ياااااااااااااااااااااااااااااااااااااااااااه الله يرحم زمان اول في الحاره
÷÷÷تنبيه!!!!! ماوضع عليه نجمه* سيتم تعريفه في الاخير
انا تذكرت سوالف اول ايام كنا بزابيز*
كانت عندنا سوالف لما اذكرها الحين اتمزع من الضحك
طبعارراح تقولون وش جاك وتذكرت هالسوالف ؟
السبب اني قابلت في احد هاليومين احد شباب الحاره القداما ايام الستينيات (منتب عاقل ي جحدر)
السالفه باختصار طويل
اننا ايام زمان وحنا في الحاره نجتمع مع البشكه* عند احد عواميد خزانات المياه الارضيه ذيك الحمرا اكيد عرفتوها اللي مايعرفها يقولي (طبعا هالعمود مشخبط فيه ذكريات من كثرها صاير لون العمود اسود متخيضر وكان العمود بجنب المسجد ومسوين لنا دكه كذا صغينونه مش قد المقام وحاطين فيها شويه فرش بعضه مشلحينه وبعضه لا طشينه والبعض الاخر قامينه من احد الزبالات المحترمه المعتبره(اعزكم الله) التى تقع قرب بيوت الامراء المنغنغين (والاجانب نسميهم الدوافير سابقا لاتستغربون لانه كانو ذيك الايام يشربون حليب نيدو وحنا الله يخلف علينا حدنا مويه وسكر كانو يسمونه شاهي ذيك الايام الحين نسميه قلت حيا طبعا مب نفس شاهينا الحين غيييييير
الشاهد احنا لما نجتمع في هالدكه عاد هيكون لنا اشارات وحركات بين الاشخاص اللي يمونون ويرتاحون لبعض في امور معينه
مثلا لما تبغى تروح للبقاله ماتحب تروح الا مع شخص او شخصين معينين عشان انتم خابرين اول الدراهم مو زي الحين منطله لو تعطي بزر من البزران هالحين ريال ذبه في وجهك ..حنا ذيك الايام نمزمز الفلوس اللي يعطوناها اهلنا عشان نطلع منها بالميت ريال او نص حق اتعاب الطريق حقت بدل الخطر والنقل ..
مثال ثاني وهو بيت القصيد طبعا زي ماقلتلكم الواحد ياخذ اشخاص معينين لمهام معينه عادة تكون سريه وشخصيه ينادى لها الشخص عن طريق شفره او اشاره لا يفهمها من الجلسين عند دكه العامود(سقيفه بني ساعده* صايره هالدكه ) الا الاشخاص الذين يفكون الشفره ويفهمونها
طبعا نسيت اقولكم الحاره وين!! الحاره هي ام سليم
طبعا احنا ذيك الايام انا وثنين معاي نروح نقم ونخم* في القمايم الخاصه طبعا اكيد قمايم محترمه (حقت الامراء والاجانب) لان البلديه ذيك الايام ماتشيل القمايم الا بعد يومين تقريبا طبعا القمايم في ذاك الوقت كانت تجمع في براحه او مايسمي ذيك الايام بالمخربه (قطعه ارض )
عشان نتواعد نروح للعمليه السريه (القم والخم) طبعا انا سميتها عمليه سريه لان الدم يوصل للركب اذا اكتشفو الشباب ان فيه مشروع زباله قيمه وثمينه يعني اذا وصلنا لها كلنا عند الزباله المذكوره نتطاق ونتهاوش على اللي نلقاه كل واحد يقول هذا حقي واللي يقول انا اللي معلمكم المكان وندخل في متاهاه لها اول مالها اخر ونصير مثل الغابه القوي ياكل الضعيف(وش رايكم كلام كبير هالتشبيه صح) فعشان كذا نختصرها على فريق مكون من 3 متفاهمين ميه ميه يعني التقاسم بالعدل مافيه قسمه ظيزا*
ارجع للشفرات اللي نقولها عشان يفهمها الاشخاص المعنيين
1- شحت حت وتعني شحاذه واللي بمعني القم والخم
2- شرعرع وتعني شارع
3- خزن زن وتعني خزان
يعني الكلام او الشفره على بعضه يعني
شحت حت شرعرع خزنزن ********** الوعد شارع الخزان يعيال الثلاثه العنيين البقيه مايفهمونها يحسبونها اهازيج ولا كلام ينقال وبس
طبعا بد ربع ساعه يكونون الشباب المعنيين متواجدين في الموقع المذكور ..ويبدا البحث الذي يستغرق الساعه احيانا

طبعا ودي اعلمكم وش نلقى في هالقاميم من مقتنيات ثمينه عشان تقدرون مستوى وكفائه هذي القمايم ذيك الايام
× سيكل ثلاث عجلات منعفط كفه القدامي يعني يبغاله شويه تعديل وكمختين بالشاكوش ويطلع زي العسل يدحدر مع الدحديره مايرده الا حطة الزبيريه على الكفر القدامي لكي يفرمل
×× قواطي نيدو فاضيه او كورة نيده مبنشره وهذي تستخدم لاغراض كثيره جدا منها علب لتخزين الدقيق او الليمون الاسود وغيرها من اغراض المطبخ او حجرة الزاد*
××× ملابس خواجات دوافير* من ابدع مايكون فيها بعض الشقوق او تحصلها محببه او احذيه فيها نص عمر فتلقى الدافور يقول للمماتو مابدياه بتحح ع جسمي وبطفشنا (ياحياتي ياي ..عاد حنا من دلاختنا اول نسميهم قوم مجدي*)
×××× تسريحه غرفه ولا كمدينه غرفه او معاليق اثواب وبيجامات او رفوف يرمونها احيانا عشان انهم بيروحون لديرتهم ولا عاد هم راجعين
××××× حركات وحاجات حلوه مثل مزهريات مناظر اللي تعلق على الجدار ورود صناعيه تحف شبوك للمطبخ اشياء مانعرف اساميها اول نشوفها ونخمها من اكسسوارات وروج
×××××× اواني منزليه زمزميات ملاعق صحون صينيه..كفر سياره بجنط او بدون

*** بزابيز×× تدليع كلمة بزارين وتعني عيال صغار(كلمه محررين كبار ممنوع اصطحاب الغاتير )
*** البشكه×× شله من الصيع والفارغين اللي مالهم شغل ولا مشغله الا ازعاج الجيران(للاسف هذا الحقيقه المره )
*** سقيفه بني ساعده×× كان زعماء قريش يجتمعون به للتشاور وتحشش بخلق الله وهي باختصار عباره عن خيمه بلا اروقه (ابوك يالثقافه ي شموخ)
*** نقم ونخم×× مايحتاج لها تفسير نقم مأخوذه من القمامه ونخم مأخوذه من الخمام في وجه شارون وبوش (برضو شموخ سياسي)
*** ظيزا×× مأخوذه من قوله تعالى (تلك اذا قسمه ظيزا)يعني غير عادله ..(الشيخ شموخ..جزاك الله خير ..هذا لسان حال كل واحد يقر الحين ..صح
*** حجرة الزاد×× هي حجره يذب فيها كلشن يحتاجله تصليه او اشياء ينتحسف على ذبتها ..وتستجدم ايضا لحفض الزاد والاطعمه يعني بالعربي زي المخزن اللي نستعمله الحين
*** خواجات دوافير×× الخواجات عندنا اول هم الدوافير لاكن الفرق بينهم انهم اتجر واكثر تطورا مره يعني نحس انهم زي الامريكان اما الدوافي فهم الفلسطينيين والسوريين والاردنين والمصرين يعني الجاليات العربيه وسموااااااا دوافير لانهم زيون ويتنضفون ويكشخون ويلبسون بنطلونات وفي روايه اخرى لانهم جيدين في الدراسه

$$$$$$$$$$$$$$$$$نهاااااااااااااااااااااااااااااااااايتووووووووووووه

حتقولوا ليش انت كتبت مثل هالموضوع الغير مفيد
اجاوبكم لسببين
الاول: الواحد لما يتذكر ايام اول ومواقف اول يبتسم ويضحك ويستانس كثييييييييييييييييييييييييييييير ويتمنى انها ترجع .....................وانا ودي اسالكم ليه ؟
ثانيا: الرجال اللي شفته هالايام لي تقريبا عنه اكثر من العشرين سنه ما شفته ومع كذا عرفته بشكله وحركاته وكان هو احسن واحد يطب في القمايم ويلقى اشياء ثمينه وقيمه ومع كذا كان يقبل اننا نتقاسمها بسبب الوعد اللي اخذناه على انفسنا نحن الثلاثه
!!!!!!!!!!!!تصدقون الشي الضريف هو انه يمكن جلس مع الرجال حوالي الساعه والنصف ماحسينا فيها ..وكان يقول كل واحد منها للثاني انا مستعجل
في بعض الاشخااص مهما طال غيابهم صورتهم في بالك مستحييييييييييييييييييييييييييييييل تنسي بسبب بسيط ان الدنيا تصقل وتلمع بعض الاشخاص دون ماتغير علومه الطيبه


الى لقـــــــــــــــــاء اخر مع ذكريـــــــات زمــــــــــــــــــان

اقول انثرك شايب وحنا ما ندري....

إقتباس الرجال اللي شفته هالايام لي تقريبا عنه اكثر من العشرين سنه

يعني كم عمرك ذيك الايام

إقتباس شحت حت شرعرع خزنزن ********** الوعد شارع الخزان يعيال الثلاثه العنيين البقيه مايفهمونها يحسبونها اهازيج ولا كلام ينقال وبس

اتحدى مطبخ الامن والبنتاقون....وحتي بوش يعرفون معناها..... والله يا عليكم كلمات تشفيريه حتى طالح كامل ما يقدر يشفر زيها

إقتباس قرب بيوت الامراء المنغنغين (والاجانب نسميهم الدوافير سابقا لاتستغربون لانه كانو ذيك الايام يشربون حليب نيدو وحنا الله يخلف علينا حدنا مويه وسكر كانو يسمونه شاهي ذيك الايام الحين نسميه قلت حيا طبعا مب نفس شاهينا الحين غيييييير

حدك الصالحيه وحدر

إقتباس طبعا انا سميتها عمليه سريه لان الدم يوصل للركب

اخس يا ولد بن لادن

إقتباس بزابيز×× تدليع كلمة بزارين وتعني عيال صغار(كلمه محررين كبار ممنوع اصطحاب الغاتير )

خبري ((البزابيز)) يعني صنابير المياه

إقتباس البشكه×× شله من الصيع والفارغين اللي مالهم شغل ولا مشغله الا ازعاج الجيران(للاسف هذا الحقيقه المره )

اذكر جدتي.....تقول واحد اسمه جحدر مزعج العالم ...تقول ما افتكينا منه....الا يوم تفرقوا الشله....

الحين ذكرت سالفه ذي ونسيت المصاقيل والكيرم...والدنينه لا تقولون ما نعرف الدنينه
الدنينه على كلام جدي يقولون مكوناتها جنط سيكل اربع وعشرين....وعصاء مكنسه...و قوطي صلصه الحديد ابو نص ريال ....عاد تصليحها وكيف تلعبها يبلها شرح وان شاء الله نشرحها لكم بعدين او خلوا الشاب اللي فوق يشرحها لكم