مساكم الله بالخير جميعاً
هارد لك على الخسارة ( المتوقعة )
طبعاً يمكن بعض اللي بيقرون موضوعي بيقولون لا تلومون هالسفية منقهر وكتب الموضوع بعد الهزيمة مباشرة وعقله ما هوب معه ، لكن لا والله عقلي معي وهبالي خذاه قريتس يوظفه في مباراة اليوم
عموماً ندخل للموضوع
يالله سترك وستار من خلقك ( هذي دعوة دايم يرددونها شيبانا )
صراحة بالنسبة لي شخصياً توني أعرف معناها الحقيقي على أرض الواقع ، لأن الدعوة تمثلت في مباراة اليوم ( يعني بالمختصر ربي رحمنا وستر علينا أنها ما جت تاريخية في مبارة اليوم )
صدق ربي ستر علينا وأعمى عيون مدربهم عن تغيرات مفترض يقوم فيها بوقت أبكر من المباراة تعدم فريق الهلال ( تغيرات إتحادية مبكرة + تخبطات قريتس = 3 صفر أقل شي ) لكن ولله الحمد ربي ستر علينا
قريتس ما قصر اليوم حاس أم الفريق وحاس أم التشكيلة وأحرج لاعب شاب مثل سلمان الفرج بإشراكه في مباراة كبيرة مثل هذي وفي خانة غير خانته الأساسية
قريتس أحدث فرق في فريقنا خلال مسيرته مع الفريق وذلك من خلال الإنضباطية الفنية في أداء التمارين والحضور والإنصراف وأقر التمارين الصباحية اللي ساعدت الفريق على تأدية مبارياته على أحسن حال خلال مشوار الدوري ( بس الله يرحم والدينكم خذوني على قد عقلي وأشرحوا لي فكرة أن لاعب غير منضبط يعاقبه المدرب بوضعه في قائمة الإحتياط ويلعبه في آخر المباراة ) يعني اللي أنا أعرفه أنك ياقريتس ياتعاقبه وتحطه برى التشكيله نهائياً ولا إذا أنت مقتنع فيه لعبه من أول المباراة ولا تخلي فريقنا شوارع ومحجور حجرة قطو
طبعاً أنا أتكلم عن نفسي ( نسيت أشباه خشت مبروك زايد ) والسبب طويل العمر قريتس ( حلو منكم قلتو لي ليه )
يعني المدرب الداهية ملعب لي ناس في خط النص لا هم اللي يساندون الدفاع في إستخلاص الكور عن الفريق ولا هم اللي ساندو الهجوم في صناعة الهجمات صراحة مدري وش يبي ، وبعدين نجي لأختراااااعاته في التغيرات وعموماً ما هيب أول مره يسويها دايم يخترع في التغيرات الله يهديه غصبٍ عنه
يعني نواف العابد اللي قاعد يساند الجهة اليسرى ومسوي شغل مضبوط يطلعه ويحرج الفريق أكثر وأكثر ( كنه يقول هاه يا هكتور وش تبي أحسن من هالهدايا اللي أعطيك أياه أنجز علينا وخلص المباراة )
اللي بقوله أن قريتس مدرب كويس في الإعداد ولكن للآسف في قراءة المباريات وخصوصاً في التبديلات رفيقنا ماهوب اللي تبون
يعني حالف ومطلق ألا يحوق أي مباراة يلعبها الهلال
مباراة الهلال والنصر 5-3 أخترع في أم التغيرات وسلم النصر المباراة في الشوط الثاني والسبب أنه خواف ولا كان مفروض تكون نتيجة تاريخية
مبارة الهلال والسد في آسيا ( مباراة الأياب ) نفس الشي
يعني لو نرجع لكم مباراة سابقة نلاحظ أن المدرب ( خواااااف ) في تغيراته وصارت معروفه تقدم بهدف إلى هدفين وطلع وسط مهاجم وكثف محاور
بس اللي بقوله لكم بالنهاية عدة أمور :
1 - فريقنا ما قصر خلال هذا الموسم وحقق بطولتين وكانت بطولتين قريبة مننا ( كاس فيصل ضاعت بسبب تعنت قريتس بإشراك الحارس شراحيلي ) وبطولة خادم الحرمين اللي ضاعت اليوم (بإختراعاته في التشكيلة اللي تسببت في تسليم المباراة لنادي الإتحاد من بداية المباراة )
2- نحمد الله أن المباراة أنتهت بضربات الترجيح وفكنا الله من هزيمة تاريخية لو مدرب الإتحاد أستغل اللخبطة اللي سواها قريتس بالفريق اليوم 0
3- أتمنى من إدارة الفريق مناقشة المدرب بالأخطاء الفادحة اللي أخترعها لنا اليوم وتسببت بظهور الهلال بمظهر غريب على الفريق 0

أمنية شخصية :
( طبعاً أرجع و أقول لكم لا تجون وتقولون معصب وقام يخذرف هالشايب )
أتمنى أنه يتم التعاقد مع قريتس من قبل منتخب المغرب أو أحد الفرق الأوربية لنتمكن من جلب مدرب بحجم ( يوزيك ) وبنفس الوقت نفتك من الشرط الجزائي
الرجال وخذنا اللي عنده ( الإنضباط + تمارين الصبح ) بس نبي واحد يعرف يقرأ المباراة صح ويعرف يغير صح 0
وتقبلوا تحياتي