||..مــقــالــب و مــواقــف طــريــفــه مـضـحـكـه و مــواقــف مــحــرجــه..|| - نادي الهلال السعودي - شبكة الزعيم

زيزوم الزعيم · #1 07/05/2010, 12:58 AM

السلام عليكم ورحمة الله وبركاته

اليوم قريت بعض المذكرات
وذكرتني بمقالب ومواقف فيه منها الطريف والمضحك و فيه منها المحرج
واللي طار فيها وجهي بعض الايام من الاحراااج
والموضوع ماراح اجيب المواقف والمقالب اللي تعرضت لها انا فقط
بل سنتبادل المواقف والضحكات يعني نبي تجيبون لنا المواقف والمقالب اللي تعرضتو لها

راح اقولكم بعض المقالب اللي تعرضت لها واللي بصراحه
عرضتني لاحرااااج بكل ماتعنيه الكلمه احرااج
مثل مره في الجامعه انا وسط القاعه في المحاضره
جالسين ومركزين وانا كنت الصرااحه مزاجي زفت ذاك اليوم
لان كان جهازي (الاب توب) طاقه فاااايرووس يمشي الفين
وكنت افكر في انه لازم اسويله فرمته وانا لي فيه اشياء ابيها وحالتي حاله
المهم اثاري الشباب عيال الـ..مانيب قايل ماخذين جوالي قبل ادخل المحاضره
و مجهزينلي مقلب وحاطينلي الساعه ضابطينها ترن في نص المحاضره
وياليتها على كذا الا ماوقفت على كذا حاطين رنة الجرس (النغمه) اغنية (ياراعي الجمس)

المهم وانا جالس والله مفهي ما توعيت الا و الجوال يشتغللل يااااااراااااااعي الجمس
وكل من يتواجد في القاعه كان يطاالع فيني وانا سويت يعنني ماهوب انا

وجلست اتلفت وكــاني طالع منها ولا الدعووه مكشووفه
بس وقتها والله وجهي صاار احمممر كاني ضااارب بريك ومولع الوجه احممر

عاد انا اغلب مواقفي محررررجه جدا جدا
دقيقه خلوووني اتذكككر موقف صارلي مع اثنين من الشباب اللي هم سعود و محمد
عاد سعود ذا ان شاء الله ماتعرفونه صح ان مقالبه كنها وجهه ثقيله تسبب احراااج ماله حد الا انني سبحان الله احبه
المهم حنا كنا في عزا واحد يعرفه محمد اما انا و سعود جايين مسويين يعنني ندور الاجر يعني جايين قطه
وعزينا اهل المتوفي الله يرحمه وجلسنا شوي كالعاده وحنا جالسين الثلاثه جنب بعض
الا وانا جالس ماخذيت الا سعود ينغزني قلت هلا قال اقرب بقولك حاجه بصوت خفيف
قلت هلا قال سرعه اقرب قربت منه وانا على بالي بيقولي شي
ماتوقعت توصل به المواصيل يحطني في موقف محرررج في العزا وخصوصا ان حنا عند ناس مانعرفهم

المهم قربت منه.. الا والرجال يقولي بصوت خفيف في اذني (نـكـتـه مــضــحــكــه)
هو بس قال النكته انا مامسكت نفسي هليت ابوها وامها ضحك قسم بالله ماعاد قدرت امسك نفسي
من الضحك والمسيكين محمد ضاع وجهه قدام ربعه اهل العزا
وسعود الخسيس جالس وقسم بالله ماعليه اثر ضحكه وانا ضحكت ثم على طول طقيت بريك كالعاده
طقيت بريك و وجهي وللع اشاره حمراااا

ومحمد والله العظيم شهر مايكلمني وانا مالي ذمب بس الخسيس ذاك اللي حطني في الموقف ذا

هذي مواقف من مواقف كثيير
لكن خلونا نشوف ردودكم ومواقفكم ومن ثم نكمل
والحين ابي اجيبلكم مواقف ما تعرضت لها بس سوالف مجالس دايم نسمعبها
يعني مثل ماتعرفون اذا جلست في المجلس سالفه من ذا وسالفة مقلب من ذاك
بقولكم سالفة واحد هو و اخوه في صلاة الفجر
يعني كالعاده يجيك الواحد سهران ما نام وما يمديه يسجد في الصلاه الا والرجال صاكها نومه

وهو ساجد عاد تعال وصحه تصير الهوايل و الضحك من بعيد يعني اذا كان الموقف بعيد عنك

يقول ابو شباب كان رايح هو واخوه يصلون الفجر في المسجد
ويوم سجد الامام وسجدو معه ..اخوه ماصدق على الله يلمس راسه الارض الا وراحت عليه نومه في السجده..

عاد رفعو من السجده وابوالشباب عاده ساجد(احلام سعيده) ونايم
يقول اخوه حاولت اصحيه بس ابو الشباب ماصحى نايم..يقول وحاولت انغزه..
ونغزه من جنبه نغزه قوووويه.. قام وقال بصوووت عالي..ياهيييييه ماتعرف تصحي النااس..

يوم شاف درا انه في المسجد ونايم حط رجله من المسجد..

وفي الختام نبي نشوف ردودكم وتفاعلكم ونبي نسمع مواقفكم
ومقالبكم وترا الموضوع ..يــتــبــع.. اذا حسيت انكم تقبلتوه

خــالــد