15/01/2010, 09:08 AM
|
| زعيــم متواصــل | | تاريخ التسجيل: 25/11/2008
مشاركات: 63
| |
|
فيه إعادة لمباراة الفتح والشباب
فيه إعادة لمباراة الفتح والشباب ,
ما فيه إعادة !!
إلا فيه إعادة !!
أقولك ما فيه إعادة !!
يالحبيب والله فيه إعادة !!
أقولك ضف وجهك ماكو إعادة !!
لا حول ولا قوة إلا بالله يا رجال أنا متأكد فيه إعادة كل الناس تقول , والخبر منتشر !!
يابن الحلال هذا رأي اللجنة في الظهر , وفي العصر توقف , وفي المساء تغير !!
الله يهديك ترى كل الخبراء قالوا خطأ فني يستوجب إعادة المباراة !!
أعيد وأكرر لك يالحبيب مالك شغل بقرار اللجنة ما فيه إعادة !!
يا خوي ترى قانون كرة القدم واحد حتى لو كان الدوري في .. عطارد أو زحل !!
يارجال أصلك ما فاهم شيء , ولا فاهم الطبخة , ولا «الفزعة» .
طيب الطبخة وفهمناها .. فهمنا هالفزعة ويش تكون ؟
أسأل الربدي تراه فاهم في هالأمور وايد , وعيني عليه باردة والله ما قصر !!
أقول خلنا من الربدي ومن غيره , وقول لي الدوري السعودي تابع لقانون كرة القدم العالمي , والا أنا غلطان في هالسؤال ؟
والله الحكاية كل الحكاية اللي عرفناها في الاحتجاجات هي (قبل شكلا ورفض مضمونا) ودي أفهم هالعبارة من زمان وعجزت أفهم , لأن كل القرارات تحت وطأة هالكلمة ....!!
يعني ماكو إعادة , هذا هو القرار الأخير .
هذا هو القرار , وترى ما فيه استئناف , وبلط البحر كان عندك شيء .
طيب رأي الخبراء , وقانون كرة القدم , واللوائح والقوانين , والأنظمة كلها ما نفعت مع الفتح ؟
فيه جملة عند حبايبنا المصريين بتقول «بلها واشرب ميتها» وفي أغنية لجورج وسوف تقول «أرضى بالنصيب» لكن في مثل آخر يصلح للفتح «ما ضاع حق وراءه مطالب» .
طيب وإذا قدم الفتح استئناف ممكن تعاد المباراة ؟
تعاد في المشمش , إذا كان الفتح حصل على ثلاثة أصوات من اللجنة في اجتماع الأمس مع الاستئناف ولا صوت , واللبيب بالإشارة يفهم ..!!
يعني أفهم من كلامك ما فيه إعادة ؟
شوف فيه إعادة إذا كانت المسألة كرة قدم , وليس» كرة الهدف « .
طيب ويش الفرق بين كرة القدم , وكرة الهدف ؟
يالحبيب .. كرة القدم تعتمد على النظر وهي للاعبين الذين أنعم الله عليهم , بنعمة البصر , يعني عيونهم سليمة , أما كرة الهدف فهي لعبة مخصصة « للمكفوفين « وتعتمد على السمع وليس على النظر , واللجنة الفنية بالاتحاد السعودي ومن قبلها لجنة الحكام برئاسة «حاد البصر «عبد الله الناصر , حبوا يقلدون المطاعم الفاخرة التي تجيد عمل وخلط العصائر وتعمل في نهاية المطاف « كوكتيل « فهم جمعوا ما بين كرة القدم التي تعتمد على « البصر « وكرة الهدف التي تعتمد على « السمع « لذلك أخذوا بتبرير الحكم عندما قال « سمعت الكرة تلامس يد الحارس « ..!!
طيب كرة القدم في كل انحاء العالم تعتمد على النظر وليس على السمع ؟
يا أخي .. ما تفهم أنت ..قلت لك .. الجماعة ما حبوا يكسرون بخاطر « المكفوفين « واعتمدوا على السمع , وهذي لفته كريمة منهم , لأنهم يسعون لدمج ذوي الاحتياجات الخاصة في المجتمع « جزاهم الله ألف خير «.
عندي سؤال أخير .. طيب لو تكررت هذه الحادثة من جديد بنفس السيناريو وكان الفريق المتضرر له جمهور وإعلام .. ويش بصير ؟
عيب عليك .. أنت الحين تتهم اللجنة أنها ظلمت الفتح لأن مش من الأندية الكبيرة ( اللي لها ظهر ) واللجنة معروفة بالنزاهة , والدليل قرارها الصارم في المباراة القضية , ما احتاجت (48) ساعة لتفجر القنبلة التي جعلت « الفيفا» بشحمه ولحمه , يشكك في قوانين اللعبة « كفو والله كفو «.
والحل ؟
أسأل أهل الحل والربط ..!!
"نقلا عن صحيفة اليوم السعودية"
الاستاذ عيسى الجوكم
والله كلام من صميم القلب لحال كرتنا السعودية
والله عجبتني المقالة وحبيته انشرها لكم |
الوضع العادي
