13/11/2009, 12:49 PM
|
 | زعيــم نشيــط | | تاريخ التسجيل: 10/02/2008
مشاركات: 690
| |
سالفتي في شارع التحليه .. مع الهايلوكس الكوبيه و شطحاتي
شسمه بدون اي مقدمات .. ابي اقعد اخربط عليكم شوي فيذا .. واهم شئ ابيكم تقرون و ما تنقدون علي و ترى فيه بعض التبهير في السواليف 
ذاك اليوم كنت في الرياض عند ولد خالتي [ طبعا محدثكم من ولايه نيويورك ] .. و جالسين في ملحقهم وانواع الطفششششششش لـ درجه ان لو تشوفون وجيهنا تسنها مضرب تنس ارضي من كبرها
والواحد اذا نكت للثاني يرسل له رساله ع جواله فيها ابتسامه من زود ماله نفس يضحك
ولا في الرياض الواحد ما يقدر يسوق وهو ماخذ راحته ابد اول ما يطلع من بيتهم يبي يخلص مشوار من العجله تلقونه يمشي كأن وراهـ الـ fpi تلحقه واذا مشى 120 يقالك متمسكين في القوانين المروريه يلقى وراهـ عشرين سيارهـ اللي يكبس و اللي يضرب بواري و اللي يبي يسقط من اليسار مع الكتف وحتى اللي في الخط الاوسط يضربون بواري معهم يقالك يعاونونهم
وانا خابر ان في كل اللي في الكورهـ الارضيه متفقين ع قانون واحد .. اللي هو .. اذا صارت الاشارهـ صفراء استعد للوقوف
بس حنا لاااااااااااا .. ادعسسسسسسسسسسس عشان ما تحمر الاشارهـ
المهم
وانا كنت ساكت و منسدح جالس اشوف الـ tv و ولد خالتي مدري وش حاط عليه بس انا اتفرج وبس قلت له اقول وش رايك نطلع لـ كافي في التحليه و نغير جو
قالي طيب وين العيال [ يقصد ربعنا ] قلت له عسى بس منيب امهم وانا ما ادري دق عليهم و شف وينهم فيه
قال طيب [ طبعا بدون نفس ] و يوم دقينا عليهم صارو مشغولين هالتسلاب
و قالي ترى ماراح نروح لـ كافي في التحليه .. نبي نروح لـ مقهى ابو هيثم اللي في السريع
قلت له يرررررررررررحم امك .. عليك مزاج مدري وش يبي .. اقول خلنا نروح للتحليه وانا ابي اقهويك ع حسابي .. هنا خق و قال ابششششششششششششر
حبيت اعطي نضرهـ بسيطه لـ اللي ما يعرفون شارع التحليه هذا شارع يفقع التسبد و المرارهـ تحصلون بزر ما خط شنبه و معه جيب بورش كاين سعرهـ 300 ألف ريال .. ولا شله بنات اكبر وحدهـ في 3\ج و معهم لكزس 460 [ ماشاء الله تبارك الله ]
ياناس المطبات الصناعيه معروفه في كل شوارع العالم انها تصلح من الزفت [ اكرمكم الله ] بس في شارع التحليه مصلحينها من بلاط و فيها لمبات و حركات و ما نقص الا اثنين هنود يوقفون على جوانب المطب يبخون معطر رائحه على السيارات
و السيارات هناك بشكل عام حدث ولا حرج .. كل وحدهـ تقول الزين عندي و الشين حوالي
واشكال الشباب هناك ما شفت زيهم الا في المجلات .. اللي تشوفونه تحسبون منفقع الاستشوار في شعرهـ واللي تشوفون سكسوكته تسنه محددها بـ سيف واللي مالط كل شئ في وجهه و مابقى الا شئ اسود تحت شفته كأنه ماكل كيت كات و ذايب ع خشته اشكال اللهم عافنا ولا تبلانا
اقولكم
وحنا نتمشى و كل مابغينا نسولف مرت من جمبنا بانوراما .. بجميع الالوان اللي تبون
قال خويي وش السالفه .. هم يوزعونها ببلاش اول الشارع ولا وش السالفه بالضبط <-- صدز انه ماشاف خير
قلت له لا .. اذا عبيت بـ عشرين يعطونك وحدهـ ببلاش
قالي يعني لو اعبي فل يعطوني ماي باخ ..
قلت له .. انت الحين عب فل و يصير خير <-- تراهـ ما طاح وجهه ابد
واخر شئ اخترنا كوفي و جلسنا فيه و الغبنه في قلوبنا الى الحين قلت لـ خويي { ان لم تغلبهم فـ كن معهم ] دام الدعوهـ هياط في هياط خلنا نوريهم
قالي وش في بالك و وجهه كذا قلت له انت خلك معي و سلكني و ماعليك <-- ترى ماعليك تجيب مصايب
جيت قلت له اقوووووووول .. ليه ما جيتونا في مخيمنا اللي في لندن
خويي انلخم و طلعت عيونه من قوي النصبه قلت خلني اكمل السالفه قبل ما يجيب العيد وهو يستعيد قواهـ العصبيه
قلت له .. فاتك والله .. كنا قاعدين نتمشى باليخت حق ابوي و مسكت معنا نروح لـ بريطانيا و سبحان الله صارت جوازاتنا معنا <-- الظاهر انكم جايين بـ تأشيرهـ سواقين .. تمشون و جوزاتكم معكم
و رحنا لـ بريطانا و خيمنا هناك اسبوعين .. وحلفت علينا ألزبيث اننا نقعد اسبوع ثالث و حلفت بالطلاق من توني بلير ان الذبايح معلقه بس حنا اعتذرنا و مشينا
يوم شطح علي ولد خالتي و قال كم قعدتو في الخط <-- يلعن بليسك يا ولد الفقر .. الظاهر حنا رايحين لـسدير موب لـ بريطانيا
قلت له يومين .. قال ماشاء الله شكلكم معبين بنزين 95 و وصلتو بسرعه { عقب هالكلمه قررت اني اسولف عن البعارين اصرف لي }
و رفسته من تحت و قلت له كانك ما تعرف تسلك اسكت و خلني اكمل ولا تخرب يا ثور
طبعا انا اسولف و تشوفون كل اللي في الكوفي بدو يسكتون عشان يسمعون سالفتنا عاد انتم تخبرون مافيه ألقف من عيال ديرتنا
و اغمز لـ ولد خالتي و اقوله يالله خلنا نكمل السالفه بدت تحلى السواليف
يوم هذا قال ولد خالتي .. والله ما قدرنا نجي عشان سيارات الوالد كلها في الوكاله و اضطرينا نشتري غيرها وهذا اللي اشغلني
هنا حسيت انه غطى علي في التسذب
جيت قلت له ياشيخ مالك داعي .. ياليتك داق علي و معلمني .. عشان اخلي جوهر { السواق حقي } يجمع لك سياراتي اللي تاركها في الشوارع .. كل ما خلص بنزينها وقفتها و تركتها و مشيت و خليتها
ياخي والله بايخين هالشركات اللي يصنعونها .. ما يدرون ان الواحد عندهـ اشغال و يخلون سيارته تفضى بنزينها والله مشكله
<-- لو اللي مخترع البانوراما سامعني كان اخترع تريله بس عشان تصدمني
خويي عقب كلمتي هذي مسك راسه و جاهـ صداع نصفي و قام يهز راسه تسادهـ يستوعب اللي سمعه و يجمع قواهـ العقليه عشان يكمل السالفه معي
وانا اتنحنح واحس اني زودتها
قالي .. ايه والله .. من كثر ما ترمي سياراتك في الشوارع اخذت البلديه فكرهـ حلوهـ انهم يجمعون سياراتك و يحطونها في طريق المشاة حق الملك عبد الله ايام العيد
قلت له طبعاا وانا اخوك .. هالشعب ينرحمون .. ماعمرهم شافو مواتر .. يجيك واحد مركب ع سيارته جنوط و يمتر كل الشوارع كأن معه فراري ولا يجونك اثنين متقاطين في دباب و راكبين مع بعض كأنهم توأم سيامي على بالهم كوووول
الا صح الحين راعين الدبابات وش يحسون به .. يعني ياقالك انهم حركه و كووول .. خلونا نشوفها من جهه منطقيه
اللي معه دباب .. ما يقدر يدخن .. ولا يسمع اغاني ولا يرد ع جواله و في الصيف و الشتاء يلبس خوذهـ و جاكيت
ما الله حادك يا وليدي
نرجع لـ محور حديثنا ..
قال خويي .. ياليته ع كذا وبس .. اذا جاك هاللي يتزلجون الواحد مسوي فيها نانسي عجرم { هالهيس ما يعرف مشاهير }
وانا اناظر فيه و اقوله قصدك بيب بيب اللي في افلام كرتون { ابي اكلحها عميتها }
و في هالوقت احس بـ زي المظله فوق راسي يوم رفعت راسي لقيتها اذن اللي وراي قاعد يتسمع لـ السالفه و متحمس لها جيت ابي اصرخ في اذنه و اروعه بس قلت مالي داعي اخرب كل شئ
جيت قلت لـ خويي يالله خلنا نمشي عشان ورانا مشوار لـ شيكاغو اللي في ايطاليا عشان صفقه مع مصنع خيام نبيهم يصلحون لنا خيام لويس فيتون و خيام بربري
قال خويي .. لاااااااا يحرم امك .. وش بربري .. ياخي انت تذكرني بـ وزرهـ سواقنا
خلها خيام جيفنشي انا قلت له ابشر بعزك ما طلبت شئ
ها ها ها <-- ضحكه اغنياء
عقبها مدري حسيت ان كل العالم يناضرونا و مطوقين علينا يتسمعون للسالفه و بعدها جانا الفلبيني حق الكوفي يقول الحساب <-- كأنه يقول يالله طس انت وياهـ انا و انا اللي ما افهم عربي حسيت انكم تتسذبون
والله و نقوم و نسولف و نضحك ضحتنا حقت الاغنياء [ ترى ماوجعني حلقي ابد ] و طلعنا من الكوفي و وصلنا لـ سيارتنا اللي هي هايلوكس كوبيه [ يعني هايلوكس غمارهـ ] بس نبي ندلع انفسنا شوي
و نمر من عندك المقهى و فاتحين الدرايش { عشان مافيها مكيف } و مطلعين ايدينا مع الدرايش
و كل حقين الكوفي ودهم يلحقونا بالزبيريات بس فحطنا في وجيههم ولا وقفنا الا في البيت
و رجعنا لـ كهفنا العزيز و راح يومنا وبس
اتمنى ان هالسوالافه اعجبتكم و حازت ع رضاكم .. و ترى فيها بعض البهارات اللي نحاول نستضرف بها
يالله اشوفكم في حلقه جديدهـ يا ابطال 
اخر تعديل كان بواسطة » *ابوسعد* في يوم » 13/11/2009 عند الساعة » 08:52 PM
السبب: 00
|
الوضع العادي
