حينما سمعت تصريح رمزهم بعد مباراة الهلال ، وذكره لنادي الطائي بالذات ، تذكرت سالفة أحد الشباب حدثت له في يوم من الأيام.
ومعذرة سأسردها على طريقته لأنه يميل دائما إلى الإسلوب الساخر في رواية بطولاته وصولاته وجولاته .

يقول خوينا: ابطريق بيتنا مطب صناعي خفيف شوي يعني يجي شبرين وقفلة ، - فقلة ذي وحدة قياس خاصة بخونا هذا- يقول امتعود دايم أجي على الكابرس أنقزه زي سلام عليكم .
لكن مرة من المرات تعطل الكابرس واستعرت عطية الله ( الددسن ) من الشايب وما قصر عطان اياه على طول ، - يبي الفكه منها - .

يقول خوينا : جيت وقت القيالية بعد الدوام طفشان أبي - يعني اريد – الغدا والفراش يقول جاي كالعادة طاير فوق الارض وآآآآآآآكل المطب ، واخذ رقم قياسي عالمي ( على وزن اعليمي )بالوثبة الرباعية لان الددسن حقت الشايب أم اربع كفرات .

يقول : ولا صحيت الا على تحقق نظرية دوران الكرة الأرضية وايماني بهذه النظرية ،واللي كنت منول اتطنز بمدرس الجغرافيا بسبته ، ولاالأرض دايرة وصايرةٍ الكفرات فوق والنتدة تحت
والناس روسهم تحت ورجليهم فوق .

ولا تعدلت الصورة عندي الا بمزعة بمشط القدم الخارجي على قولتهم ، واقوم اباشوف وش السالفة ولاه الوالد يقول قم يانويصر يالله صل مذنٍ له ساعة .

تذكرت هذه السالفة لأني أحسست أن رمزهم أكل المطب على طريقة خوينا نويصر ...

تحياتي للجميع ومعذرة مرة أخرى ،،،،،