شوراعنا وش الدنيا بلاكم .. ملاهي الموت قلب ما سلاكم
يضيق بها الفضى بعض الشوراع .. والى دور سبيل ولا ليقاكم
صح بدنك<<< اجابة استباقية
كنت بكتب الموضوع من زمان بس مالقيت وقت وارجو ما يكون مكرر.. و لين جمع الواحد افكار في راسه و جاء يكتب .. تضيع حروف الكيبورد عنه عجزت معه .. صراحة كيبورد شرير من زمن سحيق قبل ساهر لما كانت شوارعنا فله و اذا مليت و كان بيتك قريب من شارع كبير
ما عليك الا تجهز بوب كورن و ميرندا فراولة و تطلع تتفرج على الاكشن عقوق الدايري معانة واقعية
من الحزن و الالم الشديد من الحرمان وقفت سيارتي عند نهر حنيفة
و قربت شوي لانعم بعبقه الاخاذ .. و يكاد الدمع يذرف من عيني و انا اقول
وجلست على ضفافه اتذكر ... اتذكر انه مسكت الدايري الجنوبي عندي مشوار مهم و قلت لا زم اسرع
و رحت ماشي 140 و حاط في بالي كذا بوصول بسرعة
فجأه !! جاء واحد توه مركب زينون و ازعجني .. قاعد يجرب الزنون
لين اعمى عيوني <<< خويكم ما درا وش يبي لين الحين بعد دقايق من التلحيم و التكبيس و البواري الناس على السيد الثاني يأشرون افهم ياخي يبيك توخر رضخت للأمر الواقع و وخرت عنه القلق
توني برجع وراه الا واحد شاطف ما انتبهت له
و في ثواني معد اشوف الا اصطبات تختفي في الافق
شكيت في نفسي ذيك الساعة رحت اناظر الطبلون ..لا صح انا ماشي 140!! مهوب 40 !!
السيد الاوسط جابلي الضغط و السكر انا مستعجل والي قدامي
والي قدامه نفس الشي ياهوه يا ناس احنا في هايوي <<< توه متعلمها و قعدت اناظر السيد اليسار بألم و حرقة
ما كنت اشوف سيارات انما فقط ظلال مدري وش ضله بس سبحان الله كلما دقيت اشارة يسار
طوووط طااات تيييت .. مدري من وين تجي بلعت العافية..و قلت اوصل للعزيمة متأخر بس قطعة وحده
وشوله الهبال بعد وراك طاير.. 70 زينة <<< يلعب على نفسه تبي تطلع من الدايري صفقني !!
يا جماعة قسم اني اعاني من الدسائس و المؤامرات
كل ما وصلت للمخرج الي ابي اطلع معه
لقيت عشرين قلابي صفوا ورا بعض و لحمو الصدام بالصدام
و كونو جدار خارق يفوق جدار اسرائيل قوة و خطورة
وكل ذا .. عشان يمنعوني اطلع مع المخرج !!
اقولها اول بعدين اروح بالقوطي الي معي هاجم عليهم بلفه انتحاريه
مع كم بوري و تكبيس و تدليك و ازعاج
اطلع مع المخرج على بعد سنتيمترات قليلة من الصبه <<< بالطقاق لحقت عليه بغا يفوتني و قووووول .. و بالسنتيمتر ياحبيبي بالسنتيمتر.. طلعت اخيرا
على طريق الملك فهد جنوب قبل سوق مكة
لاندكروزر ابيض دخل علي بلا احم و لا دستور و روعني روعة كبست له و بوري يعني سيارتي صغيرة بس عاد تاطانا.. قصرعمرك
رجع ووخر عن دربي يبي يتجاوز الزحمة من اليمين و يجي مرة ثانية
يروح ساقط علي .. الرجل صار يستخف فيني و تأخذني العزة بالأثم و اروح انسف يدي مع الطاقة
اشر له = وش تبي <<< = وش تبي ايه صدقتك وصلت لكبوري عتيقة واشوفه وراي
وطلعت بعد الكوبري يمين على السويدي شوفو تراني قوي .. قعدت اعد كم واحد في الجيب ثمن يوم عديتهم .. رجعت اشوف وجهي في المرايه فقلت حرام الوسامة ذي تروح علشانهم ابشركم شباب وسامتي لين الحين باقية
بعد خطة هروب محكمة و ممرمطة في شوارعنا الحبيبة
تخلصت منهم
متأدب بعد الهياط مع الجيوب و ماسك السيد اليمين بالقوطي الي معي جنباً الى جنب مع اصددادي راعين القلابيات راعي ليموزين من السيد الايسر بحركة انتحارية تثير الاعجاب ناطل من اليسار لليمين وكاسر ابو الشارع و يشطف الصدام الامامي لسيارتي...
بمهارة يندى لها الجبين .. و يطلع من المخرج متخطي حادث اخر كان قريب
و يجيب العيد في المساكين الي كانو على الخدمة ويوقف عند محل ابو ريالين!!
لا لا معذور كان فيه حرمة مع ولدها الصغير تأشر له .. الله يجزاه خير
بعدها غمرتني الروح العنتريه و اروح لاحقه بوريه شغله و اكبس له كبستين مع بوري و اشر له انزل و عضلاتي اشتدت استعداد للتأديب الي بسويه خلاص معد استحمل استهتار زي تسذا لازم اعاقبه في الشارع قدام الناس علشان ما يعيدها
راعي الليموزين طلع باكستاني طوله مترين و مركب بدال يديه مرزبه
خويكم (الي هو انا) ركب موتره و حط رجله و بغا يسوي حوادث من قوة النحشة
الي شد انتباهي في الموضوع ان الحرمة ركبت .. مدري شافت الافلام الي سواها الباكستاني قبل لا يوقف لها !!!
لين صارت الاشارة صفراء و يوم وصلت عندها حمرت
و كان وراك ثلاث سيارات طايرة وش تسوي
تستغني عن شنطة الموتر .. او تنتف الاشارة مع الناتفين نطلع من المسرحية و نرجع للواقع مير على طاري الليموزين الباكستاني
اذكر قصة قديمة ان فيه حرمة مع بنتها بيروحون دورية و شالو
اغراضهم و ركبو مع ليموزين باكستاني بعد نص ساعة انتبهت الحرمه ان الرجال عاكفن عن الدرب !! و صار بدال العماير تراب .. و تشوف لوحة مكتوب عليها الثمامة !! هنا قالت له الحرمة .. هيه صديق فين ايروح
الباكستاني ما في قرقر واجد انا معلوم طريق الحرمة التسبيرة كانت جالسة ورا كرسي السواق
قامت الحرمة السنعة يوم شمت ريحة غدره
ناظرت تحت عند رجليها و عينيها تقصد الحافظة الاصلية المعروفة
اوم مظلة
و تروح فاكه غطاء الحافظة و تنطلق ريحة الجريش الساخن بقوة
ثمن شالت الحافظة و تكبها على راس الباكستاني وقف على جنب.. تسلخ الحيوان .. احسن
و نزلت الحرمة بسرعة تشر للمارين
و وقفوا لها الاجاويد وحكو وجه الباكستاني في الشارع و طلع الباكستاني بعد ما اتمسك قال انا اجيب بنات
لمخيم بالثمامة عند شباب و يعطوني 1000 على البنت الوحده
بناتنا و شعر وجيهنا صارو بـ 1000 ريال
ياخي خل عنك العجز و الهججه مع اخوياك و ود اهلك لين احتاجو نقاط شوارعيه !! - لما تسوق و تبي توصل البيت بأمان حط في بالك ان كل الناس حولك عليميه!!
- افضل محلات تضليل و عندهم خبره للي ما يبي زحمة الغرابي يجي عندنا في السويدي لان شبابنا يكتم الموتر بعد يومين يلقم مخالفة و يفك التضليلة و يرجع يكتم و يستمر في التردد كل ثلاث ايام يضلل مما يعطي البنقالي خبره لا بأس بها.
- لين شفت اشارة زحمة امسك اليمين و وقف لا تخاف لان الي وراك والي قدامك و الي جنبك في الوسط و الي في اليسار و الي بيقطع الشارع على رجليه كلهم بيلفون يسار.
- لين جيت توقف عند محل شاورما وقف في نص الشارع.. صدقني مجربه.
- بتشتري موتر جديد .. اشتر جيب و تمتع بالقيادة على الرصيف.
- ابتعد 100 متر عن اي فان تشوفه في وجهك.
- لين شفت شي مكتوب علي ابو سرهد وقف موترك على جنب وكمل رجليه.
الــخــتــام لين شفت اخطاء املائية فوق
استر ما واجهت و كمل لا تفضحنا
شوكرا لقرأة الموضوع