العنوان هو ما نطبق تماما (من وجهة نظري على الأقل) على حال الزعيم هذه الأيام

اعداء الهلال ، او اعداء النجاح (سمها اللي تبي ) مردود عليهم بالبطولات والأرقام ودق الخشوم كل فترة والثانية ، لكن المشكلة في اصدقاء الزعيم والقريبين منه .

* كم مرة حاولت ادافع عن الرئيس الشاب لزعيم نصف الكرة الأرضية وطالبت بإعطائه الفرصة كاملة والوقت الكافي ، في اكثر من منتدى واكثر من مجلس ومع اكثر من صديق واكثر من زعيم في العمل (كنت ابكتبها زميل في العمل وجت زعيم سهوا ….. فحلفت اني ماغيرها بحكم ان كل هلالي زعيم )

* وكم مرة دافعت عن ادارة الكرة (المصيبيح والأحمد) من زود حبي لهم وغلاهم عندي بسبب ثقتي في اخلاصهم للزعيم في كل الاحوال .

* وكم مرة افتخرت بأعضاء شرف الزعيم اللي حنا محسودين على حبهم للزعيم ودعمهم له ماديا ومعنويا .


لكن للأسف ، واقولها الف مرة وبكل حسرة …………….. للأسف ، اصابوني بالإحباط!!


والمشكلة ان هالثلاث عناصر هي من اهم عوامل نجاح الزعيم (بعد توفيق الله) . فالزعيم غني جدا جدا بلاعبيه ذوي المهارات الخاصة والعالية ، واغنى الأندية السعودية والخليجية من الناحية الجماهيرية …. يالله لك الحمد .

يعني اية مشكلة او تخاذل او تهاون او استهتار او عدم مبالاة او اهمال او.. او.. او …. أذكر هنا اي سبب من اسباب الفشل المباشرة وغير المباشرة ، اذا صدرت من أي واحد من هالثلاث عناصر ، فبالتأكيد انها بتأثر على مسيرة الزعيم .


%%%%%%%%%%%%%%%%%%

- طيب وش اللي قاعد يصير الآن من تخبط في نادينا الكيان؟ ومن المسئول عن هالتخبط ؟؟ (سؤال للرئيس)

- وشلون يتم التعاقد مع مدرب ماله أي تاريخ تدريبي واضح ومعروف ، في مرحلة من اهم المراحل التاريخية اللي مرت على الزعيم؟؟ (برضوه للرئيس)

- هل صحيح ان هناك عناد بين رئيس النادي واحد اهم اعضاء الشرف على المدرب ، وعلشان كذا اصر الرئيس على المدرب صفوت ورفض يوردانيسكو ، علما بأن عضو الشرف تكفل بعقد يوردانيسكو كاملا؟؟ (للرئيس وعضو الشرف المحترم)

- وهل تصريح المصيبيح بعد مباراة النجمة عن المدرب الكابوس واستمراريته للموسم القادم كان في محله؟؟ والا وش كان قصد المصيبيح من هالتصريح اللي عارف انه بيرفع ضغط الجمهور والللاعبين واعضاء الشرف؟؟ (للمصيبيح)

- وهل من المعقول ان تتم اعادة الكابوس للإشراف على قطاع الناشئين والشباب ؟؟ (للرئيس والجهاز الإداري وأعضاء الشرف)

- ليش كل موسم يطلع لنا من شباب الهلال نجمين او ثلاثة ، ويبرز احدهم (على الأقل) بشكل لافت للأنظار المحلية والدولية ……. ماعدا هالموسم والموسم اللي قبله؟؟ (الجهاز الإداري)

- هل من المعقول ان تتم معاملة يوسف الثنيان وسامي الجابر بنفس طريقة معاملة القحطاني وتركي الشايع؟؟ (المصيبيح والف علامة استفهام)

- مربع غرب آسيا واللي بتأهلنا ان شاء الله الى النهائيات ومن ثم الى السوبر ثم البطولة العالمية <==== ماكنكم ناسينها شوي ؟؟ (الرئيس والجهاز الإداري)

- هل الكاتو من مستوى طموحاتكم؟؟ (الرئيس والجهاز الإداري واعضاء الشرف)

- معقولة خلصوا المحترفين الأجانب ، ولا نقدر نجيب ثلاثة مؤهلين للعب للزعيم؟؟ (الرئيس والجهاز الإداري واعضاء الشرف)

- هل الدعم مرتبط بالأخذ بآراء شخصية بحتة فيما يتعلق بالمدرب واللاعبين الأجانب؟؟ (بعض اعضاء الشرف)

%%%%%%%%%%%%%%%%%%%%

يا اخوان ، بطبعي احب التفاؤل ، وانا مدرك ان الفريق يمر بمرحلة انتقالية ، وواثق ان فترة الزعيم الإنتقالية تختلف عن باقي الفرق ….. فإذا كانت الفترة الإنتقالية تأخذ عند اغلب الفرق سنة على اقل تقدير ، وأغلب الفرق تغيب في الفترات الإنتقالية لين ننسى الوانها ….. فالزعيم في اسوأ الحالات يخرج ببطولة في السنة اللي فيها فترتة الإنتقالية .

ولكن ……… هل هذا وقته ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ (سؤال للرئيس والجهاز الإداري واعضاء الشرف والللاعبين واعضاء المنتدى الكرام وكل شي ازرق)


ماقول الا : لا حول ولا قوة الا بالله ، وما اضيق العيش لولا فسحة الأمل

اولا ارحب فيك واقول انت صح في مقاطعة الصحيفة المذكورة ،واتمنى من الجميع مقاطعتها

@احب ارد عليك في نقطة المدرب ، انه موشرط يكون له تاريخ علشان ينجح ،مثلا ريكارد الهولندي درب منخب بلاده وما معه الخبره الي انت تطلبها ، واكيد انت عارف كيف فشل كارلوس البرتومع المنتخب ،وطبعا تاريخه مايختلف عليه ثنين.

@ وبعدين تصريح المصيبيح عن المدرب ،مومعناها انه كويس ،لكن يقصد بعد انتو يا العيبه تتحملون جزء من المسئوليه (ومهوب علشان الجرايد تنتقد المدرب معنها يالعبه ما عليكم شي).

@وبعدين وش المعامله اللي تبغها لفلان تترك فلان هذولا لاعيبه محترفين ياخذون رواتب على مايقدمونه ،اما اذا رجعنا لتفرقه في المعامله معناها رجعنا لشغل اول.

@اما المحترفين فاعتقد انه برجعة لعيبة المنتخب ما حتواجه مشكلة (ان شاء الله)
بل بالعكس نطلب منهم التمهل والتريث واختيارمحترف اجنبي بهدوء ورويه،ليتحقق الهدف من وجود الاجنبي (والدعوه مهيب خبط لزق مثل الجيران ،وفي الاخير اما يصورون معه او اصابات ياالله لك الحمد ).

اخوي فهد الهلال ..... شكرا لك .

واسمح لي اناقش معاك نفس النقاط اللي ذكرتها .

المدرب : معاك في ان التاريخ مو شرط أساسي للنجاح ، ولكن ماتلاحظ انه يدل على خبرة المدرب ، ومدى نجاحه؟
بينما المدرب الجديد لا يمكن انك تحكم عليه قبل تعطيه فرصة ، والفرصة هذي يبيلها وقت ....... هل عندنا الوقت الكافي للتجربة؟

تصريح المصيبيح : لاحظ وانا اخوك انه قال المدرب الكابوس بيستمر حتى نهاية الموسم القادم ، مع معرفته التامة انه لا اللعيبة يبونه ولا الإدارة ولا الجماهير ولا اعضاء الشرف .......... يعني الدعوى عناد!!
وهذا لا يعني بالضرورة اني ابرىء ساحة اللعيبة ، بس اللعيبة وفرلهم المدرب الصح ، وبعدين طالبهم بالنتائج .

التفرقة بين اللاعبين : انا قصدت وانا اخوك نفرق بينهم في المعاملة المادية (آسف لعدم توضيحي ذلك بالموضوع الرئيسي) من ناحية توقيع العقود ومقدماتها والرواتب الإحترافية .

اللاعبين الأجانب : اتفق معاك بلنقطة الوقت وعدم الإستعجال ، بس المسألة من اللي بيختار ..... لاحظ ان الإدارة الحالية هي من اختار رباعي صكة البلوت (الكاتو ، فاييه ، مانجوت ، كرستوفر) ، يعني المفروض تكوين لجنة من ناس فاهمة كورة ويقررون بعد التشاور مع المدرب ، والمفروض اعضاء الشرف يدعمون هاللجنة بقوة .

عموما ..... شكرا لك لردك ويعطيك العافية