12/03/2010, 03:56 AM
|
| موقوف | | تاريخ التسجيل: 20/02/2009 المكان: الخبر
مشاركات: 839
| |
ان لم تستح فأفعل ماشئت ( النمشان ورفاقه ) الحلقة الاولىوالاخيرة مع المشاهد المضحكة
بسم الله الرحمن الرحيم
مبروك الف مبروك لجميع عشاق الكيان الازرق
شكرا لجميع من حضر والي ماحضر ان شاء الله تحضر بدالي المره الجايه  المهم نخش في صلب الموضوع
اولا جيت للملعب الساعه 4:40 المهم اخذنا التذكرة ورحنا للتفتيش وكان علي شال الهلال موبايلي الي يتم توزيعه
دائم من قبل مجلس الجمهور قبل كل مباراه يعني بالعربي الي انتم تعرفونه الرسمي الي العساكر مايمنعونه
( شوي الا ناط لي العسكري قال يالطيب ممنوع الشال هذا قلت ليش ؟ مافيه كتابات ولا شي قال وموبايلي هذا قلت
والهلال وموبايلي قلبين في جسد << ترا ماقالها بس اني قلت له الشريك الاستراتيجي طبعا صعبه ان العسكري
ينطق الشريك الاستراتيجي قال ممنوع اعلانات ممنوع شركات راعيه ممنوع كل شي تجيب ازرق وابيض بس
يبيني اجيب الصوف هذا الي يجيب الحساسيه هع المهم بلعناها ومشيت الشكوى لله ماباليد حيله صح نسيت اقول لكم سالته قلت من اللي مانعه قال ادارة الملعب لا حول ولا قوة الا بالله
المهم يوم جيت بدخل من عند المدرج الا والله تفتيش عادي اخذو ولاعه والثانية مزبنها  شوي الا
منبرش علي العسكري في اضحوكة جديدة قال لابس تحت البدلة هذي شي قلت لا ليش ؟؟؟ قال يالغالي هذي
ممنوعه قلت ايش قال هذي ممنوعة قلت وش تبي اللبس لايكون تبي اجيب بدلة المنتخب وان شاء الله ادخل
( طبعا الي لابس انا تيشرت الهلال الرسمي يعني حق السنه هذي  ) المهم قال لا هذي فيها اعلانات اسمح لي
ماتدخل قلت ياولد وش تحسون فيه انتم قلتم شال قلنا مو مشكلة بس سالفة ان البدلة هذي مااادخل فيها
سلاماااااااات وش تحسون فيه قال والله هذا الامر الي جاني قلت ومن قال لك قال الضابط قالي قلت والضابط من الي
قاله قال قاله ادارة الملعب قلت يعني النمشان قال ايه قلت حسبي الله ونعم الوكيل واحاول فيه يابوك ياايمين يايسار
شوي الا ينادي واحد مثله عسكري قال خلاص يدخل هع حسيت ان هذاك سوااااا لي فيها الواسطه لا عاد والادهى
والإمر ان اذا جيت لابس تيشرت فوق الثوب يقول لك ممنوع هههههه طيب ليش قال مخالف داخل مدرسة الله
يصلحك انا والا ايش المهم مدري وش سوو لي لابسين تيشرتات فوق الثياب طبعا بعدها صرت فاضي وقعدت
اتفرج في العسكر قلت بشوف هذولي الي يمشون على النظام وش يسووون واقعد اطالع الا فيه عسكري جالس في
مكان الاعلاميين الي في مدرج الواجهه وناط لي خشته بالتلفزيون ويتابع شوي الا فيه باب حاجز مخصص للمنطقة
الي هو فيها جاء عامل من الملعب وسكرها باإسيام وماانتبه هو كان خاش جو مع مباراه مدري ايش المهم شويات
الا العسكري طالع من مكانه ويبي يطلع الا حصل الحاجز حق مكان الاعلاميين مغلق طبعا كان معاه عسكري ثاني
العسكري الثاني محترم قفز من فوق الحاجز ووقف في مكانه الصحيح الي هو عند البوابه بس بقى عسكري زمانه
زعلان يقول ليش البنقالي يسكر الحاجز وينه ومدري ايش ويقعد يرفس في الحاجز لين فتحه بالقوة قلت بقلبي بالله
لو مسويها واحد من الجمهور وش الحكم الي بيجي عليه ( اعدام ؟ قتل بالرجم والا وش ) المهم شويات واذن
المغرب وصلينا ولله الحمد وتقبل الله من الجميع وقلت بروح اجلس فوق في المدرج العلوي الا والله قال العسكري
ممنوع يالطيبين طبعا العالم كثاااار يااابوك ياايمين ياايسار قال مافيه ممنوع من ادارة الملعب
((( الليل ياخي النمشان هذا مدري وش قصته غبي والا استقعاد وضعافة والا وش والله ودي افلم فيه )))
ونقولللضابط طيب كلم أدارة الملعب وقلهم ان الجمهور تحت كثير ويبون المدرج العلوي قال لا اليوم انسوووووووو
مافيه فوق تبون روحو ورى خلف المرمى ( بالله على كيف ابوك هو اروح ورى المرمى ) قال والله مافيه انتهى لو
تنتهي المباراه مافيه فوق ( طيب خلك اسلوب واللي يرحم ابوك خلك ريلاكس لاتسوي فاصل مخك ) الي ضحكني
قال انا قلت كلمة وخلاص وش عنده سمو ال كيف الحال المهم بعد شد وجذب وكسر وضمه
وبالاخير فتحو المدرج العلوي عاد قسم بالله يوم فتحوها وانطلقت الجياد قصدي انطلقت الناس فوق ترى ماابغيت
اتكسر ولا صفقت في الماسك حق الدرج ولا شي ابدا ماجاني شي وهذا ايش منه ( والله من التنظيم الي لو تسوي
ايش ماتسوي مافيه امل يتعدل ياخي ارحمونا والله كأنكم تقولون ياخي وش تبون جايين ) هذا الي حصل معاي في
الملعب عاد الحين ابي افضفض عليكم واقول لكم وش ابي وش مااابي ممكن ؟؟؟ اكيد بتسمحون لن مافيه ردود الا
بعد ماااخلص اوكي المايك معاي قصدي الكيبورد معاي
01 اولا / ممكن ولو سمحتوا تخلونا نتكلم في المنطق والعقل بالله عليكم هذي ادراة ملعب هذا ناس كفو يصيرون
مدراء هذي ناس تستاهل المناصب ؟ ؟ والا كديش ناشب في المكان حقه 20 سنه نفسي اعرف ليش عندنا الواحد
يصفق 4545492 سنه في محله ؟؟؟؟ لا عاد والمشكله قال ايش قال ياجمهور تعال بالله كيف اجي وانا اشوف ذا
الاهانات والاستقعاد والخرابيط ؟؟؟ حبيبي يقولون لك مافيه احلى من ( باجه + حمضيات + بطارية ريموت جديدة
هع ؟ المكيف د20 اممممم وفستق اذا ممكن واحلى متابعة واشجع الزعيم من خلف الشاشات والله ودنا نحضر ودنا
ننبسط ودنا نقاتل عشان الزعيم بس للاسف فيه نااااااس تحارب النجاح وتحارب التطور
02 ليش مايتم مخاطبة الجهات المسؤوله غير ( اتحاد الكرة ) لن مافيه فايده يعني نخاطب وزارة الداخليه ممثله في
والدنا النائب الثاني بأن يكون مع العساكر في التفتيش عند الملاعب ناس من امن الملاعب امن الملاعب هذا يكون
هو وظيفة مستحدثة وكل نادي يكون عنده امن وبحيث يكونون ميولهم للنادي هذا يعني ايش ( اخلاص في العمل )
ويكون وظيفتهم مع العساكر في التفتيش عشان مايجيك مسطول يقولو لك انزع فنيلتك هذي عليها موبايلي هع
والله جد
03 الله يخلف والله يوفق الزعيم والله يطير الي في بالي من منصبه تدرون من قصدي بعلمكم عشان ماتفهمون
غلط قصدي النمشان وفواز المسعد وطقتهم والسبهلله الي عايشينها واسف على اطالة الموضوع وان شاء الله اني
ماسمجتها معكم ولا زودتها ولا مصختها ولا شي بالعكس كنت حبيب معاكم وكنت ظريف فوق اللازم وكنت غثيث
بالحيل المهم باااااااي برب مكالمه هع
شكرا عبدالرحمن بن مساعد
شكرا نواف بن سعد
شكرا فهد بن محمد
شكرا والله مدري وش اسمه بس دائم يحضر التماري ويخفف شنبه على رقم 2 بس مضيع اسمه
شكرا سامي الجابر
شكرا قريتس
شكرا 11 لاعب
شكرا 7 لاعبين
شكرا جهاز طبي
شكرا مسوؤل الملابس
شكرا للي يجيبون الكور
شكرا لشبكة الزعيم
شكرا لكل من ساهم في هذا العمل ( 2010 حقوق النسخ منسوخه ليلاً ) باي |
اخاف اخربها معهم بس لو اخربتها يمكن يعطوني حكم بالاعدام 
الوضع المتطور
