله مهوب يطوّل . كلّها 30 يوم ثم نفطر على ذبيحة بصباح العيد
قسم بالله للحين اتفكّر . شلون الناس تفطر يوم العيد على لحم ههههههههههههههه . أذكر فيه برنامج بقناة أبو ظبي الوثائقية جايبين ناس من ديرة حول الفلبين عيونهم متمغّطه كنها باص خط البلدة وجايبينهم يفطرون على لحم وشي غريب وكذا ومسوين عنهم برنامج ! عاد بغيت ادق على القناة ووصّف لهم مزرعتنا عشان يجون يصورون عمّاني وهم يفطرون على لحم بيوم العيد . لا ويجيبون صورة عمي ناصر وهو يقطّع بالكرشه ويوزّعها علينا ،
كل عام وانتم بخير وكل عام وانتم أحسن من العام اللي قبله . وكل عام وانا اقول لكم : رمضان كريم وربي أكرم والفطور التزابله معنا ؟ إلا تمْ ؟
قبل اسبوعين لقيت تحت باب بيتنا عشر منشورات . بنده كارفور العثيم وشيّن مدري وش هو والدانوب بعد اللي منشوراتهم دايم طوال كنها يوم السبت . ولقيت بعد إعلان عن مشغلين نسائية . ناس شغّاله من بدري عشان هالرمضان . اللي يترزّق الله واللي ناوي على شرّ واللي شاري رسيفر جديد أبو كرت عشان مايوشوش عليه عقب مغرب . كلّن على همّه سرى وكلّن على همّه سرى ،
خذت هالاوراق ونثرتها قدام الوالد بالصالة . وقلت وش تبي بس . تخيّر . هذي والا هذي والا تبي بس نروح لبنده عشان عندهم عرض على الشوربة ؟ والا العثيم عشانه حاط غرشة فمتو ووحده معها بلاش ؟
قال لا . خل كل هالاوراق ورح للمخزن آلحين وشف وش اللي عندنا منه واجد وعطني خبر عنه ، ولاتروح لامك وتسمع منها حتسي !
قلت ابشر . دخلت المخزن . لقيت الفار ماكلن نصّ عيشتنا والرزّ صار مدود والسكر منشقّن علوّه والشطّة قزازها متكسّر . رجعت للوالد وقلت : يبه يبي لنا نشري بنده وتدق على الوليد وتستاذن منه ههههههههههه ،
كل مخزّنا سبعة دواليب حديد وفريزر يخرب كل اسبوع عشان ولد اختي يجي كل خميس عندنا مع امه ويطفّي اللمبه اللي تشّر تحت ويخرب الاكل !
حددنا الموعد والساعة . ورحنا لبنده بالليل عشان الناس قد خفّت من الزحمة . تسعين إعلان بالواجهه . مخفّضين على شي ورافعين سعر الثاني . تفخن سوري عند الزيتون يشّر لنا وهندي عند الخبز يقول " جديد اليوم " وواحدن ابيضاني كنه قشطة واقف عند اللحوم يورينا فخذ حاشي . اعنبو بليسه رافعن الفخذ قدام الحريم اللي يمرون قدّامه . ماعاد مير يستحي تزليل الحيا
ملينا نص العربية ومابرحت القائمة طويلة والشخوط فيها واجد ..
كل شوي ابوي ملتفت على امي يقول لها سالفة عشان يشغلها عن اللي بالرفوف . وامي معه بالسالفة بس ملتفته عنه وعيونها يمين لم الرفوف .
كل اللي يشترون يتلفتون علينا . ام وابو وولد واختين . رحلة جماعية لسوق بندة
اختي تقرا على امي العروض من الورقة كنها في مدرسة وامي مركزه معها وابوي حايمة تسبده منهم وانا عيوني على الطماط اعدّ كم طماطة حاطين في بنده ،
مسكنا سرا عند الكاشير وجا الحساب وطلّع ابوي من مخباه ورقتين زرق عليها صورة الملك وورقتين " قِطاف " حقت الاتصالات فيها 1000 نقطة . والله ياهو محلل النقاط بعد حقت قطاف
السوق زحمة والحريم يشيلون وينطلون بهالعربيات والضحيّة أبو شماغ اللي يقطّر من داخله من الحرّ ويقطّر من برا من هاللي يشوف !
رمضان حلو . خصوصاً لاصارت كل العايلة تلفّ سمبوسة لحم من عقب العصر لين تجي الساعة 11 بالليل ويصلون جماعة قصراً وجمعاً وكل شي عشان مايتأخرون ويفوت عليهم الوقت هههههههههههه ،
رمضان له نكهة . نكهة أكل نكهة جوع نكهة مسلسلات ونكهة زحمة عند محل غوّار قبل يذّن المغرب ،
العام اسأل واحد إسمه مصطفى المصري حق فرع الشفا ( اللي يبي واسطة يروح له يقول جاي من طرفي عشان يسنعه تراه خويي وقد تعشيت مع ولد خالته وجانا وشبكنا وتشبّكنا لين صرت اصدقان ) المهم يقول أن حنا نلفّ السمبوسه من قبل يدخل رمضان من كثر هالناس اللي يجون ياخذون منّا وفيه ناس يدخّلون واسطات عشان نعطيهم لفّتين مهوب لفّه وناس تجي من اقصى الشمال عشان يشرون هاللفه حتى ان فيه حريم يجون مع السواويق بعزّ الظهر عشان ياخذون هالمقسوم . يقول والله ياهي تدخّل بعد رزق .. وراس مالها عجينه وشويّة زيت ونلفّها ببلاستيكه ونبيعها بعشره ،
قلت طيب ورى ماتصيرون تبيعون اشياء ثانية دامكم تلعبون على الناس . يعني تخترعون سمبوسه مربعة بدال ماناكل هالمثلثة اللي من مية سنة وحطبة وصايرتن كنها فرض علينا بهالشكل والا تسوون لقيمات طوال بدال هالمدوّرات كنها صعو . قال ودنا بس الناس ماتحب إلا الشي اللي متعوده عليه ونخاف نسوي مربعات وماتدخل بالفم . يعني يبي لها واحد فمّه كبير عشان يدخلها بالعرض . الوكاد والله ياهي السمبوسه انها عقدتي من عرفت هالدنيا . يعني مايطلع لها طعم إلا برمضان .
تصدقون عاد ماكلها قبل اسبوع عند واحد من ربعي عازمنا على مفطّح وحاط سمبوسه ( يسمع باللي يشكّلون بالاكل لا وحاط رطب بعد بصحون . ماعاد باقي إلا ويحط كيسان شاهي ) عاد ذقت السمبوسه . قسم بالله مالها طعم كني قاعدن في محل فطاير ومباشر علينا التُركي ومذوّقنا منها ،
قلت له : الله يسامحك خربت علينا جو رمضان
جيراننا قبل امس طاقّين علينا عقب العصر يقولون عندكم فرامة لحم . شارين لهم لحمة يابسة وصارت فرامتهم خربانه . عاد ارسلنا الفرامة مع اخوي الصغير وامي يدها على قلبها تقول يالله انك تردّ فرامتنا لنا وماتخرب . دايم نرسل لهم اشياء وترجع خربانة . قد ارسلنا لهم مايكرويف عشان بيسخنون خبزهم اللي حاطينه بالفريزر من شهرين ورجّعو المايكرويف مايسخّن . صار يبرّد كنه ثلاجة حتى اننا صرنا نحط فيه دجاج مبرّد من القهر عشان نحلل هالميكرويف اللي خربوه . حتى قدورنا ماسلمت منهم . نرسل لهم فيها رز ويرجّعون القدر خربانن غطاه وماعاد يتسكّر . والا نرسل لهم صواني فيها حلى ويرجّعون الصينية متشعّره . عاد ابشركم رجّعو الفرامة خربانه . يقولون حطينا اللحمة فيها وطلّعت صوت قوي اثارينا حاطين فيها عظم ودقّر العظم وخربت هههههههههههه ، ياحبني لامي شكلها المرة الجاية بتروح هي تسنّع اللي يبونه وتوقّف عليه والا بتقول ارسلو غرضكم وحنا نصلحه وفكونا من شرّكم تراكم طفرتو بابونا ..
نصيحة رمضانية ملفوفه بكيس نايلون مقاس 12 : لاتاخذون إلا " فيمتو العوجان " . اللي يشربه برمضان بيحسّ انه صايم صح وجالس يبرد على قلبه .
مهوب دعاية ترى .. بس لأن فيه مليون طعشر غرشه صافينها بالمحلات بس فيمتو بن عوجان كل سنة اقول لاتشرون إلا هو لأنه فيمتو صدزي وفيه نكهة روحانيه مهيب صاحية .
يازين لمّة العايلة قبل مايذّن المغرب على سفرة . هذا يدعي وهذي رايحة تصب الشيره على اللقيمات والام وينها وينهي فيه خلوها تجي وتصير على سجادتها تدعي لامها وابوها وعيالها ورجلها ان ربي يسخّره لها . والابو مرتزّ من عقب العصر عند السفرة يحتري متى يذّن هههههههههههههه ،
جيراننا بالحارة مسوين حركة حلوة عشان تفطير الصايم والعمّال بالمسجد . موزّعين الاكل بينهم . اللي عليه شوربة واللي عليه تمر واللي عليه الرز والدجاج عقب الصلاة ( هذا عاد بن سويدان تاجر وعندهم سواق معه فان هو اللي متكفّل بالرز والدجاج ) . عاد دايم إذا جيت اصلي المغرب برمضان القى العمال موزّين ورى البرادة لبن وتفاح وبردقان اللي حاطينه بالفطور هههههههههههههههه ماأمداه مير يذّن إلا ومسمّين على سرق يادافع البلا !
إمامنا أطلق إمام على وجه الأرض . حاطّن بالمسجد حلقتين قرآن وحده للمبزرة عقب العصر ووحده للشيبان عقب العشا ويمسّهم لين الساعة 11 . ويوم جا الحفل بنهاية رمضان العام الماضي كل اللي فازو بالجوائز المبزرة اللي يجون العصر والا الشيبان ماقعدو إلا ثلاث ايام ثم سحبو على الحلقة ههههههههههه يقول واحد منهم إن الامام يشدّ عليهم يقول احفظو القارعة والزلزلة بيوم وحنا ناس مانقدر نحفظ إلا السور القصار . حسيت إن الإمام قايلن لهم احفظو البقرة وآل عمران ،
العام سوينا ملعب طائرة انا وربعي على الدايري الجنوبي . ندوّر الله يتوب علينا اسرع واحد يصلي العشا والتراويح عشان نركض على التفريقه عقب الصلاة . المشكلة كلنا نجي قبل مايصلون الناس . ومدري بصراحه من اللي يصلي فينا
اوووه يارمضان . والله يالعب الطائرة بشهرك له طعم . ماقد لعبنا طائرة إلا بهالشهر . عجزت أبلع كورة الطائرة في استراحة بنمار والا حول شبك في حين لبن .
عاد نفرّق فريقين ونتطاق كل يوم على سعيدان ولد خالتي عشانه طويل ويدينه طوال ويرد الكورة باصبعه السبابة . عاد العام قلنا نسوي قرعة وصار معنا وزعلو الفريق الثاني قالو نخليه يوم معنا ويوم معكم . عاد رحمناهم وقلنا خلاص يوم معنا ويوم معكم . عاد هو مايبيهم يقول انهم مايسمعون كلامه ولبسهم كله نصّ فخذ ويستحي يقعد بينهم يخاف احد يشوفه . وصار إذا لعب معهم مايحرك اصبعه السبابة عشان يكرهونه وإذا قام يلعب معنا قام يحركه . عاد قالو يالنصاب وراك تحركه معهم وماتحركه معنا ورد عليهم قال اني استغفر وكل ماستغفرت طقت الكورة باصبعي ( عاش مصرف )
كل ماتبارينا وخلصنا نزّلنا من مواترنا الفطاير الباقية من الاكل حق الفطور وجلسنا ناكل المقسوم . عاد ناكل كل شي عشاننا تعبنا من اللعب ومعنا علي ولد المذّن . ياكل كل شي لو نحط عنده كراتين مكتوب عليها " عش البلبل " كلها . ودايم إذا جا وقت الاكل نقول له يالله قم لفّ الشبكة الدور عليك اليوم وننزل الاكل وناكله بسرعه قبل يلتفت علينا وهو يلف الشبكه .
اكره شي عندي العام الماضي إذا قال لي ابوي ودّ الشوربة للعمال بالمسجد اخلص يالله لاتتأخر عليهم ثم يدعون علينا . اقعد ساعة وانا انطز بالشارع شايلن حافظتين على راسي عشان ماتتكبكب في الشارع وكل من مرّ قام يتفرج علي ( بحكم ان الشعب السعودي مايحب يلتفت إذا شاف باب كراج منفتح والا واحد طالع من بيتهم ومعه شي شايله ) !
لبى امي . تحط للعمال اكثر من عيالها . تحط بعض المرات شوربة ودجاج وبعض المرات تحط زيادة مع الشوربة لقيمات وتزوّد الشيره عليها عشان ياكلونها كلها ، وكل يوم تسأل اخوي الصغير عقب صلاة المغرب : هاه عساهم شربوها ؟
السنة هذي نويت النيّة اني أخلي صلاة التراويح كوكتيل وازوّد من المنقا عليها ..
مرّتن باصلي مع بن عبيد ومرّتن باصلي مع الجليّل عشان صوته يرقق القلب المستوي . ومرّتن بحاول اصلي مع الدوسري عشان مكيفاتهم باردة ،
التنويع زين بس الموت يوم ان الزحمة تاصل آخر الشارع ثم دقّها كعّابي وماتاصل الباب إلا والصلاة قضت ،
رمضان شهر . حسافة ان الواحد ماياخذ منه فايدته . وحسافة على ابن آدم يوم انه يضيّعه منيّاك والا منيّاك
* تحت ملعقة الشوربة :
- كثّرو من الصدقة . تراي خابركم ذنوبكم واجد
- اخبر واحد العام الماضي خاتمن برمضان عشر ختمات ويقول لي السنة هذي بحشر الشيطان في زاوية وبتيّته زين وبختم ثلثين ختمه ان قاله الله .
- طلّعو تمر والا سمبوسه والا تخاشرو في خيمة واركزوها في شارع ترى العمّال يبون من يوكّلهم بهالشهر الفضيل .
- الله من واحدن بعد بيسمن . فاللي بيسمن والا يحسّ انه بينتفخ فترى بودي ماستر عندهم عرض عقب العيد .
- اللي بيصلي مع واحد يطوّل بالتراويح لايوقف سيارته حول بيت احد من الجيران حول المسجد تراي وقفت العام عند بيت وشققو كفرات موتري الله يقلعهم . عاد من زين بيتهم ابو درجه منكسره . لا وزارعين عند البيت نعناع على بالهم انه كشخه .
- كل عام وانتم بخير حقت هالرمضان وحقت العيد الجاي ولاأحد يقول لي بارك لنا كل مرة . ترى هالموضوع حق مناسبتين .
فمان الله ..   |
الوضع العادي
