12/09/2002, 12:55 PM
|
| زعيــم فعــال | | تاريخ التسجيل: 13/12/2000 المكان: الرياض
مشاركات: 239
| |
|
سواليف أبو فهد ... الجزء الرابع .. الصحافة (1) ...؟؟؟؟
السلام عليكم
في الأجزاء الأول والثاني والثالث مع حبيبنا (أبو فهد) سولفنا عن بعض الهموم الرياضيه ... وهو مثل ما تعرفون واعدني إنه يبي يتكلم على الصحافة الرياضية ، وطبعاً أبو فهد ما هوب صحفي وعلاقته بالصحافة كقاريء يومي لها فقط ، وعندما يتحدث ويذكر بعض آراءه الجريئه ، فمن الطبيعي أن يوافقه البعض ويخالفه البعض الآخر ، وأقول للإخوان الصحفيين اللي يقرؤون هذا الموضوع إن ابو فهد هذا (شخصية وهميه) ، ما أبغاكم تستلموني حش ، الحق على (أبو فهد) ، وتذكروا مقوله اللي أنتم خابرين (إختلاف الرأي لا يفسد للود قضيه ) ، وإستمتعوا بالحوار اللي قسمته الى جزئين ، لأننا في عصر السرعه ، وإعذروني على الإطاله ...؟؟؟
..............................................قبل الموضوع ...................................................................
أبو محمد : السلام عليكم يابو فهد .
أبو فهد : وعليكم السلام ... سلامات أخوي ... تأخرت شوي ... وأنت تعرفني ... مواعيدي ثابته ... وأحب الالتزام بالمواعيد ...؟؟؟
أبو محمد : ذكرتني يابو فهد بمديرنا ... فيه واحد كل يوم يتأخر ... وهات يا أعذار ... قام المدير وجهز له ورقة ... فيها أكثر من 100 اختيار للأعذار ... وقال له : لا تتعب نفسك يا وليدي ... حط علامة صح قدام العذر اللي يناسبك ... ولا تحرجنا وتحرج نفسك ... ؟؟؟
أبو فهد : سلمني على هالمدير... وش هالأوراق اللي معك ...؟؟؟
أبو محمد : محضر لك أسئله يابو فهد ... أنت خابر موضوع الصحافة ماسك في راسي ... والجماعة ينتظرون مقابلتك في المنتدى ... تصدق واحد إتصل على برنامج حوار الرياضة (قناة الجزيره) ... يبي عنوانك ... ؟؟؟
.............................................. الصحافة ................................................................
أبو فهد : ما شاء الله عليك ... مواريك صحفي ناجح ... شكلك عرفت الصنعه من البداية ... عاد (حوار في الرياضة) ... تعلمت ... من أولها إثارة ودجل ...؟؟؟
ولو (خلك حضاري) ... وين المسجل ... شايل معك أوراق ... هاهاهاهاها ... ؟؟؟
أبو محمد : والله يابو فهد أخاف أنسى ... قمت وكتبت بعض الأسئله اللي في راسي ... ؟؟؟
أبو فهد : شكلك بتولعها نار مع الصحفيين ... تراها سواليف وأنا أخوك ... لا تروح بعيد ...؟؟؟
وسكت أبو فهد شوي وطالعني وقال:
مثل ما تعرف الصحافة فيها المراسل والصحفي والكاتب والناقد ... وطبعا حنا بنتكلم عن الرياضيين فقط ... فئه (نصف نجمه ) ... أما الإخوان الأفاضل فئة خمس نجوم ... اللي فرضوا إحترامهم على الجميع ... فهم خارج الموضوع من أساسه ... وهذولا مدارس منها نستفيد ؟؟؟
أبو محمد : ( يا جبان) من أولها بديت تتردد ... ؟؟؟
أبو فهد : العين ما تعلا على الحاجب وأنا أخوك ... وبعدين يا أخي خل أكمل كلامي ... وخلنا في (نصف النجمه) ...؟؟؟
لمعلوميتك كثير من هاللي تشوفهم يملون الصفحات ... وهات يا مقابلات ما صارت ... كل غرضهم ... (من باب الميانه أو التقرب) من المسئول أو الإداري أو اللاعب ... وطبعاً أكبر همهم ... تطلع صورهم بالألون ... وتعليق تحت الصورة يقول الضيف ومعه (الزميل) ... علشان الشهرة والترزز ... بعضهم تشوف غترته (قامزة مترين) قدام ... والطاقية أكبر من راسه ... والأدهي وأمر إنه يشوف روحه صاحب فضل عليهم ... وإذا كذبوه (شرشحهم) ... وإن تركوه (تمادى) ... وأهم شيء يملأ الصفحات ...؟؟؟
أبو محمد : معقوله يابو فهد ...؟؟؟
أبو فهد : لا وأزيدك بعد ... تصدق فيه صحفيين يعطون بعض الناس ورقه بيضاء علشان يكتب فيها الأسئلة والأجوبة للمقابلة ... وأهم شيء إن تكون صورته وياه واضحة ... هذا مفهوم الصحافة عند بعض الناس ...؟؟؟
أبو محمد : هالكلام ما يصير ... أظنك تبالغ ... معقولة ورقه بيضاء ومقابله ما تمت ...؟؟؟
أبو فهد : وبعض هاللي تشوفهم شايلين المسجلات ... قرائتهم وكتابتهم ركيكه ... ما يعرفون يحطون كلمه على كلمه ... أو يكون خطهم مثل (مواطي الدجاج) ...؟؟؟
أبو محمد : ها ها ها ها ... (مواطي الدجاج) ... الله يقطع شيطانك ... ضحكتني يابو فهد ...؟؟؟
أبو فهد : وبعضهم يأخذ الأوامر في التلفون ... مثل عادل إمام ... (أكتب يا حسين إكتب) ... والأبله ما غير يردد ويقول ... سم ... إبشر ... سمعاً وطاعه ... المهم تكون راضي عني ...؟؟؟
أبو محمد : هذولا ما علينا منهم ... هالأشخاص معروفين ... على قد حالهم ...ويبون أكل عيش ... لكن العتب على اللي ينشر مقالاتهم ...؟؟؟
أبو فهد : لكن هالنوعية هم اللي تلقاهم (مالين) الجرايد كل يوم ... أغلبهم مراسلين ... يكذب عليك وهو يضحك ... وخذ أخبار على كيفك ... يوميا تقرأ لهم ... هاتفيا ( ريوديجانيرو ... نيويورك ... لندن ... روما ... فرنكفورت ... مدريد ... طوكيو ... الوكالات) ... وهات يا أخبار عجيبة ... مع كبار المسؤولين العالميين والمشاهير من لاعبين وإداريين وغيرهم ... صرح فلان ... ونفى علان ... ؟؟؟
إذا قريت الخبر تفتح ثمك وتندهش ... كن هالمسؤولين ينتظرون سعاده الصحفي يتصل عليهم علشان يصرحون له ... وتتسائل مع نفسك ... ما شاء الله الجماعه (يتكلمون لغات) ... مع إنهم ما يعرفون يحطون كلمة على كلمة (بالعربي بعد) ...؟؟؟
أبو محمد : طيب وين المسؤولين عن الصفحات الرياضية عنهم ...؟؟؟؟
أبو فهد : أظن والله العالم ... في بعض الجرايد ... (وافق شن طبقه) ... أو بعض رؤساء التحرير يقول ... منين يجيني (أهبل) مثل هذا يسوي كل اللي أبيه منه ... ؟؟؟
أبو محمد : لا ما يصير هالكلام يابو فهد ... رؤساء ومدراء التحرير ... تفكيرهم أرفع من كذا بكثير ... ؟؟؟
أبو فهد : والله يا الصحافة وقصصها فيها بلاوي ... وكثير من هاللي تشوفهم يترززون ... وهات يا فلسفة وتنظير ... مثل البالونه المنفوخه ... ما هنــــــاش ...؟؟؟
والعجيب إن هالعينه من الصحفيين ... معروفين ... ومالين الصفحات ... وهم من أهم أسباب التخلف والتعصب الرياضي عندنا ... واللي على راسه بطحاء ... (يحسحسها)... ؟؟؟
أبو محمد : طيب يابو فهد ... والحل في نظرك ...؟؟؟
أبو فهد : الحل إن مثل ذولا ما ينفع لهم الا العين الحمراء ... وشوت بالرجل بعد ...؟؟؟
أبو محمد : طيب المشكلة في صحافتنا ... إن كل واحد يتهم الثاني اللي ما يتوافق معه بالميول إنه من هالنمونه ... وشلون تميزهم ... وتعرفهم ...؟؟؟
أبو فهد : أهل الخبرة يعرفون الزين من الشين ... فيه مقومات وأسس لازم تتوفر في الصحفي ... وإذا بغينا نتطور ، لازم نستفيد من اللي سبقونا ، أو اللي جو من ورانا وتعدونا ...؟؟؟
ناظر (الصحافة العالمية) ، وعلشان نكون واقعيين أكثر أقول لك ، (خلنا في ربعنا) قارن ما بين صحفنا وصحف الكويت والإمارات ، والصحف المصرية بعد ... وفرق بينها ... وبتشوف الفرق شاسع وبعيد ...؟؟؟
أبو محمد : من أي ناحية أقارن ...؟؟؟
.............................................. الصحافة المتخصصة .....................................................
أبو فهد : خذ عندك مثلاً ، حنا أكثر دوله عربية عندها جرايد رياضية متخصصة ، وكل جريدة يومية تعطي القسم الرياضي أهمية كبيره ، علشان السوق طبعاً ، ولكنها مع كثرتها ... وجودها كعدمه ...؟؟؟
أبو محمد : والغاية يابو فهد ...؟؟؟
أبو فهد : الغايه إن كل صحيفة تنشد النجاح ... لازم يكون عندها أهداف معينه تبي تحققها ...؟؟؟
أبو محمد : كلام صحيح ... وهدف الجرايد ... النجاح والإنتشار...؟؟؟
أبو فهد : والهدف يحتاج لمضامين وأسس ... من ضمنها الصدق والأمانه ... الصحافة لها دور كبير في بناء المجتمع ... وإذا ما قامت بهالدور ... ولا عطتنا من خيرها ... على الأقل تكفينا شرها ...؟؟؟
وبالنسبة لصحافتنا ... خل أعطيك مثال بسيط ... وأتكلم في (الصحف اليومية المتخصصه) ... طبعاً معروف إن جريدة الرياضية هي الأقدم والأشهر والأكثر مبيعاً بين زميلاتها في الساحة... وفيها مجموعة من الكتاب المشاهير ، لكن أبغاك تأخذ أي عدد وتتصفحه ...؟؟؟
أبو محمد : طيب والقصد يابو فهد ...؟؟؟
أبو فهد : تحس وأنت تطالع الجريدة ، إن ما فيها مواضيع ، طبعاً الجريدة من 16 صفحة ... شف الصفحة الأولى كلها عناوين رنانه ... وبعدين شف مساحة الصور ، والدعايات ، والعناوين بالبنط العريض ... تلقاها تملأ أكثر من 60% من الجريدة ....؟؟؟
أبو محمد : يعني خلاصة كلامك الجريدة 16 صفحه ...يصفى منها 6 صفحات ...؟؟؟
أبو فهد : لا يا أخي الـ 6 صفحات اللي تقول ، منها صفحتين (حشو) أقلام القراء ، يعني إجتهادات من خارج الجريدة ، وأكثرها حش في بعض ، أو يكتبونها بعض الصحفيين ، وصفحتين (فن) مع إن الجريدة رياضية ، (لأن ما عندهم مواضيع أصلا) ، وطبعا صفحه أو صفحتين معلومات وأخبار من وكالات الأنباء عن بطولات الدول العربية والغربية ، وصفحة أخبار متنوعة ، ويبقى كم عمود بأقلام الكتاب (على حسب مستوياتهم).
أبو محمد : طيب هذي هي الجرايد يابو فهد وش تبيهم يسوون ...؟؟؟
أبو فهد : يعني خلاصة الكلام إن اللي يصفى لك وتقراه ... ما يتعدى صفحة وحده ... وفي وقت المناسبات صفحتين ... أنت خذ أي جريده أجنبية (متخصصه) ... وتصفحها وبتشوف ... وطالع المضمون وقارن ...؟؟؟
وبعدين عندك دليل واضح على إن الجماعة همهم (يعبون الصفحات باللي يصير) ... يحشونها بـ ( الجداول المكررة) ... اللي دبلوا كبودنا فيها ... واللي يحطونها كل يوم وعلى مدار السنه وبخط كبير للمباريات) ...؟؟؟
أبو محمد : طيب الجداول مفيده وضروريه ، وما فيها شيء ...؟؟؟
أبو فهد : الجداول مفيدة لكن بهالطريقة ، الجداول عندنا (إملأ الفراغ) ... حشو صفحات مكررة يوميا ... لجميع المباريات لكل الدرجات والألعاب ... من بداية الموسم ... وبالخط العريض على 3 أعمدة ... يعبون لهم أكثر من (صفحتين يوميا) ... فيه حشو أكثر من كذا ... على الأقل تكون الجداول الشامله بعدد (إسبوعي) ...؟؟؟
ولمعلوميتك في مصر مثلا ... ياخذون حساب السطر الواحد ...؟؟؟
وبعدين يا أخي شف الجداول لازم تكون ديناميكية ... وفيها حركة وتجديد ... تصفح لك الصحف الأجنبية .. وتابع المساحة والطريقة اللي ووضعها للجداول والتحليل المصاحب لها ... وما أظن مثل هالموضوع يجهله الأساتذه الكبار أمثال (صالح الحمادي وصالح الطريقي) وتعرف قصدي ...؟؟؟
أبو محمد : وضح لي لو سمحت ...؟؟؟
أبو فهد : يا أخي تلقى في الجداول المطلوبه لازم فيها معلومات وإحصائيات ونسب توضح لك طريقة اللعب وإسلوب الفريقين ... واللاعبين ونسبة عطائهم ... والدقائق اللي لعبوها ... والمجهود اللي بذلوه ... والإستحواذ على الكره ... أما عندنا ... (مكانك راوح)...؟؟؟
أبو محمد : وشلون (مكانك راوح)
أبو فهد : من يوم عرفت جرايدنا وهي تعتمد على أسلوب الوصف ... خذ سرد على مزاج كاتب الخبر ... وميوله طبعا ... يعني بعد أي مباراة خذ جريدتين مختلفتين ... وشف وصف المباراة ... وركاكته ... جماعتنا تعودوا على هالطريقة ... مع إنها ما فيها فايده ... لازم نستفيد من الآخرين ؟؟؟
إذا بغينا نتطور لازم نستخدم طرق حديثة ... ونستفيد من تجارب اللي سبقونا ... ؟؟؟
أبو محمد : أحلامك بعيدة يابو فهد ... وبعدين وش فايدة مثل هالكلام ...؟؟؟
أبو فهد : ماهو لو تغيرت إرتفعت الصحافة بمستواها ... راح يمتد تأثيرها على الأندية والجماهير والرعاية بعد ...؟؟؟
أبو محمد : وهل مسؤوليتها إنها ترفع الوعي عند الجماهير ...؟؟
أبو فهد : ما قلت لك إذا ما عطتنا من خيرها خل تكفينا شرها ... وأبعطيك آراء بسيطه ... لو حصلت من يتبناها ويفكر فيها ... راح تشوف تغير جذري في روتين الصحافة ... وأراهن على هالكلام ... وإلا ما أكون أبو فهد ...؟؟؟
أبو محمد : كلامك كبير يابو فهد ... عسى ما توهقنا بس ...؟؟؟
.............................................. وش عند أبو فهد .....................................................
إخواني الأعزاء أتوقف عند هذه النقطة من الحوار ... وأختم الجزء الأول من الصحافة ... شكل أبو فهد هالمره (طب في الغويط) ... ويراهن بعد ... عسى ما يوهقنا بس ... الله يكون في عونه ... يا صابت يا خابت ... أبو فهد هالحين بين (المطرقة والسندان) ... وش رايكم ووش تتوقعون إنه يراهن عليه ... يابو فهد (صارت سواليفك ... سواليف) ... الله يكون في عونك...؟؟؟
وداعا إخواني والوعد الأسبوع القادم بإذن الله ... تصدقون ما راح يجيني نوم ... حتى أعرف وش عند أبو فهد ... والله إني خايف عليه ... الله يستر...؟؟؟
وتقبلوا تحيات أخوكم .... أزرق هلالي
.............................................. نهاية الصحافة (1) ..................................................... |
الوضع العادي
