! >> علامة تعجب من قصة لشخص كبيييير ( إذا تبي عمل لازم يكون عمرك 36سنة ) >> علامة تعجب !
بسم الله الرحمن الرحيم ..
وش ذا الغبار اللي طلع ..
أدري إني من مبطي عن المجلس وعن الأعضاء اللي فيه لكن مدري وش جاني شكلها عين الله يكفينا ويكفيكم شر العين ..
طبعاً أنا اليوم أبكتب عن موضوع بس ترى الموضوع قسم بالله إنه جد
مو استهبال لأني متوقع أي واحد بيقرأ هذا الموضوع بيفكّر إنّي أنكّت أو إني أستهبل
قبل ما أبدأ الموضوع دعوني أذكر لكم قصة تناسب هذا الموضوع شيئاً ما ..
هذا واحد طبعاً كبير بالسن يمكن عمره اللحين 42 سنة أعرفه معرفة شخصية هو من معارف الوالد والرجال هذا عليه طلعات وعليه مغامرات بالحياة مدري وش يبي منها .. المهم ذاك اليوم جلس يسولف علينا بالمجلس مع بعض عمّاني >> تراي شددت الميم
عن موضوع من المواضيع إلاّ ويقوم له واحد من عيال عمّي ويقول الا أبسئلك يابو فيصل خوينا أسمه أبو فيصل
وراك ما تقاعد مبكّر وتاخذ راتبك وتشتغل أي شغلة خاصة ..
ضحك أبو فيصل وقال صاحي أنت إلا خلني بشغلي ما مثله والرازق الله نفتح كم محل باسم المرة زود على اللي عندها ونأمن المستقبل رد عليه ولد عمّي يقول عمرك تعدّى وما أمنت المستقبل .
قال أبو فيصل راح الزمن وتعرف تونا مالنا بالوظيفة الا ثلاث سنين >> هنا وقف الجميع مندهشاً
وقال بصوت واحد ثلاث سنين .
قال أبو فيصل نعم بصوت عالي ثلاث سنين قال واحد من عيال عمّي وشلون قبل ثلاث سنين وظفوك وأنت كبير بالعمر قال هم اللي يبون كذا
قلنا بصوت واحد وشلوووووووووون ؟؟
قال أسمعوا :
قلنا إسلم يا شاب المستقبل
قال يا طويليون العمر والسلامة تخرجت من الثانوي قبل 22 سنة وكان عمري وقتها 20 تعرفون الدراسة ذيك الأيام كانت صعبة وكانت الثانوية بالنسبة لي إنجاز وبالنسبة للأهل وما صدقت أخلّصها علشان أرتاح من هم الدراسة ..
قالي الوالد دوّر لك على شغل اللحين يا وليدي علشان نزوجك أنا سمعت نزوجك وقلت ما راح أشتغل وكل يوم أطلع من البيت وأقول للوالد ما أحد قبلني ..
والوالد مصدق
وأنا كل هذا خايف من الزواج والا الوظيفة لو أبغاها جت على طول وقتها كانت الوظيفة سهلة واللي معه الثانوي كأن معه البكالريوس ويمكن أعلى ..
أنا فكرت وقلت خلني أريّح المهم مليت من الجلسة وقررت إني أشتغل من ورى أبوي بأحد الشركات قلت يمكن يجي أحد يراجع بالدوائر الحكومية ويعرف الوالد ومن ثم يزوجني ..
تعينت بشركة من الشركات ( أحتفظ بإسمها لنفسي
) عام 1409هـ وأشتغلت لمدة سنة لين عرف عني الوالد وقال ما شاء الله تشتغل ولا علمتني مير أجيب العيد وأعلّمه بالسالفة كلها وضحك وقال يا وليدي متى ما بغيت تعرس أعرس أنا كنت أبغى أحمّسك وأخليك تشتغل وتعتمد على نفسك وقال اللحين قدّم إستقالتك بالشركة ودوّر لك على شغل بالحكومة ..
ورفضت هذا الأمر لأني أرتحت بالشركة وآخذ راتب ممتاز ..
المهم أستمريت على هذه الحالة عشر سنوات ويوم جاء عام 1420 تقريباً تزوجت وبديت أراجع حساباتي شفت إن مرتبي ما زاد الا أشياء روتينية .. ولا أستفدت من هالشغل .. وبدت أمور الحياة تصعب علي .. وقررت إني أترك الشركة وأدوّر لي على شركة ثانية ..
دوّرت ودوّرت مالقيت .. بديت أدوّر في الشركات في مدن بغير الرياض وقلت يمكن خبرة 11 سنة تقريباً تفيدني والشركات تقول لازم جامعة وقتها تندمت إني ما كملت الدراسة ..
وكمّلت بالشركة اللي أنا فيها .. وجاء الولد الأول والأمر صارت صعبة وجاء الثاني وصارت أصعب إلى أن جاء عام 1427 وقتها أخذت قرار نهائي ..
بصراحة تعبت ولازم أرتاح وكان معي واحد بالإدارة صغير بالسن وتوّه متخرج من الجامعة يشتغل معنا بالإدارة وأنا تحت إدارته صار له معنا 3 سنوات وقلت له إني أبغى أشتغل بشغل حكومي بصراحة تعبت وأبغى أغيّر شغل الشركات فإذا تعرف لي وظائف حكومية شاغرة علمني وقالي ما طلبت شيء يابو فيصل .
المهم جاء بعدها بكم أسبوع ويقول وش أبشرك لقيت وظيفة وشكلنا بنقدّم أنا وأنت بأحد الجامعات وش رايك لا وعلى المرتبة العاشرة بعد ..
بصراحة فرحت وقلت وين التقديم قال بالجامعة بس التقديم بعد يومين وأتفقنا نروح مع بعض ..
جاء وقت التقديم وشفنا الشروط وخوينا صدم بالشروط وأنا فرحت لنفسي وزعلت علشانه ..
شروط التقديم كان لازم خبره للجامعي 12 سنة وللثانوي 18 سنة ..
وأنا كمّلت الــ 18 سنة وقبلوني ولله الحمد وتعينت بوظيفة حكومية وأطلع الساعة 2 وأنا عمري 39 وخوينا الشاب اللي عمره 24 للأسف رجع لنفس الشركة وأنا واثق تمام الثقة لو أشتغل كان غيّر بالجامعة وكان له بصمته بس هذي الحكومة والحكومة أبخص ..
أنا اللحين روتيني بالعمل أجي الساعة 8.30 ومعي القهوة اللي ضابطتها أم فيصل ونتقهوى مع الشباب الى الساعة 9.30 وبعدين أطلع أفطر بالبوفية وأرجع 9.30 وبعدين أقرأ الجرايد إلى الساعة 10 وبعدين أشوف وش عندي شغل وأخلّصه .. الى الساعة 11 وبعدين أطلع أروح أجيب عيالي من مدارسهم وأرجع أصلي ونخلص من الصلاة الساعة 12.30 ونرجع نشوف لنا كم شغله وكم ورقه نخلصها الى الساعة 2
يعني الشغل الحقيقي ساعتين تقريباً .. ولا أبغى أحسد نفسي بس لو عطوها الشاب خوينا والله إن يكون معدل شغله أقل شيء 4 ساعات ومجتهد ولا عنده ظروف عائلية أما أنا يا هالشايب صارت أموري العائلية أكثر من أموري العملية ..
علشان كذا ودي إذا تقاعدت بعد كم سنة أقترح على الجامعة وعلى الحكومة بشكل عام إنه مو لازم تعيّن على المرتبة العاشرة عيّن على السادسة وعلى السابعة خصوصاً وأنا الوظائف عادية وليست عالية وأشترط خبرة معقولة ..
وين التجديد اللي ينادون فيه .. وين الشباب العاطلين اللي همهم بس الحصول على وظيفة وعلى أمان وظيفي ..
وش فايدة توظف واحد بهالعمر لا وراه لا طموح ولا شيء وكلّها كم سنة ويتقاعد وش يبي يفيد هالمنظمة ؟
وظف واحد يخدمك أكثر من عشرين سنة ويكون فاهم الأمور وش هي عليه وخلّه يتطور عندك ودربّه وأهتم فيه هذا بيفيدك بعد عشر سنين خصوصاً وأنه جامعي أنا ما تقدر تدربني وإن دربتني وبتاخذ نتايج تدريبك وشغلك عليه بتتفاجأ إني مقدم على التقاعد ..
وبعدين أنا عندي وظيفي وغيري عنده وظيفة وظّف الشباب اللي متخرج من الجمعات اللي ما عنده شغل ليش تنتظر عليه ياخذ خبره 12 سنة وبعدين توظفه ؟
ومشكلة إذا أغلب الوظائف تطلب خبره طيب وشلون ياخذ الخبره وإن أشتغل مو محتاجكم وقتها ..
صدق إن العالم يتقدم وحنا نتأخر ..
طبعاً جميع ما كتب أعلاه قصة وهمية
ولكن أنا رتبتها على هذا الشكل لأني دخلت اليوم سامع عن وظايف بجامعة القصيم وشفت الشروط وأنبهرت ..
وقلت لازم أعطيكم وشي الشروط وأنتم أحكموا :
ما أقول إلّا حسبي الله ونعم الوكيل واللي حاط الشروط والله ما أدري وش يحسّ فيه وشي المقاييس اللي خلته يحط عدد السنوات
لأنه بعملية حسابية بسيطة .
طالب الثانوي يتخرج بعمر 18 سنة + 18 سنة خبرة = عمره 36 سنة
الطالب الجامعي يتخرج بعمر 22 سنة + 12 سنة خبرة = 34 سنة
أي خبرة أجنبية إستفدت منها أيها الواضع الشروط ..
ما أقول إلا كما قلت مسبقاً حسبي الله ونعم الوكيل ..
على فكرة أنا ما عندي نية أقدّم لأني الحمد لله مرتاح بشغلي لكن واحد من الشباب بيقدم وقال شف الشروط ..
وأكتفيت بعلامة تعجب
!
؟
مأمور صرف ومستودعات ومشغل حاسب ومختبرات ومدري ايش 
الوضع العادي
