17/12/2009, 01:07 AM
|
 | مشرف سابق في منتدى الجمهور الهلالي | | تاريخ التسجيل: 21/02/2008 المكان: مدريــدي / ارسنــالي
مشاركات: 13,119
| |
|
ديـر الـقـهـوة يـا مـايـكـل .. قرّب الـقـدوع يـا اسـتـيـفـان
حيــــــــاكم مزبن لابوها من ببسي.. لابوها من كوكاكولا مابقى الا انتم والله هذا اللي كان ناقصنا شكلنا بنقلبها فله سن توب وسن كولا تموت الحرة ولاتأكل بما كانت به ترضعنا انا جيت  ... وفي الوقت اللي انا فيه اكون ( جيت ) ... تكون سمكة الهامور اللئيمة وحبات القريدس المتوحشة في داخل معتقل الفرن
وأكاد أجزم ان الدعوى قد تحوّلت الى ( شلاويط ) داخل تلك الصينية التيفال
ومثل منتم عارفين... الانتظار قاتل ومدمّر للجوعان... خصوصاً اذا كان مجموعة انسان
علشان كيذا
قلت خلّن أجي أبربر عليكم شويات حتى يحين موعد الدّغ المباح 
السالفة ومافيها ياطويلين الاعمار << جدي الله يرحمه كان يزعل اذا احد قالها ويقول طويل العمر ابليس 
قبل فترة ليست بالقريبة ولا بالبعيدة ( علشان اكون دقيق فاخر )
صدمت بسيارتي في حادث رباعي قدام ايكيا مخرج 16
ولسوء حظي كنت انا آخر سيارة من ورى
يعني اذا جاء المرور بيحط الخطأ علي انا بالمية لأني أعتبر انا اللي صادمهم كلهم 
الموهيييم
قعدنا نحتري المرور
وبما ان الحادث وقع في تمام الساعة السادسة والنصف صباحاً
إذا جميع رجال الامن والمرور زابنين عند الفوّالين ويدغّون بصحون الكبدة والقلابة
وحنّا الاربعة واقفين نحتري.. واقترحت عليهم نربّع بلوت علشان نقتل دقائق الانتظار
لكن للاسف... اثنين هنود وواحد سوري... كلهم مايعرفون
جانا رجل المرور بفضل من الله في تمام الثامنة ( بعد ساعة ونص )
وماشاءالله عليه... ما اخذ معه المحضر والتقرير اكثر من ثلاث دقائق
ثم مادريت الا وهذيك السطحة تسحب موتري
بعالي الصوت صرخت :
سيارتي يالحبيب... هييييييييه انت... اترك سيارتي  
طلع لي راسه من الدريشه وقال :
حنّا معتمدين من المرور... ولازم نسحب أي سيارة يصير عليها حادث.. اجباري
قلت له :
بس سيارتي تمشي والصدمة مالها دخل.... ليش تسحبها ؟؟؟
قال :
هذي تنظيمات المرور... واذا خلصت موضوعك معهم تجي وتستلم سيارتك
تركته انا.. وقلت بكيفه دامها تعليمات المرور وعلى حسابهم
وخذ يامطامر بين المرور والوكالة
وماجاء اعتماد التأمين الا بعد عشرين يوم
ورحت اطلع السيارة من المكان اللي اخذه فيها راعي السطحة
وأثاري الرجّال يقول لي حاسب
قلت له : وش حسابه ؟؟
قال : قيمة سحب السيارة
قلت له : مو انت تقول انك معتمد من المرور وان السحب اجباري حتى لو كانت السيارة تمشي ؟؟؟
قال : إلا... لكن مو ببلاش... وانت تدفع كل شي
ويوم شافني تغيّر لون وجهي قال :
وازيدك من الشعر بيت... غير السحب بتدفع خمسين ريال عن كل يوم فات من الحادث وسيارتك عندنا
ويحسبها وتطلع 1200.... ومير اعطيه وآخذ سيارتي واودّيها للوكالة
وتقعد عندهم اربعين يوم
وطبعاً طوال هالاربعين يوم كنت مستاجر سيارة
ويوم قربت تخلص سيارتي رحت للوكالة اشيّك عليها
قالوا لي ( ماباقي الا نشوف لك كفرات منّا ولا منّاك )
استغربت انا وقلت : ليش كفرات... وكفراتي وين راحت ؟؟؟
قال المهندس : كفراتك انعدمت بعد الحادث
قلت له : كيف انعدمت وهي ماجاها شي ؟؟
الرجّال قام يلف ويدور... ثم عطاني ظهره وفرك... وعرفت ان الدعوى فيها بربسه 
جاني ولد شاب سعودي يشتغل معهم في نفس المكان
وقال لي : تراهم يفكون الكفرات الجديدة اللي مثل كفراتك ويبيعونها
ويلفقون لك كفرات منتهية صلاحيتها ( شغل نصب )
طلعت من عندهم وجبت رقم فاكس الادارة العامة حقتهم بجدة
وارسلت فاكس فيه كل اللي صار
ساعتين بس ويجيني اتصال من مكتب نائب المدير العام... يستفسر وياخذ التفاصيل
وبعد المغرب ياجماعة الخير... مدير المركز اللي فيه سيارتي يتصل بي
ورحت له... ويخمّني ويحب راسي ويعزمني على قهوة تركية
ويسلمني السيارة بعد ماركّب لها اربع كفرات جديدة.. وحتى الاستبنه غيّرها
وزود على كذا
قال لي رح لراعي السطحة جب منه فاتورة وانا اخلّي شركة التأمين ترجع لك فلوسك
هذا اللي صار.. والله على ما اقول شهيد
علشان كذا خذها نصيحة :
اذا صدمك احد ... وحتى لو هو الغلطان .. سامحه وطيّب خاطره وخله يروح
وترى ورقة الاصلاح بخمسين ريال عند كل الورش
شكل الصينية احترقت
.
.
.
ومضه
عندما عاد الامام الشافعي من احدى سفراته أعطاه احد الامراء مائة الف درهم.. فلم يصل الامام الشافعي الى مكة عند امه الا وقد انفق جميع ما معه في طريقه على المحتاجين .. فلما دخل على امه البيت وقد علمت انه اُعطي هذا المال فسألته عنه فقال : قد انفقته كله ..
فقالت له : (( لولم تفعل ذلك لما اعتبرتك ابني ولما ادخلتك البيت ))
هكذا تكون الأم مصنعاً للرجال
مدفن
كم أكره ذلك الحقير النذل المدعو ( ناموس )
ابن الذين اذا شفط دمّك مايرحمك ولايفكك
وكم احب ذلك الانيق المدعو ( سيرجيو راموس )
فهو رغم جرياته ممتع وصرقعته دايم تشدّك |
كآنوا ياخذون الفرشآت حقت الرجل الجديده ويبدلونها بوحده مجيمه 
<< جورج كلوني 
ياخي ذولا ماهم فالحين الا في الأنظمة اللي مدري وش تبي والمخالفات 
خـاصـه نقـطـة النـاموس لابـارك الله فـيه 
الوضع المتطور
