اخوي سلطان ..
الاتحاد السعودي يقيم مسابقات في اكثر من مدينة خلال السنة أخرها كان في الرياض قبل شهر تقريباً وتقدر تشارك بالذهاب لمقر الاتحاد السعودي للتس في الملز وتدفع الرسوم (رمزية)،
برضه في بطولة يقيمها فندق الانتركونتننتال في الرياض وهذي انتهت قبل شهرين وأظن بيقيمون بطوله ثانية في أكتوبر أو نوفمبر الجاي.
وفي فندق اليمامه على طريق المطار القديم في مسابقة للزوجي تقام كل نهاية أسبوع مدة شهر تقريبا و بشكل مستمر (جيده للي يبغى يمارس بشكل دوري ويتعود على جو المسابقات ويتحسن مستواه)، وفي نفس الفندق تقام أكثر من بطوله خلال السنة بعضها من إعداد الفندق وبعضها من جهات ثانيه تستأجر الملاعب لإقامة بطولة عليها. (ملاحظة ملاعبها دمااار)

عموما التنس لعبة حماسية و فيها متعة غير طبيعية وبعد ما تمارسها راح تعشقها، والأماكن إلي ممكن تلعب فيها أولا فندق الانتر ثانيا حي السفارات ثالثا فندق اليمامة وعندك ملاعب جامعة الملك سعود، فيه أماكن ثانيه بس بالنسبة لي هذي الأفضل.

واللي يبغى يلعب تنس من البنات فيه نادي خاص لهم في حي السفارات.

المهم تكون عندك الرغبة وتأخذ أساسيات اللعبة من مدرب جيد وفاهم يساعدك تحصل المهارات المطلوبة لأنه إذا تعلمت حركات خطأ صعب انك تغيرها بعدين.

وأي استفسار تفضل