أمي بالغصب الا تتخرج وتاخذ الشهادة - نادي الهلال السعودي - شبكة الزعيم

عقـل الهلال · #1 15/10/2009, 06:28 AM

بسم الله الرحمن الرحيم

أمي سلمكم الله حبووووووووبه مرررة مرررة بس مشكلتها ماهي متعلمه ولا تعرف تفك الخط على قولتهم ,لدرجه ههههههههههههههههههههاي والا اخلي هالموقف بعدين في ثنايا الحديث اكتشفوا هالموقف أنتم .
المهم مامتي حاقدة على عمرها ليه هالعجز اللي كبرها بعضهم مديرات ويستلمن رواتب 15000 ألف وعليها, فا بما إن الوالدة الله يحفظها ماهي مديرة فا ماعرف كم يستلمون المديرات وكذا .

ماعلينا فا صار هالشيء دافع لها إنها تتعلم وتدرس وتكافح وتدخل مدرسة محو الأمية هالكلام ترا عـــام 1403هـ بدأت أمي تدرررس وصارت تتعلم ألفون بائون .... بس كانت عندهم معلمه شكلها جايه تاخذ راتب وبس وعندها عقدة شخصية وفاهمه إن الصفوف الأولى للصغار والكبار لهم نفس التعامل فا ذي المعلمة اللي من عند الكورنر بس عاقده حجاجها وليش يا أم فلان ما جبتي الواجب أنتم أطفال وأنواع الهواش عاد أمي مسيكينه تباري الساس ولا تعرف تهاوش اذا هاوشت هاوشت وصارت متحمسه وتبي تنفلت بالكلام بكت فا قالت وش لك يابنت الحلال بالدراسه أهم ماعليك كرامتك تجيك بنت مافطمتها أمها الا أول العام تنافخ علي إلا أقعد عند أبوسليمان ينافخ علي هو أبرك من أبله منيرة << عاد أمي عندها عقدة من إسم منيرة تحس كل وحده أسمها منيرة تطلع شريره ونفسها بطرف خشمها

.

عادت أمي لحياتها الطبيعيه ماغير فلة جحش الصبح مع حريم الجيران والعصر بالحووش فارشه فراشها وتخيط لحف << هوايتها خياطة لحف لدرجه أننا نمشي بالبيت على لحف ما يحتاج نروح للسوق نشتري زوالي و فرشات وكذا
يؤؤؤ أمي مللت من هالحاله قالت يابنت

شرايك ترجعين للدراسة خصوصا ان طيبة الذكر يقولون انها نقلت كان هالكلام عام 1407هـ تقريباً ومير إنها ترجع لصفوف الدراسة وتبدأ من جديد ألفون بائون .. ألخ وتعدي سنة أولي وتدخل سنة ثاني .. ترا ذيك الأيام أذكر انها أولي يخلصونها بترم واحد والترم الثاني يبدأو بثاني وهلمجرا لين ينتهون من الأبتدائي ومير أمي كملت لين وصلت خامس وهو يتوفى خالي L الله يرحموهـ عاد هذا خالي كان يخوف بس حبيب يوم توفى وقالوا لي خالك توفى قلت يووهـ من بيجيب لنا رؤوس ذيابه

أم التفكير يا شيخ ماعلينا أمي نفسيتها تعبت وسحبت على أم أم أم الدراااسة أبوها أبو أبوها , كانت هذي المحاولة الثانية وباءت بالفشل الذريع.
بيوم من الأيام وفي عام 1410هـ قدحت مع أمي ذيك الفكرة وكلمت فيها ام جيراننا أم مطلق وقالت لها (( أم مطلق لين متى وحنا جالسات فبيوتنا لا علم ولا وعماير ماغير نركض وراء البزران وعشيان وغديان فا شرايك ندرس .. قالت أم مطلق تممم خل ندرس ونصير زي أم عبدالله شوفيها مدرسة ومطلقه ولا طقت لزوجها خبر معها راتبها وتكد على بناتها وعندها سواق يوديها ويجيبها )) فاتفقوا على الذهاب للدراسه واذهبوا ودرسوا وحضروا في فصل أبله زكية وكانوا مجتهدات ونحسبهم كذلك كنا معاهم بأول الطريق نعلمهم وندرسهم وأمي كانت اشووى وش حليلها تفهم شوي بس المشكله أم مطلق مادري وش تبي من الحياة نقول قولي ب ط ي خ وتقول وهي حاطه البرقع ومتكيه راسها على يدها وتقول بكل ثقه برطيخ واطالع لها بشوف هي صادقه والا تستهبل معاي أقول أم مطلق بطيخ يعني ب ط ي خ انطقيها صح وتقول بلهجتها (( عاني أقولها ب ر ط ي خ )) أم مطلق صدق وش تحسين فيه ؟وتقعد تشتكي لأمي وتقول: يووهـ يا ام مشاري عاني ولدك وانا اللي اكف يدي منها وأقول سا أسلم الدفه لأخي الأكبر ويجيها ويقول لها أم مطلق قولي بطيخ قولي قولي .. وتنطق بكل ثقه برطيخ وينسدح جنبهم ضححححك مالكم بالطووويلة أمي استملت تعليمها كلمة بطيخ وتنطقها مع أمي كوويس واذا جينا نعلمها تقعد تطق طق فوق رؤوسنا وتسوي أنها البنت الزاحفه اللي بآخر الفصل وتعلك علك وتحطه بشعر خويتها .
المهم أم مطلق ذي طلعت لعابه وعرفت امكانياتها إنها ماهي حقت دراسة وحقت فرفشه ووناسه الصبح مع العجز وبالليل تفرص(( تهمز )) ظهر أبو مطلق ويخب عليها ذي الصفر الداخلي << لأنها قزمة وكذا J .
تأثرت منها أمي وصارت تشتغل تحطيم بأمي يا أم سليمان حنا ما تصلح لنا الدراسه بعد ماشاب ودوه الكتَاب خلينا في بيوتنا استر لنا . ومير أمي تسمع كلامها وتقعد تتبطح في البيت وماعليها الا انها تولد وترضع وتطبخ وتنام . وكانت هذي المحاولة الثالثه .

في عــام 1416 هـ وبعد ست سنوات توقف وعطاله في البيت وبعد زواج البنت الثانية وخلوا البيت من الجنس الأنثوي فا أمي حست إنها بحاجه لتكحيل عيونها بحسنوات وخصوصا أنها تقدر الزييين وتحب تجلس بالاجتماعات مع البنات أو أنها تروح لهم فترات اثناء الجلسه وتسوي فيهم مقالب وتطارد وراهم تبي تشوف زول الغزال وهو يركض وتمتع ناضريها .
المهم بعد ايام مداولات ومشاورات ونقاشات في المجلس العائلي بأمر عودة الوالدة لكراسي الدراسة وبعد ابداء مبرراتها للعودة بعد ثلاث محاولات فاشله فشل ذريع قررنا السماح لها بالعودة للدراسة ولكن مشروطه
بأنها هالمرة تخلص الابتدائيه وتصير حرمة سنعه وفعلاً راحت للمدرسة وصارت تدرس عن المعلمه فوزية يؤؤؤؤؤؤؤ يا فوزية هذي سلبت عقل أمي تخيلوا صارت تكتب لها اشعار أمي هااااااااااائمه بها يالبيه يا وليدي لو تشوفها آه آه آه بس يالله الجنه أدب وزول وجمال وأأأأأأ << أشياء ثانية .. ماعلينا وهي اللي تزن على أبوووي يا أبو مشاري شفت فوزية يالله الجنه أدب أدب جمال جمال أصل أصل تدري وش ناقصها يا أبو مشاري ؟؟ قال ابوي وش ناقصها قالت ناقصها بسسسسس نزوجها مشاري ولدنا وتصير كاملة والكامل وجه الله .
ومير أبوي كنه اقتنع قال هااهـ والله فكرة وصاروا أبوي وأمي يشتغلون بالمباحث تطلع أمي من المدرسة وتركب مع أبوي ويجلسون بالسيارة ينتضرون اللي يجي ياخذ فوزية ويبون يتبعونهم لين يوصلون للبيت وحددوا موقع البيت.
وهو يجي ذاك اليوم اللي خلاص قرروا يخطبون البنت وتفاتحها ماميتي بالموضوع وقالت لها يا فوفو أنتي مخطوبه ؟؟ قالت فوفو لا قالت أمي زززين شرايك أنا بخطبك لوليدي أسمه مشاري ومتخرج من المكان الفلاني و و و و و قالت لحظه يا أم مشاري أنا متزوجه وعندي طفلين عاد دوروا وجه أمي ومير تضيق هالدنيا بما رحبت بوجه أمي وتجي تعلم أبوي ومير أبوي معها ينصدم خصوصا بعد ماشاف زولها وكذا هههههههههههاي صاروا أبوي وأمي نكتة البيت لمدة اربعطش سنة .
ومير أمي يوم قالت لها فوفو انها متزوج وهي يضيق صدرها وصار يزوولها بالمدرسة انها تطفش وماهي زينه والدراسسسة وع وع وع وهي تغيب عن الدراسه ولم تعد وقالت توبة من الدراسة توبه وأصبحت أسيرة الأحزان لا فوزية طلعت بنت ولا الدراسه كملتها , وانتهت المحاولة الرابعه .

دارت بنا الدنيا وفي عام 1418 هـ انتقل الوالد لحايل بعد 45 سنة قضاها بالرياض منها 35 سنة مع الوالده .
أمي ماهي متعوده على هالجو وين الجيران وين فلة القايله وين طلعات العصر فا صار اعلان بالحي انه تم افتتاح مدرسة محو الأمية بالحي وأمي قالت بسسسس هذي هي اطلع من جو الحبس بالبيت واصير ادرس بمحوالأمية منها فلة حجاج وصداقات مع البنات اللي اعمارهم 50 وانت طالع ومنها دراسة وكذا فعلن أمي درست وحصلت مجتمع اجتماعي ومدرسات كويسات ومتساهلات وبغضون ثلاث سنوات أبشركم أمي تخرررررررررررررررررجت قلوليش قلولولولولوليييش وصارت أمي صاحبة شهادة يؤ مير استلمت أبوي ههههههههههههاي ترا أنا معاي شهادة وانا اللي لو يخلون امور البيت بالشهادات اصير انا المديرة عليك وترا اسمع بيعطوني ألف ريال والله ما تشوف منهم شيء لو ما شريت لي رشرش هدية نجاحي وحصولي على الشهادة الأبتدائيه وترا اسمع البيت يوم عليك ويوم علي ماهو تحسب انك زوجي خلاص تفلها معاي خلاص انا متخرجه ومتفوقه ترا ابوي ما بغى يصفقها بترمس القهوة وتراه ما اخذ الألف ريال حقتها J عشان ثاني مرة ما تشوف نفسها عليه بهالألف خاف انها تسافر بها جنيف والا شيء والله عاد تصدقون ينخاف عليهم البنات هالوقت . وبكذا حققت أمي أول حلم بحياتها وهي انها تصير معها شهادة كويسه ومحترمه لكن طموحها لم يكتفي عند هذا القدر فا قررت الوالدة انها تكمل دراستها المتوسطه J
يؤؤؤؤؤ يا يمه الله يعينك ترا بوهـ انجليزي ورياضيات على كيف كيفك ماهي اجمع واطرح اللي انتي تخبرينهن وترا شوفي مافيه فلة العصر كل يوم قوم ودني للمدرسة جبني من المدرسه ترا تجلسين في البيت ولا تعرفين المدرسة الا بأيام الأختبارات تجين منتسبه تحتبرين وتطلعين . ومير أمي كنها هونت قالت أنا اللحين يالله اعرف اقرأ قل هو الله أحد يبوني ادرس عنقليزي لا والله اللي صدق يقولون بعد ماشاب ودوهـ الكتـَاب لا والله يا وأنا أمك الشكوى لله بقعد بالبيت وابروز الشهادة بالمطبخ واصلح لكم احلى طبخات وانا نفسي مفتوحه من اطالع الشهادة . هنا انتهت المرحلة الخامسه والأخيرة والتي تكللت بحمد الله بالنجاح والسداد .

عاد أمي الله يحفظها صارت تروح تسير على مدرستها اللي تخرجت منها وتريد ان تسترجع ايام الدراسة والجمعه مع ام فلان وعلان ومناااك تبي تنشب بحلوقهم كودهم يوضفونها معيده عندهم خبركم خبرة من عام 1403 لين 1421 وهي تحوف الأبتدائيه حوف يعني بتدرس الحريم وهي مغمضه ومير تفاتحهم بالموضوع وقالوا لها خير ان شاء حنا بنرسل لك خطاب للتعليم وكودهم يوافقون بناءأ على الخبرة المكتسبه بس وش رايك يا ام مشاري تصيرين تدرسين عندنا سادس وكلها ترم وانتي متخرجه وتصير معاك شهادتين ابتدائيه ومير أمي تصدقهم وهي ترجع للدراسة وتدرس سادس وصارت كل ترم تروح لهم وتدرس سادس ويعطونها شهادة وتبروزها وأمي اصبحت تجميع شهادة الأبتدائية من اهم هواياتها .... بس من يعرف ليه هم قالوا لها شرايك تدرسين سادس وتتخرجين كل ترم بشهادة,,,, أحد يعرف ؟؟؟
أنا أقول لكم ليش ,, لأن سلمكم الله المدرسات مسكينات عايشين على الله ثم على هالعجز لو صار مافيه بهالمدرسة عشر طالبات سكروا هالمدرسة وانقطع رزق هالمدرسات من وراء هالعجز فا مالهم الا انهم يسايرون العجايز ويعطونهم شهادات وحلاو يووهـ ذاك اليوم معطين أمي تجرااف ههههههههههههههههههههاي هدية لأنها قرأت سورة الزلزله ياحليلك يا ميماه . بس عاد أمي من هذاك الوقت من عام 1422 لين 1425 وهي تنتضر التعيين وكل يوم تسألهم هااهـ ماجاوبوا تعييني L ياحليلك يا يممه خريجات بكالوريس جالسات ينغمن فصفص بالبيت وانتي تتحرين تعيين بشهادة سادس عاد أمي طفشت وقررت أنها تجلس بالبيت وبلا طلعات العصر اللي مال أمها سنع ماغير مشاوير على الفاضي وخصوصاً انها سكنوا عندنا عائلة جديده الجدار بالجدار وأمهم أم محمد فله ووناسه وكل أبو شيء وصارت امي معها أحم أحم يعني ما يتفارقون أبد. لدرجه اذا أم محمد سافرت للمدينه أعوذ بالله أمي من الطفش تعصب راسها وتجلس بالحووش وتبكي على الأطلال .
وبكذا اسدلنا الستار على رحلة أمي في التعليم وانها تصير زي أم عبدالله مديرة أد الدنيا وعندها سواق يوديها ويجيبها ولاهي محتاجه طليقها أبو عبدالله .

بس لحظه أكو مشكلة أمي قررت العووودة للدراسة لا واللحين مقررة العودة للدراسة مع اختها الأصغر يعني بيسووون عصابه بالمدرسة لا وأمي بتبدأ من الصفر لأنها حاسه أنها يا أما أن التأسيس كان خطأ أو أن ذاكرتها صارت تخونها بعد موقف صار لها مع أخووي .
أمي راعية عقار متأثرة بأبوي وكذا يعني تطلع معه تشوف الأرض الفلانية عليها لوحه للبيع وياخذون الرقم وكذا .. عاد كانت امي بمشوار مع أخوي وفيه لوحه مكتوبه على المسجد * أفطار صائم * وأمي عاد خبركم حاصله على الشهادة الابتدائيه العليا فا جت بتقراها وقالت (( مسسسججدد يؤؤؤؤؤؤؤ ياويلي الله لا يسخط بنا عوذا عوذا قال لها اخووي يممما وش فيك !!؟ قالت ياويلي هاللوحه تقول مسجد للبيع

)) أخوي لبق على جنب من الضحك وقال يممما هذي لوحة افطار صائم .

مايستفاد من هالموضوع الطويل العريض والكلام للجنسين :
- ليه إنتي اللحين جالسه افبيت أهلك وتتفنسقين وتقولين انا مابي ادرس طفشت من الدرااسه تعب وقرف على غير سنع .. قولي لي اذا ماودك تصيرين زي أم عبدالله المديرة طلقها زوجها ولا طقت لأمه خبر عندها راتبها وبيتها وسواقها يوديها ويجيبها.. تعلمي ياملا الغنيمة ترا الدنيا دوارة اليوم انتي براحه وسعاده وأبوك حي يصرف عليك بكرا تتزوجين ولا قدر الله الله تتطلقين ويموت أبوك أو يكون عاجز عن تكاليف اعاشتك من بيعيشك بعد الله غير شهادتك اللي تاخذينها .
- أمي هالعجوز الله يطول بعمرها ماتعبت من كل العراقيل اللي وقفت بوجهها قدام دراستها وحاولت وحاولت وحاولت مايئست صح مرت بفترات يئست بس عدتها لو أنها طولت بس نجحت وانتي ما ينقصك شيء هذا انتي شباب وجسمك يشيلك وش اللي يردك عن اكمال دراستك .

انتهى

اللي عندهـ رأي أو نصيحه لكل شخص توقف عن مسيرته العلمية يتقدم فيه والله يكتب له الأجر ان شاء الله يارب .

أتشرف أني منتمي جديد لهذا الصرح وهذي العقول النيَرة وأتمنى تقبلوني أخ جديد واسئل الله ان يجعلني من المقبولين لدى قلوبكم .

اسعد الله اياكم .

إلى اللقاء.

RO7_ALHILAL · #2 15/10/2009, 06:47 AM

إقتباس


	فا جت بتقراها وقالت (( مسسسججدد يؤؤؤؤؤؤؤ ياويلي الله لا يسخط بنا عوذا عوذا قال لها اخووي يممما وش فيك !!؟ قالت ياويلي هاللوحه تقول مسجد للبيع )) أخوي لبق على جنب من الضحك وقال يممما هذي لوحة افطار صائم .

لااه وازيدك من الشعررر بيت

شووي يوم كملوا الطريق شاافت مدرسه عليها لوحة اسمها عااد بتقراهاا وتقوول اف اففف افطااار صااايم

الله يجزاهم الجنه كثروا اللي يبون الخير هههههههههه

هلا بك ياخووي بيننا

بس لا تتحمس واجد كل يوم تكتب موضوع مالها دااعي تاخذ كرت الصخره

< اي هيييين والله لو تكتب ثلااث مواضيع محد يجي زيوه

شف وانا اخوك سالفه ان البنت تاخذ شهادتها عشان مايممن عليها زوجها ومن هالكلام مايصير ولا انها ماتحتاج له ، زوجهاا واجب عليه يصرف عليها وهذي من اقل حقوقها ، والشهاده ملزومه تاخذها مو عشان انها ماتحتاج له لا ، بس هذا حق من حقوقها ، مو اننا نفكر انها تاخذ شهاده عشان تتوظف وتدق خشم زوجها

تتعلم لانه شي كووويس

( فييس واحد فييه نوم ولا عرف يعبر )

نشوفك ان شاء الله من اللي لهم مكان بالمييلس خصوصاً ان الجو يهيأ ع الإدمان مع ناس تشوفهم غير

يالله عسى ربي يطول بعمر الوالده وعقبال الدراسه اللي مدري كم بهالأميه

مشعل الحربـي · #3 15/10/2009, 06:57 AM

اخوي انت مسجل 2007 ومشاركاتك 1 والله شي غريب

بس حياك بيننا ونتشرف فيك اخوي ...وان اشاء الله نشوف كتاباتك بشكل اكثر

بالنسبه للموضوع لي عووووده

تحيتي لم ..

الهنوووف · #4 15/10/2009, 07:21 AM

وعليكم السلام ورحمة الله وبركاته

هلا بك اخوي

معاناه مع هالدراسه الله يخلي لك اميمتك

ويرزقكم برها ورضاها

الشهاده صارت سلاح البنت والشاب بعد
بس يمكن فيه ناس يشوفون اهم شي مستقبل الولد وغالبا البنت ماتلاقي تشجيع من اهلها ع اكمال الدراسه ظنا منهم ان الزواج هو المستقبل

بعض البنات اذا كانت ظروفها حلوه قالت وش لي اكمل واتعب وكل الي ابيه يجيني
ماتدري عن الدنيا

يمكن تحتاج هالشهاده بـ يوم من الايام

طبعا انا اشوف الشهاده الجامعية مهمه لـنا كـ بنات بصرف النظر عن الوظيفه
حلو الواحد يكون واعي اكثر وخالط مجتمعات كثيره
يعني لو مايكفي من الدراسه الجامعيه الا انك تخالط ناس من مجتمعات مختلفه
بالاضافه ان الوحده تكون تعتمد على نفسها كثير

بعض الناس تستصعب هـ 4 او 5 سنوات
خصوصا لو كانت مو متزوجه مالها عذر

بتجلس بهالبيت ماغير تفكير وسوسه

وطفش
فتدرس احسن لها

انا بما ان ماباقي لي الا القليل واتخرج شايله هم

جلسه البيت

\

/
عوافي لك

بالرغم من طول الموضوع الا ان اسلوبك القصصي حمسني وشدني للمتابعة
تمتلك روح فكاهيه حلوه لاتحرمنا من قلمك

ربي يحفظك ويخلي الوالده لكم

الهنوووف

كانت

هنا

ورحلت

بطلة · #5 15/10/2009, 08:09 AM

ههههههههههههههههه رهيبة أمك ياحلوها الله يحفظها

- والله عزيزي الدراسة مو بس شهادة وانتهينا , مع العلم إنها شيء مهم بنظري

يكون عندي شهادة عالية مو حلوة تلاقي اللي حولك كلهم شهادات وإنت العكس والله صعبة .

- بس الأهم الأهم : الدراسة حلاتها إنك تستفيد من اللي تعلمته بحياتك اليومية
وتكون واعي وعندك فكر , مو الواحد يدخل المعلومة من جهه ويخرجها من جهه مشكلة كذا

- وكمان مجتمع الجامعة والكلية غييييييييييييييييير أيام المدرسة
شفت الفرق والله بكل شيء , التفكير + اللبس+ ردود الفعل بمواقف معينة .. .. الخ كل شيء
حتى طبيعي الشخص يوصل لمرحلة تقدر تقول نوعاً ما بالغالب فيه نضج وعدم تسرع بااتخاذ قرار مصيري
مو زي أيام ثانوي أم الصرقعة خخخخخخخخ

- نكون علاقات تستفيد من بعض التجارب والمواقف اللي تمر عليك
لدرجة ممكن سبحان الله مستقبلاً تنظر للمواضيع بأكثر من زاوية بعد ماكانت النظرة من زاوية وحدة
بحكم العمر وقلة التجارب بالحياة >> أوخس يالعجوز هههه

>>>اللي تركوا دراستهم هذه بعض النقاط عشان أغريهم يكملوا هوع

بس ترى مو كل من ترك الدراسة مخير يمكن مجبوووووووووووووووور

_ إما معدلة ما دخلة الجامعة رغم إنو يعتبر بوجهة نظرنا إحنا حلو بس الجامعة وماتسوي

_ أو مصاب بالعين يالطيف
_ أو البنت زوجها يقول لها مافي اقعدي بالبيت

_ أو الولد يكون تفكيره بس يبغى ثانوي وبس ويروح يتوظف أي وظيفة عشان يخفف الضغط على أهلة
_ وكمان ممكن يكون تفكيره يبغى يجمع له مبلغ , شوي شوي يساعده عالزواج

>> كل هالنماذج مروا علي الله ييسر أمرهم والله يحزنون .
>> كم شخص ضاع مستقبلة مسير لا مخير !!

شطحة:>>عجبتها الكلمة

يوه كيف 2007 وتو تتفعل عضويتك يووووووووو عمر , يلا إن شاء الله خير .

الهلالي دائماً · #6 15/10/2009, 09:40 AM

حياك وبياك يالغالي ...ومنور يا عقل الهلال

والله يحفظ لكم الوالدة ويرزقكم برها ..

ذكرتني بأمي الله يحفظها قبل عشر سنين تقريبا دخلت محو الامية ..
وكنت اوديها العصر وارجعها المغرب وانواع الوناسة بصراحة كانت ايام حلوه

وكنت اذاكر لها بشكل استقعادي

واسمع لها قران بالتجويد

عاد كانت تقول ما ابي ماجد يذاكر لي

طبعا الوالدة ما طولت درست سنة يمكن وسحبت عيهم

شكرا لك يالغالي على الموضوع الجميل والاسلوب المميز

ومثل ماقلت التعليم زين >>زين والا موبايلي

شكرا لك حضورك

ودمتم برعاية الله ,,,

عقـل الهلال · #7 15/10/2009, 12:20 PM

<< RO7_ALHILAL >>

أخوي حبيب قلبي ماتعرف تطق بالباب الغرفه وتقول يا أحم أحم << أسمي وكذا استحي أقوله :$
إيه ماتعرف تقول انا رايي كذا وكذا الا يعني لازم توصل ألف مشاركه طيب اسمع ترا باقي 821 مشاركه وتوصل وتدخل الألفيه الأولى شد حيلك.
وبالنسبة لأمي مابغيت أقول هالموووقف خفت أنهم يغسلون ايدينهم من امي خير شر.
أما مسأله أنزوجها واجب عليه يصرف عليها هذي ما أختلفنا فيها وبعدين الشرع قايل للرجال أنتم قوامين على النساااء بس عاد وين اللي يقومون على النساء تحصله يقوم باللي يبيه ولا وصلت مسألة الفلوووس وكذا ضرب أم البريكات وسحب جلنط من شان هيك أقول لبنيواتـــنا خذوا الحذر ماهو كل الأزواج مثل الأب الطيب الحنون اللي يروح يتسلف وياكل هم الدين عشان عيونك .
بعدين تعال كأنك سحبت علينا !! قم الله يصلحك بنطلع للمزرعه أمي تواطي من الساعه 8 ونص وهي تدق .

<< حربي هلالــي 20 >> :

مرحباً أخووي ماقصرت الأخت بطله شرحت لك السبب

<< إلا الفيسات ذي من وين تجيبيونها قلبت أم الرد ماعرفت اطلعها بس عاد تراه فيس محزن.
حيآآآك أخووي وأنتضر نيراتك تنور بها ألبابنا بعد قراءة الموضوع .
والشرف لي ولوووووو .

<< الهنوووف >>

مرحباً ماشاء الله اللهم لا حسد سطرين تحت اسمك كلهم مناصب ذكرتيني بهذولاك الله يحفظهم وهـ بس مالت علي .
اسمعوا كلام الهنوووف يا بنات تراها هه تبي تتخرج ومن اللحين ماكله هم جلسة البيت وأنتم اللي اكتفيتوا بالثانوي ألم يأن الآوان لأستكمال الدراسة .

خيتي الهنوف تعقيبك يدل على أنك جامعيه وكذا مو مثل بنات الثانوي اللي جالسات في البيت كلمتين ورد غطاها << نياها بنات الثانوي .
ويامرحبا بك ..

<< بطلة >> :
أهلن وسهلن أختي بطلة زان الموضوع باطلالتك وتعقيبك ,
شوفوا بطله اعطتكم كم سبب للدخول للمعترك الجامعي تحصلون بوهـ بنات وسوالف ومناقشات تثري فيكم ثقافة الحوار << مع اني ما هقيته بس بعديها لبطله هالمرة ههههههاي < وردة >

مشكور زيارتك أخت بطله والله يجعلك أقوى بطله بالدراسة ونشوفك بدال بنت الفايز .

<< ماجد مقبل >> :
<< ترا ما بغى يعض شليلوهـ ويجدع اللي بمخابيه ويزبن الجبل .

أحم أحم أهلين مشرفنا العزيز وعلى دعوتك آمين يارب العالمين وكل اعضائنا الله يرزقهم بر والديهم أحياء وأموات يارب .

أمك الله يحفظها كانت مثلي أمي؟؟ ليلة الأختبار تواصل وبطنها يوجعها ههههههههههاي ياحليلك يا يمه والله حسيت معها أنه شوي ويطلع لها حب الشباب من كثر شسمه ماتسوي جركات البنات . بعدين عاد مع الخبرة صارت تدخل الأختبار وهي تقشم فصفص .

نورك أضاء الموضوع << ماهو خايف ترا :$
والله يحييك ويبقيك .

شاكر لكم اخواني وأخواتي اطلالتكم وعذب كلامك للردع الموضوع.

إلى اللقاء ,,

محب الجنه الخرج · #8 15/10/2009, 02:37 PM

ههههههههههههههههههههههههههههه الله يخلي لك والديك ان شاء الله

والله موضوع روعة بس لو كان خالي عن من بعض الاخطاء الاملائية كان احلى كلام

بس ي شهادة ابتدائي وتنتظر التعيين هاذي كلام ثاني خخخخخخخخخخخخخ

اوما سالفة المسجد اللي للبيع فسبحان الله توني اليوم اقراء موضوع عن مسجد للتقبيل بالخرج

Miss.nora · #9 15/10/2009, 05:53 PM

ما شــا الله تباركـ الله اخوي امكـ طموحــة

الله يخليها لك و يرزقك برهــا

و بخصــوص الشهــادة مو كل الهدف منــها الوظيفــة
و الوظيفــة مو كل الهدف منـها الفلوس و أني أصرف على نفسي
لان أهـلنـا مو مقصرين علينا الله يحفظهم

أنا عن نفسي ما احب قعدة البيت و مرة اطفش زي ما قالت الهنوووف (الله يرزقك بالوظيفة و ما تجربين قعدة البيت)

و بعد التخرج قعدت فتــرة بسيطــة ما اشتغلت تعبت فيها نفسيا كثير
لاني ما احب ان حياتي تكون نوم و أكل و تمشية بس

عوافي اخوي على هالاسلوب الحلو

عقـل الهلال · #10 15/10/2009, 10:09 PM

<< محب الجنه الخرج >>
أهلن أهلن
حي الله هالطله
أوما ذا المسجد اللي للتقبيل حكاية ثانية بس ما نقول الا الله لا يسخط فينا يارب .
أما عن نقطه الاخطاء الأملائيه هذا وأنا مسوي صايد ام الوضع ومركز مرة قلت من شان انه أول موضوع وكذا أثريني من جنب المرمى ماعليه نتعلم بالجايات إن شاء الله
ومشكووووووووووووور على النصيحة يالبى قلبك
ومرورك أسعدني كثير كثير كثير.

<< Miss.nora >>
مرحباً من ملفاك لملقاك
بالنسبة لردك إيه تقوله اللي متوظفه وضامنه آخر الشهر عند الصرااف << ماشاء الله لا اله الا الله اللهم زد وبارك.
إيه لين متى والأهل بيصرفون عليك !! لين يجي سعيد الحظ ويقطفك من بستان أهلك ويزرعك في بستانه همن على حسب عامل هالبستان يمكن يجي يوم يقطع فيه عنك الموية وش تسوين بهالحاله !!؟
لازم الوحدة تعمل حساب لكل شششيء

مرورك مرة مرة مرة مبهج للصدر والروح
لذا شاكر لك تكرمك بالرد أوخيتي وعقبال ان شاء الله يارب المراتب العليا

إلى اللقاء أحباب في الله