إخواني الأعزاء : السلام عليكم

هاهو الشخصية الخيالية الهلالية الشهيرة (أبو فهد) يعود لكم وسواليفه التي لا تمل .
والحقيقة أنه أطال الغيبة ومثل ما يقول المثل (من طول الغيبات جاب الغنايم)

المهم إنه مثل ما تعرفون قبل حوالي شهرين وفي بداية الإجازة ، ظهرت لنا سلسلة سواليف أبو فهد في الجزأين الأول والثاني ، وأرسل فيها (صواريخ متعددة الأصناف ) وكثير منها أصاب الهدف .

في الجزء الأول بعنوان... (يا مطره حطي حطي) ... وتكلم أبو فهد عن واقع الرياضة السعودية ، وفي النهاية وزع أبو فهد (أمثال) لكنه ما علمنا وش هي ، ولا زالت سر عنده ...؟؟؟

وفي الجزء الثاني .. (الشق أكبر من الرقعة) ... تحدث أبو فهد عن عدة مواضيع ، أسباب فشل المنتخب والعزوف الجماهيري ، والشركة الراعية لتذاكر المباريات ، وتوقع خسارة الهلال بطولة السوبر ، وانتقد أشياء كثيرة .
وواعدته إننا نتلاقي في النادي ونكمل السواليف ، وخصصنا الموضوع عن الصحافة الرياضية وآآآآآآآة ياصحافة .

(..... لمن أراد أن يقرأ الموضوعين السابقين يجدهما على الرابط بنهاية هذا الموضوع .........)

................................... الهلال والنصر ..........................................................................


المهم إن أبو فهد ، عطاني (أشكل) وانحاش ، أخذ له إجازة وراح خارج الحدود ، يمكن يكون خايف من ردة فعل بعض الصحفيين عليه ، يوم دريت إنه رجع من إجازته ، رحت وطبيت عليه في بيته من غير موعد ، وشفت مباراة الهلال والنصر معه وتابعناها على صوت الأحمد ، وبصراحه أبو فهد قام وقصر صوت التلفزيون بعد هدف الهلال بشوي لأنه شاف الأحمد قام (يحوق ...) ويخربط ويغلط بالكلام على الهلال ، وقال أبو فهد (شفت وشلون العيار اللي ما يصيب يدوش) ، حتى الأحمد اللي أعرف إنه نصراوي واللي كان مقبول نوعاً ما ، قام (يخور) على كيفه ...؟؟؟
ويشوف أبو فهد ... وأبو فهد (صادق) إن الحكم كان يجامل النصر بشكل فاضح وواضح وخصوصا التمثيل العلني للبيشي وعلي يزيد من بداية المباراة ولما تقدم الهلال ، فصخ الحكم (الحياد) وصار يشوف (بعين وحدة) حتى إن البلنتي غير صحيح البته ، ويقول أبو فهد إن الهلال يستاهل اللي يجيه ، لأن النادي اللي مالقى له رئيس يواجه ، ولا لقى من يدافع عن حقوقه ، يستاهل إن يكون (طوفة هبيطه) ...؟؟؟

وعن مباراة الإتفاق اللي خسرها الهلال يرى أبو فهد لأن الهدف الأول بلنتي غير صحيح ، والثاني تسلل واضح وفاضح ماركة (أبو طير) مثل ما يقول الحربان ، وأبو طير يعني أصلي ما فيه شك ولا يختلف عليه أثنين ، لكن لأن ما عندك أحد يتكلم ، أخذوا الحكام راحتهم ...؟؟؟
ويشوف إن لاعبين الهلال فقدوا الإتزان بعد الهدفين المبكرين لإنعدام الخبرة ، وما أشبه هذه بتلك (يقصد مباراة النصر) ، لكن ربك ستر ، والجايات راح تكون أعظم ، إذا كان موقف الإداره والمسؤولين هو (الـلآت الثلاث) ...( لا أرى ... لا أسمع ... لا أتكلم) ...؟؟؟

وتكلمنا في مواضيع كثيرة ... واليكم أعزائي بعضا مما دار بيننا ، وتقبلوا تحياتي ...؟؟؟

.................................... في منزل أبو فهد .............................................................................

أبو فهد : حيا الله من جانا ، والله الساعة المباركة

أبو محمد : الله يحييك يابو فهد ، ولو إني زعلان عليك ، أحرجتني مع الجماعة ، واعدتهم إننا بتتكلم عن الصحافة ، وبعدين (كشت بي) وحطيتني في موقف صعب ...؟؟؟

أبو فهد : الصراحة زينه وأنا أخوك (ردود الفعل) ما كانت تشجع ، موضوع تتعب عليه ، ويقراه عدد بسيط ، والمنتدى صاير مثل عملية (شد لي أقطع لك) ، وشو له تتعب نفسك ، وبعدين من أحرجتك معه ، قال صفوا (صفين) قال حنا (إثنين) ، من كثر اللي قروا مواضيعك ...؟؟؟

أبو محمد : لا يابو فهد الصبر زين ، وبعدين أنا ما يهمني لو واحد بس يقرأ موضوعي أعتبره مكسب ، صحيح الجزئين الأولين (نزلوا) في وقت الإجازة ، والموسم الرياضي (مقفل حتى إشعار آخر ) ، لكن فيه ناس كثير أعجبها الموضوع ، وناس مشهورين في عالم الإنترنت بعد ، الناس تفرق بين الغث من السمين وأنا أخوك ...؟؟؟

أبو فهد : أقول يا حليلك ، خلك عن المثاليه وأحلامك البعيدة ، هذي إسمها منتديات ، يعني مكان للسواليف وسعة الصدر ، حط في بالك (الربع) أكثرهم ما يبون المواضيع الجديه ...؟؟؟

أبو محمد : ولو منتدى عن منتدى يفرق يابو فهد ، وموضوعنا بعد سواليف ، لكنها مطلوبة ، وش أدرك يمكن بعدين ننجح ونفتح منتدى ونسميه (منتدى سواليف أبو فهد) ، وبتشوف عدد المشاركين يفوق التوقعات ...؟؟؟

أبو فهد : إيه مثل ما يقولون ( في النخل) ، حنا ناقصين منتدى ، وعلى طاري هالكلام ، ما تلاحظ إن فتح المنتديات صارت موضة هالأيام ، المنتديات أكثر من (الطماط) ...؟؟؟

....................................(الصحافة على خفيف)...............................................................

أبو محمد : ولو يابو فهد بعضها مثل فقاعات الصابون ، أو (بيبسي) وطاشت ، وبعدين (سلام عليكم) ، والمنتديات المعروفه باقية ويدورونها الناس ...؟؟؟
وبعدين تراك ورطتني مع الإخوان ، واعدتهم إنك بتتكلم عن الصحافة وأحرجتني ولازم تنفذ الوعد ...؟؟؟

أبو فهد : إذا تبي نصيحتي خل هالموضوع عنك ، أو تدري خلة مثل (السنارة) ، سو له دعاية وقل (قريبا بإذن الله) ، وأنت طول بالموضوع شوي ، وكثر من الدعاية عنه مثل ما يسوون في جرايدهم ، الشغلة كلها (طاش ما طاش)...؟؟؟

أبو محمد : الظاهر إنك صرت مثل بعض مسؤولين الأندية ، (تداهن) الصحفيين ، وأظنك تخاف منهم بعد ، بس أنت ما لك مصلحة يابو فهد ..؟؟؟

أبو فهد : ها ها ها ها ، أوجعني قلبي من الضحك ، وشلون أداهن الصحفيين ، وإنا إنسان (وهمي) ، على كل حال أنت شايف عندنا صحافة ، ترى الدنيا مصالح وأنا أخوك ، وصحافتك (كثير) من اللي فيها مبدأهم (شد لي أقطع لك) ، وإنتبه تراني قلت (كثير) ماهوب (كل)...؟؟؟

وتوقف أبو فهد للحظات وهو مبتسم وشرب كاس مويه علشان يبل ريقه وقال ...؟؟؟

خذ أقرب مثال يشخص حال صحافتك ، في الصيف أشغلتنا بالعويران والجمعان وطيارة الفليت ، وهالحين بنور ، وبرواتب لاعبين النصر ، وبعدين توقيع سامي ، الله يرضى عليك هذي صارت أهم المواضيع الرياضيه ، الله يخلف علينا ...؟؟؟

وبعدين إذا بغيت تعرف معدن الصحافة عندنا واللي شاغلهم ، عندك مثلاً موضوع توزيع التذاكر تكلمنا عنه في سواليفنا (الجزء الثاني) قبل شهرين ، والصحافة (يا غافل لك الله ) ، ما أحد فكر فيه ولا همهم ، لكن يوم صار الموضوع عن تذاكر الصحفيين ، وإن كل صحفي مسموح له يدخل في ملاعب منطقته (بس) ، طنطنت صحافة (كل من إيدوه إله) ، وكل من شال سيفه (ليش هذا ما يصير) ،

المهم إشتغلت (النخوة) ، و(نــط) منصور الخضيري أسرع من البرق وكلم الشركة وقال هذا ما يصير ، الصحفي لازم يدخل كل الملاعب ، ولازم تكون بطاقته (دوليه) ، الله يستر لا يطلبون بعد يدخلون فيها الملاعب العالمية ، وطبعاً هات يا شكر ومعلقات للأستاذ منصور على فزعته اللي أعادت الحق لنصابه ، أما أنت يالمشجع المسكين
( إنـثــــبـــررررر ؟؟؟؟؟؟؟؟؟؟؟؟؟؟؟؟) ...؟؟؟

وطبعاً الشركة أكيد تبي مصلحتها ، ولازم (تكسب ودهم) ، وافقت على طلبهم وعطتهم بعد (بوسه) فوق الراس ( المهم رضاك يابيه) ، المسأله مثل ما قلت لك (شد لي أقطع لك) ... هذا آخر زمن ، انت ما قريت كلام التمياط عنهم ، الصحفيين ياخذون فلوس واللاعبين يتفرجون الى هالحين ما أخذوا مكافآتهم على بطولة الخليج ...؟؟؟

أما الجماهير ومشاكلهم ، وإرتفاع أسعار التذاكر ، فالصحافه العزيزة تقول (بالطقاق) وش علينا منهم ، (نفسي نفسي) ، حنا وبنترزز في المنصة (محفولين مكفولين) ... (آكلين شاربين) ... كل الخدمات متوفره ، (تلفونات وفاكسات) و(شاي وقهوة وعصيرات ومفاطيح) و(مواقف سيارات) ، وأظن إن بعضهم تكتب لهم أحداث المباريات وهم ما شافوها ، الله لا يغير علينا ، هذي هي صحافتك ، وهذا البير وهذا غطاه ، صحافة مبدأها ( تأخذ القشور وتترك اللب) ، الله يرحم والديك لا تحوم كبدي .

أبو محمد : ولو يابو فهد شكلت قسيت عليهم شوي ، لكن الصراحة مطلوبه ، عطنا بعد من اللي عندك ...؟؟؟

أبو فهد : أقول إسمع تراني ما عممت بكلامي على الجميع ، لكن مثل ما يقولون (التفاحة الفاسدة تخرب الباقي) ، وموضوع الصحافة يبي له رواقة ، وأنا ماني مستعد له هالحين ، خله في المرة الجاية أو اللي بعدها ...؟؟؟

أبو محمد : رأيك نسوي مثل القنوات التلفزيونية ، دعايات (قريبا) ، وهو بعد سنه ...؟؟؟

أبو فهد : طبعاً أخوي هذي أصول اللعبة وهذي طريقة الصحافة ، و(داوها بالتي كانت هي الداء) .

أبو محمد : لكن يابو فهد حنا مغمورين بالساحه ، وبعدين مثل هالمواضيع تحطنا في مواجهات صعبه ، حنا على قد حالنا نكتب بالمنتديات (فقط) ، لازم يكون شعارنا (الصدق) والأمانه ...؟؟؟

أبو فهد : إسمع ، اللي بيزعل نقول له إقرأ العنوان ، هذي سواليف وأنا أخوك ، إلا إذا بتمنعونا منها ...؟؟؟
أما بالنسبة لكلامك ، (الصدق) والأمانه ، أقول إذا هذا مبدأك ، ما راح تاكل عيش بهالزمن وأنا أخوك ، وبيصير لك مثل المصيبيح ، كلمه شكراً هي ((Get Out أو (إقلب وجهك) ...؟؟، ما زلت تعيش في دنيا الأحلام ، الله يكون في عونك ..؟؟؟

أبو محمد : أي المصيبيح (فهد) أو (أحمد) ...؟؟؟

أبو فهد : الإثنين ...؟؟؟

أبو محمد : على ذكر المصيبيح وش سالفة أحمد المصيبيح مع جريدة الرياض ...؟؟؟

أبو فهد : والله ما المسؤول بأعلم من السائل ، ولكن إذا كان العذر اللي قالوه لعدم إلتزام جريدة الرياض بمبدأ الحياد ، فأنا ما أدري وش هي الجريدة المحايدة إذا صارت الرياض ما هي محايدة ...؟؟؟

أبو محمد : طيب وسالفة فهد المصيبيح ...؟؟؟

أبو فهد : أقول مثل ما كتموا (مصباح الرياض) ، كتموا (مصباح الهلال) ، وكلهم ما شفنا ولا عرفنا عنهم إلا كل خير ، كل اللي أقدر أقوله (الله يجازي اللي كان السبب ) ...؟؟؟

أبو محمد : صحيح ما شفنا منهم إلا كل خير ، ما لاحظت هالصيفية أحداثها ساخنه شوي ، وعلشان كذا إختفت موضة صفقات الصيف ...؟؟؟
أبو فهد : بالنسبة للصفقات ، صارت صفعات ، تصدق في هالصيفيه صار لي حالة ملل وخمول وكسل وشرود ذهني ، كله بسبب هالكوره ، المشكلة إني ما أقدر أتركها ، ما أدري هو من المنتخب ، أو مطاريس ربعنا في الصحافة والمنتديات وغيرها ، أما موضة صحافة الصيف فربعنا ما قصروا حولوها على راعي طيارة الفليت وربعه...؟؟؟

.................................... (المشكلة الهلالية) .............................................................................

أبو محمد : والهلال وش صاير فيه هالأيام يابو فهد ...؟؟؟

أبو فهد : أنت هالحين مستغرب ‘ إذا كانت الأمور عندك تمشي بطريقة (طقها وإلحقها) وش تتوقع ...؟؟؟
يا أحي كل هاللي تشوفه طبيعي وما فيه غريب ، والقريبين من النادي والعالمين ببواطن الأمور يعرفون قبل غيرهم إن هذا راح يصير ومتوقعينه من زمان ، أنت نسيت موضوعك اللي كتبته قبل كم شهر (مرثية الهلال)...؟؟؟

أبو محمد : الموضوع كان عبارة عن خواطر ومشاعر وأحاسيس وحطيتها بالمنتدى ، وماله علاقة يابو فهد ، لكن إذا كانوا القريبين يعرفون اللي يصير مثل ما تقول ، ليش ما احتاطوا بالحلول من أول ...؟؟؟

أبو فهد : إذا كان موضوعك خواطر فهو ما راح بعيد عن الواقع ، والمشكلة وأنا أخوك (القلوب ماهي على بعض) ، والرجال المخلصين أغلبهم إبتعد ، وما نقول غير (إنشاء الله الباقين فيهم الخير والبركة)... ومن مده والهلال عايش على المهدئات والمسكنات والإبر الموضعية ... للأسف هلالنا (نزف) كثير ... وللأسف بعد إن أغلب المحبين يتفرجون ... حنا ننتظر فارس مقدام يجي ويقول (أنا لها) ...؟؟؟

وأخذ أبو فهد نفس عميق بعد هالفضفضه ، شكله شايل هموم هلاله فوق راسه ، وكمل كلامه وقال ...

يعني خذ مثال النجم البديل هالحين مفقود ومعدوم ، بعد ما كان اللاعب الهلالي يخاف إذا إختاروه للمنتخب ، لأنه إذا رجع للنادي أكيد بيلقى الخانه طارت منه ، ومكانه في الإحتياط ، مثل ما صار أيام كندينو ، لكن هالحين زي ما تشوف ، (البيه اللاعب) يتدلل ويتشرط مثل ما يبي (قال من أمرك قال من منعني) ، والغريبة إن بعض أعضاء الشرف يجاهر إنه يشجع اللاعب بالتمرد على النادي ، لأن الطاسه ضايعة وأنا أخوك ...؟؟؟

أبو محمد : طيب والحل في رايك يابو فهد ...؟؟؟

أبو فهد : ما قلت لك سالفة الهلال هالحين (طقها وإلحقها) ، وحنا بإنتظار فارس مقدام يقول (أنا لها) ويشمر عن ساعديه ، وحنا معه والله يوفقه ...؟؟؟
وإذا تبي وجهة نظري عن أحوال الهلال ، فأعتقد إنه يواجه مشاكل من جبهتين داخلية وخارجية ...؟؟؟
وبصراحة الحل صعب ويحتاج لوقت ، لكنالدور هالحين على الهلاليين المخلصين عموما وأعضاء الشرف بوجه الخصوص ، ونادينا بين أمرين (أكون أو لا أكون) ، الهلال بحاجة لوقفة صادقة وجادة ، أو نقرأ الوداع للبطولات ...؟؟؟

أما بالنسبة للحل الداخلي اللي أشوفه إنه لازم يتواجد شخص محنك وربان ماهر يمسك الإدارة ، على شرط يتفرغ للعمل فيها ، وحط تحت (يتفرغ) خطين ...؟؟؟

ولازم يمتاز بقوة الشخصية ، وتكون عنده ثقة كبيرة في نفسه ، ويحتاج قبل كل شيء للدعم والتفاف الجميع حوله ، خصوصاً أعضاء الشرف ، اللي مطلوب منهم (تغليب المصلحة العامة) على الخاصة ، هذا إذا بغينا مصلحة الهلال قبل كل شيء ، وشخصيا أشوف أنسب شخص تتوافر فيه معظم الصفات المطلوبة هو الأمير بندر بن محمد ، وهذا وقته ولازم يضحي للهلال ، والأمير بندر ما أحد يشك في حبه وإخلاصه للهلال ، هو لها بإذن الله ، وبصراحة هو قدها وقدود ...؟؟؟

أبو محمد : بس الأمير بندر بن محمد ساكن في جدة وأنت تقول يتفرغ ...؟؟؟

أبو فهد : أعتقد الهلال بحاجة لرئيس متفرغ والأمير بندر لازم يضحي وهو المعروف بإخلاصه وحبه للهلال ، أما إذا إنسحب فهو يتخلى من المسؤولية ، وهو يعرف البير وغطاه ...؟؟؟

أبو محمد : صحيح إبو محمد قدها وقدود وكلنا مع أي شخص يتولى النادي ، وصراحة فقدنا الأمير سعود ...؟؟؟

أبو فهد : ما أقول عن الأمير سعود بن تركي إلا (في الليلة الظلماء يفتقد البدر) ...؟؟؟

أبو محمد : طيب يابو فهد أنت هالحين علمتنا بالجبهه الداخلية ، والجبهة الخارجية ...؟؟؟

أبو فهد : لازم يعي ويعرف كل من يعني بأمر الرياضة السعودية عموما سواء في الرئاسة العامة لرعاية الشباب أو الصحافة والإعلام ، وكل من له علاقة بالرياضة ، أن الهلال هو المرآه الحقيقية وترمومتر تطور الرياضة السعودية عامة وكرة القدم خاصه (إن صلح صلح الجسد كله) ، هذا إذا بغوا صلاح الرياضة بالسعودية...؟؟؟

أبو محمد : وش تهدف له بهالكلام يابو فهد ....؟؟؟

أبو فهد : يا أخي هالحين اللي يمارس ضد الهلال قي الصحف والفضائيات و(بدون رادع) ، أنا أشوفه معول هدم الكرة السعوديه والدليل واضح ، أنت ما تشوف قام يتطاول علينا (عوير وزوير واللي ما فيه خير)...؟؟

إذا إستمرينا على هالحال ، راح يجي يوم نتحسف فيه على (زمن ولى) ، و(حضارة سادت ثم بادت) ...
يا أخي لمعلوميتك (الهلال هو الواجهة الرياضية السعودية) ، أما باقي الأندية فهي (كومبارس) ، شاء من شاء وأبى من أبى ، واللي ما يعجبه أقول له مثل ما قال طيب الذكرعثمان العمير (إشربوا من ماء البحر فنحن هلاليون) ، هذا هو الواقع اللي أشوفه ، إذا بغوا الجماعة بطولات ، لازم يهتمون بالهلال قبل كل شيء ، الهلال والهلال بس .

أبو محمد : وشلون يعني يخلونه في كفة وباقي الأندية في كفة

أبو فهد : لا وأنا أخوك يكفينا يعطونه أبسط حقوقه ، ويعاملونا مثل الآخرين ، وإذا تبي تضحك شف هالحين الجرايد صاجتنا بالشباب وإنه يتظلم من اختيار لعيبته لمنتخب الشباب ورافعين خطاب يشتكون على هالموضوع ، والله إني فطست من الضحك والقهر بنفس الوقت ...؟؟؟

أبو محمد : ليش يابو فهد ...؟؟؟

أبو فهد : يعني من هالحين يعلمون بزارينهم إنهم ما يفرحون إذا إختاروهم للمنتخب ، وإنه ماهو شرف ، وإن الشباب مظلوم ، ما كأن الموضوع شرف وواجب وطني على اللاعب ،
وبعدين أجل وش نقول حنا اللي طول هالسنين محرومين من لعيبتنا والدوري ماشي ، وكل سنه تضيع علينا البطولات وتروح لنادي ما يستاهلها ، ولعيبتنا يشرفونا ويجيبون الإنجازات للمنتخب ، وياغافل لك الله ...؟؟؟؟

أبو محمد : والله يابو فهد ما أدري وش أقول حيرتني ...؟؟؟

أبو فهد : لا تقول شيء خلني أنا اللي أقول ، قارن بين موضوع الجمعان ومحمد نور، وتعامل الرئاسة والإعلام معهم ، بالله عليك لو الجمعان لاعب إتحادي كان وقفوه 6 شهور ، ليش العيون مفتوحه على لاعبينا ومقفله على غيرهم ...؟؟؟

أبو محمد : لكن إدارة الهلال هي اللي إشتكت وإدارة الإتحاد ما قالت شيء ...؟؟؟

أبو فهد : وهو لازم تشتكي الإداره ، يا أخي فيه مواضيع تتصرف فيها الرئاسة من دون النادي ،
أجل (نور) الإتحاد يسرح ويمرح ، ومن محطة لمحطة شوفوا (نور) يتخطى ، مشاكله في كل مكان ، طرد من المنتخب بعد مباراة إيران ، ولا صعد المنصه مرتين علشان يأخذ ميداليته في كأس الملك وكأس ولي العهد (لأنه خسران) ، حتى الجماهير ما سلموا منه ، تهجم عليهم وكسر سيارتهم ، لا والوسطات تشتغل علشان ما يروح للمحكمه ،..؟؟؟.. كافأوه وأخذوه للمنتخب في كأس العالم ... وكسر إصبع الخوجلي ... وأشغلتنا الجرايد فيه وإنه يلعب بالحواري ... وختمها بسالفته اللي ما تنذكر ... وفوق هذا راز خشيمه ... ويكذب الناس ... (صحيح إذا لم تستح فإفعل ما شئت) ... والغريب إن ناديه يدافع عنه ... أمثال هاللاعب الشطب قليل في حقهم ... إذا كل هالمشاكل في أقل من سنه ... وش ينتظرون منه بعد ... الفاس وطاح في الراس ... (ويا زمان العجايب ...وش بقي ما ظهر) ... ؟؟؟

أبو محمد : أظن الإتحاديين أبخص يابو فهد هذا ولدهم وهم أعرف فيه ؟

أبو فهد : ما أقول إلا الله يرحم (فيصل) ، والله إن بعض الناس ما يمشون إلا بالعين الحمراء ، والطيبه واللين ما تنفع معهم .

أبو محمد : الغرض من هالكلام يابو فهد ...؟؟؟

أبو فهد : المعنى في بطن الشاعر ...؟؟؟

.................................... القناة الرياضية .............................................................................


أبو محمد : على فكرة ، يقولون القناة التلفزيونية الرياضية قربت تفتح ..؟؟؟

أبو فهد : أقول ياحليلك ، ما قلت لك تعيش في دنيا الأحلام ، أنت هالحين جاي تبشرني

أبو محمد : إيه ياخوي وش فيها القناة التلفزيونيه خلاص قربت تطلع .

أبو فهد : يا أخي حدث العاقل بما لا يليق فإن صدق فلا عقل له ، هالحين التلفزيون وأحسن ما فيه برنامج (كل الرياضة) وبعد (لك عليه) ، وش ترجي من قناة رياضية تبي تبث طول اليوم .

أبو محمد : وش فيه برنامج كل الرياضة بعد ، ما هوب عاجبك .

أبو فهد : إلا قل وش ما فيه ، برنامج تحس إن 90% من مادته (حشو) ، هذا وهو أحسن الموجود ، أما مراسلينه الأعزاء (يالله من فضلك) ، مثقفين وعلى مستوى ، والله إن أسئلة ومقابلات برامج الأطفال أحسن من أسئلة (أبو ممدوح وربعه) .

أبو محمد : وش فيهم المراسلين بعد ، هذا الموجود ، والجود من الموجود ...؟؟؟

أبو فهد : شفت وشلون هالحين تقول الجود من الموجود ، علمني وشلون أخذت أوربت المذيعين والمعلقين اللي عليهم الكلام ، وشف وشلون يديرون الحوار ، يختبرونهم ويدربونهم صح قبل ما يطلعون قدام الناس ، أما ربعنا ماخذينها باب للرزق والله يرزقهم ، لكن مو على حساب المشاهد المسكين ، والا هالحين أنت عاجبك سلطان العبدالله ، وإلا (النباط) ، ولا يهون راعي القصيم وراعي (جده) ، إذا هذا أجود الموجود ، وإذا البرنامج كله رسايل من زيد وعبيد وفي النهاية يختمها ويسرد قائمة ربعه (المصور والملحن واللي شال الكاميرا واللي وصل الأسلاك والسواق والجيران وووو...) وبعدين مع تحيات محدثكم، عاد من زين هالرسالة ، إذا برنامج واحد ما لقوا له مراسلين (زي الناس) ، وش ترجي من محطة تبث طول اليوم.

شف المكسب الوحيد من القناة الرياضية (إذا كان صحيح هناك قناة) ، هو إنك ما راح تنتقل بين القناتين (الأولى والثانية) وأنت تشوف المباريات .

أبو محمد : بس يا أبو فهد يقولون راح نشوف منافسات وبطولات عالمية في التلفزيون ، وبيريحونا من سيطرة هالقنوات الفضائية ، قريت في الجريدة إن التلفزيون السعودي يبي ينقل بطولة أبطال أوروبا وإنهم دفعوا مليون وثمانمائة ألف ريال وش رايك ...؟؟؟

أبو فهد : وبنفس العدد يقولون إن أوربت سددت قيمة نقل مباريات الدوري السعودي مليونين ريال فقط لا غير (يا بلاش) ...؟؟؟

أبو محمد : وش قصدك يابو فهد ...؟؟؟

أبو فهد : قصدي واضح الدوري السعودي اللي يتابعه أغلب الناس وشف عدد المباريات المنقولة فيه ، وقارن كم يدفعون فيه ، حنا مع الأسف (نخله عوجاء) ...؟؟؟

أما بخصوص نقل أبطال أوروبا ، الظاهر إنك تحلم ، (هو صالح كامل وربعه) خلو لهم شيء ، إذا المنتخب السعودي ما هم قادرين ينقلون مبارياته ، ولا نقلوها في كأس العالم إلا بعد حب خشوم ، وتنازل سعادته وسووا له وقناته شكر ودعايه ، ومن أعلى المستويات ، هذا والحق معهم ، تبيهم هالحين ينقلون أبطال أوروبا ، هالأيام وأنا أخوك كل شيء بفلوس ، واللي يبي لازم يدفع ، لا ويدفع (ملايين) بعد مو (ملاليم) ، إذا (البيه صالح) ماخذ حقه ، إبشر باللي تبي ، حتى الدوري حقك إصبر شوي وراح تشوف ، تبي تدفع علشان تشوفه ، تقوللي قناة رياضية ومنافسات عالمية ، يا أخوي حط عقلك براسك ولا تطير بالعجة ...؟؟؟

أبو محمد : والله يابو فهد كلامك على العين والرأس لكن أظن إن فيه تخطيط ودراسات شاملة للموضوع .

أبو فهد : ما راح تشوف بتلفزيونك غير سباقات الفروسية العالمية ، والمصارعة قبل 10 سنوات ، وسباقات (الفورملا) في السبعينات ، ويمكن بطولات الغولف والتنس الأرضي في اللثمانينات (بورغ وماكنرو وليندل) ، وطبعا بعض أشرطة الإرشيف العالميه .
وإن كان مباريات الدوري المصري (أوه نسيت ) البه صالح مشفر الدوري المصري ...؟؟
أظن بينقلون مباريات الدوري في دول الخليج ويمكن دوري (جيبوتي) ، وأكيد بيعرضون بطولات السلة والطائرة وتنس الطاوله (مسجله) بعد ..؟؟
وبعدين لا تنسى إن التلفزيون ما يجيب أي ألعاب نسائية ، يعني ألعاب قوى عالمية ونقل مباشر لها مثل ما يقولون إخواننا الكويتيين (ماكو) ..؟؟
إسمع القنوات المشفرة فيك فيك ...؟؟؟
أقول غير الموضوع وأنا أخوك ، لا تحوم (كبدي) ...؟؟؟

.................................................................................................... .................

إخواني الأعزاء ما ودي أطول عليكم علشان ما يصيبكم الملل من سواليف أبو فهد ، لكن أعدكم بإكمال هذه السلسلة إذا (جازت) لكم ، لأن أبو فهد في جعبته الكثير وحنا تكلمنا عن الجمعان اللي أختصر لكم رأي أبو فهد يقول لازم أبوه يمسكه مع إذنه ويجيبه للنادي ويخليه يعتذر للجماهير قبل الإدارة ، لأن اللي سواه ماهوب بسيط والجمعان ماله غير هلاله ، لكن الإعتذار (دين) عليه للجمهور علشان يسامحونه ، وتكلمنا بموضوع الطريقي والهجوم اللي جاه ، وقال إنه معجب بكتاباته ، وياليت عندنا كم واحد يكتبون مثله ،

هاه وش رايكم في لكلام (أبو فهد) ووش تقولون عنه ، أنتم تؤيدونه والا لا ...؟؟
وبصراحه أنا ابحاول أطلع بعض اللي عنده ، وخصوصا موضوع الصحافة اللي شاغلني ، وبأحاول أطلع بعض اللي عنده ، والله يكون في العون ...؟؟؟؟

وتقبلوا تحيات أخوكم أزرق هلالي
..................................... المواضيع السابقة ...................................................................

الجزء الأول ... (يا مطره حطي حطي) ... وتكلم أبو فهد عن واقع الرياضة السعودية …؟
http://alzaeem.com/vb/showthread.php?threadid=72144

وفي الجزء الثاني .. (الشق أكبر من الرقعة) ... تحدث أبو فهد عن عدة مواضيع ، أسباب فشل المنتخب والعزوف الجماهيري ، والشركة الراعية لتذاكر المباريات ، وتوقع خسارة الهلال بطولة السوبر ، وانتقد أشياء كثيرة .

http://alzaeem.com/vb/showthread.php?threadid=72441

..................................... ( إنتهى) ...................................................................

الله يخليك لنا يابوفهد
هذي مهيب سواليف هذي محاضرات ...

الحضور للملعب مهيب مشكله بس يخلون المباريات في الملز مهوب في اقصى الرياض في الاستاد .
ولازم تكاتف اعضاء الشرف حتى يرجع هلالنا كما عهدناه ..

ونتمنى تواصل السلسله الرائعه .. وتحياتنا لبوفهد

رائع جدا



مشكور على جهدك

الأخ أبو حسن : ما بعد شفت شي ، ابو فهد ( يعجبك) ، عسانا نقدر نطلع بعض اللي عنده

الأخ زورو (أعجبني إختيارك لكلام المصيبيح) نعم لا عدمناك يا أبو محمد

وتقبلوا تحياتي

سلسله رائعه من سواليف ابو فهد

بصراحه سواليفه عن الصحافه والقناة الرياضيه والمشكله الهلاليه جت على الجرح

شكرا لك

تحياتي

ا لإخ أبو شذى

الأخ العوسجي

مشكورين يا إخوان وإنتظروا (أبو فهد) ... في المرات الجايه ... بيجيب العيد؟؟؟؟؟؟