السلام عليكم
احب اعطيكم فكرة عن الموضوع قبل مانبدأ فيـه ، وهو مجموعـه من اثار وماضي اجدانا
جبت لكم قصه وقصيدة وحكمه ومثل
وان شاء الله يحوز الموضوع على اعجابكم
كان فيه شخص مغربي (( مغربي يعني غريب عن العرب أما يكون من بلاد الهند والسند أو أنه شخص ما يتكلم عربي كويس )) كان رايح للحج يعني رايح لمكة المكرمة وكان كل يوم عند عرب يضيف عليهم لين يوصل مكه وبأحد الأيام وكانت ليالي برد فا جاه الليل واضاف عند بدوي راعي بيت شعر قال للبدوي أبي شيء أكله انا ذابحني الجوع فا أعطاه البدوي شنينه (( لبن غنم مخلوط معاه ماء )) قال له المغربي أبي بخر (( أي خبز )) قال له البدوي هذا اللي عندي تبيه والا مع السلامة رد المغربي عليه وقال له " الله كريم يا بدوي " فشرب المغربي اللبن وانسدح بطرف البيت يبي ينام والصباح يكمل سفره ويوم جاء حول وقت العشاء مادرى البدوي الا والركايب تنوخ عند بيته (( الركايب = الذلول = بعير مهيأ للسفر والغارات والحروب )) ويقلطون عنده وهو يشب النار وعرف انه هذا أمير من أمراء قبيلة حرب ويقال أنه حجرف الذويبي أو الذوبه ((الذويبي أمير كريم والكريم الله سبحانه وتعالى يقدر الضعيف والمحتاج ويقدر الكبير و الصغير ))
وهو يذبح الذبيحه ويسوي العشاء ويوم قلط العشاء رز وذبيحة وقال البدوي للذويبي اقلط على عشاك قال الذويبي لراعي البيت قعد هالرجال اللي نايم وش هو هالضيف رد عليه راعي البيت هذا مغربي درويش من الدراويش يا أمير لا يهمك قال الذويبي لا لا انا ما اتعشى لين يقوم معاي هالدرويش يتعشى معاي وهو يروح البدوي يصحي المغربي والمغربي بالاصل ماهو نايم وكان يتسمع للسوالف كلها يوم صحى المغربي قال للبدوي ابي موية اغسل يدي فجاب موية يغسل للمغربي يده وهو كاره فا همس المغربي للبدوي وقال ما قلت لك " الله كريم يا بدوي !! " وهو يتعشى مع الذويبي عشاء طيب وعين خير وهم يمرحون (( ينامون )) .
الذويبي بالأصل هو جاي يبي يخطب بنت راعي البيت وبالفعل خطبها منه ووافق أبوها واتفقوا بالصباح يروحون للمدينة عشان يملكون لهم .
وبالصباح مشوا للمدينة الذويبي وراعي البيت والمغربي معاهم وبنص الطريق تحت الطلحه (( شجرة )) نزلوا عشان يصلحون غداهم وهو يجي الذويبي ويصلح قرص (( خبز أقرب ماله الحنيني )) وهو يقطع الخبز ويكسره ويحط معاها دهن وقال تعال يالمغربي تغد معي وبالفعل تغدا معاه ويوم خلصوا ويفركون ايدينهم بعد الخبز والدهن وهو ينتبه المغربي للذر (( نمل )) ينزل من الطلحه للأرض وياكل من باقي الخبز فا قصد المغربي قصيدة يقول فيها
شبعنا وشبع الذر من بعدنا //وللذر من مال الطيبين معاش
يعطي العطى من كان ضاري للعطى // ويمن العطى من كان خاله لآش
واللي مايعرب نيسبوه قبل ويلدوه // يا ويلدوه يأتي عليه ابلاش
وهذي القصيده صوتيـة بصوت الوالد الله يطول بعمره
*لاش : خرطي ماعندك أحد .
*ابلاش : يصير عليه بلشه ويكثر ضره على ابوه .
الذويبي فهم مقصد المغربي من هالابيات فقال الذويبي للبدوي حنا استخرنا يا معزبنا انت ارجع لأهلك وانت يالمغربي هذا طريق المدينة وحنا بنروح لأهلنا .
هذي قصيدة قالها عبدالله الرشيد لصديقه حسين المسطح يوم كانوا بطريق سفر ومعاهم زوجة عبدالله الرشيد وكانت حافية الرجلين والارض فيها شوك وحجر والمشي اتعبها وصارت تهوكع مرة فا قال عبدالله الرشيد هذي القصيدة . جنب حثاث القاع واتبع لها اللين // واقصر خطاك شوين وامش مشيانه ياحسين والله مالها سبت رجلين // ياحسين شيب بالضمير اهكعانه ولو تنقله يا حسين تر مابها شين // ترا الخوي يا حسين مثل الأمانه ولا يشتك يا حسين كود الرديين // ولا ترا الطيب وسيع بطانه
وهذي القصيده صوتيـة بصوت الوالد الله يطول بعمره
خاب يارجلٍ خطبني ماتفكر بالنهار شافني حمرا متره يحسبني اعمر له دار
مرادف هذا المثل هو :
ليس كل ما يلمع ذهب
---
الصميل : يكون نوعين أما يكون مصنوع من جلد حيوان أو يكون من معدن واستخدامه يكون لمخض (( مخض = رج = خض )) الحليب حتى تطلع الزبدة بعد ما يطبخ الحليب ويبرد ويصير لبن وتصفى منه الزبدة ويحفظ اللبن بالصميل .
هذي قصيدة لشاعر شاب بس ماشاء الله أتنبأ له بمستقبل عظيم في مجال الشعر الشاعر سعد الهويمل الشمراني أداء عبدالله حمدان الشمراني
وحده معاقه اسمها شهد تعرفت على واحد اسمه مهنى بعد فتره قالت له انها مشلوله ,, بدا يبتعد عنها.
انشرحت لي القصه وطلب مني اترجم احساسها بكم بيت ,,
هييه يا خيبة ظنوني يا بدايات الجراح ,,,
يالعذاب المر يا قصة نهايات السرور ,,
يالجفا يالحزن يا دمعي على كسر الجناح ,,,
يا جفا صوت الرحيل ويا بجاحات الطيور ,,
يا ظلام الليل روّح ما أبي غير الصباح ,,,
اكتفى قلبي ظلام ومل ظلم ومل جور ,,
انكسر مجداف حبي واختفى صوت الرياح ,,,
واعتلى موج الفراق و ما استدليت العبور ,,
حايره في مركبي بس احيي عالفلاح ,,,
ساجده وادعي الاهي يا رحيم ويا غفور ,,
يا هني اللي يطير ويا هنيه لا استراح ,,,
ويا هنيه لا تبسم بابتسامات الغرور ,,
يا مهنى لا تطير وشايفٍن هالطير طاح ,,,
وين قلبك يا مهنى ما تحس بهالفتور ,,
انت رحت بكبريائك لا ولا قلت السماح ,,,
لا ولا قلت اعذريني يا شهد ماني صبور ,,
ما بقى لي غير حزني يا مهنى والجراح ,,,
ما استلذيت بوصالك لا ولا شفت السرور ,,
يا مهنى رح بدربك دام كسري بالجناح ,,,
ويا شهد خلي مهنى يهتني بين الطيور ,,
الشاعر : سعد الهويمل الشمراني
وبالنهاية اتمنى ان الموضوع اعجبكم واستفدتوا منه :
وانتظر مشاركاتكم اللي تنور الموضوع
واحب اشكر اختي الهنوف اللي ساعدتني بتنزيل الاصوات وتعبتها معي وادعو معي الله يوفقها بالاختبارات وكلكم يارب.
واشكر اخوي RO7_ALHILAL
والمصممة من خارج الشبكه Anra
تعبتهم معي ومشكورين باللي ساعدوني فيه .
أولاً أباركـ لك و للجميع بالتتويج و يا جعلها دوووم يا رب أفراح
و ثانياً إعذرني يا االغــلا على التأخير لكن مثلكـ عارف الأوضاع الحاآآليه
للموضوع:
أعجبني الكم الهائل من المعاني البدويه و القديمه الرائعه مثل شنينه,الركايب.اهكعانه
و لفت انتباهي كلمه الصميل و معناتها عندهم تختلف عن الي أعرفها و إلي هي
عبارهـ عن عصا مجوفه و قويه يتكئ عليها و بعض الأحيان تستخدم في المعاركــ....الخ
و أيضا أعجبني دهــاء و حمه شيبانا الأولين في حسن إتمام الشئ على وجه الصحيح
كما فعل الذويبي و راع البيت في كتابه الملكه في المدينه و هذا أكبر دليل عن بعد قلوبهم
عن الجفاء و الغل الموجود حالياً عندنا طبعاً.
أيضاً قصديه الوفاء و الصداقه المتمثله في عبدالله الرشيد لصديقه حسين المسطح رائعه
و جميله.
و حلوة المثل المرادف للمثل الشعبي صراحه حاولت افكر فيه و أترجمه ماش ما وضح لي
لكنك ساعدتني بالمثل التوضيحي .
و أخيراً القصيده الموجوهـ الى شهد و التي أعتبرها محزنه و جزله و وجدانيه أكيد و أعجبني
البيت هذا
انت رحت بكبريائك لا ولا قلت السماح ,,,
لا ولا قلت اعذريني يا شهد ماني صبور ,,
أخيراً .أشكرك أنت و أبوكـ و الله يعطيه طوله العمر و يخليه لكم و أشكرك على التميز في طرحكـ
فلولا تعليقاتكـ الموقرهـ ما فهمت و لا أنسى أن أشكر الأعضاء الي ساعدوكـ طبعاً في تنزيل الموضوع
من خارج الشبكه و من داخلها .
تقبل تحيآآآتي و جُل احترآآآآمي
عادل
في بادئ الأمر الله يحفظك لك الوالد وينعم عليه بالصحة والعافيه .. وما شاء الله عليه .. صوته والقاؤه للقصيد رائع ويستحوذ الأسماع والمشاعر معا ،،،
إقتباس
وين الشيوخ وثابتين المواقيف ... ايام كان الناس جوع وفقارى
صح لسان من قاله
البيت بسيط في مفرداته ولكن معناه عظيم .. ( الموقف ) مفردة لم تتبدل ولكن معناه بين الماضي والحاضر تغير في نفوس الكثيرين من ( مبدأ ) الى حالة أخلاقية تشبه عملية اصطفاف السيارات في مكان ما والذي اطلقنا عليها إيضا ( موقف ) !
قصة المغربي ( الغريب ) والبدوي والأمير .. قصة رائعه .. واستمتعت بمفردات ( القرص ) و ( الذر ) حيث كنت أظنها مفردات حكرا لنا شعب اليمن
والقصيد التي وردت في خاتمة القصة .. جعلتني اتعجب كيف يمكن ان يكون قائلها ليس من العرب ؟!!
أخي الكريم : عقل الهلال كما انك تستاهل إيضا هذا الوجه الصبوح
حقيقة لقد أستمتعت جدا بكل فقرة تناولتها من التراث الجميل
ومن جميل التراث انه عندما تشاهده او تقرأه أو تستمتع اليه فأنه يتملكك حالا وقد تملكتنا في موضوعك يا أخي الكريم ،،،
من نظم القصيدة التي طرحتها في آخر الموضوع كان متميزا .. كما أن من قام بأداء القصيدة يتمتع بصوت والقاء متميزان يتناسب مع مفردات القصيدة ذات الأحساس المرهف ،،،
إقتباس
أستودعك رب البرايا ربك ... أستودعك هو عالم بالنية
بأدعي أله قد حرمني قربك ... في جنته يجعلك لي حورية
كما أن وصف الحال الذي تعاني منه بطلة القصيدة الأخيرة ( شهـد ) نسأل الله لها العفو والعافية .. كان متمكنا بنص مؤلم ،،،
هل يمكن أن أجد هذه القصيدة وأخرى على اليوتيوب ؟
حقا يا اخي الكريم : عقل الهلال .. اشكرك جزيل الشكر على هذا الموضوع الرائع ،،،
والشكر ايضا لكل من تعاون معك .. أختنا ( الهنوووف ) واخينا الكريم ( روح الهلال )
هنالك سؤال ورد في ذهني
هل يكونان الشمريان سعد وعبدالله هما عقل الهلال وروحه ؟!!
هلالي من أرض اليمن
لبى هالمرور يا شيخ
فيه قصائد كثيرة قالوها اشخاص غرب لكن هذه الابيات ثبتت لأنها كانت مثل واستشهاد بالاعتناء باختيار النسب الزين .
طيب الصميل ماله شبيه عندكم ؟
شهـد المسكينه الله يرأف بحالها ويعوضها بدال مهنا جعله ما يتهنى بس ماضنيت أن الشاعر نزل له حاجه ع اليوتيوب لأنه توه افبداياته لكن ممكن تحصل قصايد على نفس اللحن .
لااااا سعد وعبدالله مش هما عقل وروح الهلال لأن سعد وعبدالله يرجعون لقبيلة الشمراني وهذة القبيلة تقطن الجنوب أما عقل وروح فهما من أهل الشمال وليسوا شمامرة مع إن شمر قبيلة عريقه ونفتخر لو أننا منهم وهم خوالنا وانسبانا بس أنا وروح مش شمامرة .
هلالي من أرض اليمن أكبر شررف للموضوع هو ردك القيــم والكريـــم
M.Adel : أحلى باك عادل , مرورك عطر الموضوع
فعلاً حياة الأجدادنا رغم شقاها وتعبها واللي مفروض انه تضيق صدروهم لكن بلعكس تحصل صدورهم وسيعه . ورجعة البدوي من نص المشوار عادية لأنه عرف انه غلط بحق ضيفه.
الله يعطيك العافية على الدعوة ويارب يخلي لك كل اللي تبيهم يارب .
M!ss 7up :
الابداع مرورك لو أنه ماطوول بس عاد معذورة اختبارات وكذا ,, يللاهـ عاد موفقه يارب انتي وكل اللي عندهم اختبارات . لا تنسين تبشريننا عن اختباراتك وكذا بيضوا الوجه .
متآبعه بصمت :
أيييييييييه يازمان العجايب .
ياشهد اسمعي كلام متابعه تقول لك المعاق معاق التفكير
مرورك راقي ياراقيه . وميرسي ع الدعوة ويارب يخلي لك كل اللي تبينهم ويطول باعمارهم .
عقل الهلال..
موضوع راقي ورائق ..
جمع أصالة الماضي بمعاصرة الحاضر..
الله يخلي لك الوالد ..
انجرحت والله من قصة شهد..
لكن أبقول لها : إنتي أكرم 1000000 مرة من الحقير هذا الي راح ولاقدرها وقدر مشاعرها..أقل شيئ يشرح لها ليش ابتعد عنها..وبراحتها عاد تقبل أعذاره وإلا لا بس المهم يقول لها..
الله يسعدها ويعوضها خير..
بس الخط كان صغير شوي وأتعبني والله..بس دامه منك فهو رررررررررائع..
شكرا لك..
..سيناتور..
قريت الموضوع.. انا كنت داخل مستعجل وشدتني صوت القصيدة ونزلت اشوف راعيها و لا مكتوب بصوت الوالد الله يحفظه ..و بس..
قصة القصيدة مختلفة عن القصة التي سمعتها و هي ان غريب داخل عند الشاعر تحت ظل الشجرة و ابن الشاعر رافض ان ياكل الغريب معه واصر عليه الشاعر و بعد الأكل وجد النمل يأكل باقي الطعام وقال هذه القصيدة ..