سلام عليكم يا زعماء..

اول شي هاردلك التعادل اللي هو بمثابة الخسارة..

وان شاء الله الوعد المباراة القادمة أمام الاتحاد ..

طبعا حاب أقولكم وش صار لي في مباراة الهلال والشباب..

كنت متواعد انا و اثنين من اقربائي اننا نروح الملعب سوا ..

واحد منهم ساكن في دولة عمان الشقيقة وجاي يعيد عندنا بالرياض .. والمفروض ماشي الاربعاء عشان المدارس بحكم انه مدرس رياضيات.. لكن لعيون الزعيم حضر المباراة وبعدها مباشرة مشى لعمان ..

<<< اللي يبي دروس خصوصي يعلمني!!! :to:

المهم رحنا للملعب .. يوم رحت أبي أقص التذاكر .. أشوف الشباك فل .. زحمة وحوسة..

قعدت أناظرهم قلت يمكن أعرف أحد صاف يشتريلي معه.. ماعرفت أحد فيهم ..

قلت خلني أروح الشباك الثاني ..

ويوم أروح الشباك الثاني الا ألقاه فاااااااااااااااضي .. قلت يمكن قضت التذاكر عنده.. ويوم اروح له الا التذاكر موجودة ..:d

وش اللي مخليهم متزاحمين على شباك و ساحبين على الشباك الثاني الله أعلم مع ان ما بين الشباكين الا بوابة الدخول..!!!!

المهم قصيت التذاكر لي واللي معاي .. ودخلت الملعب.. يوم جا التفتيش الا و أشوف واحد قدامي خذوا شاله .. الا وافك الشال من رقبتي واخبيه خفت يصادرونه..

المهم عديت التفتيش وانتظرت اقرباي .. قريبي خش بعدي والقاه حاط الشال على رقبته ولا أحد كلمه.. استغربت قلت له ما خذوه منك ؟؟

قال لا !!

قعدت أقول في نفسي .. وش السالفة؟؟ عبط عساكر يعني ولا ايش؟؟

الا ويجيني عسكري يبي يمشيني .. " لا توقف هنا "

قلت خلني أسأله : الحين ليه الشالات ممنوعة ؟؟

قال : أي شال ما عليه شعار موبايلي ما يدخل ..

يوم قعدت أناظر الشالات المصادرة .. الا كل الشالات صدز ماهيب حقت موبايلي ..

بعدها قعدت أفكر ليه طيب ؟؟

فكرت شوي وعرفت ..

انه احتمال ان هالشي من شركة موبايلي نفسها ..

لأنه من أبسط حقوقها كونها الشريك الرسمي انها تمنع دخول الشالات اللي ما عليها شعار موبايلي .. مع توفير شالات مع كل تذكرة .. كنوع من الدعاية لها..

وبرضوا عشان كل مشجع يكون معاه شال .. وشكل الشال موحد ويعطي منظر جمالي في التشجيع.. وانتم تخيلو المنظر..

وبعد تبغى تمنع بيع التذاكر في السوق السودا مع اني اشوف ان محد يشتري من ذولي اللي وافقين في المواقف الا واحد دلخ وغبي ..:s5s:

تقولي ليش ؟؟

يبيعون التذكرة بـ 25 ريال وبدون الشال ..

يعني دافع زيادة تقريبا 15 ريال ..

5 ريال حق التذكرة و10 ريال حق الشال ..

فلا أحد يلعب عليك ويقول لك التذاكر خلصت ..

اتعب شوي ورح للشباك واشتر التذكرة .. ومعها شال زيادة.. s13s

أدري اني طولت عليكم .. بس اللي حبيت أقولكم اياه المباراة الجاية لا تجيبون شال عليه عبارات .. لأن موبايلي راح تعطيك .. وهذا أقل شي ندعم فيه شركة موبايلي.. اللي سوت أشياء كثيرة من أجل نادي القرن..

وتقلبوا تحياتي .. وآسف ان كنت ثقلت عليكم..

محبكم.. خيالو

الرسالة الأصلية كتبت بواسطة هلهول الزعيم (مشاركة 13762144) صراحه حركه غبيه انا شاري شالات وعلم بقيمة 60 ريال قبل ما ادخل .. حتى داخل كأني مهرج ولا عندي علم ابدا ان دخولها ممنوع واتفاجئ بالأمن يقوللي ممنوع حاولت افهم منه ما رضى يفهمني رميتها وقلت العوض .... سالت عسكري داخل قاللي احتمال موبايلي مانعتها هي وحده من حلين يا ان موبايلي تعلنها رسميا وأكثر من مره وقبل كل مباراه وعن طريق شبكة الزعيم ان دخول غير شالاتها ممنوع او تخلي الوضع يمشي زي ما هو معليش انا داخل أشجع الهلال .. مو موبايلي

والله مشكله المفروووض مايمنعون اي مشجع كذ1

وبنفس الوقت نحمل شالاات موبايلي


اتمنى من ادارة الملاااعب التي تقاااام فيها مبارياة الهلااااال النظر في ذلك