.
.

السلام عليكم ورحمة الله وبركاته

أسعد الله صباحكم / مساءكم .. بكل خير

بمآ إني من عشاق الشاعر القطري المعروف خليل الشبرمي التميمي
أحب أن أقدم لكم كل شيء عن هذآ الشاعر مما احتفظت به في جهازي
ومما جمعته من محرك البحث الشهير قوقل

فهيآ ننطلق و نسافر إلى عآلم ~ شبرميآت ~





][ نبذه عن الشاعر خليل الشبرمي التميمي ][


الاسم : خليل ابراهيم ناصر الشبرمي التميمي

مكان الولاده : مدينة سميراء - بمنطقة حائل عام 1391

المؤهل العلمي : جامعي - مدرس لغه عربيه

الحاله الاجتماعيه : متزوج - ولديه أولاد ولله الحمد





][ ديوان الشاعر خليل الشبرمي التميمي ][


وش اللي صار ما ندري

وش اللي صار ما ندري .. ولا ندري وش اللي صار
ولا نـدري وش اللـي بالليـال المقبـلات يصيـر

تعلّمنا مـن اسـرار الحيـاة .. ان الحيـاة اسـرار
وتفسيـر الحقيقـه .. بالحقيقـه مالـهـا تفسـيـر

ومن غـدر الزمـن كـلٍ يقـول ان الزمـن غـدار
فكم ممسي على قمـة جبـل واصبـح بقاعـة بيـر

ومن مكر البشـر كـلٍ يقـول ابـن البشـر مكـار
فكم بالناس حامل مسك وكـم بالنـاس نافـخ كيـر

صحيح ان الصحيح اصبح خطـا والعـار ردّ العـار
ولكـن مالنـا حيلـه ولانقـوى عـلـى التغيـيـر

نشوف اللي نشوفه مـن مصايـب واليديـن قصـار
تحت رحمة رحيـم وفـي رجـا الله والـي التدبيـر

نسوق العِيـر بامـر الله ونمشـي لآخـر المشـوار
وعلـم الغيـب عنـد الله وبامـر الله تسيـر العِيـر

نعايـش وقتـنـا ونسـايـره ونـقـول ياسـتـار
علينـا تستـر بستـرك وبـامـرك يالله التيسـيـر

نفكـر بالليـالـي والليـالـي تفـخـت الافـكـار
ولازلنـا نفكـر كيـف ممكـن نتـرك التفكـيـر

وش اللي صار ماندري .. ولاندري وش اللي صـار
ولكـن كـل شـيٍ ممكـن انـه بالحيـاة يصـيـر


قلت حق

قلت : حق ... وقـال :: لابالله زيـف
قلـت : عنـدي مايـبـرر موقـفـي

قال :: كيف ؟ وقلت انا له :: كيف كيف
بعـد ذا المـده تقـول انــك وفــي

زل صيف وزل صيـف وزل صيـف
مـن ثـلاث سنيـن وينـك مختـفـي

رحت أدور عنك مـن بيـش لطريـف
ودجت نجـد مـن الهفـوف ليـا نفـي

كنت طيف وجيت طيف ورحت طيـف
والامـل لا طـال شمـعـه ينطـفـي

قال احبـك قلـت حبـك حـب حيـف
مااقبلـه لـو كـان حسنـك يوسـفـي

مامعـي للحـرب لاحربـه وسـيـف
مـن غرابـيـل الليـالـي مكتـفـي

وعطر باريسي وساعـة مـن جنيـف
ماتـفـيـد ولا تـغـيـر مـوقـفـي


وا وجودي كل ماشفت زوله

وا وجودي كل ماشفت زوله مـن بعيـد
وجد مَن مِن زود مابه غبن عاف الحياة

ووجد من صلى على امه وابوه بيوم عيد
يوم صلى العيد مـد الجنايـز للصـلاة

ووجد عـودٍ قيّـدوه العساكـر بالحديـد
ذابحٍ له نفس من دون عرضه والبنـات

واصغر القصّر بلغ ما عفا راسه عنيـد
أقشرٍ لاجاه جاه العـرب قـال الصفـاة

ووجد مجدور العرب بالخلا خلي وحيـد
بعنّته مـا حولـه الا الذيابـه عاويـات

ووجد رجْل اعمال عقب المعزه والرصيد
فلّس وحلـت عليـه العطيـه والزكـاة

أتوجّـد وادري ان التـوجّـد مايفـيـد
وجد مَن مانال شفه ولا حصـل نجـاة



ياسعد وش شاف مجنون ليلى

ياسعد وش شاف مجنون ليلى بالغـرام
أشهد انـه وان بِلِـي بلوتـه ياهونهـا

ياسعد ليلاه وان مـات فيهـا مستهـام
تدري انـه بالهـوى ياسعـد مجنونهـا

المصيبه من غدى ميتٍ لـه كـم عـام
عشقته ماتـدري انـه قتيـل عيونهـا

قرهدت نفسه عليهـا ومـرّ الكبـد زام
ودوك قلبه ياسعـد مزّعتـه طعونهـا

ياسعد والله يالولا الحيا واخشى المـلام
والقرابـه والحيـا والهـوى وجفونهـا

لاانهبه وانحاش واجلى جنوب ديار يـام
ما يردن لو وقف جيش هتلـر دونهـا

ياسعد راع الهوى بالهوى لاضيم شـام
مايـرده طـول بيبانهـا وحصونهـا

وان غوى راع الهوى في هواها مايلام
لااجتمع غبن الزمن ياسعـد وغبونهـا

ياسعد هي منوة اللـي تمنـى والمـرام
لعن ابو حظٍ قصر ياسعد مـن دونهـا

أسمع الرعـاد واخيـل بـراق الغمـام
بس مادري ياسعد وين وبـل مزونهـا

وياسعد والله فلا اسلى هواهـا لاحـرام
لو يلوح الشيب فـي لحيتـي وقرونهـا

وخذ وصاتي ياسعد وصلّه بنت الحشـام
ذي وصاتي كان غيري غدى مظنونهـا

لا شرت ثوب الفرح تشتري لي باع خام
يدفنونـي ليلـة العـرس ويزفونـهـا


عاد عيد العنود

عاد عيد العنود العيطموس الفـارع الفاتـن المملوحـه
الهنوف العطوف ام العيـون الخـرّس الذبّـل الذبّاحـه

يوم عادت بيوم العيد عادت يا عـرب للمعنـى روحـه
وفز قلبه مثل ما فز ببروق الوسـم قلـب راع فلاحـه

وا سْفَر الكون وانور في عيونه وارجهنّ وبرنّ جروحه
شاف في نجد ورد الطايف ومزن السراة وضباب الباحة

وانتشى الورد واغصانه تثنّت والندى دمعـةٍ مسفوحـه
وغرد الطير والقمري سجع كنّه على (مسرح المفتاحه)

انتظر وانتصر وادرك مرامه بالغرام ولحَق مصلوحـه
كيف ما ينتصر ؟ دام المحبه محزمه والعفاف سلاحـه

وعاد عيد الحيا والسلهمة والبـوح والنبـرة المبحوحـه
والقلوب النظيفة والنوايا البيـض والخطّـر المنساحـه


ضحـــــى العيد

حرام ... يا باشة الغيـــــــد = والله ... ورب البريـــــّـــــه
لولاي اهــاب المنـــــاقيد = واللــوم والهــرج فيـــــّـــــه
لااشق ثوبي ضحى العيد = وادنـــــّــــها هاشــميــــّـــــه
وانـخى جميـع الاجاويد = تكفون يـاهل الحميـــّــــه
راع الهـــوى يالاواليــــد = شيـــلوه في مروحيـــــّـــــه
لاحرّكت هزّت البيـد = تــرزم رزيــم برديــّّـــــه
ودوّه يم اتلع الجيد = تكفون قبــل المنيــّــــه
ولا تـكثـــرون التـناشيــــد = بالحيــل حـاله رديــــّــــه
عيده عذاب وتناهيد = وجروح قلبه طريـّــــه
وشفا العيون المراميد = شوفة رهيف الثنيـّـــــه
ماجت على كيف ماريد = ميـر الوعد بالضحيـّــــه
يامخلفيــــن المواعيـــــــد = من غير ذنب وخطيّـــه
وما ودي انقص و لا ازيد = واكشـف امــورٍ خفيـّــــه
محروم من فرحة العيد = من ذاق فرقـا خويــّـــــه


قصيده موجهة من الشاعر خليل بن ابراهيم الشبرمي الى اللواء متقاعد عبدالعزيز اليوسف
رئيس لجنة القبول بالكليات العسكريه سابقا..
ومناسبتها هي ان الشاعر ذهب لمقابلة اللواء في موضوع لاحد ابناء عمومته ولكنه لم يستطيع مقابلته اكثر من مرة فكتب هذه القصيدة علماً بأنه كان بينهما سابق معرفه جيران وهذه القصه عام *1416هـ ..

ياواحد مـادون بابـك خفـارات
ياسامع اللي بالدجاء لـك ينـادي

يالله سالتـك يـاالـه البـريـات
عفوك وسترك والهدا والرشـادي

ومن بعدذا يامحزمـي بالمهمـات
اللازمـات الملزمـات الشـدادي

ياماكر الصلولات نسل التميمـات
يامعرب الجديـن سقـم الاعـادي

حاولت اشوفك بس هيهات هيهات
انا بوادي وانـت عنـي بـوادي

والجندي الماخوذ مابـه مروفـات
يهوشني ويقول وين انـت غـادي

واهل المشالح والرتب الرفيعـات
ماوقفوابالـبـاب صفـرالايـادي

والعلم مابـه يالبناخـي مـراوات
جاك الوكـاد ورد علـم وكـادي

والطيب كايد بس للطيب حـزات
والفعل صملـه والـدوادي دوادي

واديـم الله ماتـدوم المقـصـات
تمسي لوتصبـح انسـان عـادي

والشر له بوجيه الاشرار شـارات
والجود باهل الجـود بيـن بـادي

وغيري يجيب من الامير اعتمادات
واناعلـى رب العبـاد اعتمـادي

يقوله اللـي مايخـون الامانـات
ولايجحد المعروف عنده مبـادي

وصلو على مبعوث رب السموات
شفيعنـا يـوم الحشـر والتنـادي


من الوسمي سحاب

من الوسمي سحاب(ن) ساقه الرحمن ومفاجات
تزبّر وارتهش وارهش وهـل وبيّـح سـدوده

ترزم وارتكم وابهل على الروضه ونوّه بـات
يقود ونوض براقه يقيـد وترجـس رعـوده

ردوم(ن) هل ماها من سماها والبـرد زخـات
وغثير السيل من يوحي هديره زادت سعـوده

ربابه لاانفهق واقفى مثل ذود(ن) من الخلفات
تتالى واقفت ركابـه عقـب مانـزّل شنـوده

كساه العشب والنوار الاصفـر كنـه جنيهـات
وقال الروض غني يا ام سالم باعذب انشـوده

يطيب الكيف والدله على جمر الغضا مركـات
بروض(ن) لااومت فنوده يفوح الطيب مع نوده


يا عيوني عيوني

يا عيوني عيوني عن خطـاك معصوبـه
مخلص(ن) لك بحبي والليالـي عصيبـه

ليه ماترحم اللـي منـك يمـك هروبـه
ومـن عذابـك لذيـذ مـا يهتنـي بــه

بعدك اقسى عذاب وقربك اعذب عذوبـه
ووصلك اكبر نعيم وصدك اكبر مصيبـه

وصمت اعظم عقاب وهمسك اجزل مثوبه
وانت طب الجروح المبطيـه والعطيبـه

سقت جيش العتب لاشك واجه صعوبـه
وانسحـب مـن ميادينـك كتيبـه كتيبـه

تـدري ان المحبـه ياحبيبـي عقـوبـه
وادري المحبـه طـوع ماهـي غصيبـه

وادري ان الدقايـق والعمـار محسوبـه
حسبي الله على حظـي وربـي حسيبـه



وقتً مضى

وقتً مضى يا قرقعه جبت الابيـات
واوميت بالسبحـه ومسيـت عمتـك

يا قرقعه ما عندنا صرف عشـرات
دوّروتلقى غيرنـا يصـرف ميتـك

ما اسطى على ذم العرب وانت باذات
ما اسطى على ذمك ولا امس لحيتك

متحزمً بالصبر والصمـت وسكـات
لو عضني مع لحيتي نـاب لحيتـك

سيفـي بغمـده والبواريـد مركـات
عسى الولي يدفع بـلاك ومصيبتـك

لا عيال عماتً ولا عيـال خـالات
ولا نيب من ربعك ولا مـن قربتـك

ان طعتنـي سكّـر جميـع الملفـات
لا تقص جرتنـا ولا نقـص جرتـك

ما ودي اضرب في يديك الكلبشـات
لين امسكك متلبـسً فـي جريمتـك

وكانك تبين اذبحك وقـع قـرارات
عطني ديتك بيدك واعف بوصيتـك

الناس يبن الناس قشـران وعصات
لا ضمتها يا طيب الفـال ضامتـك

واحذر ترا غوص البحار العميقـات
يقطع نفسك وعمقهـا يقطـع ريتـك

وكانك من اللي يقطعون الاشـارات
بالحال نسحب رخصتك واستمارتـك

يا قرقعه وابليس ما مات مـا مـات
لا تتبعه يعمي بصـرك وبصيرتـك

لا لا تروح ايام عمـرك حسوفـات
اغنـم حياتـك قبـل تدنـى منيتـك


في مراكش وانقـره

في مراكش وانقـره والقاهـره واللاذقيـه
حسنها ماشفت مثله جل خلق اللي خلقهـا

ولا هقيت انه بقى للزيـن فالدنيـا بقيـه
الله اللي عن جميع الناس والعالـم فرقهـا

الرموش جيوش صفت واللواحـظ بندقيـه
الله اكبر ( بندق الخياط ) مايخطي تفقهـا

والله اني من ثمان سنين وعيونـي شقيـه
ودوحة احلامي رياح الياس قد حتت ورقها

ياعرب مجنون فيهـا والقضيـه منطقيـه
زينها شيٍ عجيب ولايلام اللـي عشقهـا

حبها في وسط قلبي لـه مكانـه واسبقيـه
وفي عيوني بالجمال وبالحلا ماحدٍ سبقهـا

والهوى دامه عفيف ونيتـي بيضـا نقيـه
ما التفت للوم واذني عن كلام الناس صقها


اتركينـي

اتركينـي يـا عزيـزة للشتـات
والعنـا والبعـد والليـل الطويـل

وريحيني من غمـوض المفـردات
وكبرياء الكذب والعـذر الهزيـل

وحاصريني صمت من كل الجهات
واذبحيني بوح فـي نبـرة عليـل

واسألي غـدر اليديـن الناعمـات
عن ثلاث طعون في صدر القتيـل

وافرحي لاقيـل فارقـت الحيـاة
وزغردي لاشيعـوا جثـة خليـل

وكل شيٍ بيننـا يـا بنـت مـات
ولابقى بعد الرحيـل الا الرحيـل

وانتهت رحلـة ثمـان الطايـرات
وابتدت قصـة لقانـا المستحيـل

كنتِ أجمل من رأيت من البنـات
ومالـك بعينـي مثيـل ولا بديـل

وصرتِ أشنع جرح وأبشع ذكريات
للأنانـيـة ونـكـران الجمـيـل

ولا تبقى من غـلاك إلا الرفـات
ولا تلاشى من عنـاي إلا القليـل

ودعيني يوم فقـت مـن السبـات
ولا تعديني سـوى عابـر سبيـل

اقترف في حـق نفسـه سيئـات
ولا يكفرها سوى البعـد الطويـل



يقول الشاعر خليل ::

أعطاني أحد الإخوان ورقة فيها ثمانية أبيات موجهة إليّ ،
ولكن الغريب هو أن هذه الأبيات الثمانية فيها اختلاف ،
فالأربعة الأولى قوية وموزونة ، أما الأربعة الأخيرة
فعلى العكس تماماً ، وبالذات الأبيات التي ذكر فيها اسمي ،
فقلت لأخي الذي وجهها إليّ ، هذه الأبيات إما أن الذي كتبها اثنان ،
أو أنها كانت موجهة لشخص آخر ، ثم عُدّلت ووجهت لي ،
وهذا ليس هو المهم ، المهم هو أن مضمون تلك الأبيات
أن الناس تتكلم والناس تقول والناس قالت وووو ،
بالإضافة إلى بعض التهم الموجهة إلىّ ،
وقد حاولت التهرب من الرد لكنه أصر على ذلك ،
وحقيقةً أبياته لاتحضرني الآن ، وليست مسجلة عندي ،
ولا أذكر إلا ( المشد ) ، يقول ::

ألا يا قلم سر بالهواجيس سجل لي بيوتٍ دفعها هيض فكري على بالي


وهذا ردي عليه :


ألا مرحبـاً واهـلاً هـلا عـد ماهلـي
سحابٍ على سلمـى واجـا دوم همالـي

وحي الرفيق اللي علومـه يجـوزٍ لّـي
وحي الكتاب كتاب غالي ومـن غالـي

ولاوالله الا مرحبـاً بالرفـيـق الـلّـي
مضرا على كسـب النواميـس ريبالـي

مديـم حجاجـه طلـق ولسانـه يهلّـي
به الطيب طبع معرب الجـد والخالـي

صديقٍ صدوقٍ صادق الود صافـيٍ لّـي
نقـيٍ تقـيٍ مالـه اجنـاس وامثـالـي

ومن بعد ذا يااحمد ابا ارسـل وحوّلـي
وشرواك ذيبٍ موجتـه تلقـط ارسالـي

انا يالحميدي عان وسمـي علـى بلّـي
علام الوسوم اللي علـى بلّـك اشكالـي

وش اللي جرى وايش السبب يافتى قلّـي
علام العلوم علـوم جـزلات وهزالـي

لاصرت فوقي ماانت ملزوم تنـزل لّـي
ولاصرت حدري ماانت مكلوف ترقى لي

وكانك تقول النـاس قالـت فعيـن لّـي
من اللي سلم من راعي القيـل والقالـي

ولاتبعد ابدن بـس مـن ملّـك وملّـي
تحسـس ودوّر كـم حقـودٍ ومحتالـي

بلانـا بـلانـا بينـنـا دوم ينسـلّـي
ومنـا بنـا واشيـن ورخـوم وانذالـي

وبالناس يابن النـاس طامـن ومتعلّـي
وانا ما ارفع الطامن ولا اطمن العالـي

وقلبي دليلـي يالحميـدي يدربـل لّـي
واميز هماجه قبل اذوقـه مـن الحالـي

وانا احَمْد ربي ماخبـرت القـدم زلّـي
ومشيي لـك الله دوم دغـري وطوالـي

ونفسـي عزيـزه بالـردى ماتسولّـي
وسود النوايـا ماتشـوش علـى بالـي

ولا اداني العيلـه ولا الميـل لـو ملّـي
ولا اطفف لغيـري ولا ازيـد مكيالـي

وانا داري انك يافتى الجود وافـيٍ لّـي
ولاهي غريبـه منـك ياطيـب الفالـي

وعلى كل حالٍ جيت كلي علـى حلّـي
وخذني شقيقٍ لك على كل ابـو حالـي

أبلبس علـى ماتشتهيـه انـت فصّلّـي
وضبّط عسـى الله مايعريـك تفصالـي

وقل واهني اللي عـن النـاس متسلّـي
دليـخٍ فضيـخٍ دالـهٍ خالـيٍ سـالـي

وصلوا على سيْد البشـر عـدّ ماهلّـي
سحابٍ توالـى نـوض براقـه يلالـي


لاوالله الا

لاوالله الا .. لاتجي والعلـم خـذ علـمٍ وكـاد
حبك تلاشى وانتهى .. والافضل انـك ماتعـود

لالاتحـاول مابقـى .. فالقلـب لـك ذرة وداد
ياللي رحلت وكن مالي بالوجـود ايـة وجـود

ماينفـع التسديـد لافاتـت مواعيـد الـسـداد
قطّع فواتير الوفا .. واحـرق ملفـات الوعـود

ماهي علـوم السندبـاد وشهريـار وشهـرزاد
ما للجحود اليوم عندي ياجحـود الا الجحـود

امشي على وضح النقا المجرود واحب الحيـاد
ولا اداني انصاف الحلول ابدن ولا اخون العهود

صابر على ضيم الدهر واجاهد ايامـي جهـاد
والعمر ينقص والليال السـود ماتنقـص تـزود

من معركتْك ابنسحب واسحب جنودي والعتـاد
ولانسحاب احياناً ارحم مـن معانـاة الصمـود

ولايندمل جرح البياض اليا دنـا منـه السـواد
ولاتطيب العله اللي بيـن بيـض وبيـن سـود

كنت اتبعك حافي قدم وامشي على جمر وكـداد
سلك الحرير يقودني ويسوقنـي ذعـذاع نـود

وتعبت انادي ياحياة الـروح يـا كـل المـراد
ومليت اقول اليوم والا باكـر بوصلـك تجـود

انشد مجاهيم الليالي فـي ربيـع وفـي جمـاد
ياما علشانك سهـرت الليـل والعالـم رقـود

اسهر على ذكراك وعيوني مطاولهـا السهـاد
وسهيل والويل وسـواد الليـل ياظالـم شهـود

صدك ذبحني والجفـا قطّـع معاليـق الفـؤاد
ياللي بتعذيبـي تماديـت وتجـاوزت الحـدود

حتي عصافير الوله فالصدر من جـور البعـاد
ماتت على هدف الضلوع اتردد الحان الخلـود

وحتى الرسايل لاجتك مـن كبريائـك والعنـاد
صارت جنايز والظروف اكفان ودروجك لحود

عذّبت قلبي واضطهدت الشوق بالهجر اضطهاد
لين الغلا مات ودفنته فـي جراهيـد الصـدود

لالا تبرر موقفك واعلن علـى الحـب الحـداد
وترى البكا ماينفع الميّـت ولا لطـم الخـدود

الحـب شـوق وجاذبيـه وانقيـاد بـلا قيـاد
وصدق و وفا واخذ وعطا ماله حدود ولا قيـود

وكلن على ما قيل يلقى مازرع يـوم الحصـاد
واكيد من من تزرع يمينه شوك ما يقطف ورود

واليوم لامنك بغيـت العلـم خـذ علـمٍ وكـاد
حبك تلاشى وانتهى وان طعت شوري ماتعـود


أغسطـس آب

لا ياحمـد لاتبحـث الأسـبـاب
والوقـت لا تـامـن عواقيـبـه

وان كانهـا تحقيـق واستجـواب
سجّـل ودوّن كـل مادلـي بــه

الحـب بلـوى والهـوى غـلاب
وويـل مـن طــب بغياهيـبـه

وياوالله اللـي ماحسبـت حسـاب
رجلي طريق الحـب تمشـي بـه

وانا ادري ان الحب حرب اعصاب
والمسعد اللي سَلْم مـا بلـي بـه

ليمـا بليـت بمتـرفٍ جــذاب
ماغير اهوجس به واهـذري بـه

غـروٍ لـك الله يسلـب الألبـاب
بالسلهمـة والمـلـح والطيـبـه

ماكنـه الا والـغـزال اقــراب
مـن دون لاشــكٍ ولا ريـبـه

عاشق عيونـه فـي عيونـه ذاب
ذوب الذهب وان سلهم غـدي بـه

رمشـه كتيبـه والعيـون كتـاب
تاصـلـك لاسلـكـي مكاتيـبـه

شلفا ذيـاب وفـي يميـن ذيـاب
ياعنـك مايبـرى مـن تصيـبـه

تصوب العاشـق بعكـش اهـداب
وبنظـره توديـه وتـجـي بــه

أهـواه واهـوى ليلـه المنسـاب
واسري معه واضيع واسـري بـه

واهيـم وادخـل جـوه الخـلاب
واطرب واغني لـه واغنـي بـه

واعيـش جـو انشـودة السيـاب
واغيب واصحي به ولا اصحي به

وان مـر طيفـه سيّـد الأحبـاب
وانـا بنومـي قمـت اهلـي بـه

افـز بـه وافـز لـه باعـجـاب
ضيـفٍ تهلـي بــه معازيـبـه

لاوعـي لاتمييـز لا استيـعـاب
الزين ماسمع به ولا اوحـي بـه

عاشق عيونـه ياحمـد منصـاب
والموت كانه مـات مـادري بـه

يادمعتيـن ونظرتـيـن عـتـاب
للجـادل اللـي صـده مصيـبـه

أتلى العهَد به فـي أغسطـس آب
الفيـن وخمسـه ذاك علمـي بـه

أسهر وقلبي ياحمـد مـن غـاب
والهـم يقبـل بـه ويقفـي بــه

ابـا اتمنـى والبخـت جــلاب
يالله عسـى الاقـدار تومـي بـه

يلملـم شتـات الهايـب المرتـاب
ويبعـثـره ويعـيـد ترتـيـبـه

ويمد لي من بعـد طـول غيـاب
فنجـال واقـدع مـن مذانيـبـه


من سبا عقلي

من سبا عقلي وقلبـي مـن سبـاه
مستحيل انسـاه هـذا المستحيـل

يوسفي الحسن تـوه فـي صبـاه
ناشنـي بالعيـن واردانـي قتيـل

ماحبـا ربـي لـحـيٍ ماحـبـاه
بالحلابيـن المـلا مالـه مثـيـل

لامشى المجمـول تزهـاه العبـاه
غصن موزٍ ناشتـه نسمـة عليـل

ولاسمعت أصلي ولا اعذب من نباه
والجبين الشمس والليـل الجديـل

اكتبوا له (ياحمـد) لفـت انتبـاه
يدرك اللي من سهم طرفـه عليـل

وكان حبـي فيـه لبـسٍ واشتبـاه
دوك مهج القلـب برهـان ودليـل

و(ياحمد) قـل لقربانـا وأقربـاه
ياعرب ذا البنـت لاتذبـح خليـل

مانبـا غيـره وغيـره مانـبـاه
ولانـدور بالغوانـي لـه بـديـل

واشهد إن الحب عـدٍ مـن جبـاه
نزعب الليعـات والدمعـة تسيـل


واونتاه اللـي مـن العـام للحيـن

واونتاه اللـي مـن العـام للحيـن
وافوح كبدي.. وآآآآه.. وعزتالـي

وابري حالي كل ما قلـت بتزيـن
عيت تزين وصحت وابري حالـي

البارحة مامسيت والناس ممسيـن
عيني قزت والقلب يصلاه صالـي

يرجف ورجفه كنه عيار خمسيـن
مع هيلعٍ عنـد اللقـا مـا يبالـي

وانس بكبدي مثل طعن السكاكيـن
ولا حدٍ فطن ياخوك للـي جرالـي

تخالفـن ياخـوك كـل الموازيـن
والحمـل كايـد واحتملتـه لحالـي

ان اشهد ان الموت ضيم المواليـن
والغدر امره مـن رفيـقٍ موالـي

والخدش كبه لو رصيـده ملاييـن
وانص الولد لو ما بجيبـه ريالـي

تمقلـي ياعيـن دامـك تشوفيـن
وتوكـدي حــرام والا حـلالـي

السيل سال وشال روس وكراعيـن
والله يثبـت راسيـات الجبـالـي

وحنا على درب المقاديـر ماشيـن
ولا حدٍ درى عن غيب سود الليالي

يا من ترى وتشوف وتروف وتعين
أبطلبـك يامـن عليـك اتكـالـي

أنك علـى درب السلامـة تقديـن
وتلطف بحالي يا عزيـز الجلالـي



الليالـي تـوْدِع العاقـل

الليالـي تـوْدِع العاقـل هبـيـل
والامـور اليـوم سلّـم ياسـلام

راح جيل ومقبـلٍ ياخـوك جيـل
يالله اني طالبـك حسـن الختـام

العزيـز يـذل ويعـز الذلـيـل
والسباع تباع فـي سـوق النعـام

ودفتر الشيكات في مخبا البخيـل
ماظهر في حرب والا في سـلام

واللبن والزبد في بطـن الصميـل
ما اطعم الجايع ولا فطـر صيـام

وش يجيب (الدوم) لغروس النخيل
فرقهن فرق الكـرام مـن اللئـام

ومن جلب لاهل الحسا تمرٍ حويل
علمـوه ان الهزيـلـه ماتـسـام

حسبنا المولى وهو نعـم الوكيـل
عالـم النيـات خـلاق الأنــام

مانبـي منهـم كثيـر ولا قليـل
ولا لنا مقصـد ولا غايـة مـرام

والحظيظ اللي يحسّـب للرحيـل
باكر ليا لف فـي متريـن خـام

مايفيـده لا خـوي ولا زمـيـل
ولايفيـده لاخــوال ولاعـمـام

فانيـه والادمـي عابـر سبـيـل
اترك اللي فات وانظـر للأمـام

والمهايط والحكـي مالـه ذبيـل
مارفـع طامـن ولاطمـن سنـام

والشعير يكـال بشـوال و زبيـل
والذهب محسوب بالملـي جـرام

والكلام احيان احد مـن الصقيـل
يتلـف الارواح ويقـص العظـام

والصبر طيب لـو انـه حنظليـل
والعفو والصفح من طبع الكـرام

استغلوا فرصة الشهـر الفضيـل
افتحوا صفحة محبـه وانسجـام



قالها في اجتماع بني تميم في حوطة بني تميم وفي ضيافة

الشيخ / حسن بن إبراهيم آل حوتان التميمي

يوم الخميس ليلة الجمعة الموافق 6 من شوال 1425هـ

ذروة تميم

بديت بسم السميع الواحد اللـي بالسرايـر عليـم
الحي محيي هشيم الصفصف القاع ورميم العظام

اللي دحر بالبحر فرعون وجنوده واعـز الكليـم
وانطق لسان ابن مريم بالمهَد عيسى عليه السـلام

يارب لطفك وحلمك ياحليـم ورحمتـك يارحيـم
والعفو والستر والغفران ياغافـر ذنـوب الانـام

ومن بعد ذا مرحباً واهلاً هلا ماهل همـال ديـم
وعداد مالاح برق وسومها بخشوم سـود الغمـام

عند البنيخي هل الحوطه هل المجد القديم العظيـم
واهل القويع وهل الحلوه زحازيح الرجال الكرام

رمز الكرم والصخا والطيب والطولات ذروة تميم
أهل الوفا والظفر والباس لاثار الدخن والعسـام

أهل الندا والنقا فرز الوغا ومنزحيـن الخصيـم
دون الغروس الظليله والحما محمي بحد الحسـام

عوق العدا والمنايا يـاردون حياضهـا ورد هيـم
وجيوش الاتراك تشهد يوم ولّت والمدافع حطـام

وانتم هل الدين وانصار الشريعة والهدى من قديم
وانتم حماة العقيدة قالهـا الامـام نسـل الامـام

والحمد للواحد اللي لاوهب يجزل وان اعطا كريم
تميم من روسيا لاسبانيا في عز واشـرف مقـام

وكل القبايل علـى ماقيـل فيهـا حقهـا يافهيـم
كلمة وفا والوفا لاهل الوفا فرضٍ وتركه حـرام

وعداد ماعاد عيد وعدّ مـا هـز الجرايـد نسيـم
على النبيّ الأبيّ الهاشميّ ازكى صـلاة وسـلام


ماذا دهاك

يامن دهتني عيونك واحتوتني يديك
الله يسامحْك كيف تقول ماذا دهاك

ماتدري اني متيّم بك وكلي لديك
مملوك مأسور مسبي مستهام بهواك

أموت كلي معك .. واموت فيك وعليك
واغليك لكن عسى الله مايبيّن غلاك

واحنّ اليك .. وعليك احنّ من والديك
ومن لهفتي عين قدّامك وعينٍ وراك

أشتاق لك واشتكي لك منك واشكيك اليك
كلك ملكني .. وكلك في عيوني ملاك

جادلك جيدك جبينك خنجرك حاجبيك
اسمك سماتك سمّوك سِسْتِمِك مستواك

جوريْك جمرك لجينك عسجدك وجنتيك
ذرابتِك رقّتِك روعة حضورك بهاك

وجهك وهج مبسمِك بسمَتْك غمّازتيك
براءتك .. خالك اللي لاذ بايسر شفاك

سِجِنّجِلِك جلنارك نرجسِك كركديك
كاديك مسكك نسيمك شمس صبحك مساك

سلهام عينك .. نَعَس طرفك .. حَور مقلتيك
بوهَتْك ملحك حلاتك خف دمك حياك

ما اعرف اداري ولا اهدّي ولا امسك بريك
لاجيت اجي كلي .. وكلي عساني فداك

أقدّم الروح كاش .. وباقي العمر شيك
باسمك مصدّق ولا يصرف لحيٍ سواك

يامن دهتني عيونك واحتوتني يديك
الله يسامِحْك كانك قلت ماذا دهاك





][ قصائد مرئيه و صوتيه للشاعر خليل الشبرمي التميمي ][


1 - مرئيه






















2 - صوتيه

قصيدة / قطري الهويه

للتحميل هنآ


قصيدة / جوال ابو نغمه

للتحميل هنآ


قصيدة / آخر انتاجي

للتحميل هنآ


قصيدة / يا سعد

للتحميل هنآ


قصيدة / آه يا شيب عين المعنى

للتحميل هنآ


قصيدة / بان الخفاء لي والحقايق تجلت

للتحميل هنآ


قصيدة / قال التميمي

للتحميل هنآ


قصيدة / يا عزيزه

للتحميل هنآ


قصيدة / ماذا دهاك

للتحميل هنآ


قصيدة / واوجودي كل ما شفت زوله

للتحميل هنآ


قصيدة / يا عيوني

للتحميل هنآ


قصيدة / آه وفوح كبدي

للتحميل هنآ


قصيدة / أرجي

للتحميل هنآ


قصيدة / وش اللي صار ما ندري ولا ندري وش اللي صار

للتحميل هنآ


قصيدة / في مراكش وانقره والقاهره واللاذقيه

للتحميل هنآ


قصيدة / ليت فرخ الحمام عصير ما عاد يسجع

للتحميل هنآ






][ لحظة تتويجه بلقب شاعر المليون ][








][ صور للشاعر خليل الشبرمي التميمي ][




















إلى هنآ أصل إلى ختآم موضوعي البسيط عن هذآ الشاعر المميز

أتمنى أن يكون الموضوع قد حاز على رضاكم و استحسانكم

هذآ الموضوع أخذ مني اكثر من ساعتين كاملتين .. فلا تبخلو علي بردودكم

http://www.youtube.com/watch?v=ZIa_YqHNqQY
الجزء الأول

http://www.youtube.com/watch?v=6S0TggH773I
الجزء الثاني

هجاء ولد تميم للمدعو إبن ذيب

مسح فيه البلاط و ماخلا شئ ما قاله فيه

مجهود رائع .. ماقصرت الله يعطيك العافية



شاعر كبير و غني عن التعريف



موفق خير ~

وعليكم السلام ورحمه الله وبركاته


اناا اشهد انه شاعر متمكن

ونعم والله بولد عمي

بيض الله وجهك وتقبل مروري


أحب الليفر

اول شي نحمد الله وجت على مانتمنى...
وفاز خليل بشاعر المليون
وقهرنا متابعه بجنون
وهذا فيس واحد ملسون >

:::::::::::::::::::::::

مشكور ع المجهود الجبار .........

بس اكره شي فالشعر انه صار تخصص عصبيه قبليه

الله يكون بالعون

تحياتي

اخوي الدين واضح في عيوني
مجهود تشكر عليه
صراحه ماعمري سمعت للشاعر خليل
بس حبيت اشكرك على المجهود الطيب
تقبل مروري

إقتباس الرسالة الأصلية كتبت بواسطة ع ـشقهــا هـلالـي وعليكم السلام ورحمـة الله وبركآتـه صبآحك طآعه اخوي غرم والله ياختك ماني بـ احب هـ الشخص ب الذات لانه اخذ البيرق من ناصر وكنت انا متعصبه لـ السبيعي والسفياني فـ عجزت اهضمه واهضم قصيده بس بمآ انك كاتب الموضوع قلت ارد ولو بكلمة شكر ع مجهودك بـ الموضوع الله يعطيك العافيه مبين مشتغل عليه .. يعطيك العافيه اخوي غرم

أرحبي برفسورتنا

وبما ان بيننآ عيش و ملح منيب راد عليتس بخصوص كرهتس لخليل

والله يعافيك برفسورتنا

أشكر تواجدك

إقتباس الرسالة الأصلية كتبت بواسطة متابعة بجنون .. وعليكم السلام ورحمه الله وبركاته والله ماآعرفته إلا من شاعر المليون وقت ماكان يشارك فيه ولا أعجبني مثل هالبنت اللي فوق ^^ بس آستحيت آطلع وماآقول شيء لاني شفت أسمك تحت ومايمديني آطلع بدون ماارد.. خصوصاً وأنت كاتب لاتبخلون علي بالرد وانه آخذ من وقتك ساعتين .. / فـــ بجد الله يعافيك " شغل متعوب عليه وإن شاء الله يردون عليك آعضاء آحسن مننا .. وآعذرنا على الصراحة ياأخوي .. ...

ياليتس طلعتي وما رديتي

وش جاكم على خليل

وبالنسبه للصراحه .. أهم شي في الحيآة
ومثل ما يقولون : الصراحه راحه

والله يعافيك يالغاليه

أشكر تواجدك

إقتباس الرسالة الأصلية كتبت بواسطة I B R A H E M http://www.youtube.com/watch?v=ZIa_YqHNqQY الجزء الأول http://www.youtube.com/watch?v=6S0TggH773I الجزء الثاني هجاء ولد تميم للمدعو إبن ذيب مسح فيه البلاط و ماخلا شئ ما قاله فيه

قد نزلت موضوع عن السالفه و تم نقله

بإنتظار حذف ردك

أشكر تواجدك

إقتباس الرسالة الأصلية كتبت بواسطة تركي السلماني مجهود رائع .. ماقصرت الله يعطيك العافية شاعر كبير و غني عن التعريف موفق خير ~

مرورك أروع عزيزي تركي

والله يعافيك يالغالي

أشكر تواجدك

إقتباس الرسالة الأصلية كتبت بواسطة أحب الليفر وعليكم السلام ورحمه الله وبركاته اناا اشهد انه شاعر متمكن ونعم والله بولد عمي بيض الله وجهك وتقبل مروري أحب الليفر

وجهك أبيض يالبنآخي

أشكر تواجدك

إقتباس الرسالة الأصلية كتبت بواسطة ام متعب التميمي اول شي نحمد الله وجت على مانتمنى... وفاز خليل بشاعر المليون وقهرنا متابعه بجنون وهذا فيس واحد ملسون > ::::::::::::::::::::::: مشكور ع المجهود الجبار ......... بس اكره شي فالشعر انه صار تخصص عصبيه قبليه الله يكون بالعون تحياتي

من ولي العرش جزل الوهايب << مسك خط

وبالنسبه لمتابعه .. مدري يوم قريت ردها أصابني نوع من القشعريره
محمله بنسبة لا تقل عن 5% من الكره اللاارادي << فهمتو شي

والعفو يا أم متعب

أشكر تواجدك

إقتباس الرسالة الأصلية كتبت بواسطة دحوم القصيم اخوي الدين واضح في عيوني مجهود تشكر عليه صراحه ماعمري سمعت للشاعر خليل بس حبيت اشكرك على المجهود الطيب تقبل مروري

يا جعلك تسلم يالغالي

أشكر تواجدك

ودي اتكلم بس خلني ساكت
ما اقول الا الله لايوفقه بس اسوأ ايام حياتي يوم درسني الظالم

إقتباس الرسالة الأصلية كتبت بواسطة بلد الوليد ودي اتكلم بس خلني ساكت ما اقول الا الله لايوفقه بس اسوأ ايام حياتي يوم درسني الظالم

أفآ أفآ اثر أبو أديب تسذآ

كان علمتني انه يدرسك عشان أزبط الوضع

يلآ يلآ حط الماضي ع جنب وخلنا بالحاضر << يبي يرقع لأبو أديب

أشكر تواجدك عزيزي

صراحه مايعجبني قط...

بس شكرك واجب اخي...لان من لايشكر الناس لايشكره الله

إقتباس الرسالة الأصلية كتبت بواسطة كرستاله صراحه مايعجبني قط... بس شكرك واجب اخي...لان من لايشكر الناس لايشكره الله

ومن قالتس حبيه ؟

والعفو يالغاليه

أشكر تواجدك

الصراااااااااااااااحه شااااااااااعر رائع بكل مااااااااااااتحمله الكلمه ...

على الاقل من وجهة نظري ,,,

الف شووووووووكرنـــــــــ على المجهود الاكثر من حلوووووو يااااااااحلو.....

إقتباس الرسالة الأصلية كتبت بواسطة I B R A H E M http://www.youtube.com/watch?v=ZIa_YqHNqQY الجزء الأول http://www.youtube.com/watch?v=6S0TggH773I الجزء الثاني هجاء ولد تميم للمدعو إبن ذيب مسح فيه البلاط و ماخلا شئ ما قاله فيه

يا أخي أحترم شعره لكن بعد الي سمعته ... !!

الهجاء محرم ~ وكله سب وعصبية منتنة للاسف


.

.


كنت متحمس للفرآعنة لكن يستاهل الشبرمي

اشكر لك جهدك ~

موفق