نادي الهلال السعودي - شبكة الزعيم - الموقع الرسمي - ليه مايطبق عليك النظام ......... خذ جنسيتي وتعرف ليه

السلاام عليكم

كيف الحال طيبين

المهم بقولكم سالفه صارتلي ندخل في السالفه

يوم الخميس الساعه خمس ونص قبل اذان المغرب المهم ياطويلين العمر دق جوالي محمد يتصل بكـ المهم خويي محمد انا ابو حميد << لتشفيرفقط

دار الحوار التالي << ترا متعووووب علي الجمله

محمد:هلا ابوحميد وينك
ابوحميد:هلابك والله في البيت

محمد:غريبه ماطلعت

ابوحميد:والله شويات واطلع

محمد:وين

ابوحميد:بروح للاستراحه

محمد: اهااا طيب وش عندك بااكر (جمعه)

ابوحميد: ماعندي شي

محمد:ابيك من بعد صلاه الجمعه لين اخر الليل

ابوحميد: اوكيه بس بعد الصلاه عندي شغله اخلصها وادق عليك بس وش عندك

محمد: تذكر خوينا محمد الفرنسي

ابوحميد ايه وش فيه

محمد: بنطلع باكره الظهر لسباق الدراجات الناريه والسيارات المرهمه

ابوحميد :اوكي

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــــــ

الساعه 11 ظهرا يدق جوالي محمد الفرنسي

ابوحميد: هلا محمد

محمد الفرنسي : انت جاهز تجي مع محمد بعد الظهر

ابوحميد: اكيد بجي بس مين راح يجي معك ووين موقعهم فيه << واضح اني مفهي

محمد الفرنسي : راح يجي معي شمسي وادوار وجوغبا اخر واحد من جزر القمر
( الحوار مترجم)

انتهي الحوار
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــ

وصلنا الساعه وحده ونص يعني قبل مايبدا اللقاء بوقت حلو المهم خوينا الفرنسي يعرف واحد بيشارك في السباق وكان جالس معاهم قبل ما نوصل جينا بندخل لين فيه واحد من ظباط الامن (سكرتي) وين ابد خوينا داخل قال لا انتو جمهور تعالو مع الجهه الثانيه قلنا اوكي ورحنا مع الجهه الثانيه الباب مسكر :d عاد عندنا شمس طيبه وادق علي محمد الفرنسي واقوله تعال دخلنا السكرتي رافض جا ودخلنا وجلسنا نسولف شوي قال وشرايكم نجلس في المدرجات قلنا اوكي رحنا وجلسنا في المدرجات شوي قبل مايجي دور خوي خوينا قال محمد الفرنسي تعالو معي المهم نزلنا المظمار بطريقه غير شرعيه يعني طبينا اول واحد طب الفرنسي وبعدها شمسي التونسي وانا وخويي بعدهم وقفنا المنظم وهذا اللي من جد غبني

المنظم : وين ياشباب

محمد : ابد مع اخويانا

المنظم وين اخوياكم

ناديت شمسي ومحمد << محمد الفرنسي قدحه وخبل ومنسم >>
محمد الفرنسي : وش تبي

المنظم: لما شافه يتكلم انجليزي الخم علي طول سأله من وين انت

محمد الفرنسي : من فرنسا وصديقي هنا وبروحله

المظم : مرحبا تفضلو

محمد الفرنسي : طيب ممكن تخلي هذولي يجون معنا يقصدنا

المنظم: لا

محمد الفرنسي : طيب كيف يجون

المنظم : لازم يطلعون برا ويجون من البوابه الثانيه
ابوحميد ومحمد: ساكتين وملخمين من المنظم
محمد الفرنسي : بالحرف الواحد هل انت مجنون يقطعون ثلاثين متر وهم الحين خطوتين ويوصلون :ranting:

المنظم: النظام نظام:s5s:

محمد الفرنسي : بضحكه انا موقف سيارتي الحين تحت لوحه ممنوع الوقوف وفوق الرصيف ولما الحين ما شالو سيارتي وين النظام :s3s:

المنظم : بكل ادب سيد محمد لو سمحت تتفضل

محمد: محمد خلاص رح محمد وحنا بنجي

المنظم : يالله ياشباب اطلعو من برا وادخلو من البوابه الثانيه لا انادي العسكر يتفاهمون معكم :mad:

محمد: اسداً علي وفي الحروب نعاامه:yes:

المنظم: اقول امش بس
اخذت يد محمد وطلعنا ودخلنا مع البوابه الثانيه
دخلنا وقابلنا محمدالفرنسي يقول ليه يعاملونكم كذا تعرفونه قبل كذا؟؟

ابوحميد : لا بس يحب يوضح لكم اننا منظمين

محمد الفرنسي : طيب ليه ماطبق النظام علينا

ابوحميد : خذ جنستي وتعرف ليه

ــــــــــــــــــــــــــــــــــــــــــــــــــــــــــــــــــــــــــــــــ

انتهت السالفه

بس سؤالي لهذاك المنظم ليه ماطبق النظام عليهم ؟؟

السؤال الثاني ليه يكلمه بأحترام وحنا يقول اطلعو ولا ناديت الامن يتفاهم معكم ؟

السؤال الثالث متي يحطون تنظيم صح لسيارات المعدله ولا فيه اصلا اعلام قوي عليها ؟

(كلام الفرنسي بالانجليزي ومترجم بالعربيه )

اعتذر عن الاطاله وياليت اشوف ردودكم