التكلف في المجتمع السعودي ,, أسبابه ؟ حلوله ؟ شاركنا برآيك - نادي الهلال السعودي - شبكة الزعيم

مقطوع راسي · #1 24/02/2010, 10:18 PM

السلام عليكم ورحمة الله وبركاته ..

أول شيء وقبل صباح الخير ..

اللي وقته يعز عليه يطلع لإني ضغطت على موضوع جديد وما براسي إلا العنوان فقط !

.. أما الآن فصباح / مساء الخير ..

كيف حالكم يا إخوان ؟

وشلونكم ؟

,,

:: الزبدة ::

تساؤلات بسيطة جاءت على بالي بشكل سريع ( شطفتني

) ..

ليه عندنا يالمجتمع السعودي المثفف المتقدم والمتعلم والإلخ ..

إذا أردت " عزم " أحدهم لـ بيتك كأنك بتخصب يورانيوم ؟

بصراحة ألف إتصال تأكيد حجوزات وتحديد موعد الحضور ..!!

ومدري إيش وتكلف ماله أول ولا آخر وبالنهاية " آسف جدتي شافت مقطع للفريدي وتحمست وتكرفست بالدرج وتوفّت الله يرحمها ما أقدر أجي "

وإذا لاحظ إنك ما إقتعنت بهالصاروخ عزز له بـ2 شاورما صغير " أقول ترى بنصلي عليها بالراجحي والدفن بـ مقبرة النسيم "

أو تبي تذاكر أنت وخويك سوى .. تقعدون شهر ما اتفقتوا على مكان الجريمة

<~ وآخرتها تنقلب سواليف

يعني المجتمعات الأجنبية تشوف الواحد يقول لزميله : وشرايك نذاكر سوى اليوم يا جون ؟

الثاني : قدااااااااااام يا بيتر بس وين نتشاوف

الأول : بقريح أهم شيء نذاكر

وانتهى الموضوع !

مافيه أي صورة من صور التكلف المنقطع النظير هنا !!

سواءً بالطعام أو الشراب أو اللباس أو مظهر البيت ..

موب لازم ربع تيس ولا يلبس ثوب ويدقها بكّاريه طول الوقت هناك ( بالمجتمعات الأجنبية ) يطلع لخويه بسروال سنه(*1) عادي

يعني أنا منيب فاهم ليه هالتكلف بإختصار ؟

اللي يشوفنا يقول من زود الإيتيكيت ولا الأخلاق اللي بنا يالله هناك بس

<~ وكل هاللي ذكرت أنا عن التكلف بالزيارات ولا التكلف بالملبس والكماليات عالم ثاني

,,

:: برآيك ::

سـ 1 : ما سبب هالتكلف بشكل مجمل ؟

سـ 2 : ما أفضل الطرق للقضاء عليه ؟

سـ 3 : هل تعتقد أن التقنية والتطور والعصرية تحد من التكلف الموجود لدينا وتقلل منه ؟ أم العكس ؟ بالتفصيل الله لا يهينك

سـ 4 : ليش التكلف معدوم بالمجتمعات الأجنبية ؟ وش الأسباب ؟

مابي أكثر عليكم بالأسئلة

ومثل مانتم شايفين الموضوع ملخبط ومدري كيف جاي بس قعقعة عتاريس(*2) ببالي وطلعتها ..

مع خالص تمنياتي للكل بالتوفيق والسداد دنيآ وآخرة ..

أخوكم ..

* 1 - سروال السنة هو عبارة عن بنطلون أبيض كشخة ورزه اشتهر في أوساط المجتمع السعودي لسلاسته وجماله .

* 2 - قعقعة العتاريس هذي سالفتها سالفة ..

هذا واحد من أقوى فلاسفة النحو واللغة ( نسيت أسمه ولا هو مشهور

) ..

<~ بعد شوي يطلع أبو كاب

المهم كان مع خادم له في بداية الفجر ..

فقال العالم : أقعقعت العتاريس ؟

فرد الخادم النجيب : زعلب !

فقال العالم وقد تعرفطت جبته من شدة التعجب : وما تقصد بزعلب ؟

قال الخادم : وما تقصد أنت بـ أقعقعت العتاريس ؟

قال العالم : أقصد هل صاحت الديكة ؟

فقال الخادم : وأنا أقصد نعم

انتهت القصة مهيب حلا عاد