من بن لادن إلى ابو صالح (فضفضة واحد نفر) - نادي الهلال السعودي - شبكة الزعيم

leader ksa · #1 22/02/2010, 04:30 AM

بسم الله الرحمن الرحيم

مساكم الله بالخير ياشباب ويابنات
كيفكم عساكم بخير

من هو الشاب في نظر المجتمع السعودي..؟

هو الشخص الذكر الغير متزوج وليس لديه وظيفة وان كان لديه فهو قريب من فقدها بسبب اهمالة
وهو على فكرة سبب افساد فتيات المجتمع وهو نفسه الشاب الشاذ اللي يبعث عن متعته مع ابناء جنسه
وهذا التعريف ينطبق على جميع من يملك الجنسية السعودي وليس متزوج
ولن اثني من حديثي اي فئة لماذا لسبب بسيط انه يحق لي ذلك فلا يوجد امامي شخص واحد يدافع عن الشباب
فهم يتربعون على قائمة الفئة الاكثر اثارة في المملكة العربية السعودية
وليس لهم اي انجازات تذكر وليس لهم اي اهمية فوجودهم وعدمهم واحد بل من الممكن ان يكون عدم وجودهم افضل للشعب السعودي المحافظ الذي لايملك اي سيئة سوا وجود الشباب بينهم
هذا هو كلام الشعب عن كل شاب ولا اريد ان ارى اي رد يفند هذه المقولة لانني لم ارى خلال حياتي اي شخص من الشعب السعودي الكريم قد تجرأ بقول غير ذلك

فهل هذا التعريف منصف للشباب...؟

>>اللي فوق مادري اذا كان يعتبر فصحى ولا بنقالي بس المهم الحين بنبدا في الزبدة والزبدة ماتوصل الا لما تنقال بلهجة القلب

انا شاب ماني كويس الصراحة وفيني اخطاء من شعر راسي لين ظفر اصبع رجلي الصغير >>كيف الوصف اللي يلوع الجبد >>يالبى الكويت

لكن تجوني وتجلسون تتهمون وتتفلسفون فوق راسي لا والف لا ياشعب الغفلة ياشعب ابي وصفة التبيض على قناة بداية وادعوا لي ابي اشتري فستان اليوم اذا نزلت السوق
انا شاب سعودي وين ماروح الاقي العالم محتقريني ولاهم مخلين علي كلمة ولا تقولون انت تتكلم عن مجتمعك ولا انت مسوي شي ولا ماادري ايش من تصريفاتكم
لكن هذي الحقيقة انا شاب يعني اني مراقب في كل تصرفاتي ولا احد يلاحظ اي اخطاء غير اخطائي (بالعربي كأنها لجنة الانضباط مع الهلال)
بداية في الاعلام ثم ننتهي الى اصغر فرد من الشعب السعودي واللي ينزل موضوع كل يومين عن الشباب السعودي واستهتارهم

اعلامكم ياكبااااار ياشعب ياكويس مخلي كل الاخطاء اللي تصير في كل مكان ولا عنده غيرنا كل يومين قصة شعر جديدة للشباب وقضية التفحيط لم تتوقف ولماذا يغيب الشاب عن المراكز الصيفية المبهجة وغيرها من المواضيع واللي يقرا جرايدكم اللي تجيب العفن ماراح يلاقي غير هذي هالنوعية من المواضيع كل فترة منزلين موضوع والسبب ايش عشان اثارة سخيفة وسامجة مثل وجيهكم بالعربي ترا جرايدنا مثلها مثل مجلات نانسي وهيفاء مع اني اقول الله يرفع ذيك المجلات عن جرايدنا عالاقل لهم هدف واضح ولا يلعبون على الناس واللي بيشتريها يعرف انه ماراح يلاقي غير كذب ونصب على عكس جرايدكم اللي ترفع شعارات مصلحتنا من مصلحتنا من مصلحة الشعب والوطن ولا احد يقولي الشعب مايقدر يسوي شي لا يقدر تدرون ليه ..؟
لان اغلب اللي موجودين بالاعلام هم منكم من الشعب مو من الشباب السعودي الداشر القذر

ونجي بعدها للشعب ياكبار يالمتزوجين يالشيبان تعالوا كلكم
انتوا ماراح اتكلم عن دوركم للشباب اللي هم اولادكم لكن راح اتكلم عن دوركم للبنات حبيبات قلوبكم انتوا
اللي مايصدر منهم اي خطأ الملائكة اللي يمشون على الارض واللي دائما يقعون في شباك الشباب الشريرين >>وهذي وحدة تمعط شعركم ياوسخين

ملائكتم الطاهرين ليه ماتحصنونهم ضد الشباب ..؟ ليه ماتعطونهم من الحنان اللي يكفيهم عن اي مشاعر خارجية ..؟
ليه طيب ماتعرفون وين بزارينكم الملائكة الصغار اللي تلاقيه بالمتوسط وجالس لين صلاة الصبح برا البيت ومع شيبان اكبر من ابوه ...؟
ماتهتمون فيهم ولكن تلومون الشباب اذا استغلوهم يعني ماتعرفون ان عايش معاكم وحوش شريرين ..؟
خلونا من واجباتكم لاولادكم لاننا نقول الشباب الشريرين يخربون عليكم
لكن خلونا نقول وينكم من واجبكم تجاه وطنكم ..؟
هل تتوقعون الشباب الشريرين مايبغون حتى يخدمون وطنهم ..؟
ليه ماتمسك وضيفتك انتي وياه وتؤديها بكل امانة ...؟

مثل امانة الرياض بسم الله عليها اللي مخليه كل ابو الاشياء المهمة في الطرق ولكن تهتم للورود

صدق اللي مو عايش فالرياض لازم يزورها قريب عشان يشوف الورود ترا بديت احس اني في هولندا
لعنبوا ابليسكم يامتنحين انا ابغى اعرف بس مين اللي موافق على زراعة الورود في الرياض احس انه ماجاء الرياض من قبل 5الاف سنة قبل الميلاد ايام ماكنت انهار والجو ربيعي
الحين النخلة وهي النخلة يالله مستحملة هالجو 60 درجة مئوية وين تعيش فيه الوردة ..؟؟
يعني اذا تبغون تسرقون مانقول لا بس اسرقوا وفيدوا الشعب وحطوا لنا نجيلة عادية تعطيكم المضهر الحظاري وتستمر بل المصخره اللي تصير كل 3 اسابيع لازم يزرعون ورود وحتى ورودهم استغفر الله ينقون الالوان الشنيعة يعني تخيل ورده بنفسجية وبنجبها برتقالية وبجنبها نخلة بالله وين تركب ..؟
خلوا كل شي اذا فيكم خير قصصوا من هالنخل والاشجار وحسنوا شكلها اذا تهتمون وتبغون تزينون الشوارع

>>معليش على شطحة الورود بس لازم منها صراحة وتحمدوا ربكم لاني كنت ناوي موضوع كامل عنها

وتبغون تعرفون الورود وش سببها ..؟

لان اللي ماسكها كبير من الشعب السعودي الكريم واللي هم الناس الكويسين ولكن ليه ماحد يحاسبه ولا يقول انه اخطأ بقراره الفاشل لانه للاسف مو شاب ولا ينتمي لفئة الشباب الضالة

لحظة نسيت شي كم سعر الشسمه هالايام ..؟

خلصنا منكم ياكبار نجي للملائكة ياكرهي لكم

>>عشان لايقولون تتميلح وتبي تشبك

ليه ياشطورة عمرك 676 الف سنة ولين الحين ماتعرفين تطبخين ..؟
عشان الشباب الوسخين يضايقونك في المطبخ ..؟ وليه ياشطورة اذا طلعتي ماتتغطين كويس عشان الوحوش الكويسين مايجونك ..؟
والا انتي بس تبغين تشوفين مقدار تأثير سحرك على الشباب وبس ..؟
وليه ياحلوة ماتتكلمين وتطالبين وزارة الصحة انها تحميك من الوصفات اللي كل يوم تنزل 46 الف وصفة للتبييض 76 الف وصفة لتساقط الشعر و93 الف وصفة عشان النمش و73 الف وصفة عشان بطنك بعد الولادة ..؟
واللي تسبب بلاوي ويمكن تموتك ولكن ماتهتمين ياحلوة ياشتورة ولما يقولك واحد يقولك ياعسل وانتي ماشية هو اللي يسبب لك الموت ..؟
هذا اذا افترضنا على كلام الشعب الكويس ان كلكم ملائكة طاهرين
ماكأننا صرنا نشوف 768 الف وحدة فاقده في مواكب الهجولة ..؟
وتطلع مع اي واحد يمشي فالشارع بس عشان تاخذ لها كاس ابو زنوبة ولا صاروخ اذا كان راعية صمخه
ولا 873 الف وحدة تعرض في النت ..؟
ولا 637 الف وحدة صار يفحط لعيونها الطارة الفلاني والطارة الفلاني وتنتظره الاخت في نهاية الشارع مع خوية وتقوله وربي انك تارة ياكبير ياحسن حبيب في العالم واذا خلصوا وراحوا الاستراحة ومسكوهم انتي تطلعين بعد ساعتين وينادون ابوك واللي معاك اول شي يسوونة انهم يحاولون ينهون رجولتة ومن غير بقية الطق اللي يخليه يروح المركز وهو فيك كسور ورضوض في كل جسمك ومع ذلك يقولون نحن حماة الدين مع انهم مايعترفون بالدين في طريقة تعاملهم
ومع ذلك حنا نحسن الظن فيكم ياحلوين لانكم شتورين انتوا ملائكة والشباب هم اللي دايم يغرونكم ياشتورين

خلصنا من الفئات اللي مسببة لي زحمة في حياتي

لكن باقي نقطة صغنونة وافديتها تزنن ياناث

انا مافيه شي يقهرني بحياتي غير المواضيع اللي اشوفها في كل المواقع نسبة 99% من المواضيع تتكلم عن الشباب وتصرفاتهم ولو كانت عادية لان فيه فئات ثانية تسوي مثل مايسوون الشباب ولكن بكل تأكيد ماتلقى نفس الاهتمام

يعني مثلا اقول لكم موضوعين صارت من قريب مالها مدة طويلة والموضوع الاول هو طيحني وفي المقابل العبابات اللي نشوفها في كل سوق واللي فالقرى لايجي يتفلسف يجي الرياض ويشوف الاسواق وبعدها يتكلم

طيحني للشباب واللي يكون البنطلون نازل ومايبان من عورة الرجل شي ويكون فيه بوكسر
والعباية المخصرة اللي توريني الاشياء اللي ماتتسماش

كلهم الاثنين مخالفين للشرع حلو ومتفقين لين الحين

لكن تعالوا قولوا لي مين اللي يفتن فيهم اكثر..؟
باختصار اذا قلنا واحد لابس طيحني هل بيلحقونه البنات ..؟ بالطبع لا
واذا قلنا الشواذ نقول يلحقه 5
المجموع 5 فالنهاية

بالنسبة للبنات اذا وحدة راصه كل شي ويالله تتحرك وواضحة قدامي كم واحد بيلحقها ..؟
بالاقل اذا كانت في سوق اضمن لكم مابين 15-20 شخص
واذا كانت في ممشى مثلا اضمن لكم راح يتوقف الشارع

هذا اذا احسنا الظن في الشعب طبعا

هنا وش الفرق بين الحالتين ..؟
يعني معقولة في الحالة الاولى يكون المنع من دخول بعض الاماكن واذا شافه الجيب الله يعينه على القسم والتهزئ والازعاج والتوقيف لااكثر من ساعه وتعهد ويمكن تشتبك مع العسكري وتروح عليك اكثر من شهر بسبب بنطلون

وفي الحالة الثانية عقابها ثلاث كلمات (استتري هداك الله)

مع ان الحالة الثانية اشد من الحالة الاولى بكثير..!!

المثال الثاني

الشباب الكدش ومالكدش ويقولون سبب منعه انه التشبه بالكفار واذا قالوا تشبه بشباب مسلمين قالوا هذولاء ساقطين ومدري وش فيهم

وفي المقابل

والبنات صبغاتهم وقصاتهم والوان العدسات والميك اب وباختصار كل مايهتم بجمال بالبنت
الصبغات والقصات على والميك اب وحتى الملابس كلها حسب فنانات هوليوود يعني تشبه ولا فيه اي فرق
واذا قالوا هذي موضة اذا نقول هذي موضة للساقطات

وفالاخير وش الفرق ..؟

الشاب ينتهي في الحلاق وياخذ عليه تعهد
والبنت مايمنعون حتى الملابس اللي مدري وش تبي بالاساس ويخلونهم على كيفهم

حتى في برامج النصايح اللي نشوفها في القنوات الدعوية الاغلب اذا استضافوا شيخ كلامهم عن الشباب
يعني مادري والبنات موب مسلمين موب من امة محمد عليه الصلاة والسلام ..؟
يعني فعل الشباب ممكن يدخلهم ضمن الفئة اللي لعنهم الرسول وفي المقابل البنت لا ..؟

#خلصت الامثلة وان شاء الله فهمتوا قصدي بدون درعمه

#

ويبقى واحد فالمية يشمل بقية المواضيع
و في حياتي ماشفت مواضيع تتكلم عن البنات غير حقت الخلطات والطبخات يعني ماشوف مواضيع تتكلم مشاكل البنات او مجتمعهم او المشاكل اللي في طريقهم غير مواضيع ان فيه شاب حقرور ياعيني غازل اختها >>ماتبي تقول هي عشان لايقولون تتميلح

>>ياقافطهم يا أنا

يالبى قلبي بس

من جد احسبوا المواضيع وشوفوا يعني تراني شوي وبديت اشك ان المجتمع السعودي مسوي علينا مؤامرة وشكلي بسوي لي فلم مثل حقين القادمون وترا لو الاقي فلم بنفس مواصفاته ولكن يتكلم عن الشباب السعودي والله لاصدقه

يعني مو معقولة كل مشاكل الحياة سببها الشباب يعني نؤمن بالنصف الاخر ولكن للاسف مايؤمنون الا ان وجودنا سبب المشاكل

>>كيف حزنتكم صح

المهم اللي بقوله باختصار تكفون ترا كل فئة في المجتمع لها اخطائها وبنفس النسبة
لكن ليه التركيز على سلبيات فئة معينة ..؟
ولكن عموما في كل شي لابد من التشجيع ولو كان في انتقاد يكون بطريقة ايجابية ويكون هدفه البناء وليس هدم ماتبقى >>بعد هالسطر حسيت اني حكيم يالبى انا ياناس

فالاخير ادري تقولون وش دخل ام العنوان في الموضوع
لكن بقولكم خوفي بكر يطلع علينا واحد اسمه ابوصالح ويبغى يجاهد ضد الشباب السعودي

اللي ما اعجبه الموضوع يقرأ هالقصيده ويمسح ابو البياخات اللي فوق من راسه

عامين احبك واكتم الحب واخفيه
واخفيه حتى عنك يا نور عيني
عايش بصدري طول هالوقت اربيه
ياكل من ايامي ويشرب سنيني

خايف عليه ولو ضلوعي حواليه
لكن كبر مابين قلبي وعيني
عزمت اسلم كل هالحب راعيه
واخفف احزان المحب الحزيني

شيدت لك قصر من الحب بانيه
فجأه هدمتي كل هالحب فيني
فرحت عمر ماتت قبل ما تولد ليه
حلم كبير وضاع ما بين يديني

عودي على قلب يحبك وشيليه
في القلب نار و في البعد لا تحرقيني
عامين احبك واكتم الحب واخفيه
واخفيه حتى عنك يانور عيني

يالبى كل من قال أحب رابح

لكل شخص مر من هنا واعجبه الموضوع

لكل شخص مر من هنا وما اعجبه الموضوع

.

مجنووووون · #2 22/02/2010, 05:52 PM

والله عبرت عن الي بالقلب
مشكور بعد سبدي ولا عدمناك

leader ksa · #3 23/02/2010, 01:44 AM

^
^
زين توقعت اول رد يكون بقس

العفو يابعد خراطيش الرديتر

تحياتي

ỳάṡṣẻя · #4 23/02/2010, 01:58 AM

..

هلا وغلا بالقائد

يا شيخ انت وينك من زماااااان

ووين المواضيع اللي تبرد الجبد

والله العظيم وبدون مجامله لي اربع سنوات بالمنتدى ما قريت مثل هذا الموضوع وشفافيته

إقتباس


	فهل هذا التعريف منصف للشباب...؟

بالتأكيد لا صدقني مو كل الشعب نظرتهم كذا لشباب

بس المشكلة من الشباب الحثالة اللي تشوه سمعتنا حنا الشباب الكويسين

إقتباس


	الشاب ينتهي في الحلاق وياخذ عليه تعهد والبنت مايمنعون حتى الملابس اللي مدري وش تبي بالاساس ويخلونهم على كيفهم

من هذا المنبر << احم احم

اطالب بإستحداث قسم نسائي في هيئة الامر بالمعروف والنهي عن المنكر

من مبدأ العدل والمساواة

إقتباس


	طيحني للشباب واللي يكون البنطلون نازل ومايبان من عورة الرجل شي ويكون فيه بوكسر والعباية المخصرة اللي توريني الاشياء اللي ماتتسماش

صدقني كلهم الاثنين بلاوي
الأول بعتبره انحراف خُلقي
والثاني لا تعليق
واثنينهم يندرجون تحت التربية السيئة

* اقتباسات اضحكتني كثيييراً

إقتباس


	الحين النخلة وهي النخلة يالله مستحملة هالجو 60 درجة مئوية وين تعيش فيه الوردة ..؟؟

..

إقتباس


	وتقوله وربي انك تارة ياكبير ياحسن

..

إقتباس


	وفي الحالة الثانية عقابها ثلاث كلمات (استتري هداك الله)

قوووووية

,,

كل الشكر لك اخ leader

تكفى لا تحرمنا من مواضيعك

عوآآآفي

leader ksa · #5 23/02/2010, 03:28 AM

هلا وغلا بالقائد

يا شيخ انت وينك من زماااااان

ووين المواضيع اللي تبرد الجبد

والله العظيم وبدون مجامله لي اربع سنوات بالمنتدى ما قريت مثل هذا الموضوع وشفافيته

ياهلا حياك الله يابو عزوز >>مصدق انك ياسر

الله يسلمك ياخي انا من زمان احس ان عندي مواهب >>كبره راسه

بس ملاحظة بسيطة لاتحتك بالكويتين واجد

بالتأكيد لا صدقني مو كل الشعب نظرتهم كذا لشباب

بس المشكلة من الشباب الحثالة اللي تشوه سمعتنا حنا الشباب الكويسين

ياخي انا كنت اقول كذا واني المفروض ماازعل اذا كان فيه مثل هالمواضيع لانها ماتخصني وانا مو من هالفئة

بس خلاص اخذوها فله قسم بالله حطوا كل عله في الشباب ويعممون ولا يخصون ولا كأن فيه اي مشكلة في الدنيا الا الشباب السعودي حتى فلسطين اماعاد ذكروها

من هذا المنبر << احم احم
اطالب بإستحداث قسم نسائي في هيئة الامر بالمعروف والنهي عن المنكر
من مبدأ العدل والمساواة

لالا يابعدي لا

خلهم نفسهم بس خلهم يطبقون نفس العقوبات

صدقني كلهم الاثنين بلاوي
الأول بعتبره انحراف خُلقي
والثاني لا تعليق
واثنينهم يندرجون تحت التربية السيئة

انا ماقلت ان فيه نوع منها كويس ولا شين

كلها فالهواء سوا لكن ابغى اعرف المنطق الغريب اللي يخليهم مايعاقبون البنات وفي المقابل قووة حرق للشباب كانهم حيوانات

,,

كل الشكر لك اخ leader

تكفى لا تحرمنا من مواضيعك

عوآآآفي

ابد العفو حبيبي

اما المواضيع فاغسل يدك لان اساسا ماطلع هالموضوع الا بعد مامتلت مساحة القلب ماعاد فيه الا 1 جيجا يعني يالله نحمله فيه فلم

تحياتي لك

the king yasser · #6 23/02/2010, 04:37 AM

اكبر بوسه على راسك يا لبى قلبك

اقسم بالله العلي العظيم ان كل كلامك ويحاكي الواقع المرير

البنت شيء مقدس في كل حاجه والشاب لو هو صحيح مخطئ

عـ العموم والله ماعمري شفت موضوع عن الشباب ويحاكي الواقع بكل حرف فيه

مثل موضوعك

ياشيخ خذ هذي كلها لك

:ros e:

:r ose:

ام متعب التميمي · #7 23/02/2010, 05:08 AM

شوف انا بقولك شي انت الحين شاب طيب

اصبر كم سنه وتتزوج وقسما قسمات بتقول هالكلام عن الشباب

انهم صيع ومايسوون بيزه^^

،،،،

الشباب بعضهم رجال وينحطون ع الجرح يبرى

ولجات الفزعات ورب الكون يخدمونك خدمه

وفيه شباب شفتهم بالراشد مول

قسم قسمات حرام عليهم كلمة شباب

ياشيخ حسيتني محماس وهو سلوى

ياجعلك الماحي الي يمحاك ويمحى نسلك

تدري وين قابلته في محل مس سلفرج يدور ع ميني جوب

مدري منهو بيلبسه له

الموهم وانا اختك

المشكله ان الشر يعم والخير يخص

فتحملوا اغلاط بعض

تحياتي

leader ksa · #8 23/02/2010, 06:23 AM

the king yasser

ياهلا حياك الله اخوي ووالله ماطلع هالموضوع الا من القهر

ومشكوور ماصرت على كل اللي حطيتها لي تراكم اخجلتم تواضعنا

هذي لك

ام متعب التميمي

ياهلا حياك الله ام متعب

اولا مسألة اني بقول كذا ماتوقع لاني اعرف نفسي ومستحيل اني اتأثر بكلام المجتمع واصدق شي ماتشوفه عيوني

اما مسألة اللي قلتيه هذا انتي قلتي واحد ماقلتي كل السعوديين

ولكن خلينا من هالكلام

انا خلاصة موضوعي في كل فئة فيها نسبة سيئة ليه التركيز على فئة الشباب بس ..؟

انتي من خلال النت بتقدرين تروحين لبعض المواقع وبتشوفين عدد البنات اللي يتميلحون وتلاقينها مصورة كل جسمها وحاطة الصور بالبروفايل وعددهم بالالاف ولكن ماحد يتكلم عن البنات وهذا طبعا اللي فالنت يعني ماراح اقول عدد اللي فالاسواق لان الناس كلهم يشوفونهم ولكن ماحد يتكلم

لكن اذا واحد رقم في الشارع ثاني يوم 5 جرايد و600 قروب و5الاف منتدى حاطين الخبر وبالبنط العريض

على اي اساس كل هالتركيز ..؟
ممكن الاقي اجابة مقنعه ..؟

ومسألة اني اتحمل اغلاط غيري يعني مادري اقول ولا اخاف تزعلون يابنات شبكة الزعيم
مثلا شفتي البنات اللي قلت لك بمواقع التعارف انا راح اخذهم على انهم الفئة الاكبر
وبقول كل بنت تدخل النت هذي تبغى تتعرف على شباب وتكون علاقات >>هل بتتحملين هالموضوع ..؟
وهالكلام في الجرايد والاعلام وهذا الكلام اللي يدور في كل المواقع هل بتقولين عادي اقدر اتحمل اغلاط غيري ..؟

عموما مشكورة على مرورك

تحياتي

مجنووووون · #9 23/02/2010, 07:29 PM

[QUOTE=leader ksa;14377223]the king yasser

اذا واحد رقم في الشارع ثاني يوم 5 جرايد و600 قروب و5الاف منتدى حاطين الخبر وبالبنط العريض

على اي اساس كل هالتركيز ..؟
ممكن الاقي اجابة مقنعه ..؟

ياخي يكفي خلاص سكر الموضوع ماعاد اتحمل
اهئ اهئ اهئ

leader ksa · #10 23/02/2010, 09:41 PM

^
^

هدي اعصابك واصبر عليهم ان شاء الله تفرج عما قريب

مشكور على تواجدك

تحياتي لك

مقطوع راسي · #11 23/02/2010, 10:35 PM

إقتباس


	البنت شيء مقدس في كل حاجه والشاب لو هو صحيح مخطئ

لاحظ !

كل الردود تمجد المرأة وتقدسها في المجتمع السعودي !!

ويأتون العلمانيون الكويسين ( عجبتني

) يقولون الإسلام ظلم المرأة ومدري إيش والإنثى مسلوبة الحقوق في السعودية !!

ياناس والله لو إننا حمير - تكرمون - ما لعبوا علينا لهالدرجة !!

الشباب يطالبون والحريم يطالبون والشيبان يطالبون وكلش والنهاية وين ؟

والله يا بتشوفون شيء ما شفتوه بالسعودية خلال الخمس السنين الجاية بس اصبروا

والله واقعنا اليم جداً ( ما أقصد الشباب المجتمع كـ كل ) ياناس شوفوا الجامعات بس !!

المدراء يقولونها على بلاطة للدكاترة والمدرسين " هذولا آخر شعبة في النظام القديم مشّوهم علشان نخلص " !!

هذا التعليم أهم ما بالدولة وساسها وأساسها !!

كمية كبيرة من الكبت فيّ أحببت التفريج عنها في موضوعك يا قائدنا الروحي

بالتوفيق

leader ksa · #12 25/02/2010, 12:29 AM

والله وش نقول يامقطوع راسك

فيه اشياء كثيرة نبغاها تتعدل بس موضوعي بخصوصنا لان الشعب كله جالس تحطيم × تحطيم

مافيه اي وسيلة تشجيع للشباب اللي هم راح يكونون هم الشعب راح يكونون مسؤلين عن أسر راح يكونون المسؤلين في الدولة

مو معقولة تؤسس الشباب على شي وتطالب بشي ثاني

واما مسألة خمس سنوات والله يابعدي اللي اشوفه الحين خلاص مايخليني انتظر لخمس سنوات

الشكر لك يالمواطن الروحي

تحياتي لك

المحترف التميمي · #13 25/02/2010, 02:02 AM

اخوي القائد
ابكون صريح معك
شعبنا ينقسم الى ( بدوي- جنوبي-حضري- قروي)

المشكله اللي حاصله موجوده في الرياض وجدة والخبر
اولا /شوف الجنوبي لا جاء الرياض صار مرجوج واستهبل لانه مايخاف يشوفه احد يقربله (مع كافه احترامي للجنوب

ثانيا / البدوي

اشوفهم من تالي طايحين بالبناطيل جنز ولابس زبيريه المهوم مع عيال عمه ياشر اشتر ولحاله محترم بس لاجو عيال عمه اخر الاسبوع انهبل

ثالثا/ القصمان

لحالهم لاهين في هالوكسات وجيوب ونصب والبلاوي المصاحبه للجيوب
وكذالك السديراويه

وكلن فيه حقه ونفس الاشياء فيهم كلهم من دوران ومشتركه في كل الشعب
يعني انا ما اقول الخطا من الجنوب دون القصيم كلنا في الهواء سواء
وكل ناس فيهم حقهم وفيهم محترمين وهذا على التربيه اولا واخرا

(فيه نقطه اثرتها عن الهيئه ) انا معك ان الخطأ مشترك لكن الشاب مهوب حمار مايفهم
الشاب مهوب مرفوع عنه القلم احس في كلامك كنه بزر مايدري وهي الشريره والخطأ مشترك

الان طلعوا البويات والجنس الثالث وسكار وحفلات في الثمامه الله يستر علينا ولا يخسف بنا

شاكر لك موضوعك وانا مو من عادتي ارد الا ان الموضوع حلو ولا احد يزعل علي

ỳάṡṣẻя · #14 26/02/2010, 09:24 PM

إقتباس

الرسالة الأصلية كتبت بواسطة المحترف التميمي


	شعبنا ينقسم الى ( بدوي- جنوبي-حضري- قروي)

,,,

{ يا أيها الناس إنا خلقناكم من ذكر وأنثى وجعلناكم شعوبا وقبائل لتعارفوا إن أكرمكم عند الله أتقاكم }

أتمنى انها وصلت

,,,

leader ksa · #15 25/02/2010, 04:13 AM

ياهلا يالمحترف

بس انا عندي لك مفاجأة

>>هذا الشخص جنوبي على قولتك مع اني ضد التقسيم شكلا ومضمونا >>حسيت اني اللجنة الفنية

ومسألة اني مهبول لان ماحد يعرفني بالعكس انا انسان كل ماطلعت مكان فالرياض لازم اشوف واحد من الجماعه على اني احاول اتلافاهم
رحت لممشى لقيتهم رحت لسوق لقيتهم رحت لمطعم لقيتهم رحت لمقهى لقيتهم رحت للملعب الاقيهم وحتى موب هلاليين

فعشان كذا اقولك تأكد من معلوماتك او تعال الرياض وتشوف ياكثرنا

اما بدوي ينهبل مع عيال عمه والله ياطال عمرك ابد ينهبل على كيف كيفه انا وياه والقصيمي والقروي والحضري وكل انواع الشعب السعودي
ننهبل بكيفنا فالاخير حنا شباب وهذي مرحلة غصب على كل واحد يمر فيها وفيه طاقات لازم نفجرها بس انتوا حددوا الجهة المعينه وساعدونا على اننا نفجرها في مكانها المطلوب

بس مو هذا اللي قاعد يصير الشباب والشيبان والبنات والحريم وكل فيئة لها هبالها وجنونها ولكن ماحد يتكلم الا عن الشباب بس هذا اللي رافع ضغطي ماحد يتكلم عن اي فئة ثانية وحاطين كل المشاكل في الشباب

والسبب لين الحين للاسف ماعرفه ..!!

مشكور على مرورك

تحياتي