]
السلام عليكم ......

صباح الخير لكل الاعضضاء الاعزاء .....
والي يقرا الموضوع بالليل نقوله مساء الخير ولا يزعل ....

سامعين انتو الظاهر متابع بصمت هو انا ... كل يوم ادخل المجلس العام اقرا الاخبار واتصفح واسكت ...
بالرغم اني لاأعرف حتى اسماء الاعضاء الا مجرد قراءة ...
لكن لي فترة ابي اكتب موضوع وكل مرة اقول بكرة بكرة بكرة
وانا اتصفح اليوم المواضيع والردوود كان في رد هو الموضوع الي كنت ابي اتكلم عنه

ندخل بالموضوع ....

هذا رد الاخت وسن الهلاالية هو الي خلاني اشغل يوزري النايم واكتب الي بداخلي وحرك مشاعري
تقول الاخت وسن بردها على موضوع ابو طلال الي كان عنوانه حرامي ::


"" من احضرهم للبلاد نحن المواطنين لاننا صعب نعيش من دونهم وهذي صراحة
صعب صعب لانه حتى الان للأسف لم نجد شباب سعوديين مستعدين يحلون مكان هؤلاء الذين
يشكلون خطر حقيقي على بلادنا وثقافتنا وشبابنا وامننا "

وامس بالام بي سي اف ام كان تقريبا موضوع حملة السعوديين للسعوديين
وكان اكثر من واحد يسمي نفسه رجل اعمال يتصل وكان نص المكالمة كالتالي

ام بي سي اف ام :السلام عليكم
المتصل :وعليكم السلام ورحمة الله وبركاته
مقدم البرنامج : مارأيك بحملة السعوديين للسعوديين
المتصل : والله هي حملة ناجحة بس للأسف الشباب السعودي ماوصل لمرحلة ان احنا نقدر نستبدله مكان الاجنبي لانه مايرضى يشتغل الا بمكتب وتحت هواء مكيف و و و و و و و و و و ....................
وبداء يسرد هذا السعودي الكلام الفاشل الي يسمعه بالقهواي والاستراحات ولا شافه بالواقع

ماعليش كل هاذي اشياء هي الي استفزتني اكتب هذا الموضوع ...
انتي ياوسن وانت ايها المتصل وانت يارب العمل ...
هل فعلا جبتوا واحد سعودي وقلتوا له اشتغل سباك وقال لا ...
او قالك ابي مكتب وراتب 4000 وبراد شاهي
انتم يالي تقولون السعودي والسعودي والسعودي مايشتغل ولا يفعل جربتوووه حتى تقولون هذا الكلام ...
تيب مانيب نروح بعيد وكل واحد يقول اللحين هذا ماخذته العاطفة ويدافع عن عيال بلده انا اجيبلك دليل من تجربتي الخاصة ..
كنت موظف بقطاع خاص عمل مواجهة زبائن جاني واحد يوم من الايام مدير بإحدى الشركات الكبيرة وعنده من الخير الكثير ، قالي انت شخص احسك (شغيل ) وش رايك تشتغل عندي واعطيك راتب ومميزات ومادري ايش ومن هالكلام المنمق
اشتغلت معه فترة بارت تايم خارج عملي من دون ماأقدم استقالة من عملي حسيت انه صادق وقالي هو ابغاك تقدم استقالة من عملة وتشتغل عندي.
وكان هو وقتها في صدد افتتاح مشروع وكنت اساعده وهو باقي مافتح مشروعه
قدمت استقاله من عملي واشتغلت معه سنه ، بعدها سهل الله عليه وفتح مشروعه وجاب العمالة وبدا الموال الي ماله داعي تأخير بالراتب . واستفزاز بالكلام
بعد كم يوم جيت لقيت ورقة على المكتب ماعليش انا راتبك أقدر اجيب فيه اربع عمال يشتغلون اكثر منك ولا ياخذون اجازة وهذا راتبك حق الشهرين الماضية والله يستر عليك !!!!!!!!!!!!!!!!!
حنا يالسعودين مانشتغل زين ...؟؟
او انتوا يارجال الاعمال تبخلون تدفعون 500 زيادة للسعودي
ولا يجي احد يقولي انت راتبك 3000 والفلبيني 900 ، بقولك صح بس الفلبيني لازم تسكنه يارب العمل وتجدد اقامته وتسويله تأمين صحي و و و وبالنهاية كلها سوا

تيب اعرف ان في ناس بيقولون انت واحد تشتغل زين والباقي مايشتغلون وكسالى ...

شركة من الشركات تقدمت لها بعد ماطردني رب العمل الي عساني اشوف فيه يوم تقدمت لها بالشرقية .. وظيفة بمسمى عامل ... لاحظوا المسمى حتى مايجي احد ويقول السعودي مايشتغل الا بمكتب تقدمت وفجأة قالوا تعال وادخلوا فترة التجربة ثلاث شهور بعدها يجيكم تعيين بالشركة ونحطكم بمكان يليق فيكم
وللأسف ان الشركة هاذي تعتبر من كبرى الشركات المتعاقدة مع ..... بدون ذكر اسماء شركات او وزارات
في اليوم الاول الي داومت فيه كنت اتوقع اني بلقى نفسي مع ثلاثة او اربعة بحكم انطباعي الداخلي انه السعودي مايشتغل الا بمكتب مثل ماتقولون
بس تفاجأت انه العدد فوق السبعين شخص وكلهم اصحاب همة
وجلسنا 7 شهور نشتغل بالشمس وعند البحر من سبعة الصباح حتى خمسة المغرب
وثلاث شهور مافي راتب يقولك فترة تجربة ومادري ايش ..
وصبرنا وتحملنا وبالنهاية كذب بكذب مافي شي حتى ابسط حقنا راتبنا ماخذناه
ويجيك الهندي فوقك يتأمر سعودي مافي شغل كويس ايش تبغا نحفر لك الارض بيدينا يعني ..
وقسم بالله انهم يوم انشافوا انضباطنا التام رغم قسوة العمل ان الهندي كان ينزل تريلة رمل بالشمس عند البحر ويقول عبوها بأكياس ، وانه كان يوقف تريلة الخشب ويقول نزلوها بيدكم وهو يقدر يجيب الرافعة وينزلها بخمس دقايق بس خسة ونذالة فيهم

ويوم يجي مدير الشركة وصاحبها يقول سعودين ماتشتغلون تبون مكتب وشاهي ,,,,
وبعدين مع هاذي النظرة
لاحد يقول سعودي وسعودي انتم السبب يالمجتمع تحرمونا حقوقنا وابسط حقوقنا وتجون تلومونا .......
تعالوا ياأصحاب العمل وتجار الاعمال وقفوا سندا لنا وعونا لنا لا ضدنا ,,
ابعدوا النظرة السلبية التافهه الي تلبسونها لأجل الا تدفع 500 ريال زيادة للسعودي
وش تبون من السعودي
حارس امن تعطونه 1700 واربع شهور مايستلم راتب وتقولون سعودي مايشتغل .
موظف استقبال دوام 12 ساعة وتعطونه 1500 وتقولون مايشتغل ..
وش تسوي اال 1500 وال 2000 بالزمن هذا ..
خافوا ربكم يالسعوديين الي تدهووورون السعودييين .....
ومستعد لمواجهة أي رب عمل يدعي انه شغل سعودي واعطاه حقوقه ولا أدى عمله على اكمل وجه
للأسف يأمتنا عقولكم مغسولة ان الشعب السعودي ماهب كفو عمل ...
لكن انتم الي مانتم كفو من يصون اموالكم ويحفظها ، تجيبون الاجنبي يسرقكم وانتوا تضحون له وتبتسمون وتتوقعون انه احسن مننا لكن والله هو أكل الابيض والاخضر ..

الهندي والبنقالي والمصري راتبه 900 يجي السعودية ماعنده ولا شي اول شهر وتلقاه ماسك بلاك بيري من وين يارب العمل ...
من ظهرك من فلوسك سرقها واكلها ورتبها على مزاجه وانت مبسوط ...
لاتقولي من راتبه سعر البلاك بيري اقل شي 1200
تعال ياراعي الشركة الاولى اعلمك شلون تنسرق اموالك
وتعال ياراعي الشركة الثاني واعلمك ان الهندي حقك كان يسرققك وكنت تكذبنا لما نقولك
لان احنا سعوديين وهو الاجنبي عايش على ظهرك وانت ماتدري وحنا راتبنا ماعطيتنا اياه ....
مانبي رواتب ولا نبي وظايف نبي شرفنا يرجع وسمعتنا ترتقي لانكم انتم نزلتوها
احنا شعب يشتغل وقد العمل لكن مافي احد قدرنا

أخيرا (( لاتظلمونا ولا تعطونا أكثر من حقنا ))


وان اردت ان تعرف عن معاناتي مع الشركات اكثر فستفسر وسأجيب وسأخبرك بمهازل الشركات ومايكون تحتها ...
آسف طولت عليكم وماعليش انا ماني صاحب قلم حتى اكتب بالفصحى وكتبت بالعامية

ولكم شكري وامتناني
يهمني ردكم واستفساركم وتقربوا موووووووضوع جديد وناااااااار وقضية ساخنة سأطرحها قريبا

لكم جزيل الشكر ...
اكره اليوز حقي بس ماعليش كان هذا ايام المراهقة سموني ماتريدون لكن لاحد يسميني بيوزري



مع السلامة احبتي .......
[/SIZE][/SIZE][/SIZE]

السلام عليكم

الخط مرررررره صغير و يدوب قريت البدايه بس ...........بس فهمت اللي تبغى تقوله

و الله يا اخ مشكلتنا احنا السعودين ما نثق بابناء ابدا او بالاصح بمواطنينا حتى و الله لما تسوق بضاعه و تقول صناعه محليه تنظر لك بعض العيون بالازدراء كل شي يبونه مستورد ..........حتى بعضهم وصل لدرجه الزوجات

و اللي لامسته من بعض الردود انهم مو مصدقين انو السعودين يبغون يشتغلون اي شغله ............اي شغله مو معناته اني اكون خدام عند اهلك اي شغله معناته اي شي يواكب العصر
مكانيكي كهربائي نجار دهان خياط مصمم و التصميم بكل انواعه ......و كل مهنه من ذولا تفتح لك عالم لحاله من الوظائف اللي تحتها و اللي فوقها
ولو باعد الوظايف راح الاقيها اكثر من الناس
بس المشكله بالناس ذولا ..........شوفوا الناس المتعلمه اللي ماسكه الوزاره لما قلنا لهم نبغا سعوده احنا يالجيل ذا اللي دخلتوه مدارس و صح فيه بعضهم زوغ منها بس يظل اسمو متعلم .............قالوا لنا انتي شغاله و هوا كناس

اي منطق ذا ...........اللي اتكلموا عن البطاله ناس متعلمين شباب و هما جابوا وظايف الاجنبي ما يشتغلها ببلده الا للحاجه الماسه اصلاه هالوظايف انا ما اشوف لها داعي بالحياه لو كل واحد نظف وراءه كان هالوظايف منقرضه زماااااااااااااااان

اتمنى لك التوفيق
و ربك كريم خل املك بالله .

شوف هالمقطع اتمنى يفيدك زي ما فادني

http://www.youtube.com/watch?v=_OatQ0eZ8vc


على فكره حتى انا كنت اكره يوزي و لكنه من بقايا المراهقه التي اعتز بها
كذا مره حاولت اغيره بس مو راضين بس شوف الاعضاء الجدد كل ابو شي لهم هما التفعيل و التغير شكلهم مو سعودين

شكرا لك

وشووكرا لخيتي وسن انها خلتك تشغل معرفك النايم لووووول

وشكرا لك ع الموضوع اخوي ..


اختكم .. ميمي

شاكر لك ... شاكر لك .. شاكر لك
فتحت لنا باب نهزأ فيه أصحاب الأمول الضائعة ..
مسالة ن السعودي ما يشتغل ومدري ابش هذي كذبة
وانتهى زمنها وأكبر دليل على ذلك
شركة أرامكو ::
شوف العمالة اللي فيها كلهم سعوديين وعملهم 12 ساعة
وبالشمس ويادون عملهم على أكمل وجه بس ليه ؟؟؟
لإنهم يستلمون مستحقاتهم على أكمل وجه ..!
عطني راتب أعطيك عمل هذه هي سنة الحياة
وهذا مو كلامي هذا كلام الرسول صلى الله عليه وسلم
(( أعطي الأجير حقه قبل أن يجف عرقه ))
والشئ الثاني كل يوم طالع لي وزير البطالة ويقولك :
أعتقد من وجهة نظري الخاصة بان الشاب السعودي يكفيه
مرتب 1500 للعيش في الحياة !!
إذا فيك خير خلاص شغل ولدك بألف وخمس وإذا ما عفن عندك
وهو يحفر ويدفن في الدنيا .. والديون تصكه من كل جهة ..!
ويجونك بعدين ويقولك ليه ماتتزوج ويطلع لك مسؤول عن المجتمع
ويقولك والله العنوسة زادت ونسب الطلاق واجد ..!
طيب ماسأل نفسه ليه واجد ؟؟
ما سأل نفسه ليه طريق الشمال عرعر القريات ما يوقف ؟؟
لإن الشباب مامعه فلوس يتزوج .. والبنات غاليات ..
والحياة تبي فلوس الفلوس عند العروس والعروس ببيت أهلها !!
حلو .. 1500 حلوة بالحيل ..
100 ريال شحن بطاقات والا تعرف لك على مطنوخة تشحن لك !!
300 ريال بنزين سيارة وكوي ملابس ..
400 ريال حقت الأكل عشاء فطور غداء ..
400 ريال حقت السكن في غرفة والا عزبة ..!
300 ريال حقت مشوار الشام ..

هذا حال أغلب الشباب !
الحين الألف وخمس صارت كافية ووافية يا وزير الغفلة !!
حنا ما تكلمنا من فراااغ .. حنا لو كنا بإفريقيا كان هاجرنا
لإنه ذيك الديار فقيرة بذاتها عاد وشلون شعبها ...
لكن حنا اغنى دولة بالعالم ومع ذلك البطالة في زدياد ...!
والعنوسة في زدياد والفقر كل يوم يتسع فكه ليلتهمنا !!
آآآآآآآآآآآه بس وين قلبت المواااجع الكلام يطوووول
والله لا يوفق كل مختلس وسارق خيرات هذا البلد ..
الله لا يوفق كل من كان بيدهـ حل وتغافل عنه لمصالحه !!
الله يرزقنا وويوفقنا ويرزق الجميع

آسف على الإطالة
عاشق الهلال 79

و الله العظيم شيء يقهر الحال اللي احنا فيه

غازي القصيبي يجي و يقول لازم الشاب السعودي يشتغل كهربائي و سباك و ميكانيكي

تدرون ليه يا شباب

عشان يسوي الكهرب حق بيت المهندس الاجنبي و يسوي امور سباكة فيلا الطبيب المصري

و يصلح سيارة رجل الاعمال اللبناني

انا موب عنصري و عمري ما كنت عنصري لكن القهر

احد رجال الاعمال من الامراء و من اكبر رجال الاعمال على مستوى العالم

سوا استثمار مشروع مزارع ضخمه جدا في صعيد مصر

اعتمد على بعض البنغاليه في بعض الامور

و الله لم يهدأ للمصريين بال حتى طرد البنغال و احل مكانهم عمال مصريين

و الله على ما اقول شهيد و الكلام هذا قبل سنتين

جيراننا عندهم شركة مقاولات و ماسكة اكثر مشاريع طرق الرياض

و الله العظيم مهندس مصري يستلم 60 الف ريال + سيارة كادلاك كل سنة مع السواق

+ سيارة للعائلة اسكالد + شغالتين و فيللا و مدارس خاصه للابناء من مدارس الدرجة الاولى + تذكرة سفر كل شهر الى مصر

ما شاء الله تبارك الله .. ما حنا بحاسدين له .. لكن حرام حرام حرام لكن هذي ميزات وزير


عطونا فرصة

الجامعات مضيقة الخناق

طلاب سعوديين يدرسون في اكبر الجامعات العالمية و من افضل طلابها

و مع ذلك لو نظرت في سيرتهم الذاتية تلقا اغلبهم لم يجدوا قبول في جامعة هارفرد

عفوا جامعة الملك سعود

حالنا كسعوديين يندى له الجبين

العولمة بدأت تطغى علينا يا ناس

و المشكلة فاهمينها غلط

شكرا لك صاحب الموضوع

مشكلتنا كشعب سعودي مع الخيل ياشقرا ونعمم على كل شي

الشباب السعودي فيهم الخير والبركه ويدور لقمة العيش بس

مين اللي يعيطهم فرصه ولا شبابنا يبغون اي شي المهم الوظيفه

وانا والله اخواني قبل يتوظفون بوظايف حكوميه كانو يشتغلون

بوظايف راتبها الف ريال لكن ربي الحمد الله عوضهم بصبرهم خصوصاً

كان فيه هنود اكبر منهم وتعاملهم معاهم زفــــــــــت


مشكور اخوي على الموضوع ^~^

صحيح كتب على بعض السعوديين الفشل ولكن للأسف نعمم

ويمكن انا اول المعممين في بعض الحالات

عموما لي عودة >مايقلد

رجعت


والله وانا اخوك مثلك انت مثال يرفع الراس فيك
وان شاء الله ربي يعوضك بالوظيفة اللي ترتاح فيها طول عمرك

بس وانا اخوك انا عارف انك تتكلم من حرقة في قلبك
ومثل مانت محترق على نفسك وعلى الشباب اللي مثلك وشرواك
انا احترق لاني اشوف واحد من اخوياي له عاطل سنة ونص
وابوه يدبر له وظايف ب3 الى 5 الاف في وظيفة في نفس المستشفى مع ابوه ورفضها بسبب ان الدوام لين س5 العصر
وهو متخرج من كلية الاتصالات بمعدل لابأس به
ولقى وظايف كثيرة بس يحط لنفسه اعذار بايخه لانه يبغى كل شي بكيفه
لين قبل اسبوع لقى له ابوه وظيفة في مستشفى ثاني براتب 4300
ورفضها بس ابوه قاله ياتتوظف ولا البيت يتعذرك وهنا بس وافق بعد مطالبات امه له

مثل هذا تتوقع اننا نقول له مو فاشل ولا هو الطموح الل يبغاه يعني بالعربي شخص لامبالي ولا اهتم ولا فكر
تخيل يارجل راح عشان يسوي مقابلة في بنك سامبا تخيل رايح لهم ومطلع لهم الخنافس ..؟ وهو على مكتب المدير
طلع البكت قدامه وجالس يدخن يعني بالعربي لاتوظفوني

ومثل هذا مايمثلك ولا يمثل الشباب اللي نفتخر فيهم

ومثل مانت جبرت كل من قرأ موضوعك انه يتعاطف معاك
برضوة اقولك فيه امثله تجبر ان الشخص يتكلم عنها ولكن الخطأ في اننا نعمم

عندي واحد اسمه عبدالله متخرج من الثانوي من ثلاث سنين شرعي بنسبة 72 ولا فكر يدخل جامعة ولا عسكرية
وجلس عاطل لين السنة الماضية والسبب الوحيد اللي خلاه يتوظف ان اهله نقلوا جده وهو يبي الرياض فمجبور اذا بيغطي مصاريفه انه يتوظف
وتوظف في شركه براتب 3400 ومعاه هندي براتب 8الاف بس الفرق فيه الشهادة والتخصص
الهندي عنده بكالوريوس محاسبة وهذا الاخ اللطيف يقارن نفسه بالهندي صح ممكن يكون فيه سعوديين معاهم
نفس مستوى شهادة الهندي ويستحقون الوظيفة بس مو انت ياعبدالله ياللي يجي كل يوم ويتكلم عن هالهندي

وبعد فترة في دوامه جته وظيفة اعلى من وظيفتة ويحتاج لها انجليزي بس وهو مايعرف اي شي انجليزي
وكان يقدر انه ياخذ دورة ويتقدم لها واكيد راح يترقى زيادة او على الاقل يحسن وضعه بشكل بسيط

بس ما اخذ تدري ليه لمجرد ان وظيفته الحالية مكتبه بجنب مكتب المديرة ويصير بينهم سواليف

يعني هذا مثال ثاني اقدر اقولك عنه حمار (مكرم القارئ) بكل بساطة يعني مخلي ترقيه عشان بنت طيب
خذ الترقية حتى عشان تعرف تسدد فواتيرك على الاقل وكلم وشبك بيدينك ورجولك


وكل الموضوع تعميم خاطئ لااكثر ولا اقل في موضوع الفشل او الدشرة او غيره
منهم من يعمم معاهم معاهم عليهم عليهم
او مع الخيل ياشقراء

وانا اقولك اعمم بعض الاحيان لاني اشوف ناس يتكلمون بمواضيع ثانية وبعيييدة ويجيبون طاري البطالة بالغصب
ويحطون كل ابو الاسباب ضد الدولة عشان يظهرون بمظهر اننا نحن الذين نقول الحق ولا نخاف منه

ولا هي مجموعة اخطاء من الدولة + المجتمع + الشباب

مانقدر نحصر سبب البطالة او فشل الشباب في سبب واحد

ومثل ماقلت ان شاء الله ربي يرزقك بالوظيفة اللي تريحك طول عمرك

تحياتي