بين كل مطعم ومطعم ( مطيعم ) وبين كل بوفيه وبوفيه ( بروستد )


كثرة المطاعم .... وكثرة رواد المطاعم ... وش تعني ؟!

تخيلوا على شارعنا بس عديت المطاعم اليوم انا وعيالي ... من اول الإشارة لين آخر الإشارة طلع العدد 37 مطعم مختلف ... من كنتاكي وماكدونالد إلى مطاعم المشويات والفطاير والفوالين والبروستد ....... إلخن . إلخن إلخن )

هذا بخلاف محلات الحلويات والعصائر الطبيعيه .... والآيسكريم ؟؟؟


كثرة المطاعم مصيبة !! من الناحية الصحية مصيبه.... الناحية الإجتماعية مصيبه ... الناحية المادية مصيبه

ومع ذلك الزباين على ( أفا من يشيل ) والزحمة واصله للشارع .... ومرات يطول الطلب والناس تنتظر ويجيها صبر عجيب وفي الأخير على سندويشه

وبالنسبة للزباين فهم من جميع فئات وشرائح المجتمع ... الشيبان ... والمراهقين .. والمثقفين ... والعاطلين ... والحريم .. والمبزرة ... تلقى بزر ناشب في حلق المعلم ( كتشب وميونيز يامحمد ) وهو طالب بريال فلافل

الناس تصرخ من غلاء الأسعار .. أغذيه .. وملابس وإيجار .... والمعيشة أصبحت صعبه ... ومع ذلك كل يوم يفتح عشر مطاعم جديدة بالرياض ... سته في الرياض وأربعة بس في شارعنا ...

اذكر في وسط موضوعي تكلمت عن الأضرار الصحية ... والإجتماعية .. والمادية اللى تصيبنا من ورى هالمطاعم ..

ورى مانفندها لكم ...

الأضرار الصحية :
الزيوت القديمة وطريقة الطهي والمواد المستخدمة والغذاء المطبوخ وضمانه... وإنعدام النظافة ونقل الأمراض و و و و و و و و إلى مالا نهاية من بلاوي المطاعم الصحية وانتم ادرى فيها

الأضرار الإجتماعية :
هو التواجد على سفرة واحدة وإجتماع الأسرة ولمتها لأنه في الغالب او الوقت النماسب لإجتماع الأسرة هي في وقت الأكل ... وطبعاً المطاعم بتحرمك من نعمة الّلمة والجمعة الأسرية خصوصا في وقت العشاء وهي الوجبة اللى غالبا تكون خارج المنزل

الأضرار المادية :

الببسي صار بريالين عند المطاعم ... وهذا اول ضرر مادي ... والشاورما أم ريالين صارت بثلاثة ... والحين فيه شاورما بسته !! الله على أيام الشاورما بريال ولحم بعد
كل شي زاد سعرة في المطاعم والنفر من كل شي تبي تشبع منه لابد يكون من هالعشرين وفوق ... كانك تبي تدلع نفسك .. إلا إذا تبي تميس مع ببسي هذي أربع ريال بالراحة ... بس وين تقعد ؟
يعني كل يوم عشرين ؟؟ في الشهر600 ريال ؟ راتب شغاله تطبخ وتنفخ وتغسل وتكنس ويمديك تعرس عليها بعد

في الختام ...

القصور على مين ؟

هل كثرة المطاعم هو دلاله على تقصير الزوجات تجاه أبنائهم وأزواجهم ؟؟

او القصور من الأزواج والأبناء في عدم مشاركة الطعام مع الأهل في البيت ؟؟

او الملل من الروتين .. لكن صار الروتين في المطاعم الحين والإستثناء والتغيير صارت طببخة البيت ( للأسف ) ؟

وش حنا من شعب ! أقرع ونزهي !! غالي غالي ..؟؟؟ ونروح نتعشاء برى ؟

تدري إنك تملى ثلاجتك لمدة أسبوع بقيمة وجبة عشاء يوم واحد ؟! وفي البيت بيكون أكثر نظافة وصحي أكثر واقل تكلفة ... ومع ذلك تشارك الأهل وتشوفهم !

الممطلوب ..كل عضو يعد كم مطعم في شارعهم ... هع هع

أخوكم الصغير ابو طلال