يذكرني موضوع رئاسة الهلال بالشخص اللي بيعرس ومتقدم وخاطب ، بس اهل العروس ما بعد ردوا عليه ، هواجيس وتفاكير وفزات في الليول ( جمع ليل ) ، وقلبه يكفٌخ وافقوا والا ما وافقوا وكل شوي ناتقا على امه وهي ساجه ومروعها هاه الجماعة ردوا والا توهم 000 باسم الله علي روعتني ياوليدي لا يا بعدي توهم ، يمه ظنك يوافقون والا لا ، وان طق الباب او رن الجرس او التلفون فز قليبه وقام يبترم ويدور في مكانه من الخلفة ما يدري وش يسوي وقال أكيد هذولا أهل البنت يالله عسى خير ، وعلى هالحال كل يوم تقول خاطب باسكال والا عتاب ( دعابة ) يخاف احد يسبقه ، لكن تبون الحل عندي وانا ابو هندل 0 خلوووووووههههههههها0
والرأي المضبوط هو ان يتم ترشيح الأستاذ فواز المسعد رئيسا رسميا لنادي الهلال ، وبيوافق على طول ما هوب قايل ابا اشاور امي ، والا ابا اشاور ولد جيرانا ، والا عطوني 25 مليون واوافق( انا عطوني قيمة خمسة ونيتات ددتسن غمارة وحدة بعد واوافق بالكعب ) ، والا اليوم يقدم ترشيحه وبكرة يسحبه ، والا لا احد يزعلني والا هونت ( يعني يا دهينه لا تنكتين ) وبيلقى الدعم من اعضاء الشرف المخلصين اللي يحبون الهلال وليس الأشخاص ، وبيوقف معه الجمهور بكل قوة لان الرجل أثبتت التجارب انه راعيها ، صحيح ان الهلال كبير ويحتاج الى المادة والقوة ، ولكن الأستاذ فواز قدها وعاشق للهلال وبيدبر نفسه وبيلقى من يدعمه ويقدر يمشي أمور النادي بكل اقتدار كما فعل سابقا ويفعل حاليا ، ثمنا رئاسة الهلال ليس وقفا على فئة معينة من الناس اذا قعدنا نحتريهم عز الله ما لقينا ريس وبنفتك من (جاءك الذيب جاءك وليده ) ، والشي المتأكدين منه ان ابو مشعل سيعمل بكل إخلاص كما هي عادته وعلى الاقل احسن ميزة بيكون رئيس موجود على طول ولا هوب راعي سفرات او كفخات ابعد ما وصل الدمام يعني في خاطرك شي انقز للنادي وبتلقاه هد السبحة عليه وعوُد للبيت وكبر الوسادة على الأقل قلت كل اللي في خاطرك وبنرتاح من قولة الريس راح الريس جاء وبترجهن قلوبنا وبتصير على كراسيها وبنرقد وامنين يعني ما تقوم الصبح وتفتح الجريدة وتقرا سافر رئيس نادي الهلال كن اللي مسافر ابوك هذي انسها اربع سنين ، هذا شي والشي الثاني ابشروا انه بياخذ حقنا ويسكت من يتطاول على الهلال او لاعبينه ما هوب قايل لا والله ما نيب راد اخاف من عمي والا اخاف يزعل فلان والا هذي سياسة انت يا لجمهور ما تدرون عنها وضاعت حقوق الهلال وحنا ما عرفنا هالسياسة اللي ما تنطبق الا على الهلال 0 والرجال كفؤ ومخلص وعنده خبرة وفاهم امور الانديه ويعرف يصرح وبيقول كل اللي في خطرنا 0 اما مساءلة البطولات فامرها عند الله0
صدقوني أن الكلام اللي قلته وان كان أحد يرى فيه استهتار أو استهزاء فيعلم الله انها من ألم في قلبي كما هو في قلوبكم 000 أما موضوع ترشيح الأستاذ فواز المسعد فهو عن قناعة شخصية بهذا الرجل الذي أتمنى فعلا أن يكون الرئيس القادم للهلال 0

الامور بدات بس عليك تتفاءل

والحال الى زواااااااال

يالله حي ابوهندل ,,,

ايبالله خلوووووووههههههههها

ونعم الرأي يابوهندل , لكن ترى الوقت ماهو الوقت , والمسعد ونعمين فيه لكن ماضنتي انه بيقدر ( يرضي الناس كلها ) وبيحتاس وانا شخصيا اخاف عليه من امور كثيره اولها عندنا واخرها بيد الذيب

اما سالفة المعرس فعزالله انك جبتها هذا حالنا لنا مده طويله والله المستعان لكن فرحتنا بتصير كبيره الى تم اللي نتمناه ( مثل فرحة العريس الى من جاه خبر القبول )

تحياتي لك ,,,