القصة من خيالي انا وليست منقولة
طبعا اللي يبي يستمتع فيها يتذكر ايام الطفولة ويقرأ الموضوع بدلع ويتخيل ايام المبزرة
الدنيا ضحى هالوقت ... الام تطبخ والعيال متسدحين بالصالة.... والابو هايت بالشغل .. 
المشهد الاول
المهم جاء عبودي من البقالة وهو حافي وحالته تبكي اللي مايبكي ..((شريتح)) مشرتح يعني ملابسه كلها تراب وشعره مشهب... وحافي وركبته مشقوق السروال وفيه نقوطات دم صغينونات من كثر مايسابق البساس (القطاوه) تحت السيارات والخزانات...
ماعليكم من اللي راح كله عبودي مو بسالفتنا اصلا خير شر...
بخخخخ الا بس حبيت استهبل شوي
طبعا اعمارهم بزارين ... وش تبون اكثر من هالكلمة
المهم دخل عبودي ومعه باونتي..قالت له اخته العنود وش معك حبيبي عبودي.... قال وهو معصب وعيونه طايره مامعي شي وش تبيني بببببب .... تسنهم ... مايصدقون احد يصير معه ريال
..اصلا مستلف نص من حق الدكان علشان اشتريها كلها لي لحالي محد معي ....
المهم جالس يأكل عبودي ولااحد هامه... شوي ولا يلتفت الا هذي عنودي تناظر فيه ...ناظرها باحتقار...قال بسم الله من هالعيون :p
وهي تولللللللللللللللع حامت كبدها... بس ماتبي تحط عقلها بعقل بزر...
طبعا معروف البزر غثيث...كلا حلاوته وخلص ... جاء يقوم ..
ولا ينقفها(يخبطها =يضربها بشويش) بيده ...
ويحط رجله (( هرب البزر))
بدا الكلام الجد:-
المشهد الثاني هي : تعال ياحيوااااااان
هو : طبعا استغل الفرصة (( راح لابوه)) يبه شفها تقولي:p ....(( عاد يناظرها بمذلة يعني اقول ولا توخرين)):p
يبه شف العنوووووود اتقول ... هااااه
شفها تقوووول ...:p
ابوه : (( ابوه ياحبه للشر)) يقول ايه وش تقول ؟ هو : تقول تراهااااا هااااه... تقووول ابوه : ايه علمني ولدي الشاطر (( طبعا الابو شكل يده تحكه ومااسطر احد من مدة))
هو: يناظر العنود بطرف عينه ... اعلم ولا لا ... اعلم ...
هي :- اعطته نظرة حقد ... شديدة البنت ((والله خايفه تتفشل
عند ابوها))
هو : حس انه اذا راح ابوه بيتسطر... فصغر بعين نفسه ....((بخخخخ))
ابوه : تكلم يالله ...((شتهي يسطر))
هو : طاح بورطة... (( يبلع ريقه)) تقول ..هاااه
ابوه : بتقول ولا انا بسطرك..
هو: تقول اني زييييين وحليت كل الواجب:p :p
ابوه : من حرته انه ماسطر احد قام يلعب لعب عنيف ... يقول لولده ياحليلك يالشري دايم متعبنا ويخبط على ظهره بشويش (( مشتهي يسطر)) هي : عبودي رافع ضغطها ولازم تسوي له شي...
هو : ابوه طلع ولا له احد غير ربه ثم الماما .... ركض ولا امه تنظف بالدروج ..ويوقف وراها..:p :p
المشهد الثالث
هو :- ورا مااااماااااا ماتقدرين تسوين شي ((بمبمبمبمبب :p :p بمبمبمبمبب)):p :p
هي : الضغط مليون ... السكري وكل انواع الاشياء اللي مي زينه صارت فيها
هو : يمااااه شوفي عنودي بتضربك انتي ....(( جلس يسذب علشان يفك روحه ))يسذب= يكذب
هو : ورا ماما بمبمبببمببممب ((امه طيبة))
هو : ورا ماما انااااااا هنااااا .....(( مايرتاح الا يتسطر))
هي : شدته مع قميصه وسحبته من ورا امه ... (( بدا الشغل))
هو : يتمصلح... يقول لها ...عنودي تتحدين مااحب راسك...
هي : كن عجبتها الشغلة .... بس (( مافي امل تسامحه ))
شكله بتضحك عليه يحب راسها وتادبه بعد تاديب:p
هو :- اخبث منه مافيه...احب راسك وسامحيني..:p
هي : رحمته من الطراق شدت شوشته (( غرة شعره))...وتركته
هو...ماصدق يلقى فرصة نحشة..... وركض وهو يقول انقهري ماتوجع اصلا..انقهري ماتوجع
هي : تسوي نفسها الحين كنها ماهي يمه ولا تناظره
هو : اصلا مايوووووووووجع باعلى صوته:p :p
هو : ذبحه الظمأ وراح يشرب مويه ..
هي : تغافلته....امسك...مسكته ...بنت الذيب
هو: كاس الموية بفمه ويشرب وعيونه طايرات من ورا الكاس ويشرب ويطلع صوت (نعيغم نيغم نيغم) صوت المويه وهي في بلعومه:p
هي : اقول اخلص هي: تقول له انت قد هالعناد اللي تسويه لي ..وتقول انقهري بعد
هو: يبتسي (يبكي) عارف مصيره
هي :اقول قل اختي الكبيرة احترمها مرة ثانية ((ورافعه خشمها))
هو : مايبي ينطقها زين (( اختي الكبيلة واحتلمها))
هي :اقول تكلم زين
هو : ((مايرد ..مسوي عنده كرامه ))
هي : اقول قلللللللل
هو : طيب اتركي قميصي واقول
هي : لاقول
هو اول فكيني..فكيني واقول
هي :- طيب يالله قوول ..
هو : طيب وقفي اشرب مويه ...ريقي ناشف:p
هو: طيب اتركيني الحين اشرق...
هي : ((طيبة بالحيل ))...تركته
هو: ((ذيب)) ماانحاش بس ((هرب)) عاد الكاس باقي فيه شوي مويه.. صفقه عليها وانحااااش
المشهد الرابع انحاش للحوش وهي لحقته بالعصا حق المكنسه بس ماتقدر تتعدا الباب حوشهم مكشوف هي : ان ماجيت لا اكسرها على ظهرك ((( وحده مقهورة)))
هو : طيب وش تبييييييين جلس يبكي اهئ اهئ اهئ وش تبييييييين طيب
هي : تعال داخل واقول لك ....((تحسبه خبل))
هو : يقول بدلع ...لالالالالا علشان تضربيني ....(( ياخبثه))
هي : ترا اذا مابتدخل بسكر الباب عليك وتجيك الظلما ...... استغلت الحرب النفسية
هو: عادي مااخاف سكري اجيكم مع الباب الثاني:p
هي :خلاص بسكره ....1....2.....3
هو : لالالالالالالا جيت خلاص ......... تو تطلع المراجل
هي: ارتاحت نفسيا شوي
دخل وهو يجر اذيال الخيبة...عبودي امام العنود وعصاها...وين عبسي ينقذه
هو: (( رجع لشغل التميلح)) نعم اختي جيت...:p
هي: تمسكه مع شوشته وتمصطه بالعصا على ...ظهره
هو: غمض عيونه من الخوف...... ولا يبتسم ... ماتوجع حس انه حمار كل هالخوف من ضربة ماتوجع
قال لها لو قلتي من الاول كان خليتك تضربيني وبكيفي بعد...ماتوجع...ياحليلك:p
هي: (((((انواع الاحباط)))) هي : ماصدقت خبر...يالله لف ظهرك...طخ
هو: بخخخخخخخخخخ مثل الاوله
هي : قالت عاد انقلع انا راحمتك ....((ياتسذبها مابها حيل تضرب ))
هو : طيب خلي العصا هذي معك وكل ماتشتهين تضربيني جيبيها معك:p
هي: اهئ هئ اهئ انقلع عبووووودي مو حلو 
هي : مو حلو عبودي يالله روح بكرة اذا جيت من المدرسة مافي حلويات
هو : لا خلاص توبة ... انا عبودي خويك
المشهد الخامس يالله نغني سوا... هي : هات ايدك...سيسي سيسي سيسي ميمي ميمي
هو: بخخخخخخخخخخخخخخ
هي : وش فيك وخرت يديك
هو : شايفتني بزر .......((مصدق انه رجل)):p
هي : وش فيها حنا نلعبها كل يوم
هو : لا هذي حقت بنات ... وش رايك نلعب بلنتيات
هي : لا اخاف تجي ببطني ولا وجهي <<== انواع الخوف
هو : لا وش قالووا لك عبودي الجمعان ...
هي : عندي فكرة ...اخويا اخويا اخويا....اخويا الصغييييير هو :اخويا اخويا اخويا .... اخويا الكبييييييييير هي : سم سم سم .... سم سم سم هو : سم سم سم ... سم سم سم هي : اخويا اخويا اخويا....اخويا الصغييييير هو : سم سم سم .... سم سم سم هي : ههههههههههههههههههه هو : خخخخخخخخخخخخخخ النهاية ياحبي لهم وياحبي لايام الطفولة...... عالم رايق مالك دخل في الكبار ومشاكلها وزحمة الدنيا من بيصير عبودي ومن بتصير العنود.... علشان نبدا هواش ...(( حنين الي ايام المبزرة)) تحياتي لكم ... ويازين البزارين ... الاطفـــــــــــــال حقوق البزارين محفوظة لعاشق الثنيان القصة من خيالي انا وليست منقولة 
يازين البزارين...شف العنود وعبودي 
والله ايام حلوة 
الوضع العادي
