#1  
قديم 18/07/2010, 04:13 AM
الصورة الرمزية الخاصة بـ leader ksa
زعيــم متألــق
تاريخ التسجيل: 06/09/2009
المكان: -
مشاركات: 1,433
♫انت توك في الف باء المحبه ღ اثقل وعيش الحكايه حبه حبه♫





صباحكم /مسائكم ورد كويس احلى منكم




فيه كمرتين جديده بعد مخرج 2 وانت جاي من الشرق وقبل المخرج وانت جاي من الدايري الغربي
طبعا القلب للدايري الغربي لسبب وحيد عشان يختصر لي المسافة من وإلى بوفيه حسن
طبعا هو مطعم حسن افضل مطعم يسوي لك شاورما صامولي
موقعه في السويدي والشفاء والبديعه والدخل >>عندي كل هالاحياء سوا ماعرف افرق بينها
الا الشفاء طبعا ادل فيه الحزم للاستراحات فقط لاغير وعلى ماقالوا اهل الشفا الشفا شفانا

وهو على طريق المدينه تاخذ مع الاشارة يسار اذا جاي من الشمال تلاقيه على يمينك ومكتوب عاللوحة الفرع الوحيد وطبعا فيه مطعم بعده مكتوب حسن بنفس طريقة المطعم الاول لكن الاصلي اصلي اكيد

ولا احد يقولي ليه تسوي دعايه بس حاب اعطي الوصف للصخره عساه يدمن عليه ويفكنا من الفول






>خلصنا الشي المفيد ونقول لكم

(كعادة مواضيعي اللتي هي كويسة لااعتقد ان يوجد به اي فائدة تذكر)








♫ بنت الرياض الاصيله ღنجم سماها متعلي ♫ تشفي القلوب العليلةღ لا شفتها قمت اهلي ♫

^
نوع من التميلح

لالا صدق كنت ناوي احطه عنوان بس تذكرت رابح وانه متغلي علينا قلت ماراح احط له عنوان لين ينزل البومه

ومن الحين اللي بيسوي ينتف ويقول وش جاب منى امرشا لرابح اقوله رجاءا اخي الكريم تقدر تروح التسجيلات وتسألهم هم اللي حاطين الاغنيتين ورا بعض

نبدأ لكم بعض الاشياء الكويسة اللي صارت لي بالصيف وتونا مابعد صيفنا






(تم الحكم ببرائتي)



السبت ماقبل الماضي
الساعه السابعة واثنان وعشرون دقيقة
انا احبك انا اعزك انا باقي على ... (رن هاتفي بتلك النغمه الرابحيه)
فامسكت به واذا به خالي العزيز

أنا : هلا
خالي : صباح الخير
أنا : بكل دهشة امسكت بهاتفي وقرأت شاشته لاتأكد من هو المتصل
وهممت بالرد عليه فإذا به يقول (ولد انت تسمعني)

نعم نعم ياخال صباح النور ولست مصدقا لما سمعته اذناي فلم اعتد على ان يصبح علي احد
ولم يصبح علي احد في حياتي الا سواء ذلك الصوت العذب الذي اخطأ في الرقم
وياليته لو كرر فعلته واخطأ مرارا فأنا على استعداد لتحمل تلك الاخطاء
لو لم اعلم فاليوم التالي انه كان صاحب مكتب العقار


ياولد وينكم انتوا مشيتو ولا لسى انا تراني قربت اوصل

ايه جايينك ياخال ماعليك قبل ثمان وحنا هناك ماسكين سرا

اتجهت لأوقض اخي الاكبر فإذا به مازال مستيقضا ومسعبلا على الشبكة العنكبوتية
فقال وبكل برود يالله مابغيت تقوم فرددت عليه بكلماتي المعتادة واستغنيت عن الفصحى اخلص انت وراسك ترا خالك ذالغثيث اقلق امي

الساعه تشير للسابعه والخامسة والاربعون
لا صح خلصنا فصحى الساعه ثمان الا ربع بالضبط

وصلنا لكتابه العدل الثانية بالرياض اللي قرب الشميسي مادري بديت احس مافيه غيرها بالرياض لاني من عرفت نفسي وعرفت خالي ماروح الا لها

وشكيت في عمري معقولة الساعه ثمان الا ربع ودائرة حكومية ومافيها الا انا واخوي وبنقالي يغسل السيارات
المهم انتظرنا الخال العزيز النصاب اللي يقول قربت اوصل ولا وصل الا ثمان بالضبط
على ان بيته اقرب بعشر دقايق يمكن بس توه مطلع له سيارة جديدة وخايف عليها
مدري من اللي لعب عليه وقاله تراك شريت مايباخ

المهم انتظرنا لين 8 وربع وماشرف احد من ذولي الاستقبال مدري وش اسمهم
يعني اساسا وضيفتهم خايسه ناس يستقبلون المراجعين ويوزعونهم على مكاتب المشايخ
وفالاخير بعد ماحد داوم منهم الا 8 وثلث ويالله عطونا مكتب وعطوا خالي مكتب ثاني
لاننا ناويين نسوي وكالات وكذا تعرفون التجارة وكذا

ومافيه اي مكتب مداوم بالكامل الا مكتب واحد والباقيين ياتلاقي الكتاب بدون الشيخ او الشيخ بدون الكتاب
طبعا المكتب المداوم من اصل 16 مكتب !!

حنا وخالي طحنا في مكاتب مافيها احد لامشايخ ولا كتاب عدل
شوي الا جانا الشيخ 8:35 دخل المكتب وجلس دقيقتين وطلع قال روحوا غيروا المكتب ترا عندي شغل
انا هنا وجهي علامات استفام لايكون حنا جالسين في بيتكم فالملحق وانا مدري لايمكن المقلط ولايمكن الصاله
وش هاللي دوامه على كيفه اللي اعرفه في كل دائرة حكومية فيه موظفين وفيه شي اسمه توقيع حضور
الا هذا مدري وش سالفته
وطبعا في وقت انتظارنا الا يجيك عامل نظافة يكنس الغبار عاد خالي كل شي عنده الا الغبار والصحة والاشياء هذي
وقام مأتش وش هالدوام الفاضي وش هالناس ماعندهم تقدير ماعندهم احترام للمراجعين
وشوي الا يهديه اللي بجنبه ويقوله يارجال تحمد ربك عالاقل مادام عندك لحية مثلهم بيمشونك ويقصد المشايخ

المهم رحنا وحطونا في مكتب ثاني فيه شيخ ومافيه كتاب عدل وجالس طال عمره يطقطق بجواله
طبعا الشيخ في مكتب والكتاب في المكتب المقابل وهنا يقهروني يعني انا انسان ابغى اعرف وش يصير لما يتنازل سعادته ويدخل البيانات فالكمبيوتر ويطبعها ويوقع ؟.!
انا اذا قلت انهم افضى ناس فهم فعلا افضى ناس فالعالم ذولي لا المشايخ ولا كتاب العدل

كل شي محفوظ بالكمبيوتر الا بعض التعديلات على حسب طلب المراجع ويدخل الاسم ورقم البطاقة ويطبعها هذي وضيفة الكاتب
والشيخ وضيفته يوقع ويتاكد من تطابق الاسماء ويسال اذا كانت الوكالة عامه مثلا
وعلى كذا مايخلصون احد الا بعد ماتطلع اخلاقه بدايه من الاستقبال لين الشيخ هذي اخذت مننا 40 دقيقة
وانا انتظرهم وهم ولا واحد فيه حاس بالمسؤلية يعني استح على وجهك انت وياه
ترا الدوله ماتدفع لك عشان تنام في بيتكم
دوامك احلى دوام بعد العاطل ماوراك اي شي بالدنيا ولا حولك مسؤول يتملعن عليك وفوق كذا ماتداوم .؟!
طبعا خلصنا شغلتنا وحنا قدامنا مراجعين بس وخلصنا الشغله في 10 دقايق

وهذي المعاناه لازم تحصل لي سنويا مع كتابة الاستعباط

وبعدها رحنا نكمل برضوة بعض الاوراق واللي تسمى اثبات حياه
وطبعا هالورقة نطلعها عشان راتب الوالد رحمه الله عليه
وكل هاللفة عشان يتأكدون اني انا وامي واخوي على قيد الحياة يعني ابغى اعرف ماراح تكون هالمعلومات عند الاحوال مثلا .؟!!


ولا يقولون حكومة الكترونية الا قصدكم بلوت ونت لوق الكتروني

وهذي طبعا من المحكمة الكبرى اللي فالديرة وطبعا شوفوا الغباء التام اللي مسوينه
حنا ناس مالنا قضية مجرد اوراق وتخليص معامله ولاتستاهل حتى تسمى معامله وحتى القاضي يمكن ماندخل عليه على حسب المزاج ومع ذلك من خلال السنوات اللي مريت في هالمحكمة اشوف قدامي احكام على ناس مساجين يجون والكلبشات في يدينه ورجوله ويطلعونه قدام الله وخلقه ليه ياخي ماتراعون شعوره وتخلون لهم دور مخصص وش المشكلة في هالشي .!؟
يعني حاطين مداخل خاصة ومصاعد خاصه للقضاة عجزانين لاتخصصون دور خاص فيهم ؟!

والسنة الماضيه اضطريت اني ادخل غرفة محاكمة عشان الشيخ يختم الورقة وكذا وكان عنده قضية طلاق والبنت موجودة والكلام اللي بالقضية مكتوب على شاشة البروجكتر بالخط العريض وكل من دخل هالقاعه من الموظفين او المراجعين امثالي يقرونها والبنت جالسة اساسا مثل الكلام اللي قريته ماتوقع ان البنت تقدر تقوله لاخوها او لابوها كلام مخجل جدا ومع كذا في محكمتنا اللطيفة انا شفته والقاضي واثنين كتاب و600 مليون موظف ومراجع يدخلون والبنت على زود اللي فيها تضطر لانها تجلس محرجة قدام الكل !!!






يوم الشبهه العالمي



الخميس ماقبل الماضي
الوقت الساعه 12 ونص الليل
المكان الدايري الشمالي من مخرج 8 لين بيت رئيس اعظم نادي فالعالم والذي سيصبح افضل فريق في اسيا

ياخي ذاك الانسان ودي اقابله ماراح انتفه ولا استهبل عليه بس راح اسأله سؤال برئ وش الصنف ياطويل العمر

المهم كنت ماخذ اهلي وراجع البيت تعديت مخرج 6 الا يلحم فيني كامري ابيض2003 سري قلت يبيني افتح له الطريق وانا اساسا ماحب هالحركة من عادتي اذا شفت احد جاي مسرع ابعد عنه لاني اتمنى اتعامل بالمثل لو مرة
المهم مسكت النص الا شوي السفاتي والقاقات >>جمع قآآآق
وقفت والا نزل ونزلت انا سلام خير وش فيه
الا يقولي ياخي انت مظلل >> في نفسي لاياشيخ يلعن خير المعلومة الجديدة

المهم جاي الاخ بيفتش السيارة قلت له معي عايله قال طيب جب الرخصة والاستمارة
طبعا مافيه رخصه اعطيته الاثبات شوي يتاكد وكذا ناداني اخذت الاغراض وقالي توكل على الله ولاتمشي بدون رخصه قلت له ان شاء الله والحمد لله مشانا على المخالفة بسبب فيسي البرئ

شوي الا تحت التخصصي الا يلحم فيني الثاني كورلا زيتي 2005 ووقفت عند بيت الرئيس العظيم
ونفس السالفة بس انا نازل مطرطع يعني ماعندهم تنسيق كل شوي واحد موقفنا سلامات
المهم قالي رخصة واستمارة قلت له ياحبيبي تو قبل شوي ماسكني خويك وتقدر تتاكد من اللوحة
العسكري عطني عطني الرخصة والاستمارة بسرعه عطيته الا يقولي الاخ فض السيارة
قلت وش اللي فضها ياحبيبي عسى ماشر قام اخذ الاوراق وراح يتاكد ورجع بمخالفه تظليل ومشيت


دخلنا الحي الا دورية شرطة وكراون فكتوريا يعني انواع الغثاثة
تعديته الا الاقي جيب قدامي ويحاول يقفل على الطريق واساسا مافيه احد فيهم قالي وقف

يعني ياجنط مسوي فيها كمين لو فرضا انا كان معي شي وكنت ناوي انحاش كان طمرت الرصيف
ووالله ماحد يجيبني منكم لاالفورد ولا الجيب ونزلت اشوف وش سالفتهم رحت لراعي الفورد الا توه متخرج وفاهم ام الدنيا غلط
قربت منه الا يقولي ارجع ارجع للسيارة
انا رجعت قلت لاينزل يطلق علي من زود الحماس
ونزل اللي بالجيب طبعا شاف ان معي عايله وقالي ليه مظلل قلت له شمس وعايله يعني مايحتاج
قالي كلن عنده شمس وكلن عنده عايله
هنا مسكت نفسي ولا ودي اضحك وشلون تركب كلن عنده شمس ؟!!
المهم الا ينزل المتحمس حق الفورد عطنا هويتك وافتح الشنطة قلت هويتي خذها توني ماقد دخلتها فالبوك لان موقفيني اثنين قبلكم وعطيتهم المخالفة شوي الا يرجع افتح الشنطة قلت ياحبيب عوايل لاشنطة ولا غيره
الا يجيني راعي الجيب قال انت من وين من الجنوب ولامن وين قلت ايه من الجنوب
الا يقول انتوا مشكلة تحبون تعطون قسايم لكن ماتحبون تاخذون
سين سؤال يابن الناس شايفني ببدلة عسكرية ولاشايفني كاتب الجنوبيين اقدع ناس
ياخي كم فيه الجنوب ووش دخلني في امهم 600 مليون واحد انا وش علي منهم ؟!
يرجع خوينا المتحمس ليه كاتم طيب والمرور اللي وقفك ليه ماخلاك تشيل التظليل
قلت ياحبيبي معي عايله تفهم انت ولالا

الا يجون يسوون على المسرحية المعتادة والمشهد المعتاد
اللي نشوفه في افلام هوليود الشرطي الكويس والشرطي ملعون الخير
ويجي راعي الجيب لا يارجال خله يروح والثاني لا لازم نجيب السطحة لازم تفضي السيارة بنشيلها
ولاتودي اهلك وترجع
اول مرة وثاني مرة قلت له معي عايله
ثالث مرة قفلت معي قلت خلاص بوديهم واجيك >>قدحة
وانا رايح الا يقول راعي الجيب لا خلاص بس تشيل التظليل لان هذا النظام
قلت ماراح اشيلها بودي اهلي وارجع له وخله يشيل السيارة دامها ماسكه معه
واروح بركب الا يناديني اخذت اغراضي ومشيت نزلت اهلي
وفكيت التظليل لاني متوقع باقي بتقروش طوال اليوم وتونا عالساعه 1ونص

وفعلا مامداني اطلع من الحي الا وراي جيب ازرق بعد وقفني والاخ مادري من اللي قاله اذا تكلمت عيب عليك
نزل قالي بطاقتك ورح وقف قدام السيارة
جلس يفتش لين داخ وخلص عطاني البطاقة ورحت جلست مع واحد من النفرات الكويسين لين صلاة الفجر
وطلعت قلت بمر واحد ساكن بحي الخليج الا قالي انا طالع بالموتر نتقابل عند المكان الفلاني
انتظرته شوي ماجاء ادق عليه مايرد قلت خلني افر لين يجي
رحت افرفر الا الاقيهم مصفطينه وناثرين ام اغراضه بالشارع
قسم بالله يا ملابسه اللي كانت بالشطنة انها مرميه عالارض
بس عرف كيف يخليهم يرجعونها السيارة لانه عسكري منهم وفيهم بعد ماخلصوا منه رحنا افطرنا وكذا وكذا
لين الساعه 9 يمكن وصباح جمعه يعني ماعاد الاخير على ماقالوا

وديته ورجعت الا الاقي مدخل الحي فيه تفتيش اللي قدامي سوري مدري وشو
المهم موب سعودي مشوه ولاادري كيف مشى يعني اجنبي خلاص مامعه شي
وسعودي هو اللي معه البلاوي .!!
المهم سوالف وبطاقة ومدري وشو لين خش في عيني ويقول السيارة فيها ريحه غريبة وش معك ؟!!

قلت له عرق
قالي هاه قلت مزيل عرق
قال ايه خوفتني قلت عرق عزالله البلشة
المهم فتش داخل السيارة شوي الا قالي افتح الشنطة
مامداني افتحها الا سكرها لان شاف الاغراض وغسل يده لان الكائن الغريب اللي اسمه اخوي
الشنطة مستولي عليها الاخ اللطيف لانه يطلع بالسيارة بعض الاحيان ومعبيها اغراض لليل

ملابس من جميع الالوان والانواع حتى مرة كان فيه بشت بس لمين وليه هذا اللي ماعرفته
طابعه كمبيوتر ماعمري شفتها في حياتي ولانحتاجها اساسا
كورتين بلاستيك من ابو ريالين
اشياء لزينة الحفلات
مصقاع
و3جزم وانتوا بالكرامه
وكلها طبعا مالي علاقة فيها
وانا كل اللي لي
5 مذكرات وكتابين وثلاث اقلام بس
ولااحد يقول هذا عدم احترام للكتب وكذا لكن تعرفون انا انسان كثير المشاغل واخلي الكتب رفيقه دربي
وعلى ماقالوا خير صديق فالزمان كتاب

واتوقع والله اعلم ان سبب كل هالقروشة (احداث الدايري الشمالي) واقول لنفسي الكريمة الحمد لله عالسلامه
ونقول للحلوين لاعاد تسوون فيها مسكرين الدايري






عمري والكل تحت امري


نرجع لقبايلكم الي كل قبيله اشرف واطهر ناس تمشي على الارض

قبل شهرين تقريبا او اكثر على بدايات تهور الزرزرة والدرفت عند مجمع ركا اللي مقابل دوار الكتاب
كنت واقف اطالع لاني ابي واحد يصدم واضحك عليه
يعني قسم بالله عاهات حقين الزرزرة مع احترامي الكامل
لاني حضرت لهم مرتين غير هالمرة وحصل حادثين

الاول راعي جمس وهو يزرزر طول البنزين للجمس وراح عليه الموتر ومادرى الا وهو طامر الرصيف
للجهة المقابله ويتحمد ربه مادخل في نخله ولا جت سيارة من الجهة الثانية ولا كان عرف يزرزر بعدها

والثاني على افيو الظاهر وهذا يعني هذا كان مهدي بمعنى مهدي ويزرزر ودخل في شجرة بصدمه خفيفه
يعني يمكن ماشي 20 لو كان متهور ونزلوا بعدها كلهم مخترشين طفايه طفايه طفايه

يحسبون السيارة بتحترق واساسا الصدمه خفيفه مااثرت على داخل السيارة بس الصدام وشوي بدايه الكبوت انعفط

المهم موب هذا موضوعنا

موضوعنا انه واحد مسوي نفسه انا الذي هو اكول واحد فالعالم وهذا شي راجع له لبس سيارة زكرته لابعد حد يعني كل شي مسوية على انه يطلع انسان كول انسان متطور فالاخير يسولف هو وخوية عن واحد من اللي يزرزرون
لا ماعليك منه هذا انا شايفه فيه شاليهات .... العام اعرفه هذا طرش بحر

انا بيني وبين نفسي لعنة الله عليك وعلى ابو الكول اللي تعرفه
يعني مثل هالانسان يقهرك بمعنى الكلمة تحس ان ماعنده مخ انا اتوقع ان عنده سطل كان مرمي في براحه تو الهيئة كابين منه عرق محلي

ياخي مثل هالاوادم قسم بالله يطرطع بجوك لين متى تجلس هذا كذا وهذا كذا وانا قبيلتي الكويسة
وانا اعمامي احسن ناس ولا مثل هذا بعد تلاقيه يقول الله يحرق التفحيط لانه حق بدوو
بس الزرزرة عادي لانها للناس الكول

كول باللبس وفالاخير عنده مخ مثل مواصفات مخ ابو جهل باقي يفكر هذا من وين وهذا من وين
وفالاخير بيسوي نفسه انا الذي هو كويس!!

وهالشي صراحة مو بس مجرد فكرة عند بعض الاشخاص لكن يمكن انت تفقد الاشياء البسيطة اللي تتمناها في حياتك بسبب انتمائك لقبيله او منطقة معينه يعني متى يفهمون هالبشر ؟!
حنا وبالذات فالسعودية اكثر ناس عانينا من هالشي مسلم وسعودي وتسافر برا يشوفونك ارهابي خصوصا لو عندك دقن
ونقول ليه يحكمون علينا بفعل بعض الاشخاص
وحنا لسى نمارسه ضد بعض مع ان كلنا مسلمين وكلنا من نفس الجنسية !!


وعندي ثلاث اشخاص تأثروا بهالشي

الاول شخص قريب مننا جدا ولاراح اذكر صله القرابة يشتغل في قطاع عسكري وهذا القطاع من افضل القطاعات واتوقع الكل يعرفه المهم ان هالشخص عنده من الدورات والخبرات ماتكفي لانه يترقى للمنصب اللي ترقى له قبل مدة بسيطة لكن طبعا بحكم انتمائة وقبيلته هالشي كان ممنوع عليه ولكن بعد حرب الحوثيين كان له دور كبير في هالحرب من خلال وظيفتة فالرياض وخلال شهر كامل ماطلع الا مرة وحدة زار اهله ورجع ولا نومه واكله وشربه فالمكتب اقتنعوا ان مالهم بديل له في هالفترة ولذالك تمت ترقيته على مايجهزون بديل له ولا هو يستحق الترقية من اكثر من 10 سنوات!!

الثاني مثل سالفة الاول شغال في قطاع عسكري وتفاجأ في اول يوم من رجوعه من اجازته بورقة (انهاء خدمة)او بمعنى ثاني استقالة عشان يوقعها ويقدمها وكان وضعه حرج شوي لان كان البيق بوس على ماقالوا اللي حوله كلهم اقنعوه ان هالشخص ماينفع وكان لو قدم شكوى راح يكون في موقف محرج لان كان تحت يده بلاوي مالية فأي تحرك يمين يسار راح يتلبس احلى قضية

الثالث هذا اللي انا مستغرب منه
هو يصير عم صديقي وهو من قبيله مدري وش اقول يعني ذولي لحالهم يسوون دولة بسم الله عليهم
جد جد يعني اكبر قبيله ومعقولة يلاقي مصاعب للاسف حصلت وهو شخص تاجر ماشاء الله عليه
وكان يلاقي مصاعب مع الدوائر الحكومية ومراجعاتها فشال اسم القبيله واكتفى بالفخذ ولكن فخذه موجود لدى اكثر من قبيله يعني على ماقالوا يلعب على المضمون


ولله الحمد فادتني قبيلتي لاول مرة وتسجل فالتاريخ
رحت الاثنين ماقبل الماضي للاحوال ابغى اجدد البطاقة لان الصورة رايحه فيها
لقيت واحد الصراحة اني ماعرفت هل هو من جماعتنا ولالا لكنه عرفني
واحس انها من جماعة قرية ثانية موب تبعنا من اسئلتةالخايسة
تعرف فلان مدري فلان طيب هذاك وش صار عليه
يا ابن الناس وش دخل امي انا انا جماعتنا اللي فالرياض قسم بالله ماني حافظ اسماء كثير منهم
وذا جالس يسولف لي عن ناس كانوا على زمن الدولة العثمانية

بس جزاه الله خير استفدت منه بشيين
الاول خلص لي البطاقة السبت وماقالي 14 يوم
وعطاني معلومة مفيده ان سعد بن صالح جاله ولده وانه زارهم لما راح جده
بس السؤال اللي يطرح نفسه بعد هالمعلومة المفيدة وش المفروض اني اسوي ابكي ولا انتحر





وادري كلكم تقولون لاعاد تكتب مواضيع بس الجد ابي اناقشكم في شي يشغل الكل
وش الافضل مواصل ولا هكتار ؟! >>احس ان مواصل الحين H كبير

لالا جد خلاص الرجال اختار الاسم اللي يليق فيه كمثقف
واحب اقوله

ان زعلوك ترا انا معاك
وان ضايقوك انا معاك
لكن اذا حبوك اسمح لي ياسيدي
انا معاهم مو معاك

وبما اني دخلت في اغاني علي بن محمد
بالمرة اهدي لوليد القحطاني
ياقرب واشنطن ولندن وباريس حذفت عصا للي رصيده ملايين
والله يوفقك ياوليد وترجع تقهر مرسال

ماتزعلوش ياللي ذكرتكم في موضوعي ولكن انتم الاشهر والاكوس >>كيف المخرج





ختاما كالعادة
قصيدة كويسة تعجبكم






تعالي نمطر أحساس وأماني ... تعالي نزرع الدنيا تهاني
تعالي عطري روحي بشوفك ... دعيتك حب وإحساسك دعاني

تعالي بسمه فوق الشفايف ... وأغلى حرف ينطق به لساني
تعالي نكتب الفرحه قصيده ... تعالي واعزفي شوقي أغاني

تعالي يا حياتي في حياتي ... أماني علقت فيك الأماني
تعالي نرفض سنين التباعد ... نعيش بحب وإخلاص وتفاني

تعالي درب ما يعرف نهاية ... تعالي شط وأمواج ومواني
غروب الشمس مشتاق لشروقه ... يقول يموت لو باكر نساني

تعالي غيري لون الليالي ... مثل ما غير إحساسك كياني
غرامك حلم نور لي حياتي ... غرامك كل شي في زماني

أنا اللي كثر حبي لك أحبك ... أنا اللي فيك مجنون وأناني





تحياتي
اضافة رد مع اقتباس
  #2  
قديم 18/07/2010, 04:17 AM
زعيــم متألــق
تاريخ التسجيل: 29/08/2007
المكان: قباء
مشاركات: 1,387
حجز
...............................

صحيت


انت متاثر بالدعايات ثلاث بواحد

اخر تعديل كان بواسطة » parrot في يوم » 18/07/2010 عند الساعة » 02:48 PM
اضافة رد مع اقتباس
  #3  
قديم 18/07/2010, 05:11 AM
الصورة الرمزية الخاصة بـ HAYA92
زعيــم مميــز
تاريخ التسجيل: 02/12/2009
المكان: All Around The World
مشاركات: 4,025
آبدآآآآآآآآآآآآع موضوعك ...
وسوآآآآآآآآلف شئ وآستمتعت يآ <<قائد السعودية>> بموضوعكـــــــ,,’’’,,
سلمت يمنآآآآآآآآآآآآآآآآآآك
::::::::::::::
اضافة رد مع اقتباس
  #4  
قديم 18/07/2010, 05:23 AM
الصورة الرمزية الخاصة بـ ام متعب التميمي
زعيــم مميــز
تاريخ التسجيل: 18/10/2007
المكان: في ــ♥ــه
مشاركات: 2,247
يالله انك تحيي ابو المغامرات...........

إقتباس
وشو لين خش في عيني ويقول السيارة فيها ريحه غريبة وش معك ؟!!

كان قلت من شاورما حسن بدت تتبخر من جسمي

تحياتي
اضافة رد مع اقتباس
  #5  
قديم 18/07/2010, 05:48 AM
الصورة الرمزية الخاصة بـ بطلة
زعيــم مميــز
تاريخ التسجيل: 24/09/2009
المكان: مدينة السنافر
مشاركات: 3,141
أي موضوع لـ ليدر حجز من دون قراءة ---> كيف الترفيع ؟

** **

صباح الخير ,,

موضوعك قصييييييييييييير ,,


إقتباس
وعطاني معلومة مفيده ان سعد بن صالح جاله ولده وانه زارهم لما راح جده

إقتباس

بس السؤال اللي يطرح نفسه بعد هالمعلومة المفيدة وش المفروض اني اسوي ابكي ولا انتحر



خخخخخخخخخخخخخخخخخخخخخخخخخخخخخخخخخخخ
حلللللللللللللللللللللللللللللللللللللللللللوة

**
على فكرة في كلام مافهمته ,,
وكمان اش يترزز ؟

**

الله يعطيك العافية
شكر لك
بطلة

اخر تعديل كان بواسطة » بطلة في يوم » 18/07/2010 عند الساعة » 07:13 AM
اضافة رد مع اقتباس
  #6  
قديم 18/07/2010, 05:51 AM
زعيــم فعــال
تاريخ التسجيل: 08/11/2004
مشاركات: 421
الله يسعدك قلبك يآخي . .
الدوريات والمرور هذا اللي اقلق شي بالحياه !
يرفعون الضغط من جد , يعني اذا بيستقعد لك غصب بيطلع لك كم مخالفه . .
وماقد طحت في احد طيب فيهم استغفر الله مع احترآمي كلهم هيآط . .
الله يعين بس . .
تسلم ليدر . .
يعطيك العافيه حبيبي . .
اضافة رد مع اقتباس
  #7  
قديم 18/07/2010, 05:52 AM
الصورة الرمزية الخاصة بـ leader ksa
زعيــم متألــق
تاريخ التسجيل: 06/09/2009
المكان: -
مشاركات: 1,433
ام متعب

الحين لك ثلاث ساعات مباحثات مع الكيبورد فالاخير طلعتي بسطر واحد ولا بعد تنتفيني


>>وبعدين وين هالاشياء ورا مارجعت للحين

حياك الله ولاعااد تنتفين


اضافة رد مع اقتباس
  #8  
قديم 18/07/2010, 05:58 AM
الصورة الرمزية الخاصة بـ ỳάṡṣẻя
زعيــم مميــز
تاريخ التسجيل: 27/12/2006
المكان: لاهاي - هولندا
مشاركات: 3,847
,,,

صباح الجوري
انت يا عزوز تحسب ما عندنا شغل بالدنيا إلا نقرأ مواضيعك
برب
................
بآآآك
هيا تؤمن بالله يا عزوز اني سحبت ع محاضرة عشان ارجع اقرأ موضوعك
خلني اخذ حرمان صدقني لأجيك الرياض عند مطعم حسن تعزمني ع الشاورما
بآآقي إلى الآن تسمع للسحلية الله يهديك يا رب اذكر كان عندنا مدرس رياضيات
يدرسنا بالثانوي نسخة من رابح حتى ما ناديه بأسمه ناديه رابح .. اسأل عادل اذا مو مصدق
ايوه وترا الدوائر الحكومية والوزارت كلها تتبهذل عندها إذا تبي تخلص شي يعني احسب حسابك
إذا بتراجع دائرة حكومية خاصة وزارة النقل صار لي معهم موقف صرت اول وزارة اسبها
أما المرور فهؤلاء لهم قصص وروايات لي معهم يعني ما ابي اتعبك تقرأ حراام << مايقصدك ابد
بس اغلب اللي يمسكوني من هم على شاكلة كلن عنده شمس بعضهم وربي ملاحيييييس بقووة
والقبايل وعلووم القبايل ما ابي اتكلم اخاف اجيب العييد حتى أهلي ساكنين في منطقة
ما يدانون شي اسمه جنوبي بس الحمد لله عايشين من 30 سنة بمشاكل ع الخفيف
ومواصل بيضلون ينادونه مواصل حتى لو غير اسمه بعدها بيسوي زي عسيريه
يرجع للنك الأول بس هالمره بيصير مواصل من عام 1431
ووليد ما شاء الله عليه ما يحتاج الراتب شكله مخاوي له هامور وإلا طايح له ع كنز بماليزيا
كمان لا يزعلون مني مواصل ووليد بس شسوي جاب طاريكم بالموضوع
عزوز المره الثانية طلبتك لا تجمع لي 3 قصص في موضوع واحد اكتب كل قصة في موضوع
عشان ابو مقبل يثبتها لك يعطيك العافية ومعليش إذا طولت عليك << تعلم مني

اسأل الله ان يرحم والدك ويوسع له في قبره ويطول بعمر والدتك ويحفظها لكم

,,,

اخر تعديل كان بواسطة » ỳάṡṣẻя في يوم » 18/07/2010 عند الساعة » 11:51 AM
اضافة رد مع اقتباس
  #9  
قديم 18/07/2010, 06:22 AM
الصورة الرمزية الخاصة بـ الرامـي
زعيــم مميــز
تاريخ التسجيل: 04/05/2010
مشاركات: 2,228
يعطيك العافية على سوالفك

إقتباس
كلن عنده شمس

اضافة رد مع اقتباس
  #10  
قديم 18/07/2010, 11:07 AM
الصورة الرمزية الخاصة بـ leader ksa
زعيــم متألــق
تاريخ التسجيل: 06/09/2009
المكان: -
مشاركات: 1,433
إقتباس
الرسالة الأصلية كتبت بواسطة كهـــرمـــان
آبدآآآآآآآآآآآآع موضوعك ...
وسوآآآآآآآآلف شئ وآستمتعت يآ <<قائد السعودية>> بموضوعكـــــــ,,’’’,,
سلمت يمنآآآآآآآآآآآآآآآآآآك
::::::::::::::

الله يسلمك طال عمرك
الابداع في مرورك يا ريكافوكا >>كيف القفطه
اما عليك اسم اسمح لي
واسمح لي اصحح لك معك زعيم المملكة العربية السعودية في مجال اللحسة واللمسة واللبسة فقط لاغير
>>عشان لايزعل ابو متعب
حياك ياكويس





إقتباس
الرسالة الأصلية كتبت بواسطة بطلة
أي موضوع لـ ليدر حجز من دون قراءة ---> كيف الترفيع ؟

** **
صباح الخير ,,
موضوعك قصييييييييييييير ,,

خخخخخخخخخخخخخخخخخخخخخخخخخخخخخخخخخخخ
حلللللللللللللللللللللللللللللللللللللللللللوة

**
على فكرة في كلام مافهمته ,,
وكمان اش يترزز ؟

**

الله يعطيك العافية
شكر لك
بطلة
[/CENTER]


ايه كذا الترفيع الكويس

افا وش دعوه بطله
بالاول ترفعين فالاخير تخربين
حسيت اني سواق اندونيسي متأخر على عمته ومضيع السوق

وش اللي مافهمتيه غير الزرزرة ويزرزر ؟

عموما الزرزرة هي مفهوم يمتد الى بداية معرفه السعوديين بالسيارات
ولكن التاريخ المتأكد منه هو بدايه التسعينات الميلادية بوجود الكرسيدا والالتيماء كسيارات درفتة وزرزرة
قبل ان يتم تحويلها الا تفحيط واندثرت هذه العاده لدى الشعب
حتى عادت وانتشرت خلال الاشهر القليلة الماضية
بالعربي هي مرحلة ماقبل التفحيط واللي من خلالها نشأ علم التفحيط السعودي
تخميس - مقاومات - تربيع - قصه دوار

وتقدرين تكتبين (درفت) باليوتيوب وتشوفين بنفسك بس لاتتهورين
واذا كان اي احد من الاخوان عنده اضافه على ماذكرت لاني مش من اصحاب المجال
بكوني صاحب كامري وانا اعتبر من المعادين للدرفت والزرزرة
ومؤيد وبشده للتفحيط لان ببساطه اللي يجي مصفي طبلونه مو مثل واحد توه حاط السيارة بالاول
وحتى في علم الرياضيات ويمكن للاخت الببغاء تفيدنا في ذلك حيث ان العدد 200 او 240 لا يمكن ان تساوى ب 60 او 80

الله يعافيك حياك





اضافة رد مع اقتباس
  #11  
قديم 18/07/2010, 12:08 PM
زعيــم فعــال
تاريخ التسجيل: 03/07/2008
المكان: الـــريـــاض
مشاركات: 454
^^^^^^^^^^^^^^

الدرفتآت لسيآرآت الدفع الخلفي مب الأمآمي
اضافة رد مع اقتباس
  #12  
قديم 18/07/2010, 04:19 PM
مشرف سابق بمنتدى الجمهور الهلالي
تاريخ التسجيل: 03/08/2002
المكان: مكآوي !!
مشاركات: 3,729
موضوع جميل وسرد رائع ،،

بصراحة إستمتعت جداً مع الموضوع ،،


شكراً ،،



الهاديو
اضافة رد مع اقتباس
  #13  
قديم 18/07/2010, 05:29 PM
الصورة الرمزية الخاصة بـ عادل بن ساعد
رئيس تحرير مجلة طله
تاريخ التسجيل: 26/10/2009
المكان: . في قلب من عرفني .
مشاركات: 2,196
هلا أخووي عبدالعزيز ,, رجعة جميلة لنا و للمجلس ,,
أولاً دعني أفتتح ردي بدعآآء ,,
أسأل الله أن يمد في أعمار والدينا و أن يرحمهم
و يغفر لهم تحت الأرض , و أن يجازيهم بإحسانهم لنا يوم العرض ,, يا رب ,,
و أعود لموضوعك الطويل ,, و الذي حمل الكثير من المواقف و القصص ,
و سأعرج عليها مجملاً ,,
- بالنسبة للمحاكم فالحكم بتقييم عملهم صعب , خصوصاً و أن المحاكم تعج
بجميع أنواع القضايا , فسير المعاملة يأخذ على حسب عمق القضية و مدتها ,,
- بالنسبة للمرور ,, فلا أعلق عليهــا ,, لأننا صرنا حبايب ,,
- القبيلة و الهيآآط ,, قضية لن و لن تخمد ما حيينا ,, و شغلة الأحوال المدنية
أول مره أسمع عنهــا ,, يمكن لأني باقي على بطاقة الأحوال القديمة ,,
** تقبل مرووري المتواضع بحجم موضعكم الشامخ ,, و لكن وصلكم الغير
مستغرب لنا يجبرنا على التعريج و تسجيل حضورنا ,, دمت في حفظ المولى ’’
تقبل تحيآآتي و خالص إمتنناني ,, عادل
اضافة رد مع اقتباس
  #14  
قديم 18/07/2010, 05:57 PM
الصورة الرمزية الخاصة بـ Hilaly Madridi
زعيــم مميــز
تاريخ التسجيل: 25/11/2008
المكان: ] [ . . . . https://twitter.com/Abdulmohsn10 . . . . ] [
مشاركات: 5,702
.. .. ..
.. ..
..



لي بااك

موضوعكـ يبي له جلسه


^^

بااااكـ

صراحهـ انبسطت على هالليله قعدت اقرأ موضوعكـ
صراحة موضوعكـ حلوووو مره


إقتباس
فيه كمرتين جديده بعد مخرج 2 وانت جاي من الشرق وقبل المخرج وانت جاي من الدايري الغربي



اذا طبقوا نظام ساهر ليتك تجي لمنطقتنا
تعلمنا وين الكاميرات


إقتباس
(تم الحكم ببرائتي)



يالييييييييل

ياشيخ اشين شيء هذولاء وماشابههم
المرور..الأحوال ..وطقتهم
والي رحت لمهم انت

المرور ..عندهم مسؤول مادري شسمه ..عريف مادري مقدم مادري فريق اول
اسمائهم صعببه ..
المهم اسأل الي بالاستقبال متى يجي خويكم هذا يقول 8:30 قلت ننتظر ..
صارت 8:30 قلت متى يجي قال شوي ويجي
قلت ياخي عادي قل الصدق اعترف مو لازم تخبئ عليه
قال تسع إلا ربع قلت ننتظر
وتصير تسع إلا عشر ويفتح العامل مكتبه ويقعد ينظف ويشغل المكيفات
ويحووس له شوي وعلى الفطنه
يجي سعادت الموظف
متآخر يمكن ساعه عن دوامه لكن ماحولك احد ..


إقتباس
يوم الشبهه العالمي



كم واحد مسكك
12 ولا 13
ياخي ع حسب الموتر تكون الشبهه ..
وعلى حسب القائد
شف انا سبحان الله ..اول مايشوفني
امش ياسعادة الوزير



إقتباس
عمري والكل تحت امري





بعض الناس عقليته صغيرهـ ..
انا عندي صديق قسم لو تعطيه اسم العائلة
يعطيك أصله ومن وين ..
صراحة أثرت فيه مرهـ
الحين اذا جينا نطلع للاستراحه قلت ننادي هذا
يقول وش تبي فيه هالـ....... تفهم افهم ماتفهم على راحتك


إقتباس
وش الافضل مواصل ولا هكتار ؟!



لا ..هكتار أحلى ...
بس وش معنى هكتار..؟



إقتباس
وبما اني دخلت في اغاني علي بن محمد
بالمرة اهدي لوليد القحطاني
ياقرب واشنطن ولندن وباريس حذفت عصا للي رصيده ملايين
والله يوفقك ياوليد وترجع تقهر مرسال




وليد ..الله يوفقه ويرزقه ..


ياحبيلك ياليدر
كثر لنا من هالمواضيع ..
بس ياخوي عطنا إياهـ أقساط
قعدت مادري كم وانا اقرأ موضوعك


تحياتي لكـ خيوو





.. .. ..
.. ..
..

اخر تعديل كان بواسطة » Hilaly Madridi في يوم » 19/07/2010 عند الساعة » 01:31 AM
اضافة رد مع اقتباس
  #15  
قديم 18/07/2010, 06:30 PM
الصورة الرمزية الخاصة بـ HILALYA ]~
زعيــم مميــز
تاريخ التسجيل: 01/09/2008
المكان: يارب ان متابعه بصمت لقت لي شي اكتبه ض1
مشاركات: 7,448
Talking

..






إقتباس

بحجز معهم ضض1ض1

باااك ..
السلام عليكم .. مساء الخير ..
نخش سيدا ..

إقتباس

وش اللي مافهمتيه غير الزرزرة ويزرزر ؟

عموما الزرزرة هي مفهوم يمتد الى بداية معرفه السعوديين بالسيارات
ولكن التاريخ المتأكد منه هو بدايه التسعينات الميلادية بوجود الكرسيدا والالتيماء كسيارات درفتة وزرزرة
قبل ان يتم تحويلها الا تفحيط واندثرت هذه العاده لدى الشعب
حتى عادت وانتشرت خلال الاشهر القليلة الماضية
بالعربي هي مرحلة ماقبل التفحيط واللي من خلالها نشأ علم التفحيط السعودي
تخميس - مقاومات - تربيع - قصه دوار

وتقدرين تكتبين (درفت) باليوتيوب وتشوفين بنفسك بس لاتتهورين
واذا كان اي احد من الاخوان عنده اضافه على ماذكرت لاني مش من اصحاب المجال
بكوني صاحب كامري وانا اعتبر من المعادين للدرفت والزرزرة
ومؤيد وبشده للتفحيط لان ببساطه اللي يجي مصفي طبلونه مو مثل واحد توه حاط السيارة بالاول
وحتى في علم الرياضيات ويمكن للاخت الببغاء تفيدنا في ذلك حيث ان العدد 200 او 240 لا يمكن ان تساوى ب 60 او 80

الله يعافيك حياك






عاد تصدق ما فهمت للحين < لا شبه فهمت < بيني وبينك خفت لا يجيني شي ..

وشسمه موضوعك جلست يومين اقراه ..
قسمته للنص < تعبت ياخي ..
بس صدق عليك موضوع .. كل سالفة بجهه ..
جد اسعدتنا الله يسعدك : ) .. بس تعبتنا < ..
وعدساتي جاها شد عضلي من كثر ما اقرا ..
وشسمه الله يعافيك امتعتنا .. بالتوفيق لك ..

اختك ..

اخر تعديل كان بواسطة » HILALYA ]~ في يوم » 18/07/2010 عند الساعة » 06:46 PM
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 12:15 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2024, Jelsoft Enterprises Ltd

Google Plus   Facebook  twitter  youtube