تموت الأسود في الغابات جوعاً ... ولحم الضأن تأكله الكلاب !!
حيـــــــــــاكم
مزبن
من عرفته والمحيّا.. بالمحيّا
وما يروح الا ذراعي في ذراعه
ان رضيت أرضيه.. وان عيّيت عيّا
وان طلبني.. قلت له سمعٍ وطاعه
ماعشقت من النجوم.. الا الثريا
وما ملكت من الكنوز.. الا القناعة
حامد زيد
مراحب 
انا اليوم جايب لكم مشهدين
ويشهد الله انها صحيحة.. واعرف اصحابها شخصياً معرفة تامة 
وحبيت انقل لكم الصورة بحذافيرها ... واترك التعليق لكم 
انا عن نفسي راح اكتفي ببيت الامام الشافعي كعنوان للموضوع.. ولن اعلق !
المشهد الاول
لبناني جاء يشتغل بالسعودية قبل ثلاث سنوات
توظف براتب 6500 ريـال
وصار يجمع فلوس حتى كمّل ست شهور.. وشرى مرسيدس شبح قديمة بثلاثين الف ريـال
هالشخص عنده الام خفيفة في اسفل الظهر.. او كما تسمى ( الديسك )
بعد مرور 8 أشهر من حضوره.. راح لأحد المستشفيات الحكومية يقدم معروض لمكتب المدير علشان يتعالج
المكتب فيه موظفة سعودية.. سمراء مقبولة الشكل ( غير جميلة ) وكبيرة بالعمر ( 35 ) سنة.. راتبها 14 الف
اعطى اوراقه للموظفة
صار يراجع المستشفى وينصى مكتب السكرتيرة ويتكّي عندها
طيّحها بالكلام الحلو والابتسامة الساحرة
وضاعت علومها مع شعره الطويل اللي رابطه فرس من ورى وريحة العطر
قعد ست شهور يكلمها جوال
اتفق معها على الزواج.. راح يخطبها ومعاه مهر خمسين الف ريـال
طبعاً هي بهالعمر وهالحالة ما كذبت خبر... يعني في سكة التايهين ولازم تزبن بدون تفكير
الزواج تم
اللبناني خلاها تطلع من بيت اهلها وتطلب من ادارة المستشفى يعطونها فيلا في السكن المؤمّن ( الكامب السكني )
فيلا صغيرة فاخرة مجهزة ومؤثثة بالكامل وعلى كيف كيفك
يكفيك ان حديقة الفيلا رغم صغرها تخضع للصيانة من ( حدائق السلطان ) المتخصصة بالمنتزهات والقصور
المهم
( ابو تبّوله ) عاش ملك وصار يضرب بالالوف
بعد ثلاث شهور من الزواج بدت الملامح تظهر
التلفزيونات بالبيت سوني بلازما ال سي دي اكبر مقاس
والسيارة BMW X5
والملابس من أرقى المحلات على شارع العليا العام
والعطور من قزاز... والساعة كارتير
والجوالات بلاك بيري وآي فون وحدث ولا حرج..
وخلال هالثلاث سنوات راح لبنان اربع مرات... في كل مرة معه شنطة فيها 80 الف ريـال عدّاً ونقداً
وقبل شهرين راح ديرته واشترى جيب انفينتي وحطه عند بيت اهله ورجع للسعودية
وقبل شهر طلّع بإسمها فسح لمطعم ( خمس فتحات ) ناوي يفتحه في رمضان ان الله أحيانا
والحين صار له عشرين يوم يلف ويدور على البنوك.. يبي قرض بمليون ريـال بإسمها
وحسب كلامه يبي يشتري بهالمليون فيلا جديدة ويعرضها للإيجار << شوف الاستثمار
قبل اخلص
ماعمره طلع من البيت وفي مخباته اقل من ثلاث الاف ريـال... من زود الفسقة
.
.
المشهد الثاني
شاب سعودي ملتزم ويخاف الله
موظف اهلي وراتبه مايتجاوز 4500 ريـال
تزوج وحده بنت ناس أجواد.. كانت طالبة متخرجة وعاطلة بالبيت
توظفت بالصدفة جاها التعيين بعد الزواج.. وراتبها كان 7000 ريـال
بعد ثلاث سنوات جاها تحسين وضع في العمل وصار راتبها فوق 10 الاف.. وهو مثل ماهو على راتبه ما تغيّر
الرجل مكافح ويمر عليه ايام مافي مخباته ريـال واحد.. ولا يتكلم ولا احد يقدر يلاحظ عليه
جاب عيال من هالزوجة وعايشين بشقة ايجار
قبل فترة ساءت الاوضاع بينهم وكادت توصل للطلاق.. بسبب انه طلب منها تسدد فاتورة الكهرباء 200 ريـال
وكان ردها عليه جارح ( بالله ماتستحي على وجهك.. رجال مامعك 200 وقاعد تطلب من حرمه )
وبعد ان هدأت النفوس وعادت المياه لمجاريها
الرجال قرر يبيع سيارته اللي اتعبته كل يوم في ورشه للتصليح
راح لعبداللطيف جميل وسأل عن شروط البيع بالتقسيط
وطبعاً طردوه وقالوا له انت موظف اهلي.. لا تجي الا ومعك موظف حكومي يكفلك
الرجال قال لهم : طيب زوجتي موظفه حكومية.. ينفع تكفلني ؟
قالوا له : مايحتاج تكفلك.. خل السيارة باسمها وكأنها هي اللي اشترت السيارة.. وانت تعال وسدد القسط شهرياً
وطبعاً هذا كان الحل الوحيد علشان يشتري سيارة بدون ما يحرج نفسه مع احد
زوجته شريكة حياته وام عياله هي اللي بتساعده و( سمننا في دقيقنا ) مثل مايقولون
راح لها وطلب منها تجيب تعريف من عملها علشان يقدمه لشركة التقسيط... ورفضت
وكان عذرها : السيارة لك.. انا وش دخلني تحطها باسمي.. بكرى تورطني باقساط وتقول هذي صاحبة السيارة
صارت مشكلة طويلة عريضة وانتهت بعد تدخل احد اهل الخير اللي راح بنفسه وكفل الرجال واشترى السيارة
بعد سنة ونص من شراء السيارة.. 18 شهر فيها 18 قسط تم تسديده
الرجال جته ظروف صعبه وتأخر على دفع القسط
اتصلوا عليه شركة التقسيط وكان وقتها بالسيارة وزوجته راكبه جنبه
وقالوا له تعال سدد والا ترانا بنتصل بكفيلك
الرجال طبعاً مستحيل يقبل بهالشي والفشيلة مع الشهم اللي كفله
وقف السيارة عند اول مكينة صراف وطلب من زوجته تسحب له القسط 1800 ريـال
طبعاً ماله غير هالحل علشان يتخلص من الاحراج وهالضيقة المالية
وكانت المفاجأة ان زوجته استنذلت عليه ورفضت
رفضت تساعده وتفك زنقته بهالقسط.. رغم انه اول مره يطلب منها هالشيء
كان ردها بمنتهى البرود : انت رجال ودبّر نفسك.. انا وش دخلني بقسط سيارتك !!
الرجل طار عقله وكاد يجن... كان يصرخ : انتي زوجتي.. وشلون وش دخلك ؟؟
وهي ترد : زوجتك صح.. بس فلوسي لي والله ما اعطيك ريـال.. وش دخلني !!
الاثنين الحين منفصلين صار لهم 8 شهور... ولم تفلح محاولات الجميع في الصلح بينهم
هو مو مستعد يعيش مع وحدة انانية ونذلة ( على حد تعبيره )
وهي مو مستعدة تعيش مع واحد يستغل راتبها ( على حد تعبيرها )
.
.
مدفن
أَحْسدُ الضوءَ الطروبا
مُوشكاً مما يلاقي أن يذوبا
في رباطٍ أوسع الشَّعرَ التثاما
السماء البكرُ من ألوانه آناً.. وآنا
لا يُنِيلُ الطَّرْفَ إلاّ أرجوانا
ليتَ قلبي لمحةٌ من ذلك الضوءِ السجينِ
أهو حُبٌّ كلُّ هذا ؟!
خبّريني.....
السياب
الوضع الشجري
